“Ang Dakung Adlaw ni Jehova Malapit Na”

“Ang dakung adlaw ni Jehova malapit na. Malapit na ini, kag nagadalidali ini sing tama.”—SOFONIAS 1:14.

1, 2. (a) Anong pinasahi nga adlaw ang ginahulat sang mga Cristiano? (b) Ano ang dapat naton ipamangkot, kag ngaa?

ANG isa ka malipayon nga dalaga malangkagon nga nagahulat sa pag-abot sang adlaw sang iya kasal. Ang isa ka nagabusong nga iloy nagapaabot gid sa pagkabun-ag sang iya lapsag. Ang isa ka hago nga manugpangabudlay nagahandum gid nga magsugod ang iya madugay na nga ginahulat nga bakasyon. Sa ano sila magkaanggid? Tanan sila nagahulat sang isa ka pinasahi nga adlaw—isa ka adlaw nga magaapektar sa ila kabuhi. May yara sila tudok apang magkatuhay nga balatyagon. Ang adlaw nga ila ginahulat magaabot sa ulihi, kag kon mag-abot ini, nagalaum sila nga handa sila para sa sini.

² Ang matuod nga mga Cristiano karon malangkagon man nga nagahulat sa pag-abot sang isa ka pinasahi nga adlaw. Ini amo ang dakung “adlaw ni Jehova.” (Isaias 13:9; Joel 2:1; 2 Pedro 3:12) Ano ining nagapakari nga “adlaw ni Jehova,” kag paano ang pag-abot sini magaapektar sa katawhan? Dugang pa, paano naton mapat-od nga handa kita sa pag-abot sini? Importante gid nga mahibaluan naton karon ang mga sabat sa sining mga pamangkot bangod ginapakita sang ebidensia ang pagkamaminatud-on sang pinamulong sang Biblia: “Ang dakung adlaw ni Jehova malapit na. Malapit na ini, kag nagadalidali ini sing tama.”—Sofonias 1:14.

“Ang Dakung Adlaw ni Jehova”

3. Ano “ang dakung adlaw ni Jehova”?

³ Ano “ang dakung adlaw ni Jehova”? Sa bug-os nga Kasulatan, ang ekspresyon nga “ang adlaw ni Jehova” nagapatuhoy sa pinasahi nga mga tion sang ginpadapat ni Jehova ang iya paghukom sa iya mga kaaway kag ginhimaya ang iya daku nga ngalan. Ang di-matutom nga katawhan sang Juda kag Jerusalem kag subong man ang mapiguson nga pumuluyo sang Babilonia kag Egipto tanan nakaatubang sang ‘mga adlaw ni Jehova’ sang naeksperiensiahan nila ang pagpadapat sang mga paghukom ni Jehova. (Isaias 2:1, 10-12; 13:1-6; Jeremias 46:7-10) Apang, ang labing daku nga “adlaw ni Jehova” palaabuton pa. Amo ini ang “adlaw” nga ipadapat ni Jehova ang iya paghukom sa mga nagapakahuya sa iya ngalan. Magasugod ini sa kalaglagan sang “Babilonia nga Daku,” ang bug-os kalibutan nga emperyo sang butig nga relihion, kag matapos sa kalaglagan sang nabilin nga malaut nga sistema sang mga butang sa inaway sa Armagedon.—Bugna 16:14, 16; 17:5, 15-17; 19:11-21.

4. Ngaa dapat kahadlukan sang kalabanan nga tawo ang nagahilapit sing madasig nga adlaw ni Jehova?

⁴ Narealisar man ini sang kalabanan nga tawo ukon wala, dapat nila kahadlukan ining nagahilapit sing madasig nga adlaw. Ngaa? Paagi kay manalagna Sofonias, nagsabat si Jehova: “Ina nga adlaw isa ka adlaw sang kasingkal, isa ka adlaw sang kasisit-an kag sang kalisang, isa ka adlaw sang bagyo kag sang pagkahapay, isa ka adlaw sang kadulom kag sang kaguom, isa ka adlaw sang mga gal-um kag sang madamol nga kaguom.” Makahaladlok gid! Dugang pa, nagsiling ang manalagna: “Pahanabuon ko nga magkalisod ang mga tawo . . . bangod nakasala sila batok kay Jehova.”—Sofonias 1:15, 17.

5. Ngaa malangkagon nga ginapaabot sang minilyon ang pag-abot sang adlaw ni Jehova?

⁵ Apang, malangkagon nga ginapaabot sang minilyon nga iban pa ang pag-abot sang adlaw ni Jehova. Ngaa? Kay nahibaluan nila nga amo ini ang tion sang kaluwasan kag pagtubos sa mga matarong, isa ka adlaw nga si Jehova bayawon  sing mataas kag pakabalaanon ang iya mahimayaon nga ngalan. (Joel 3:16, 17; Sofonias 3:12-17) Kon bala ina nga adlaw kahadlukan ukon paabuton sing malangkagon nagadepende gid sa kon ano ang ginahimo sang mga tawo sa ila kabuhi karon. Paano mo ginatamod ang paghilapit sina nga adlaw? Handa ka bala sa sini? Ang katunayan bala nga malapit na lang ang adlaw ni Jehova nagaapektar sa imo matag-adlaw nga pagkabuhi karon?

“Ang mga Mayubiton Magaabot nga May Pagyubit”

6. Paano ginatamod sang kalabanan nga tawo ang “adlaw ni Jehova,” kag ngaa wala natingala sa sini ang matuod nga mga Cristiano?

⁶ Walay sapayan sang pagkahilingagawon sang kahimtangan, ang kalabanan nga pumuluyo sang duta wala nagakabalaka tuhoy sa nagahilapit nga “adlaw ni Jehova.” Ginayubit kag ginayaguta nila ang mga nagapaandam sa ila tuhoy sa nagahilapit nga pag-abot sini. Wala natingala sa sini ang matuod nga mga Cristiano. Ginadumdom nila ang paandam nga ginrekord ni apostol Pedro: “Hibalua ninyo anay ini, nga sa katapusan nga mga adlaw ang mga mayubiton magaabot nga may pagyubit, nga nagalakat suno sa ila kaugalingon nga mga kailigbon kag nagasiling: ‘Diin ining ginsaad nga presensia niya? Ti, kutob sang pagtulog sa kamatayon sang aton mga katigulangan, ang tanan nga butang nagapadayon sing subong gid kutob sa ginsuguran sang pagtuga.’”—2 Pedro 3:3, 4.

7. Ano ang makabulig sa aton nga magbatyag gid pirme sing pagkahilingawon?

⁷ Ano ang makabulig sa aton nga mapamatukan ining mayubiton nga panghunahuna kag busa magbatyag gid pirme sing pagkahilingawon? Si Pedro nagsiling sa aton: “Ginapukaw ko ang inyo matin-aw nga ikasarang sa paghunahuna paagi sa isa ka pahanumdom, agod madumduman ninyo ang mga pulong nga ginsiling anay sang balaan nga mga manalagna kag ang sugo sang Ginuo kag Manluluwas paagi sa inyo mga apostoles.” (2 Pedro 3:1, 2) Ang aton pagtalupangod sa matagnaon nga mga paandam makabulig sa aton nga ‘mapukaw ang aton matin-aw nga ikasarang sa paghunahuna.’ Ayhan pirme naton nabatian ini nga mga pahanumdom, apang importante nga padayon naton nga talupangdon ini nga mga paandam, ilabi na gid sa karon.—Isaias 34:1-4; Lucas 21:34-36.

8. Ngaa wala ginasapak sang madamo ang mga pahanumdom sang Biblia?

⁸ Ngaa wala ginsapak sang iban ini nga mga pahanumdom? Si Pedro nagpadayon: “Suno sa ila luyag, wala nila matalupangdan ining katunayan, nga may mga langit halin pa sang una kag isa ka duta nga nagatindog sing malig-on halin sa tubig kag sa tunga sang tubig paagi sa pulong sang Dios; kag paagi sini ang kalibutan sadto nga tion nalaglag sang ginlapawan ini sang tubig.” (2 Pedro 3:5, 6) Huo, may mga tawo nga indi luyag nga mag-abot ang adlaw ni Jehova. Indi nila luyag nga matublag ang ila pagkabuhi. Indi nila luyag nga manabat kay Jehova sa ila maiyaiyahon nga estilo sang pagkabuhi! Subong sang ginsiling ni Pedro, nagakabuhi sila “suno sa ila luyag.”

9. Ano nga panimuot ang ginpakita sang mga tawo sang mga adlaw nanday Noe kag Lot?

⁹ Bangod sang “ila luyag,” wala ginsapak sining mga manugyubit nga si Jehova nagpasilabot sa mga ginahimo sang katawhan sang nagligad. Ginpatuhuyan nanday Jesucristo kag apostol Pedro ang duha sa sini nga mga hitabo—“ang mga adlaw ni Noe” kag “ang mga adlaw ni Lot.” (Lucas 17:26-30; 2 Pedro 2:5-9) Antes sang Anaw, wala gintalupangod sang mga tawo ang paandam nga ginhatag ni Noe. Sing kaanggid, antes sang  kalaglagan sang Sodoma kag Gomorra, sa pagtamod sang iya mga umagad nga lalaki, si Lot ‘daw nagalahog lang.’—Genesis 19:14.

10. Ano ang himuon ni Jehova sa mga wala nagatalupangod?

¹⁰ Amo man sini ang kahimtangan sa karon. Apang, talupangda ang himuon ni Jehova sa mga wala nagatalupangod: “Talupangdon ko ang mga lalaki nga subong sang linugdang sa ila linugdang sang alak kag nagasiling sa ila tagipusuon, ‘Si Jehova indi magahimo sing maayo, kag indi sia magahimo sing malain.’ Kag ang ila manggad mangin inatihan kag ang ila mga balay mangin hinapay. Kag magapatindog sila sing mga balay, apang indi sila magapuyo sa sini; kag magatanom sila sing mga ulubasan, apang indi sila makainom sing alak sini.” (Sofonias 1:12, 13) Mahimo nga ginapadayon sang mga tawo ang ila “kinaandan” nga mga hilikuton adlaw-adlaw, apang wala sing permanente nga kaayuhan ang ila lakas nga pagpangabudlay. Ngaa? Bangod ang adlaw ni Jehova magaabot sing hinali, kag tanan nga materyal nga mga manggad nga ila natipon indi makaluwas sa ila.—Sofonias 1:18.

“Padayon nga Paabuta Ini”

11. Ano nga pagpalig-on ang dapat naton dumdumon?

¹¹ Indi kaangay sang malauton nga kalibutan sa palibot naton, dapat naton dumdumon ang pagpalig-on nga ginrekord ni manalagna Habacuc: “Ang palanan-awon naigo pa sa gintalana nga tion, kag nagadalidali ini sa katapusan, kag indi ini magbutig. Bisan pa magpalantang ini, padayon nga paabuta ini; kay pat-od nga magaabot ini. Indi ini magpalantang.” (Habacuc 2:3) Bisan pa ina nga adlaw daw nagapalantang gikan sa aton di-himpit nga pagtamod, dapat naton dumdumon nga indi mahinay si Jehova. Ang iya adlaw magaabot sing eksakto sa tion, sa oras nga wala ginapaabot sang mga tawo.—Marcos 13:33; 2 Pedro 3:9, 10.

12. Ano ang ginpaandam ni Jesus, kag paano ini kabaliskaran sa ginahimo sang matutom nga mga sumulunod ni Jesus?

¹² Agod ipadaku ang importansia sang padayon nga pagpaabot sa adlaw ni Jehova, si Jesus nagpaandam nga madula bisan sang iya pila ka sumulunod ang pagbatyag sing pagkahilingawon. Sia nagtagna tuhoy sa ila: “Kon ang malaut nga ulipon magsiling sa iya tagipusuon, ‘Ang akon agalon nagapalantang,’ kag magbunal sa iya mga masigkaulipon kag magkaon kag mag-inom upod sa kilala nga mga palahubog, ang agalon sina nga ulipon magaabot sa adlaw nga wala niya ginapaabot kag sa oras nga wala niya mahibalui, kag silutan sia sing mabug-at gid.” (Mateo 24:48-51) Sa kabaliskaran, ang matutom kag mainandamon nga ulipon nga klase mainunungon nga nagabatyag gid pirme sing pagkahilingawon. Ang ulipon nga klase padayon nga nagbantay kag nagpamatuod sang ila kaugalingon nga handa. Gintangdo ni Jesus sa ila ang “tanan niya nga pagkabutang” diri sa duta.—Mateo 24:42-47.

Kinahanglan ang Pagbatyag sing Pagkahilingagawon

13. Paano ginpadaku ni Jesus nga kinahanglan ang pagbatyag sing pagkahilingagawon?

¹³ Importante gid nga magbatyag pirme sing pagkahilingagawon ang unang siglo nga mga Cristiano. Dapat sila maghulag gilayon agod makapalagyo sa Jerusalem kon makita nila ining siudad nga “ginalibutan sang nagkampo nga mga hangaway.” (Lucas 21:20, 21) Natabo ini sang tuig 66 C.E. Talupangda kon paano ginpadaku ni Jesus nga kinahanglan ang pagbatyag sing pagkahilingagawon sa bahin sang mga Cristiano sadto: “Ang tawo nga yara sa atop sang  balay indi magpanaug sa pagkuha sing mga butang sa iya balay; kag ang tawo nga yara sa uma indi magbalik sa balay agod kuhaon ang iya kunop.” (Mateo 24:17, 18) Sanglit ginpakita sang maragtas nga apat pa ka tuig antes nalaglag ang Jerusalem, ngaa hilingagawon gid nga pamatian sang mga Cristiano ang pinamulong ni Jesus sang 66 C.E.?

14, 15. Ngaa importante para sa unang siglo nga mga Cristiano nga maghulag gilayon kon makita nila ang Jerusalem nga ginalibutan sang nagkampo nga mga hangaway?

¹⁴ Bisan pa wala ginlaglag sang Romano nga hangaway ang Jerusalem antes sang 70 C.E., indi mahidaiton yadtong apat ka tuig. Wala gid ini sing kalinong! Yadto nga mga tinuig puno sing kasingki kag pagpatulo sing dugo. Ginlaragway sang isa ka istoryador ang kahimtangan sang Jerusalem sadto nga tion subong “isa ka makahaladlok kag madugo nga inaway sibil, kag mga buhat sang tuman nga kapintas.” Ginrekrut ang mga pamatan-on agod magtukod sang mga pamakod, agod mag-uyat sing mga hinganiban, kag agod magsoldado. Nagahanas sila sa militar adlaw-adlaw. Ang wala nagasakdag sa estrikto nga mga pamaagi ginatamod nga traidor. Kon nagtener pa ang mga Cristiano sa siudad, nabutang gid sila sa katalagman.—Mateo 26:52; Marcos 12:17.

¹⁵ Dapat naton talupangdon nga si Jesus nagsiling nga dapat magpalagyo “ang mga yara sa Judea,” indi lamang ang mga yara sa Jerusalem. Importante ini bangod pila lamang ka bulan nga nalagyo sila gikan sa Jerusalem, ang mga hangaway sang Roma nagsalakay liwat. Una, ginsakop ang Galilea sang 67 C.E., kag dason ang Judea bug-os nga ginsakop sang masunod nga tuig. Nagresulta ini sa daku nga kabudlayan sa mga duog sa palibot. Nangin mas mabudlay man para sa bisan sin-o nga Judiyo nga magpalagyo gikan sa Jerusalem mismo. Ang mga gawang sang siudad guardiado, kag ang nagatinguha nga magpalagyo ginakabig nga nagadampig sa mga Romano.

16. Ano nga panimuot ang kinahanglan sang unang siglo nga mga Cristiano agod makaluwas sa sadtong tion sang kapipit-an?

¹⁶ Ginadumdom ini nga mga butang, mahangpan naton kon ngaa ginpadaku ni Jesus ang pagkahilingagawon sang kahimtangan. Ang mga Cristiano dapat handa nga magsakripisyo, nga wala ginatugutan ang ila kaugalingon nga masablagan sang materyal nga mga pagkabutang. Dapat nga mangin handa sila nga “magbiya sang tanan [nila] nga pagkabutang” agod sundon ang paandam ni Jesus. (Lucas 14:33) Ang mga nagtuman dayon kag nalagyo pakadto sa pihak nga bahin sang Jordan naluwas.

Paghupot sang Aton Pagbatyag sing Pagkahilingagawon

17. Ngaa dapat naton pabakuron ang aton pagbatyag sing pagkahilingagawon?

¹⁷ Maathag nga ginapakita sang mga tagna sang Biblia nga nagakabuhi kita sa ulihi nga bahin sang tion sang katapusan. Busa, dapat naton  pabakuron ang aton pagbatyag sing pagkahilingagawon. Sa tion sang paghidait, ang isa ka soldado wala nagabatyag sing kakulba kag katalagman sang inaway. Apang, kon bangod sini indi man sia magbatyag nga hilingagawon ang magpabilin nga alisto kag hinali lang nga tawgon sia sa inaway, mahimo nga indi sia handa, kag may makamamatay ini nga resulta. Amo man sa espirituwal. Kon tugutan naton nga mag-ugdaw ang aton pagbatyag sing pagkahilingagawon, mahimo nga indi kita handa nga amligan ang aton kaugalingon gikan sa mga pagsalakay nga nagaapektar sa aton kag mahimo nga makibot kita kon mag-abot na ang adlaw ni Jehova. (Lucas 21:36; 1 Tesalonica 5:4) Kon may ‘nagpalayo gikan sa pagsunod kay Jehova,’ karon na ang ila tion nga pangitaon sia liwat.—Sofonias 1:3-6; 2 Tesalonica 1:8, 9.

18, 19. Ano ang makabulig sa aton nga dumdumon pirme “ang presensia sang adlaw ni Jehova”?

¹⁸ Indi katingalahan nga si apostol Pedro nagapalig-on sa aton nga dumdumon pirme “ang presensia sang adlaw ni Jehova”! Paano naton mahimo ini? Ang isa ka paagi amo ang paghimo sing “balaan nga paggawi kag sa mga buhat sang diosnon nga debosyon.” (2 Pedro 3:11, 12) Ang pagpadayon nga masako sa sini nga mga hilikuton makabulig sa aton nga kalangkagan ang pag-abot sang “adlaw ni Jehova.” Ang Griegong tinaga nga ginbadbad “ginadumdom gid pirme” literal nga nagakahulugan sing “ginapadasig.” Indi naton mapadasig ang tion nga nabilin tubtob sa pag-abot sang adlaw ni Jehova. Apang samtang ginahulat naton ina nga adlaw, ang tion daw madasig lang nga nagalipas kon masako kita sa pag-alagad sa Dios.—1 Corinto 15:58.

¹⁹ Ang pagpamalandong sa Pulong sang Dios kag ang pagbinagbinag sa mga pahanumdom nga masapwan diri makabulig man sa aton nga mahimo ini—“nalangkag gid (nagapaabot kag nagapadali) sa pag-abot” sina nga adlaw, huo, nga “padayon nga nagapaabot” sini. (2 Pedro 3:12, The Amplified Bible; The New Testament, ni William Barclay) Lakip sa sining mga pahanumdom amo ang madamong tagna nga nagatagna indi lamang sang pag-abot sang adlaw ni Jehova kundi sang bugana nga mga pagpakamaayo nga ihatag sa mga ‘padayon nga nagapaabot kay Jehova.’—Sofonias 3:8.

20. Ano nga laygay ang dapat naton talupangdon sing maayo?

²⁰ Karon na gid ang tion para sa aton tanan nga talupangdon sing maayo ang laygay nga ginhatag paagi kay manalagna Sofonias: “Sa wala pa mag-abot sa inyo ang nagadabdab nga kaakig ni Jehova, sa wala pa mag-abot sa inyo ang adlaw sang kaakig ni Jehova, pangitaa ninyo si Jehova, kamo tanan nga mga mahagop sang duta, nga nagahimo sang Iya hudisyal nga desisyon. Pangitaa ang pagkamatarong, pangitaa ang pagkahagop. Ayhan malipdan kamo sa adlaw sang kaakig ni Jehova.”—Sofonias 2:2, 3.

21. Ano ang mangin determinasyon sang katawhan sang Dios para sa 2007?

²¹ Busa, nagakaigo gid nga ang tuigan nga teksto nga ginpili para sa tuig 2007 amo: “Ang dakung adlaw ni Jehova malapit na.” Kumbinsido gid ang katawhan sang Dios nga “malapit na ini, kag nagadalidali ini sing tama.” (Sofonias 1:14) “Indi ini magpalantang.” (Habacuc 2:3) Gani, samtang ginapaabot naton ina nga adlaw, kabay nga mangin alisto kita pirme sa tion nga ginakabuhian naton, nga nahantop nga ang katapusan nga katumanan sining mga tagna malapit na!

Masabat Mo Bala?

• Ano “ang dakung adlaw ni Jehova”?

• Ngaa madamo ang wala nagasapak sang pagkahilingagawon sang tion?

• Ngaa dapat maghulag sing may pagkahilingagawon ang mga Cristiano sang unang siglo?

• Paano naton mapabaskog ang aton pagbatyag sing hilingagawon?

[Mga Pamangkot sa Pagtinuon]

[Blurb sa pahina 19]

Ang tuigan nga teksto para sa 2007 amo: “Ang dakung adlaw ni Jehova malapit na.”—Sofonias 1:14.

[Retrato sa pahina 17]

Subong sang adlaw ni Noe, makibot ang mga mayubiton kon maghikot na si Jehova

[Retrato sa pahina 18]

Ang mga Cristiano dapat maghulag gilayon kon makita nila ang Jerusalem nga “ginalibutan sang nagkampo nga mga hangaway”