Himua nga Labi ka Malipayon kag Dungganon ang Adlaw sang Imo Kasal

“ANG adlaw sang akon kasal isa sa labing halandumon kag makalilipay nga mga adlaw sang akon kabuhi,” siling ni Gordon, nga minyo sa sulod sang halos 60 na ka tuig. Ngaa makahulugan gid para sa matuod nga mga Cristiano ang adlaw sang kasal? Bangod ini ang adlaw nga magahimo sila sang sagrado nga saad sa mga persona nga ila gid ginahigugma—sa ila pakaslan kag kay Jehova nga Dios. (Mateo 22:37; Efeso 5:22-29) Huo, luyag sang magnobya nga nagaplano nga magpakasal nga mangin makalilipay ang adlaw sang ila kasal, apang luyag man nila padunggan ang Tagtukod sang pag-asawahay.—Genesis 2:18-24; Mateo 19:5, 6.

Paano mahimo sang nobyo nga mangin labi pa ka dungganon ining makalilipay nga okasyon? Ano ang mahimo sang nobya agod mapakita ang pagtahod sa iya bana kag kay Jehova? Paano makaamot sa kalipay sa adlaw sang kasal ang mga nagatambong? Ang pagbinagbinag sang pila ka mga prinsipio sa Biblia makabulig sa pagsabat sining mga pamangkot kag ang pag-aplikar sining mga prinsipio makabuhin sa posible nga mga problema nga mahimo magasablag sa sining pinasahi nga okasyon.

Sin-o ang May Panguna nga Salabton?

Sa madamo nga kadutaan, ang isa ka ministro sang mga Saksi ni Jehova mahimo nga amo ang legal nga manugkasal. Bisan pa sa mga lugar diin ang kasal ginahimo sang isa ka opisyal sang gobierno, mahimo luyag sang nobyo kag nobya nga may pamulongpulong pasad sa Biblia. Sa sining pamulongpulong, masami nga ginapalig-on ang nobyo nga binagbinagon ang iya hatag-Dios nga papel bilang ulo sang pamilya. (1 Corinto 11:3) Busa, ang nobyo amo ang may panguna nga salabton kon ano ang matabo sa tion sang kasal. Siempre pa, abanse nga ginaplano ang mga kahimusan para sa seremonya sang kasal kag kon may punsion gid man nga himuon. Ngaa mabudlay para sa nobyo nga maghimo sini nga mga kahimusan?

Ang isa ka rason amo nga mahimo magpasilabot sa kahimusan sang kasal ang nobya ukon ang mga himata sang nobya ukon ang mga himata sang nobyo. Si Rodolfo, nga madamo na sing ginkasal, nagsiling: “Kon kaisa, ang nobyo ginaipit gid sang mga himata, ilabi na kon nagabulig sila gasto para sa punsion. Mahimo nga ipilit nila ang luyag nila matabo sa tion sang seremonya sang kasal kag sa punsion. Ginapakadiutay sini ang Makasulatanhon nga papel sang nobyo subong amo ang may salabton sa okasyon.”

Si Max, nga kapin sa 35 ka tuig na nga manugkasal, nagsiling: “Masami ko natalupangdan nga ang nobya ang nagaprekurar kon ano ang matabo sa tion sang kasal kag sa punsion, kag ang nobyo daw indi na makatugda.” Si David, nga madamo na sing ginkasal, nagsiling: “Ang mga nobyo mahimo nga wala naanad nga sila ang magprekurar kag sa masami wala sila nagapasilabot sa mga preparasyon sa kasal.” Paano magmadinalag-on ang nobyo sa pag-abaga sang iya responsibilidad?

Ang Komunikasyon Nagadugang sa Kalipay

Agod mangin madinalag-on ang nobyo sa pagdumala sa kahimusan sang kasal, dapat sia makigkomunikar sing maayo. Ang Biblia maathag nga nagasiling: “Nagakapaslawan ang mga plano kon wala sing kompidensiyal nga paghambalanay.”  (Hulubaton 15:22) Apang, malikawan ang madamo nga kapaslawan kon ang mga kahimusan sa kasal ginahambalan anay sang nobyo upod sa iya nobya, sa mga himata, kag sa iban pa nga makahatag sing mapuslanon nga panugda nga pasad sa Biblia.

