Nahiusa sa Pagtukod Agod Dayawon ang Dios

SA ISA sang mga isla sa Solomon Islands, natalupangdan sang mga tawo ang bag-o nga Kingdom Hall sang mga Saksi ni Jehova. Ang isa ka babayi nagsiling: “Sa amon simbahan, madamo kami sing ginahiwat nga mga okasyon agod makatipon sing pundo. Ginapangabay namon ang amon mga katapo nga mag-amot sing kuarta, apang wala gihapon kami sing bastante nga pundo agod makapatindog sing bag-o nga simbahan. Sa diin kamo nga mga Saksi nagakuha sang inyo ginagasto?” Ang iya ginaistorya nga Saksi nagsabat: “Ginasimba namon si Jehova subong bug-os kalibutan nga pamilya. Ang amon kongregasyon kag ang amon mga kauturan sa bug-os nga kalibutan amo ang nagdonar sang mga kinahanglanon para sa bag-o nga Kingdom Hall. Gintudluan kami ni Jehova nga maghiusa sa tanan nga butang.”

Makita mo ang paghiusa sang mga Saksi ni Jehova sa tanan nila nga hilikuton, lakip na sa pagtukod sang linibo ka Kingdom Hall. Ini nga paghiusa sa paghimo sini nga mga proyekto indi bag-o. Milenyo na ini nga nagaluntad sa tunga sang katawhan sang Dios. Ngaa makasiling sing subong sini?

Pagtukod sang Tabernakulo kag sang Templo

Nahanungod sa pungsod sang Israel, si Jehova nagsiling kay Moises mga 3,500 ka tuig na ang nagligad: “Magahimo sila sang isa ka santuaryo para sa akon.” (Exodo 25:8) Tuhoy sa desinyo sini nga proyekto sa pagpatindog, si Jehova nagsiling pa: “Suno sa tanan nga ginpakita ko sa imo subong sulundan sang tabernakulo kag sa tanan nga kagamitan sini, subong sini ang inyo himuon.” (Exodo 25:9) Ginbalay gilayon ni Jehova ang detalye sang plano para sa istruktura sang santuaryo, mga kagamitan, kag mga dekorasyon. (Exodo 25:10–27:19) Ini nga “tabernakulo,” ukon tolda, mangin amo ang sentro sang matuod nga pagsimba sang bug-os nga Israel.

Wala naton mahibaluan kon daw ano kadamo nga tawo ang nagpangabudlay sa proyekto, apang gin-agda ang bug-os nga Israel nga sakdagon ini. Si Moises nagsiling sa ila: “Gikan sa inyo magkuha kamo sing amot para kay Jehova. Ang bisan sin-o nga may maalwan sing tagipusuon padalha sia sing amot para kay Jehova.” (Exodo 35:4-9) Ano ang ginhimo sang mga Israelinhon? Ang Exodo 36:3 nagasiling: “Ginbaton nila gikan sa atubangan ni Moises ang tanan nga amot nga gindala sang mga anak ni Israel para sa buluhaton sang balaan nga pag-alagad agod himuon ini, kag, kon tuhoy sa naulihi, nagdala pa sila sa iya sing mga dulot nga kinabubut-on kada aga.”

Wala madugay, nagtumpok ang madamo nga mga dulot, kag ang katawhan padayon nga nagadala sing dugang pa. Ang sampaton nga mga tawo nga nagahimo sang buluhaton nagsiling sang ulihi kay Moises: “Ang katawhan nagadala sing labi pa kadamo sangsa kinahanglan sang buluhaton nga ginsugo ni Jehova nga himuon.” Gani, si Moises nagsugo: “Mga lalaki kag mga babayi, indi na kamo magdala sing bisan ano nga butang para sa  balaan nga amot.” Ano ang resulta? “Ang mga butang tuman na sa paghimo sang tanan nga buluhaton, kag nagsobra pa.”—Exodo 36:4-7.

Bangod sa kaalwan sang mga Israelinhon, nahuman ang tabernakulo sa sulod sang isa ka tuig. ((Exodo 19:1; 40:1, 2) Paagi sa pagsakdag sa matuod nga pagsimba, ginpadunggan sang katawhan sang Dios si Jehova. (Hulubaton 3:9) Sa ulihi, magaabaga sila sing daku pa nga proyekto sa pagtukod. Kag sa liwat, makabulig sa proyekto ang tanan nga may luyag, may kalantip man sila sa pagpatindog ukon wala.

Mga lima ka siglo pagkatapos nga natukod ang tabernakulo, ginsugdan sang mga Israelinhon ang pagpatindog sang templo sa Jerusalem. (1 Hari 6:1) Mangin tuman ini katahom, permanente nga tinukod nga human sa mga bato kag mga tablon. (1 Hari 5:17, 18) Ginhatag ni Jehova kay David ang arkitektural nga mga plano para sa templo “paagi sa inspirasyon.” (1 Cronica 28:11-19) Apang, si Solomon nga anak ni David ang ginpili niya nga amo ang magpanguna sa pagtukod nga hilikuton. (1 Cronica 22:6-10) Bug-os tagipusuon nga ginsakdag ni David ang proyekto. Nagtipon sia sing mga bato, mga kahoy, kag iban pa nga mga materyales kag nag-amot sing daku nga kantidad sang iya mismo bulawan kag pilak. Ginpalig-on man niya ang iya mga masigka-Israelinhon nga magmaalwan, kag ginpamangkot sila: “Sin-o bala nian ang nagadulot sing kinabubut-on sa paghalad sang iya kaugalingon sini nga adlaw kay Jehova?” Ano ang ginhimo sang katawhan?—1 Cronica 29:1-5.

Sa tion nga ginsugdan ni Solomon ang pagtukod sang templo, may galamiton na sia nga linibo ka tonelada nga bulawan kag pilak. Tuman gid ka bugana ang saway kag salsalon amo nga indi na matimbang ini nga mga metal. (1 Cronica 22:14-16) Paagi sa bulig ni Jehova kag sa pagsakdag sang bug-os nga Israel, ang proyekto natapos sa sulod lamang sang pito ka tuig kag tunga.—1 Hari 6:1, 37, 38.

“Ang Balay sang Matuod nga Dios”

Ang tabernakulo kag ang templo lunsay nga gintawag “ang balay sang matuod nga Dios.” (Hukom 18:31; 2 Cronica 24:7) Si Jehova wala gid nagakinahanglan sing isa ka balay. (Isaias 66:1) Ginpatindog niya ini nga mga tinukod para sa kaayuhan sang mga tawo. Ang matuod, sa inagurasyon sang templo, si Solomon nagpamangkot: “Matuod gid bala nga ang Dios magapuyo sa duta? Yari karon! Ang mga langit, huo, ang langit sang mga langit indi makaigo sa imo; daw ano pa gid ka diutay, nian, ining balay nga akon ginpatindog!”—1 Hari 8:27.

 Si Jehova nagsiling paagi sa iya manalagna nga si Isaias: “Ang akon balay tawgon nga isa ka balay nga palangamuyuan para sa tanan nga katawhan.” (Isaias 56:7) Ang mga halad kag mga pangamuyo nga ginadulot sa templo, subong man ang mga seremonya nga ginahiwat didto, nagatugot sa diosnon nga katawhan—mga Judiyo kag mga di-Judiyo—nga makapalapit sa matuod nga Dios. Natigayon nila ang pagpakig-abyan kag pag-amlig ni Jehova paagi sa pagsimba sa iya balay. Ini nga katunayan ginapakita sang pangamuyo nga gindulot ni Solomon sa dedikasyon sang templo. Mabasa mo ang iya makapahulag nga mga pinamulong sa Dios sa 1 Hari 8:22-53 kag 2 Cronica 6:12-42.

Ang dumaan nga balay sang matuod nga Dios madugay na nga naguba, apang ginapatuhuyan sang Pulong sang Dios ang tion nga ang katawhan sang tanan nga pungsod magadugok agod magsimba kay Jehova sa daku pa nga espirituwal nga templo. (Isaias 2:2) Ang lamang nga himpit nga halad sang bugtong nga Anak sang Dios, nga ginalandong sang mga halad nga sapat sa templo, amo ang paagi sa pagpalapit kay Jehova. (Juan 14:6; Hebreo 7:27; 9:12) Sa karon, ang mga Saksi ni Jehova nagasimba sa Dios sa sining superyor nga paagi, kag ginabuligan nila ang madamong iban pa nga himuon ang subong man.

