Tudlui ang Inyo Kabataan sa Pagkomento

NADUMDUMAN ni Perla nga taga-Mexico nga sang gamay pa sia, ginbuligan sia sang iya iloy sa paghanda sing malip-ot nga mga komento para sa Pagtinuon sa Ang Lalantawan. Sa karon si Perla may lima ka tuig nga bata nga lalaki. Paano niya sia ginabuligan? “Una dapat anay ako maghanda. Samtang ginahimo ko ini, nagapangita ako sing parapo nga mahangpan kag mapaathag sang akon bata sa iya kaugalingon nga tinaga. Nian nagakonsentrar kami sa ginatawag niya nga ‘akon parapo.’ Ginapangabay ko sia nga ipaathag ini nga nagagamit sing mga halimbawa nga pamilyar sa iya. Nian ginaensayo namon sing pila ka beses ang iya komento. Ginagamit namon ang isa ka butang nga daw amoamo kadaku sang mikropono agod makahibalo sia sa pag-uyat sini kon magkomento sia. Nalipay gid ako nga halos kada miting nagakomento gid sia ukon nagabayaw sang iya kamot. Sa masami, ginakontrata na niya ang nagadumala antes mag-umpisa ang miting kag ginasilingan kon diin nga parapo sia masabat.”

Si Jens, nga isa ka gulang nga nagaalagad sa nagapamulong sing Hindi nga grupo, may duha ka bata nga lalaki nga nagaedad sing duha kag apat ka tuig. Kon nagahanda sila nga mag-asawa upod sang ila kabataan para sa mga miting, ginagamit nila ang paagi nga natun-an ni Jens gikan sa iya mga ginikanan. Sia nagsiling: “Ginapili namon kon diin nga bahin sang tulun-an ang mahangpan sang kabataan. Dayon ginahatag namon sa ila ang sumaryo sang partikular nga topiko ukon ang panguna nga mga punto sang artikulo, kag pagkatapos sini ginapamangkot namon sila sang mga pamangkot nga luyag namon nga sabton nila sa miting. Sa masami nagakakibot kami sa ila mga sabat nga daw natural gid. Kon paano nila ginapabutyag ang ila kaugalingon nagapakita kon ano ang ila nahangpan. Subong resulta, ang ila mga sabat nagadayaw gid kay Jehova kag isa ini ka personal nga ekspresyon sang ila pagtuo.”