Si Daniel kag ang Iya Badge sa Kombension

GINSABDONG ni Jesus ang nagapakamatarong sa kaugalingon nga relihiosong mga lider nga naakig sang makita nila ang kabataan nga mga lalaki nga dayag nga nagadayaw sa Dios. Sing nagakaigo, ginpamangkot sila ni Jesus: “Wala gid bala ninyo mabasahi ini, ‘Gikan sa baba sang mga bata kag mga nagasuso nag-aman ka sing pagdayaw’?”—Mateo 21:15, 16.

Ang anom ka tuig nga si Daniel, nga nagapakig-angot sa nagapamulong sing Ruso nga kongregasyon sa Alemanya, nagpamatuod nga ang mga kabataan sa karon nagadayaw gihapon kay Jehova. Nagtambong sia sa kombension sang mga Saksi ni Jehova sa Duisburg upod sa iya iloy kag magulang nga babayi. Una ini nga tion nga nakatambong sila sa amo sini kadaku nga kombension. Bag-o gid ang tanan: ang hotel, ang madamo nga tumalambong, ang pagpungko sing mahim-ong sa sulod sang tatlo ka adlaw, ang bawtismo, subong man ang drama. Kamusta si Daniel? Huwaran gid ang iya paggawi.

Sang Lunes sa tapos sang kombension, sang nakapauli na sila, temprano pa nagbugtaw si Daniel agod mag-eskwela sa kindergarten. Apang ano ang yara gihapon sa iya jacket? Ang badge nga nagpakilala sa iya nga isa sia ka delegado sa kombension! Ang iya iloy nagsiling sa iya: “Tapos na ang kombension. Puede mo na hukson ang imo badge.” Pero si Daniel nagsiling: “Luyag ko nga mahibaluan sang tanan kon diin ako nagkadto kag kon ano ang akon natun-an.” Gani, sa bug-os nga adlaw sa kindergarten, may pagpabugal nga ginsuksok niya ang iya badge. Sang ginpamangkot sia sang iya maestra tuhoy sini, ginsugid niya sa maestra ang programa sang kombension.

Sa paghimo sini, ginailog ni Daniel ang halimbawa sang linibo ka kabataan nga lalaki kag babayi nga dayag nga nagdayaw kay Jehova sa sulod sang mga siglo.