Ang Anticristo Ginbuyagyag

PAANO mo amligan ang imo kaugalingon kon nahibaluan mo nga nagaduging sa inyo duog ang isa ka makamamatay nga epidemia? Mahimo mo pabakuron ang imo lawas kag likawan ang mga tawo nga makalaton. Dapat man naton ini himuon sa espirituwal nga kahulugan. Ang Kasulatan nagasiling sa aton nga ang anticristo ‘yari na sa kalibutan.’ (1 Juan 4:3) Kon indi naton luyag nga “malatnan,” dapat naton kilalahon kon sin-o ang “nagapanglaton” kag likawan sila. Maayo na lang nga ang Biblia nagahatag sing madamo nga impormasyon tuhoy sini.

Ang “anticristo” nagakahulugan sing “batok kay (ukon sa baylo ni) Cristo.” Gani sa pinakamasangkad nga kahulugan sini, ini nga tinaga nagapatuhoy sa tanan nga nagapamatok ukon butig nga nagapangangkon nga amo si Cristo ukon ang iya mga tiglawas. Si Jesus mismo nagsiling: “Sia nga indi dampig sa akon batok sa akon [ukon anticristo], kag sia nga wala nagapanipon upod sa akon nagapaaplaag.”—Lucas 11:23.

Sa pagkamatuod, si Juan nagsulat tuhoy sa anticristo pagligad sang kapin sa 60 ka tuig nga napatay kag ginbanhaw si Jesus padulong sa langit. Gani, ang mga hilikuton sang anticristo dapat hangpon sa kon paano sini naapektuhan ang matutom nga mga sumulunod ni Jesus sa duta.—Mateo 25:40, 45.

Ang Anticristo Nagapamatok sa mga Sumulunod ni Cristo

Ginpaandaman ni Jesus ang iya mga sumulunod nga pagadumtan sila sang kalibutan. Nagsiling sia: “Itugyan kamo sang mga tawo sa kapipit-an kag patyon kamo, kag dumtan kamo sang tanan nga pungsod tungod sa akon ngalan. Kag madamo nga butig nga mga manalagna ang magalutaw kag magapatalang sa madamo.”—Mateo 24:9, 11.

Bangod ang mga disipulo ni Jesus ginhingabot ‘tungod sa ngalan ni Jesus,’ ang mga nagahingabot maathag gid nga anticristo ukon batok kay Cristo. Amo man sini ang kategoriya sang “butig nga mga manalagna,” ang iban sa ila mga Cristiano  anay. (2 Juan 7) Ining “madamo nga anticristo,” sulat ni Juan, ‘naghalin sa aton, apang indi sila sa sahi naton; kay kon sila sa sahi naton, nagpabilin kuntani sila sa aton.’—1 Juan 2:18, 19.

Maathag nga ginapakita sang mga pinamulong ni Jesus kag ni Juan nga ang anticristo indi isa lamang ka tawo kundi ginahuman sang madamo nga indibiduwal nga mga anticristo. Dugang pa, bangod butig sila nga mga manalagna, ang isa sang ila panguna nga tulumuron amo ang relihioso nga paglimbong. Ano ang pila sang ila mga pamaagi?

Nagapalapnag sing Relihioso nga Kabutigan

Ginpaandaman ni apostol Pablo ang iya masigkamanugpangabudlay nga si Timoteo nga magbantay batok sa mga panudlo sang mga apostata, subong nanday Himeneo kag Fileto, nga “ang ila pulong magalapta subong sang gangrena.” Si Pablo nagdugang: “Ini mismo nga mga tawo nagsipak sa kamatuoran, nga nagasiling nga ang pagkabanhaw nahanabo na; kag ginaguba nila ang pagtuo sang iban.” (2 Timoteo 2:16-18) Mahimo nga nagpanudlo sanday Himeneo kag Fileto nga ang pagkabanhaw malaragwayon kag ang mga Cristiano ginbanhaw na sa espirituwal nga kahulugan. Matuod nga kon ang isa ka tawo mangin matuod nga disipulo ni Jesus, ginabanhaw sia sa mata sang Dios, kag maathag ini nga ginsiling mismo ni Pablo. (Efeso 2:1-5) Walay sapayan sini, ang panudlo nanday Himeneo kag Fileto nagbale-wala sang saad ni Jesus tuhoy sa isa ka literal nga pagbanhaw sa mga patay sa idalom sang paggahom sang Ginharian.—Juan 5:28, 29.

