‘Pahanabuon ni Jehova nga Mahatag ang Katarungan’

“Indi gid bala pahanabuon sang Dios nga mahatagan sing katarungan ang iya mga pinili nga nagatuaw sa iya sa adlaw kag gab-i?”—LUCAS 18:7.

1. Sin-o ang tuburan sang pagpalig-on para sa imo, kag ngaa?

SA BUG-OS nga kalibutan, makita sa mga Saksi ni Jehova ang Cristianong mga lalaki kag babayi nga nag-alagad kay Jehova sing matutom sa sulod sang madamo nga tinuig. Personal mo bala nga kilala ang pila sining mga matutom? Ayhan nahunahuna mo ang isa ka tigulang na nga utod nga babayi, nga madugay na nga bawtismado kag halos wala gid nagapalya sa miting sa Kingdom Hall. Ukon ayhan nahunahuna mo ang isa ka may edad na nga utod nga lalaki nga mainunungon nga nagasakdag sa hilikuton sang kongregasyon sa pag-alagad sa latagon kada semana kag tinuig na nga nagahimo sini. Sa pagkamatuod, madamo sining mga matutom ang naghunahuna nga dapat nag-Armagedon na. Apang, ang katunayan nga ining di-makatarunganon nga kalibutan nagaluntad pa gihapon wala gid magpaluya sang ila pagsalig sa mga saad ni Jehova ukon magpaluya sang ila determinasyon nga ‘magbatas tubtob sa katapusan.’ (Mateo 24:13) Ang mabakod nga pagtuo nga ginapakita sining mainunungon nga mga alagad ni Jehova isa gid ka tuburan sang pagpalig-on sa bug-os nga kongregasyon.—Salmo 147:11.

2. Ano nga kahimtangan ang nagapasubo sa aton?

² Apang, kon kaisa matalupangdan naton ang kabaliskaran. Ang iban nga mga Saksi nakigbahin sa ministeryo sing tinuig, apang sang ulihi nagluya ang ila pagtuo kay Jehova, kag nag-untat sila sa pagpakig-upod sa Cristianong kongregasyon. Makapasubo nga ang aton mga kaupdanan anay nagbiya kay Jehova, kag handum gid naton nga padayon nga buligan ang tagsa ka “nadula nga karnero” nga makabalik sa panong. (Salmo 119:176; Roma 15:1) Walay sapayan sini, ining magkatuhay nga kahimtangan—ang iban nagpabilin nga matutom samtang ang iban nagluya sa pagtuo—nagapautwas sing mga pamangkot. Ngaa nahuptan sang madamo nga Saksi ang ila pagtuo sa mga saad ni Jehova samtang nawasi naman ini sang iban? Ano ang mahimo naton sing personal agod mapat-od nga magapabilin nga mabakod ang aton kombiksion nga “ang dakung adlaw ni Jehova” nagapalapit? (Sofonias 1:14) Binagbinagon naton ang isa ka ilustrasyon nga masapwan sa Ebanghelyo ni Lucas.

Isa ka Paandam Para sa mga Nagakabuhi “Kon Mag-abot ang Anak Sang Tawo”

3. Sin-o ilabi na ang magabenepisyo gikan sa ilustrasyon tuhoy sa balo kag hukom, kag ngaa?

³ Sa Lucas kapitulo 18, masapwan naton ang ilustrasyon ni Jesus tuhoy sa balo kag sa hukom. Kaanggid ini sa ilustrasyon tuhoy sa isa ka mapiliton nga tagbalay, nga ginbinagbinag naton sa nagligad nga artikulo. (Lucas 11:5-13) Apang, ginapakita sang konteksto sang dinalan sa Biblia nga nagasugid sang ilustrasyon tuhoy sa balo kag sa hukom nga naaplikar ini ilabi na sa mga nagakabuhi “kon mag-abot ang Anak sang tawo” sa paggahom sa Ginharian, sa hut-ong sang tion nga nagsugod sang 1914.—Lucas 18:8. *

4. Ano ang ginbinagbinag ni Jesus antes niya ginsaysay ang ilustrasyon nga masapwan sa Lucas kapitulo 18?

⁴ Antes ginsaysay ni Jesus ang ilustrasyon, nagsiling sia nga ang pamatuod sang iya presensia sa paggahom sa Ginharian lapnag nga makita “subong sang kilat” nga “nagapasanag sa isa ka  bahin sang langit tubtob sa isa pa ka bahin sini.” (Lucas 17:24; 21:10, 29-33) Walay sapayan, ang kalabanan nga mga tawo nga nagakabuhi sa “tion sang katapusan” indi magtalupangod sa sinang maathag nga ebidensia. (Daniel 12:4) Ngaa? Bangod kaangay sang mga tawo sang adlaw nanday Noe kag Lot wala sila magsapak sa mga paandam ni Jehova. Sadto ang mga tawo ‘nagakaon, nagainom, nagabakal, nagabaligya, nagatanom, kag nagatukod tubtob sa adlaw nga ginlaglag sila.’ (Lucas 17:26-29) Napatay sila bangod tuman sa ila kasako sa ila kinaandan nga mga hilikuton amo nga wala na sila nagtalupangod sa kabubut-on sang Dios. (Mateo 24:39) Kalabanan nga mga tawo sa karon tuman man kasako sa ila adlaw-adlaw nga mga hilikuton amo nga wala nila makita ang pamatuod nga ang katapusan sining di-diosnon nga kalibutan malapit na.—Lucas 17:30.

