Ngaa Dapat Mo Makilala ang Anticristo?

“Nabatian ninyo nga magaabot ang anticristo,” madugay na nga ginsulat sang inspirado nga apostol. (1 Juan 2:18) Interesante gid ini nga pinamulong! Sa sulod sang mga siglo, ginpaligban sang mga tawo ang buot silingon sini. Sin-o ang anticristo? San-o sia magaabot? Ano ang himuon niya kon mag-abot gid man sia?

MALABA ang listahan sang mga ginsumbong nga anticristo. Sang una, ang gintawag nga “anticristo” naglakip sa mga Judiyo, sa Katoliko nga mga papa, kag sa mga emperador sang Roma. Halimbawa, sang wala magbuylog si Emperador Frederick II (1194-1250) sa Krusada sang simbahan, gintawag sia ni Papa Gregory IX nga anticristo kag ginsikway sia. Ginsikway sia liwat ni Innocent IV, nga amo ang nagbulos kay Gregory. Bilang balos, gindeklarar ni Frederick si Innocent nga amo ang anticristo.

Si apostol Juan amo lamang ang manunulat sang Biblia nga naggamit sang tinaga nga “anticristo.” Mabasa ini sing pang-isahan kag pangmadamo sing lima ka beses sa duha ka sulat nga ginhingalan sa iya. Makita sa kahon sa masunod nga pahina ang mga bersikulo diin ini mabasa. Gikan sa sining mga bersikulo, makita naton nga ang anticristo butigon kag manuglimbong, kag determinado sia nga gub-on ang kaangtanan sang isa ka tawo kay Cristo kag sa Dios. Amo kon ngaa ginlaygayan sang apostol ang iya mga masigka-Cristiano: “Mga hinigugma, indi ninyo pagtuuhi ang tagsa ka inspirado nga hambal, kundi tilawi ang inspirado nga mga hambal agod makita kon bala naghalin ini sa Dios, bangod madamong butig nga mga manalagna ang naglakat na sa kalibutan.”—1 Juan 4:1.

Nagpaandam man si Jesus batok sa mga manuglimbong, ukon butig nga mga manalagna, nga nagasiling: “Nagapalapit [sila] sa inyo nga nagasuksok sing panapton sang karnero, apang sa sulod hakaban sila nga mga lobo. Paagi sa ila mga bunga [ukon, mga buhat] makilala ninyo sila.” (Mateo 7:15, 16) Nagpaandam man bala si Jesus sa iya mga sumulunod batok sa malaragwayon nga anticristo? Tan-awon naton kon paano naton makilala ining malauton nga manuglimbong.