Ngaa Dapat Naton Himuon Kon Ano ang Husto?

ISA ka edukado nga tawo ang nagsiling anay: “Ang ikasarang sa paghandum yari sa akon, apang ang ikasarang sa paghimo sang maayo wala. Kay ang maayo nga luyag ko wala ko ginahimo, apang ang malain nga indi ko luyag amo ang akon ginahimo.” Ngaa nabudlayan ini nga tawo sa paghimo sang maayo nga ginahandum niya? Nagpaathag sia: “Gani, nasapwan ko ini nga kasuguan sa akon kahimtangan: nga kon luyag ko himuon ang husto, ang malain yari sa akon. Nagakalipay gid ako sa kasuguan sang Dios suno sa akon pagkatawo sa sulod, apang nakita ko sa mga bahin sang akon lawas ang isa pa ka kasuguan nga nagapakig-away batok sa kasuguan sang akon hunahuna kag nagadala sa akon nga bihag sa kasuguan sang sala nga yari sa mga bahin sang akon lawas.”—Roma 7:18, 19, 21-23.

Ini nga pinamulong ni apostol Pablo, nga ginsulat sang nagligad nga halos 2,000 ka tuig, nagapaathag kon ngaa mabudlay para sa di-himpit nga mga tawo nga himuon kon ano ang husto. Agod masunod naton ang husto nga mga prinsipio, ilabi na sa idalom sang mabudlay nga mga kahimtangan, kinahanglan naton ang moral nga kabakod. Gani dapat kita mamangkot, Ano ang pinakaimportante nga rason agod himuon kon ano ang husto?

Binagbinaga ang ginasiling sang Kasulatan tuhoy sa palaabuton sang isa ka tawo nga may matadlong nga mga prinsipio. Sa Salmo 37:37, 38, aton mabasa: “Bantayi ang isa nga wala sing kasawayan kag tan-awa ang isa nga matadlong, kay ang palaabuton sina nga tawo mangin mahidaiton. Apang ang mga malinapason laglagon sing tingob; ang palaabuton sang mga malauton utdon gid.” Ang Hulubaton 2:21, 22 nagasiling sa aton: “Ang mga matadlong amo ang magapuyo sa duta, kag ang mga wala sing kasawayan amo ang magapabilin sa sini. Kon tuhoy sa mga malauton, utdon sila gikan sa duta; kag tuhoy sa mga maluib, gabuton sila gikan sa sini.”

Bisan pa ini nga mga saad kag ang iban pa nga mabasa sa Biblia nagapalig-on gid sa aton nga maglakat sa dalanon nga nagapahamuot sa Dios, indi ini ang panguna nga rason agod himuon ini. Ini nga rason may yara kaangtanan sa isyu nga nagadalahig sa tanan nga intelihente nga mga tinuga. Binagbinagon sang masunod nga artikulo kon ano ini nga isyu kag kon paano ini nagaapektar sa aton.