Huo, importante gid sa kalaslon nga hambalan nila anay nga duha ang mga plano kag ang posible nga matabo. Ngaa? Halimbawa, talupangda ang komento ni Ivan kag sang iya asawa nga si Delwyn, nga malipayon nga nag-asawahay sa sulod na sang malawig nga tinuig bisan pa tuhay ang ila kultura nga ginhalinan. Ginahinumdom ang ila mga preparasyon sa kasal, si Ivan nagsiling: “Ginahanduraw ko na kon ano ang luyag ko para sa akon kasal, lakip na ang punsion upod sa tanan ko nga abyan nga matambong, ang keyk sa kasal, kag ang akon nobya nga nagasuksok sing trahe nga puti. Apang, luyag ni Delwyn ang simple lang nga kasal, kag wala na sing keyk. Luyag pa gani niya nga indi na lang magtrahe.”

Paano nila ginhusay ang ila kinatuhayan? Paagi sa malulo, kag bunayag nga paghambalanay. (Hulubaton 12:18) Si Ivan nagdugang: “Gintun-an namon ang pasad sa Biblia nga mga artikulo nga may topiko nahanungod sa kasal subong sang ginbalhag sa Ang Lalantawan sang Oktubre 15, 1984. * Ini nga materyal nakabulig sa amon nga matigayon ang pagtamod sang Dios sa sini nga okasyon. Bangod sang amon tuhay nga ginhalinan, nagsugtanay kami sa pila ka personal namon nga luyag. Ginpahisanto namon nga duha ang amon panimuot.”

Sanday Aret kag Penny may kaangay man nga eksperiensia. Nahanungod sa adlaw sang ila kasal, nagsiling si Aret: “Ginhambalan namon ni Penny ang amon nanuhaytuhay nga mga luyag para sa kasal, kag nagsugtanay kami. Nangamuyo kami sang pagpakamaayo ni Jehova para sa adlaw sang kasal. Nangayo man kami sing laygay sa amon mga ginikanan kag sa pila ka hamtong nga mga minyo sa kongregasyon. Nakabulig gid ang ila mga panugda. Subong resulta, makalilipay gid ang amon kasal.”

Paghupot sa Panapton kag Pamustura nga Dungganon

Natural lang nga luyag sang nobya kag nobyo nga manami ang ila suksukon sa adlaw sang ila kasal. (Salmo 45:8-15) Mahimo magahinguyang sila sing tion, kusog, kag kuarta para sa nagakaigo nga panapton. Ano nga mga prinsipio sa Biblia ang makabulig sa ila nga magpili sing dungganon kag matahom nga panapton para sa kasal?

Hunahunaa kon ano ang suksukon sang nobya para sa okasyon. Bisan pa nanuhaytuhay ang mga luyag sang tagsatagsa kag depende sa lugar, mapuslanon gihapon ang laygay sang Biblia bisan diin. Ang mga babayi dapat “magpamuni sing panapton nga nagakaigo, nga may kaugdang kag kaligdong.” Naaplikar ini sa tanan  nga Cristiano nga mga babayi sa tanan nga tion, kag labi na gid sa adlaw sang kasal. Sa pagkamatuod ang malipayon nga kasal wala nagakinahanglan sing “malahalon nga mga panapton.” (1 Timoteo 2:9; 1 Pedro 3:3, 4) Daw ano ka makalilipay kon iaplikar ining laygay!