Mga Proyekto sa Pagtukod sa Moderno nga Tion

Sa bug-os nga kalibutan, ang mga Saksi ni Jehova nagaalagad sa matuod nga Dios. Ginahuman nila ang “isa ka gamhanan nga pungsod,” nga padayon nga nagadugang ang populasyon. (Isaias 60:22) Ang panguna nga duog tilipunan sang mga Saksi ni Jehova amo ang Kingdom Hall. a Linibo sini nga mga tinukod ang ginagamit, kag linibo pa ang kinahanglanon.

Ang mga Saksi ni Jehova ‘nagahalad sang ila kaugalingon sing kinabubut-on’ sa pagtukod sang kinahanglanon nga mga Kingdom Hall. (Salmo 110:3) Apang, sa masami, ang lokal nga mga Saksi wala sing kalantip nga kinahanglanon sa pagtukod, kag sa pila ka mga duog nga madasig ang pag-uswag, ang mga kauturan nagaantos sing tuman nga kaimulon. Sang 1999 ginpasad sang Nagadumala nga Hubon sang mga Saksi ni Jehova ang programa sa pagpatindog sang Kingdom Hall agod makabulig nga masolbar ini nga mga problema. Paagi sa sini nga programa, ang mga Saksi nga may kalantip sa pagpatindog naglakbay sa malayo nga mga duog agod hanason ang ila mga kauturan nga lalaki kag babayi sa pagtukod sing mga Kingdom Hall. Nian, ang nahanas nga mga manugpangabudlay amo ang nagapadayon sang hilikuton sa pagtukod sa sina nga duog. Ano na ang mga resulta sining pinasahi nga mga panikasog?

Sang Pebrero 2006, ang mga Saksi ni Jehova sa imol nga mga kadutaan nakapatindog na sing kapin sa 13,000 ka bag-o nga Kingdom Hall. Basaha ang pinamulong sang pila nga nagagamit na sining bag-o nga mga Kingdom Hall.

“Ang kongregasyon may promedyo nga tumalambong nga 160. Sa una nga miting sa tapos matukod ang bag-o nga Kingdom Hall, 200 ang nagtambong. Sa karon, pagligad sang anom ka bulan, 230 na ang nagatambong. Makita gid ang pagpakamaayo ni Jehova sa pagpatindog sining simple apang mapuslanon gid nga tinukod.”—Isa ka manugtatap sa sirkito sa Ecuador.

“Tinuig na nga ginapamangkot kami sang mga tawo, ‘San-o pa kamo makapatindog sing Kingdom Hall nga kaangay sang makita namon sa inyo mga publikasyon?’ Salamat kay Jehova, sa katapusan may presentable na gid man kami nga duog sa pagsimba. Sa baligyaan anay kami sang isa ka utod nga lalaki nagahiwat sing miting, nga may promedyo nga 30 ka tumalambong. Sa una nga miting sa bag-o nga Kingdom Hall, 110 ang nagtambong.”—Isa ka kongregasyon sa Uganda.

 “Duha ka regular payunir nga utod nga babayi ang nagreport nga mas makalilipay ang mag-alagad sa ila teritoryo sugod sang natukod ang Kingdom Hall. Mas nagapamati na ang mga tawo sa pamalaybalay nga ministeryo kag sa di-pormal nga mga kahimtangan. Ining mga utod nga babayi nagadumala karon sing 17 ka pagtuon sa Biblia, kag madamo sining mga estudyante sa Biblia ang nagatambong sa mga miting.”—Sanga talatapan sa Solomon Islands.

“Ang isa ka kaingod nga pastor nagsiling nga ang bag-o nga Kingdom Hall nagdugang sa dignidad sang ila duog kag ginapabugal ini sang mga pumuluyo. Madamo sang mga nagalabay ang nagakomento tuhoy sa katahom sang Kingdom Hall. Nagahatag ini sa mga kauturan sing maayo nga mga kahigayunan nga makapanaksi. Nagadugang ang mga tawo nga luyag makahibalo tuhoy sa aton bug-os kalibutan nga paghiliutod. Madamo sang tinuig na nga wala makatambong sa mga miting ang napahulag nga makig-upod liwat sing regular.”—Sanga talatapan sa Myanmar.

