Pagpanakayon sa Malapad nga Kalalawran

ANG Marshall Islands ginatapuan sang kapin sa 1,200 ka isla kag magagmay nga mga isla, ang kalabanan sini nagataas lamang sing mga anom ka metro sa ibabaw sang katupungan sang dagat. Bisan sa malayolayo lang, indi na makita ining mga isla. Apang, ang taga-Marshall anay nga mga marinero nakakadto sa lainlain nga mga isla sakay sa ila may katig nga baroto, sa amo nakapanakayon sila sing mga dos milyones kilometros kuadrados sa Dagat Pasipiko. Paano nila ini nahimo? Ang simple, apang mapuslanon gid nga mga “mapa” nga ginatawag nga stick chart (isa ka giya sa pagpanakayon nga human sa mga lipak) amo ang naggiya sa ila.

Base sa ila eksperiensia, natukiban sang taga-Marshall nga mga marinero nga paagi sa hagyo sang balod mahibaluan nila ang nahamtangan sang isla tubtob sa 30 kilometros ang kalayuon. Dapat nila tun-an ang madamo nga hagyo sang balod, kag ang mga stick chart nagbulig sa ila sa pagdumdom sini. Ano ang hitsura sang stick chart? Subong sang makita mo sa laragway, ang mga lipak gikan sa mga gamot sang pandan ukon bukog sang lubi ginalala kag ini nagarepresentar sa hagyo sang balod. Ginabutangan ini sang magagmay nga mga pakinhason nga nagarepresentar sa mga isla.

Sa malawig nga tion, ang pagpanakayon nga nagagamit sing stick chart bilang giya ginsekreto kag gintudlo lamang sa pila ka pinili. Paano tun-an sang bag-uhan nga marinero ang paggamit sini? Paagi lamang sa paghanas kag sa dalayon nga paggamit sini. Ginatudluan sang isa ka eksperiensado nga marinero ang isa nga bag-uhan, ayhan ginapaupod sia sa mga pagpanakayon sa kaiping nga mga isla. Kon makilala na sang bag-uhan ang hagyo sang mga balod, makatigayon sia sing kaisog sa paggamit sang iya stick chart. Sa ulihi, makapanakayon na sia sing isahanon sa lawod.

Sing kaanggid, ang Pulong sang Dios, ang Biblia, mahimo mangin giya naton sa aton pagpanakayon sa kabuhi. Sa primero, mahimo nga may magbulig sa aton nga mahangpan ang sadsaran nga mga butang sa Kasulatan. Nian, sa padayon naton nga pagtuon sa Pulong sang Dios kag pag-aplikar sang mga prinsipio sini, nakumbinse kita sa ginasiling sini. Si Josue, ang lider sang mga Israelinhon, ginsugo nga padayon nga basahon ang Pulong sang Dios agod nga makabantay sia sa “paghimo suno sa tanan nga nasulat sa sini.” “Nian,” siling sang Dios kay Josue, “magamadinalag-on ang imo dalanon kag makapanghikot ka sing maalamon.” (Josue 1:8) Huo, ang Biblia makabulig sa aton nga matigayon ang pat-od kag madinalag-on nga kabuhi.

[Credit Line sang retrato sa pahina 32]

© Greg Vaughn