Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Bueno, tilawi kon masabat mo ang masunod nga mga pamangkot:

• Ano ang makabulig sa imo kon ang isa ka katapo sang imo pamilya nagbiya kay Jehova?

Palig-una ang imo kaugalingon kag ang iban pa matutom nga mga katapo sang pamilya. Makigbahin sing bug-os sa espirituwal nga mga hilikuton. Mangin handa sa pagbulig sa iban. Indi madulaan sing paglaum nga mahimo magbalik ang imo hinigugma. Indi pagbasula ang imo kaugalingon. Tahura ang kahimusan sang Dios sa pagdisiplina, kag ipabutyag ang imo ginabatyag sa imo mga abyan.—9/1, pahina 18-21.

• Sa anong duha ka paagi nagabulig ang Kasulatan agod makilala ang “katapusan nga mga adlaw”?

Ang Biblia nagatagna sang mga hitabo nga mahanabo sa tion sang “katapusan sang sistema sang mga butang.” (Mateo 24:3, 7, 8; Lucas 21:11) Ginalaragway man sini ang pagbag-o sa mga panimuot kag paggawi sang mga tawo nga nagakabuhi sa “katapusan nga mga adlaw.” (2 Timoteo 3:1-5) Sing talalupangdon, ang maayong balita sang Ginharian dapat ibantala sa sini nga tion.—9/15, pahina 4-6.

• Ano ang katungdanan sang kongregasyon kon ang isa ka Cristiano nga nagamaneho sing salakyan nakaaksidente kag may napatay?

Mahimo mamat-od ang nagausisa nga mga gulang nga ang drayber wala nakasala sa dugo bangod halos indi niya kontrolado ang mga kahimtangan nga nagresulta sa kamatayon. Apang, kon may kasal-anan sa dugo kag ang tawo nga nakasala mahinulsulon, magabaton sia sing nagakaigo nga pagsabdong halin sa Kasulatan kag indi sia paghatagan sing mga katungdanan sa kongregasyon.—9/15, pahina 30.

• Ngaa ang kabuhi nga walay katapusan wala nasandig sa pag-uswag sang siensia?

May mga pagtinguha ang siensia agod mapalawig ang kabuhi, subong sang panikasog nga mapalawig sing pila ka beses ang pagmuad sang mga selula ukon paagi sa therapeutic cloning agod maamanan ang mga pasyente sing bag-o kag sibu gid nga mga organo. Apang, ginapakita sang Biblia nga ang lamang nga paagi agod matigayon sang mga tawo ang kabuhi nga walay katapusan amo ang gawad ni Jesus.—10/1, pahina 3-5.

• Ang rituwal nga pagpaligo sang mga Judiyo amo bala ang ginbasihan sang Cristianong bawtismo?

Indi. Ginahiwat sang mga Judiyo ang rituwal nga pagtinlo sa ila mismo kaugalingon, nga wala ginhimo sa bawtismo ni Juan. Ang pagpaninlo nga ginapatuman sang Mosaikong Kasuguan sulitsulit nga ginahimo, apang ang Cristianong bawtismo ginahimo sing makaisa lang.—10/15, pahina 12-13.

• Ano ang Ministerial Training School?

Walo ini ka semana nga kurso para sa di-minyo nga mga gulang sa kongregasyon kag mga ministeryal nga alagad nga handa nga mag-alagad diin mas daku ang kinahanglanon. Mahimo sila i-asayn sa ila mismo ginhalinan nga kongregasyon, sa iban nga bahin sang ila pungsod, ukon sa iban nga pungsod.—11/15, pahina 10-11.

• Ano ukon sin-o ang mga anticristo nga ginsambit sa 1 Juan 2:18; 4:3?

Sa masangkad nga kahulugan, ang “anticristo,” nagapatuhoy sa tanan nga nagapamatok ukon butig nga nagapangagkon nga amo si Cristo ukon ang iya mga tiglawas. Ang mga pinamulong ni Jesus kag ni Juan nagapakita nga ang anticristo isa ka grupo nga ginahuman sang madamo nga indibiduwal nga mga anticristo nga nagapalapnag sang relihioso nga paglimbong kag nagasikway sang Ginharian sang Dios.—12/1, pahina 4-6.