Ang mga panudlo tuhoy sa puro simbuliko lamang nga pagkabanhaw ginpauswag sang ulihi sang isa ka grupo nga ginatawag nga mga Gnostico. Bangod nagapati sila nga ang ihibalo (gnoʹsis sa Griego) mahimo matigayon sa mistiko nga paagi, ginsimpon sang mga Gnostico ang apostata nga Cristianismo sa Griego nga pilosopiya kag mistisismo sang Sidlangan. Halimbawa, nagpati sila nga ang tanan nga pisikal nga butang malain, kag bangod sini, si Jesus wala magkari sa unod kundi daw may tawhanon lamang nga lawas—ang pagpati nga ginatawag nga Docetismo. Subong sang  nahangpan na naton, batok gid sa sini nga nagpaandam si apostol Juan.—1 Juan 4:2, 3; 2 Juan 7.

Ang isa pa ka kabutigan, nga ginhimuhimo mga siglo sang ulihi, amo ang doktrina tuhoy sa ginatawag nga santa Trinidad, nga nagasiling nga si Jesus amo ang Dios nga Labing Gamhanan kag amo man ang Anak sang Dios. Sa iya libro nga The Church of the First Three Centuries, si Dr. Alvan Lamson nagsiling nga ang Trinidad nga doktrina “naghalin sa isa ka ginhalinan nga indi gid makita sa Judiyo kag Cristiano nga Kasulatan; nga naglambo ini, kag gindugang sa Cristianismo, paagi sa Platoniko nga mga Amay.” Sin-o ining “Platoniko nga mga Amay”? Sila amo ang apostata nga mga klerigo nga nagsalimuang sa mga panudlo sang pagano nga Griego nga pilosopo nga si Plato.

Ang pagdugang sa Trinidad maniobra sang anticristo, kay ini nga doktrina naghimo sa Dios nga daw misteryuso kag nagpaburon sang iya kaangtanan sa Anak. (Juan 14:28; 15:10; Colosas 1:15) Hunahunaa lamang, paano ang isa ‘makapalapit sa Dios,’ subong sang ginapalig-on sang Kasulatan, kon ang Dios isa ka misteryo?—Santiago 4:8.

Ang isa pa nga nagpagumon amo ang pagdula sang madamo nga manugbadbad sa ngalan sang Dios, nga Jehova, gikan sa ila mga badbad, bisan pa nga mabasa ini sing kapin sa 7,000 ka beses sa orihinal nga teksto! Maathag gid nga ang pagtinguha nga himuon ang Labing Gamhanan nga indi lamang isa ka misteryo kundi walay ngalan nga misteryo isa ka daku gid nga di-pagtahod sa aton Manunuga kag sa iya inspirado nga Pulong. (Bugna 22:18, 19) Dugang pa, ang pagtal-us sa ngalan sang Dios sing mga titulo subong sang Ginuo kag Dios wala nagahisanto sa modelo nga pangamuyo ni Jesus, nga nagasiling sing bahin: “Pakabalaanon ang imo ngalan.”—Mateo 6:9.

Ang mga Anticristo Nagasikway sa Ginharian sang Dios

Ang mga anticristo nangin aktibo ilabi na sang “katapusan nga mga adlaw,” ang tion nga sa sini nagakabuhi kita karon. (2 Timoteo 3:1) Ang panguna nga tulumuron sining modernong-adlaw nga mga manuglimbong amo ang pagpatalang sa mga tawo may kaangtanan sa katungdanan ni Jesus subong Hari sang Ginharian sang Dios, ang langitnon nga gobierno nga magagahom sa dili madugay sa bug-os nga duta.—Daniel 7:13, 14; Bugna 11:15.