“Gin-agda sang isa ka utod nga babayi ang isa ka interesado nga lalaki sa ginapatindugan sang Kingdom Hall sa iya duog. Ang lalaki nagsiling sang ulihi: ‘Abi ko indi ako pagpasudlon sang mga nagaulubra. Nakibot ako sang mainayuhon nga gintamyaw ako sang mga Saksi. Ang mga lalaki kag mga babayi mapisan gid, nga wala nagausik sing tiempo. May paghiliugyon kag malipayon nga espiritu.’ Ini nga lalaki nagbaton sing isa ka pagtuon sa Biblia kag nagsugod sa pagtambong sa mga miting. Nagsiling sia sang ulihi: ‘Nagbag-o ang akon pagtamod. Indi ko pagbiyaan ang Dios, karon nga nasapwan ko na sia.’”—Sanga talatapan sa Colombia.

 Importante ang Aton Pagsakdag

Ang pagtukod sing mga Kingdom Hall importante nga bahin sang aton sagrado nga pag-alagad. Ang paagi sang pagsakdag sang mga Saksi ni Jehova sa sini nga hilikuton sa bug-os nga kalibutan—sa pinansial kag iban pa—dalayawon gid. Apang, dapat naton dumdumon, nga importante man ang iban pa nga mga bahin sang sagrado nga pag-alagad. Kon kaisa, ang mga Cristiano nagakabiktima sang natural nga mga kalamidad kag nagakinahanglan sang aton bulig. Ang paghimo sang mga literatura sa Biblia may panguna nga papel sa pagsakdag sa sagrado nga pag-alagad. Nasaksihan sang kalabanan sa aton ang gahom sang pasad sa Biblia nga magasin ukon libro nga napahamtang sa isa ka persona nga husto nga nahuyog. Dugang pa, importante gid ang pagsakdag sa mga misyonero kag sa iban pa nga yara sa pinasahi nga bug-os tion nga pag-alagad. Ining masinakripisyuhon nga mga Cristiano may panguna nga papel sa pagpasangkad sang pagbantala nga hilikuton sa sining katapusan nga mga adlaw.

Ang mga nag-amot para sa pagtukod sang templo nagkasadya gid. (1 Cronica 29:9) Sa karon, ang pagsakdag sa matuod nga pagsimba paagi sa aton mga amot nagahatag man sa aton sing kalipay. (Binuhatan 20:35) Nabatyagan naton ina nga kalipay kon maghulog kita sang aton amot sa kahon nga para sa Kingdom Hall Fund kag kon mag-amot kita para sa bug-os kalibutan nga hilikuton, nga sa amo nagasakdag sang iban nga mga proyekto nga may kaangtanan sa pagbantala sang maayong balita sang Ginharian. Sing tumalagsahon, ang mga Saksi ni Jehova karon nahiusa sa matuod nga pagsimba. Kabay nga tanan kita mapuno sang kalipay nga nagagikan sa pagsakdag sini nga pagsimba!

[Nota]

[Kahon/Retrato sa pahina 20]

MGA PAAGI SA PAGHATAG NGA GINAPILI SANG IBAN

MGA KONTRIBUSYON PARA SA BUG-OS KALIBUTAN NGA HILIKUTON

Madamo ang nagapain, ukon nagatigana, sing kantidad nga ginahulog nila sa mga kahon-alamutan nga may ngalan “Contributions for the Worldwide Work—Matthew 24:14.”

Kada bulan, ginapadala sang mga kongregasyon ini nga kantidad sa opisina sang mga Saksi ni Jehova sa ila mga pungsod. Ang boluntaryo nga donasyon nga kuarta mahimo man ipadala sing direkta sa Watch Tower Bible and Tract Society of the Philippines, Inc., P.O. Box 2044, 1060 Manila, ukon sa sanga talatapan sang mga Saksi ni Jehova nga nagapangalagad sa inyo pungsod. Ang mga tseke nga ipadala sa sini nga adres dapat ipangalan sa “Watch Tower.” Mahimo man idonar ang mga alahas ukon iban pa nga malahalon nga mga pagkabutang. Dapat ilakip sa sini nga mga kontribusyon ang isa ka malip-ot nga sulat nga nagasiling nga ini isa ka direkta nga regalo.

KAHIMUSAN SA PAGDONAR NGA MAY KONDISYON

Mahimo man ibutang sa ngalan sang Watch Tower ang kuarta agod gamiton sa bug-os nga kalibutan. Apang, kon pangabayon, mahimo ibalik ini nga kuarta. Para sa dugang nga impormasyon, pakig-anguti palihug ang Treasurer’s Office sa adres nga ginsambit sa ibabaw.

