Puede Bala Matudluan ang Isa ka Hukom?

SI Sladjana, isa ka Saksi ni Jehova sa Croatia nakaiskedyul nga mag-atubang sa korte may kaangtanan sa problema sa propiedad. Nagpakita sia sa hukom suno gid sa gintalana nga oras. Apang, naulihi ang pihak nga partido sa kaso. Luyag gid ni Sladjana nga makapanaksi, gani samtang nagahulat ang tanan, nangisog sia nga istoryahon ang hukom.

“Sir, nakahibalo ka bala nga sa ulihi wala na sing mga hukom kag mga korte sa duta?” pamangkot niya. Siempre pa, ang ginapatuhuyan niya amo ang mga hukom suno sa pagkakilala naton karon sa ila.

Bangod sa kakibot, gintulok lang sia sang hukom, nga daw kinum-an. Dayon nagsugod ang bista. Sang matapos na sila kag nagtindog si Sladjana agod magpirma sa dokumento, ang hukom namangkot sa iya sing hutik: “Sigurado ka sang ginsiling mo kaina sa akon, nga sa ulihi wala na sing mga hukom kag mga korte sa duta?”

“Huo, Sir. Sigurado gid ako!” sabat ni Sladjana.

“May pamatuod ka?” pamangkot sang hukom.

“Huo, mabasa ini sa Biblia,” sabat ni Sladjana.

Nagsiling ang hukom nga luyag niya mabasa ang prueba, apang wala sia sing Biblia. Gani nagsiling si Sladjana nga hatagan niya sia sing Biblia. Ginduaw sang mga Saksi ang hukom, ginhatagan sing Biblia, kag gin-agda sia nga magtuon sa Biblia kada semana. Ginbaton sang hukom ang pangagda kag sang ulihi nangin isa sang mga Saksi ni Jehova.

Sing matagnaon, ang Salmo 2:10 nagasiling: “Karon magpakaalam, O kamo nga mga hari, magpatudlo, kamo nga mga hukom sang duta.” (Ang Biblia, PBS) Daw ano ka makalilipay kon ining mga indibiduwal mapainubuson nga magbaton sang mahigugmaon nga panudlo ni Jehova!

[Retrato sa pahina 32]

Si Sladjana kag ang hukom