Halimbawa, ang pila ka lider sang relihion nagawali nga ang Ginharian sang Dios isa ka kahimtangan sang tagipusuon sang mga tawo, ang pagpati nga indi mapamatud-an sa Kasulatan. (Daniel 2:44) Ang iban naman nagasiling nga si Cristo nagapanghikot paagi sa mga gobierno kag mga institusyon sang tawo. Apang, si Jesus nagsiling: “Ang akon ginharian indi bahin sini nga kalibutan.” (Juan 18:36) Sa pagkamatuod, si Satanas, indi si Cristo, “ang manuggahom sang kalibutan” kag “dios sining sistema sang mga butang.” (Juan 14:30; 2 Corinto 4:4) Amo kon ngaa laglagon ni Jesus sa dili madugay ang tanan nga gobierno sang tawo kag mangin ang solo nga Manuggahom sang duta. (Salmo 2:2, 6-9; Bugna 19:11-21) Amo ini ang ginapangamuyo sang mga tawo kon mangamuyo sila sing Pangamuyo sang Ginuo nga nagasiling: “Magkari ang imo ginharian. Matuman ang imo kabubut-on sa duta.”—Mateo 6:10.

Bangod ginasuportahan nila ang mga sistema sa politika sang kalibutan, madamo nga lider sang relihion ang nagapamatok, kag nagahingabot pa gani, sa mga nagawali sang kamatuoran tuhoy sa Ginharian sang Dios. Sing makawiwili, ginasambit sang tulun-an sang Bugna sa Biblia ang simbuliko nga babayi nga makihilawason—“Babilonia nga Daku”—nga “nahubog sa dugo sang mga balaan kag sa dugo sang mga saksi ni Jesus.” (Bugna 17:4-6) Nagapakighilawas man sia sa espirituwal bangod sang pagsuportar niya sa “mga hari,” ukon sa politikal nga mga manuggahom, sang duta, sa amo nagabaton sing pabor bilang balos. Ining simbuliko nga babayi wala sing liwan kundi ang butig nga mga relihion sang kalibutan. Sia amo ang daku nga bahin sang anticristo.—Bugna 18:2, 3; Santiago 4:4.

Ang Anticristo ‘Nagapakalam sang Dulunggan’

Indi lamang ang kamatuoran sang Biblia ang ginasikway sang madamo nga ginatawag nga mga Cristiano kundi pati man ang mga talaksan sang Biblia sa paggawi kay mas ginapili nila ang popular nga moralidad. Gintagna ini sang Pulong sang Dios, nga nagasiling: “Magaabot ang isa ka hut-ong sang tion nga indi nila [mga tawo nga nagapangangkon nga nagaalagad sa Dios] pagbatason ang makapapagros nga panudlo, kundi, nahisanto sa  ila kaugalingon nga mga handum, magatipon sila sing mga manunudlo para sa ila kaugalingon agod pakalamon ang ila mga dulunggan.” (2 Timoteo 4:3) Ining mga nagatudlo sing kabutigan ginalaragway man subong “butig nga mga apostoles, madaya nga mga manugpangabudlay, nga ginahimo ang ila kaugalingon nga mga apostoles ni Cristo.” Ang Biblia padayon nga nagsiling: “Ang ila katapusan mangin suno sa ila mga binuhatan.”—2 Corinto 11:13-15.

Ang ila mga binuhatan nagalakip sang “maulag nga paggawi,” nga isa ka makahas nga paglapas sa mataas nga mga prinsipio sa moral. (2 Pedro 2:1-3, 12-14) Wala bala naton nakita ang nagadamo nga mga lider sang relihion kag ang ila mga sumulunod nga nagahimo—ukon nagakunsinte—sang di-Cristiano nga mga buhat, subong sang homoseksuwalidad kag paghulid sang mga indi mag-asawahay? Palihug hatagi sing tion sa makadali nga ipaanggid ining popular nga mga pagtamod kag mga estilo sang pagkabuhi sa ginasiling sang Biblia sa Levitico 18:22; Roma 1:26, 27; 1 Corinto 6:9, 10; Hebreo 13:4; and Judas 7.

“Tilawi ang Inspirado nga mga Hambal”

Bangod sang nasambit na, dapat naton pamatian ang ginsiling ni apostol Juan nga indi pagpasapayanan ukon pagbale-walaon ang aton relihioso nga mga pagtuluuhan. “Indi ninyo pagtuuhi ang tagsa ka inspirado nga hambal,” paandam niya, “kundi tilawi ang inspirado nga mga hambal agod makita kon bala naghalin ini sa Dios, bangod madamong butig nga mga manalagna ang naglakat na sa kalibutan.”—1 Juan 4:1.

Binagbinaga ang maayo nga halimbawa sang pila ka “dungganon sing hunahuna” nga mga tawo nga nagapuyo anay sa siudad sang Berea sadtong nahaunang siglo. “Nalangkag gid sila sa pagbaton sa pulong, nga ginausisa sing maayo ang Kasulatan sa adlaw-adlaw kon bala matuod gid ini nga mga butang,” nga ginpamulong nanday Pablo kag Silas. (Binuhatan 17:10, 11) Huo, bisan pa nalangkag sila sa pagtuon, ginpat-od sang mga taga-Berea nga ang butang nga ila nabatian kag nabaton naggikan gid sa Kasulatan.

Sa karon, ang matuod nga mga Cristiano wala man naimpluwensiahan sang pagbaha sang popular nga mga opinyon kag malig-on sila nga nagapanguyapot sa kamatuoran sang Biblia. Si apostol Pablo nagsulat: “Amo ini ang padayon ko nga ginapangamuyo, nga kabay nga ang inyo gugma magbugana sing labi pa gid nga may sibu nga ihibalo kag bug-os nga paghantop.”—Filipos 1:9.

Kon wala mo pa ini mahimo, himua nga tulumuron ang pagtigayon sing “sibu nga ihibalo kag bug-os nga paghantop” paagi sa pagtuon kon ano gid ang ginatudlo sang Biblia. Ang mga nagailog sa mga taga-Berea wala nadaya sang “huwad nga mga pulong” sang mga anticristo. (2 Pedro 2:3) Sa baylo, ginhilway sila sang espirituwal nga kamatuoran sang matuod nga Cristo kag sang iya matuod nga mga sumulunod.—Juan 8:32, 36.

[Kahon/Retrato sa pahina 4]

KON ANO ANG GINASILING SANG BIBLIA TUHOY SA ANTICRISTO

“Mga anak, katapusan na ini nga oras [ayhan katapusan sang panahon sang mga apostoles], kag, subong sang nabatian ninyo nga magaabot ang anticristo, bisan karon may nagatuhaw nga madamo nga anticristo.”—1 Juan 2:18.

“Sin-o ang butigon kon indi ang isa nga nagapanghiwala nga si Jesus amo ang Cristo? Ini amo ang anticristo, ang isa nga nagapanghiwala sa Amay kag sa Anak.”—1 Juan 2:22.

“Ang tagsa ka inspirado nga kapahayagan nga wala nagatu-ad kay Jesus wala maghalin sa Dios. Dugang pa, amo ini ang inspirado nga kapahayagan sang anticristo nga nabatian ninyo nga nagapakari, kag karon yari na ini sa kalibutan.”—1 Juan 4:3.

“Madamong madaya ang yara sa kalibutan, mga tawo nga wala nagapahayag nga si Jesucristo nag-abot sa unod. Amo ini ang madaya kag ang anticristo.”—2 Juan 7.

[Kahon/Mga Retrato sa pahina 5]

ANG MANUGLIMBONG NGA MAY MADAMO NGA MASKARA

Ang tinaga nga “anticristo” nagapatuhoy sa tanan nga nagapanghiwala sang ginasiling sang Biblia tuhoy kay Jesucristo, sa tanan nga nagapamatok sa iya Ginharian, kag sa tanan nga nagapakig-angot sing malain sa iya mga sumulunod. Nagalakip man ini sa mga indibiduwal, mga organisasyon, kag mga pungsod nga nagapangangkon sing butig nga nagatiglawas kay Cristo ukon di-nagakaigo nga nagaangkon sa ila kaugalingon sang katungdanan sang Mesias paagi sa makahas nga pagsaad nga mahimo nila ang butang nga si Cristo lamang ang makahimo—ang pagpaluntad sing paghidait kag kalig-unan.

[Credit Line]

Augustine: ©SuperStock/age fotostock

[Retrato sa pahina 7]

Kaangay sang mga taga-Berea, dapat naton ‘usisaon ang Kasulatan adlaw-adlaw’