CHARITABLE PLANNING

Wala labot sa direkta nga mga regalo nga kuarta, may iban pa nga paagi sang paghatag nga makabulig sa bug-os kalibutan nga pag-alagad sa Ginharian. Nagalakip ini sa:

Paseguro: Mahimo hingadlan ang Watch Tower nga benepisyaryo sang isa ka kontrata sang paseguro sa kabuhi (life insurance) ukon isa ka plano sa pagretiro/pension.

Mga Deposito sa Bangko: Ang mga deposito sa bangko, sertipiko sang deposito, ukon deposito sang indibiduwal para sa iya pagretiro mahimo ideposito in trust for ukon ibayad sa tion sang kamatayon sa Watch Tower, suno sa lokal nga mga reglamento sang bangko.

Stocks kag Bonds: Mahimo idonar sa Watch Tower ang stocks kag bonds subong wala sing kondisyon nga regalo.

Real Estate: Ang sarang mabaligya nga real estate (balay, bilding, kag lote) mahimo idonar paagi sa direkta nga pagregalo ukon, kon balay naman, paagi sa pagreserba sang pagpanag-iya sa nagdonar tubtob buhi sia, amo nga padayon sia nga makaistar sa sini mientras buhi sia. Pakig-anguti ang sanga talatapan sa inyo pungsod antes legal nga isaylo ang titulo sang ano man nga real estate.

Gift Annuity: Ang gift annuity isa ka kasugtanan diin ang isa nagdonar sang kuarta ukon securities sa isa ka gintangduan nga korporasyon nga ginagamit sang mga Saksi ni Jehova. Bilang kabaylo, ang nagdonar, ukon ang isa nga gintangduan sang nagdonar, regular nga makabaton sing ginpat-od nga kantidad nga kabayaran kada tuig mientras buhi sia. Ang nagdonar makabaton sang income-tax deduction sa tuig nga nagsugod ang gift annuity.

Mga Testamento kag mga Trust Agreement: Mahimo ipapanubli sa Watch Tower ang pagkabutang ukon kuarta paagi sa isa ka legal nga testamento, ukon himuon ang Watch Tower subong benepisyaryo sang isa ka trust agreement. Kon ang benepisyaryo isa ka relihioso nga organisasyon, ang ginabayaran nga buhis mabuhinan.

Subong ginapahangop sang termino nga “charitable planning,” ining sahi sang mga donasyon nagakinahanglan sang pila ka pagplano sa bahin sang nagdonar. Agod buligan ang mga indibiduwal nga luyag maghatag sing pinansial nga bulig para sa bug-os kalibutan nga hilikuton sang mga Saksi ni Jehova paagi sa pila ka porma sang ginplano nga pagdonar, ginhanda ang isa ka brosyur sa Ingles kag Espanyol nga ginatig-uluhan Charitable Planning to Benefit Kingdom Service Worldwide. Ginbalhag ini nga brosyur agod maghatag sing impormasyon tuhoy sa nanuhaytuhay nga paagi sang pagdonar karon ukon sa tion sang kamatayon. Pagkatapos mabasa ang brosyur kag makonsulta ang ila mga abogado ukon manugkwenta sang buhis, nakabulig ang madamo sa pagsuportar sang relihioso nga mga hilikuton kag sa mga buhat sang kaluoy nga ginahimo sang mga Saksi ni Jehova sa bug-os nga kalibutan, kag sa amo, nabuhinan sing daku ang ila ginabayaran nga buhis. Ini nga brosyur matigayon paagi sa pagpangabay sing kopya direkta sa Charitable Planning Office.

Para sa dugang nga impormasyon, mahimo kamo magpakig-angot sa Charitable Planning Office, paagi sa sulat ukon sa telepono, sa direksion nga nalista sa ubos, ukon makig-angot sa sanga talatapan sang mga Saksi ni Jehova sa inyo pungsod.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue San Francisco Del Monte 1105 Quezon City

Telepono: (02) 411-6090

[Retrato sa pahina 18]

Bangod sa aton nahiusa nga mga panikasog nakapatindog kita sing matahom nga mga Kingdom Hall sa bug-os nga kalibutan

[Retrato sa pahina 18]

Bag-o nga Kingdom Hall sa Ghana