5. (a) Sin-o ang ginapaandaman ni Jesus, kag ngaa? (b) Ano ang kabangdanan sang pagkadula sang pagtuo sang iban?

⁵ Maathag nga nagakabalaka si Jesus nga basi ang iya man mga sumulunod matublag sang kalibutan ni Satanas, tubtob sa punto nga mahimo pa nila ‘balikan ang mga butang.’ (Lucas 17:22, 31) Kag sa pagkamatuod natabo ini sa pila ka Cristiano. Tinuig nila nga ginpaabot ang adlaw nga tapuson ni Jehova ining malaut nga kalibutan. Apang, sang wala mag-abot ang Armagedon suno sa tion nga ila ginpaabot, ginluyahan sila sing buot. Ang ila pagsalig nga malapit na ang adlaw sang paghukom ni Jehova nagluya. Nangin di-aktibo sila sa ministeryo kag amat-amat nga nagsako sa kinaandan nga mga hilikuton sang kabuhi amo nga diutay na lamang nga tion ang nabilin para sa espirituwal nga mga butang. (Lucas 8:11, 13, 14) Sang ulihi, ‘ginbalikan nila ang mga butang’—makapasubo gid!

Ang Kinahanglanon nga ‘Magpangamuyo Pirme’

6-8. (a) Isaysay ang ilustrasyon tuhoy sa balo kag hukom. (b) Paano gin-aplikar ni Jesus ini nga ilustrasyon?

⁶ Ano ang himuon naton agod mapat-od nga ang aton malig-on nga pagsalig sa katumanan sang mga saad ni Jehova indi magluya? (Hebreo 3:14) Ginpatuhuyan ni Jesus ina nga pamangkot pagkatapos nga ginpaandaman niya ang mga disipulo nga indi pagbalikan ang malaut nga kalibutan ni Satanas.

⁷ Si Lucas nagreport nga si Jesus ‘nagsugid sa ila sing isa ka ilustrasyon tuhoy sa kinahanglanon nga magpangamuyo sila pirme kag indi magpangampo.’ Si Jesus nagsiling: “Sa isa ka siudad may isa ka hukom nga wala sing kahadlok sa Dios kag wala sing pagtahod sa tawo. Apang may isa ka balo nga babayi sa amo nga siudad nga masunson nga nagakadto sa iya, nga nagasiling, ‘Pat-ura nga makatigayon ako sing katarungan sa akon kasumpong sa kasuguan.’ Sa malawig nga tion indi niya luyag, apang sang ulihi nagsiling sia sa iya kaugalingon, ‘Bisan pa wala ako nagakahadlok sa Dios ukon nagatahod sa tawo, apang bangod padayon ako nga ginagamo sining balo nga babayi, pat-uron ko nga makatigayon sia sing katarungan, agod indi na sia magbalikbalik kag lapyuon gid ako.’”

⁸ Sang masugid ini nga sugilanon, naghimo si Jesus sing aplikasyon: “Pamatii ninyo ang ginsiling sang hukom, bisan pa di-matarong! Kon amo, indi gid bala pahanabuon sang Dios nga mahatagan sing katarungan ang iya mga pinili  nga nagatuaw sa iya sa adlaw kag gab-i, bisan pa daw nagapalantang sia sa pagbulig sa ila? Nagasiling ako sa inyo, Pahanabuon niya sing madasig nga mahatagan sila sing katarungan. Apang, kon mag-abot ang Anak sang tawo, makakita gid bala sia sing pagtuo sa duta?”—Lucas 18:1-8.

“Pat-ura nga Makatigayon Ako sing Katarungan”

9. Ano nga tema ang ginapadaku sa ilustrasyon tuhoy sa balo kag hukom?

⁹ Ang panguna nga tema sining realistiko nga ilustrasyon maathag gid. Ginhinambitan ini sang duha ka indibiduwal sa ilustrasyon kag subong man ni Jesus. Ang balo nakitluoy: “Pat-ura nga makatigayon ako sing katarungan.” Ang hukom nagsiling: “Pat-uron ko nga makatigayon sia sing katarungan.” