Ano Na ang Nagakatabo sa Krismas?

SANG nagligad nga napulo ka tuig, sa sini man nga bulan, ang magasin nga U.S.News & World Report nagpagua sing may laragway sa panghapin nga artikulo nga “Sa Pagpangita Sing Krismas.” Ginpadaku sang artikulo kon bala ang Krismas “nagaputli na kag indi na puro komersio lang.” Amo na bala sini ang nagakatabo sa Krismas?

Ang artikulo nagpaathag sang mga rason kon ngaa indi naton mapaabot nga amo sina ang matabo. Nagsiling ini: “Wala sing rekord sang opisyal nga pagsaulog sang pagkabun-ag ni Cristo tubtob sang ikap-at nga siglo, sang si Constantino . . . amo ang emperador sang Roma.” Ginapakita sini “ang isa lang ka bahin sang pamatuod nga wala sing nakapat-od kon san-o ginbun-ag si Jesus.” Ginbaton sang artikulo nga “ang mga ebanghelyo wala sing ginsambit nga tuig, ilabi na gid nga wala ini sing ginsambit nga eksakto nga bulan ukon adlaw.” Suno sa isa ka istoryador sa University of Texas, “ang mga Cristiano sang una wala sing interes nga magsaulog sang Natividad.”

Sa idalom sang subtitulo nga “Ginhimuhimo Lang,” ginbinagbinag sang artikulo “kon paano ginpili sang simbahan ang Disiembre 25.” Ini nagsiling: “Ang labi gid nga ginabaton amo ang pagtamod nga ini nga kapiestahan isa ka hungod nga paghimo sa Saturnalia kag iban pa pagano nga mga selebrasyon nga ‘Cristiano.’” “Paagi sa pagbutang sa Krismas sa hingapusan nga bahin sang Disiembre, sa tion nga naandan na sang mga tawo nga magsaulog, ginpat-od sang mga lider sang simbahan nga saulugon sing lapnag ang pagkabun-ag sang Manluluwas.” Sa tungatunga sang ika-19 nga siglo, ang igtalupangod nagsaylo sa pagbakal kag paghatag sing mga regalo. “Ang bag-o nga tradisyon nga paghinatagay sing regalo kon Krismas nagtuga sing madasig magpamanggad nga mga negosyo, kag gilayon nga ginpasayod sang mga negosyante kag mga manugpasayod ang tion sang Krismas.”

Busa, wala sing rason agod paabuton nga may iban pa nga madangatan ang Krismas magluwas nga nagapahilayo ini sa matuod nga Cristianismo. Samtang ang Krismas sa karon bugana sa “pakitakita nga komersialismo,” ang katunayan amo nga ang matuod nga mga Cristiano wala ginapaabot nga magsaulog sang pagkabun-ag ni Jesus. Sa baylo, ginapadaku sang Biblia ang gawad nga gin-aman ni Cristo paagi sa iya kamatayon kag pagkabanhaw sa langit. (Mateo 20:28) Nagapabilin ini nga amo ang labing importante nga butang tubtob sa tion nga magaabot pa.