Si David, nga ginhinambitan kaina, nagsiling: “Madamo nga magtiayon ang nagtinguha nga iaplikar ang mga prinsipio sa Biblia, kag nagakaigo gid nga hatagan sila sing komendasyon. Apang, may pila ka kaso nga indi maugdang ang trahe sang nobya kag mga abay, wawa ang dughan ukon silangon.” Sa pagpakighambal sang isa ka hamtong nga Cristianong gulang sa nobya kag nobyo antes sang kasal, mabuligan niya sila nga mahuptan ang ila espirituwalidad. Paano? Paagi sa pagpamangkot sa ila kon bala ang suksukon nila nga panapton nagakaigo sa Cristianong miting. Matuod, ang mga estilo sang pamayo nga ginasuksok sa regular nga mga miting mahimo nga tuhay sa ginasuksok sa adlaw sang kasal kag ayhan suno sa lokal nga kustombre, apang dapat maugdang ini nahisanto sa dungganon nga Cristianong talaksan. Bisan pa nga ginatamod sang kalibutan ang mga kasuguan sa Biblia nga madumilion, ang matuod nga mga Cristiano nalipay nga pakigbatuan ang pagtinguha sang kalibutan nga impluwensiahan sila.—Roma 12:2; 1 Pedro 4:4.

“Sa baylo nga tamdon nga pinakaimportante ang panapton ukon ang punsion,” siling ni Penny, “ginhatagan namon ni Aret sing labi nga atension ang seremonya, ang espirituwal nga bahin sang okasyon. Amo yadto ang pinakaimportante nga bahin sang adlaw. Madumduman ko gid, indi ang akon ginsuksok ukon ginkaon, kundi kon sin-o ang akon kaupod kag ang kalipay nga akon nabatyagan nga ginpamana ko ang akon ginahigugma.” Maayo gid nga dumdumon sang Cristiano nga magnobya ining mga panugda sa pagplano sang ila kasal.

Ang Kingdom Hall​—Isa ka Dungganon nga Duog

Luyag sang kalabanan nga Cristiano nga magnobya nga sa Kingdom Hall ang ila kasal, kon ginapahanugutan ini. Ngaa amo sini ang ila luyag? Ang isa ka magnobya nagpaathag sang ila rason: “Nahangpan namon nga ang pag-asawahay isa ka sagrado nga kahimusan ni Jehova. Ang pagpakasal sa Kingdom Hall nga amo ang amon duog sang pagsimba, nakabulig nga ipatudok sa amon nga sa umpisa pa lang importante gid nga bahin si Jehova sang amon pag-asawahay. Ang isa pa ka benepisyo sang seremonya nga hiwaton sa Kingdom Hall sa baylo nga sa iban nga duog amo nga mapadayag sa indi Saksi nga mga himata nga magatambong kon daw ano ka importante para sa amon ang pagsimba kay Jehova.”

Kon magapahanugot ang responsable nga mga gulang sa kongregasyon nga sa Kingdom Hall hiwaton ang kasal, dapat abanse nga pahibaluon sila sang magnobya nahanungod sa himuon nga mga kahimusan. Ang isa ka paagi nga mapakita sang nobya kag nobyo ang pagtahod sa mga gin-agda sa kasal amo ang pag-abot sa gintalana nga oras sang kasal. Kag pat-uron nga ang tanan ginhimo sa dungganon nga paagi. * (1 Corinto 14:40) Busa, likawan nila ang indi nagakaigo nga pagginawi nga makita sa kalabanan nga mga kasal sang kalibutan.—1 Juan 2:15, 16.

Mapakita man sang mga nagatambong nga ginatamod nila ang kasal subong sang pagtamod ni Jehova. Halimbawa, indi sila magpaabot nga ang kasal maglabaw sa iban nga Cristiano nga kasal, subong bala nga nagapaindis-indis kon sin-o ang mas engrande. Nahibaluan sang hamtong nga mga Cristiano nga ang pagtambong sa Kingdom Hall agod makabati sing pamulongpulong pasad sa Biblia mas importante kag mapuslanon sangsa pagtambong sa punsion ukon sa ano man nga pagtililipon pagkatapos sang kasal. Kon ipahanugot sang tion kag kahimtangan nga ang isa ka Cristiano magtambong sa isa sa sining duha ka programa, ang pagtambong sa Kingdom Hall ang dapat pilion. Ang isa ka gulang nga si William nagsiling: “Kon ang mga bisita wala sing rason nga indi magtambong sa Kingdom Hall apang yara sa punsion pagkatapos, nagapakita ini sing kakulang sing apresasyon sa pagkasagrado  sang okasyon. Bisan wala kita maagda sa punsion, mapakita naton ang aton pagsakdag sa nobya kag nobyo kag makahatag sing maayo nga pagpanaksi sa di-tumuluo nga mga himata paagi sa pagtambong sa seremonya sa Kingdom Hall.”

Ang Kalipay nga Nagapadayon sa Tapos sang Adlaw sang Kasal

Ginhimo sang komersio ang selebrasyon sa kasal nga isa ka daku nga negosyo. Suno sa bag-o nga report, ang promedyo nga kasal sa Estados Unidos “nagabili sing $22,000, ukon katunga sang promedyo sang [tuigan] nga ginakita sang mga Amerikano nga panimalay.” Bangod sang impluwensia sang komersial nga pasayod, madamo nga bag-ong kasal ukon ang ila pamilya ang nautangan sa isa lang ka adlaw kag nalubong sila sa sini sa sulod sang mga tinuig. Maalamon bala ina nga desisyon sa pagsugod sang pag-asawahay? Ang mga wala nakahibalo kag wala nagasapak sa mga prinsipio sang Biblia mahimo magapili sang isa ka engrande nga kasal, apang tuhay gid ang matuod nga mga Cristiano!

Paagi sa paglimite sang kadamuon sa magatambong sa ila kasal suno sa ila masarangan kag pagsentro sang ila igtalupangod sa espirituwal nga aspekto sang okasyon, nagamit sang madamong Cristianong magtiayon ang ila tion kag kuarta may kaangtanan sa ila dedikasyon sa Dios. (Mateo 6:33) Binagbinaga ang halimbawa nanday Lloyd kag Alexandra, nga nagpadayon sa bug-os tion nga pag-alagad sa sulod na sang 17 ka tuig sugod sang ginkasal sila. Si Lloyd nagsiling: “Ayhan sa pagtamod sang iban ang amon kasal simple lang nga okasyon, apang malipayon gid kami ni Alexandra. Para sa amon, ang adlaw sang amon kasal indi dapat kabug-atan sa pinansial, kundi isa ka selebrasyon sang kahimusan ni Jehova nga hatagan sing daku nga kalipay ang duha ka tawo.”

Nagdugang si Alexandra: “Nagapangalagad na ako subong payunir antes pa kami ginkasal, kag indi ko luyag nga mag-untat sa sini nga pinasahi nga pribilehiyo para lang sa isa ka engrande nga kasal. Ang adlaw sang amon kasal pinasahi gid. Apang, panugod lamang yadto sang amon bug-os nga pag-asawahay. Gintuman namon ang panugda nga likawan ang tuman nga pagtalupangod sa adlaw sang kasal kag ginpangabay namon ang panuytoy ni Jehova sa amon kabuhi subong minyo. Bangod sini natigayon namon ang pagpakamaayo ni Jehova.” *

Huo, ang adlaw sang imo kasal isa gid ka pinasahi nga okasyon. Ang mga panimuot kag ang mga ginahimo sa sina nga adlaw makapahamtang sing sulundan sa inyo pagkabuhi subong mag-asawa sa tinuig nga magaabot. Busa, magsalig sa panuytoy ni Jehova. (Hulubaton 3:5, 6) Hupti gid sa hunahuna ang espirituwal nga aspekto sang adlaw sang imo kasal. Sakdaga ang isa kag isa sa inyo hatag-Dios nga mga katungdanan. Sa amo, matukod mo ang mabakod nga pundasyon sang imo pag-asawahay, kag paagi sa pagpakamaayo ni Jehova, maagom mo ang kalipay nga magapadayon pagkatapos sang adlaw sang imo kasal.—Hulubaton 18:22.

[Mga nota]

[Retrato sa pahina 29]

Ang magnobyahanay dapat magkomunikar sing prangka apang matinahuron samtang nagahanda sang ila kasal

[Retrato sa pahina 31]

Hupti gid sa hunahuna ang espirituwal nga aspekto sang adlaw sang imo kasal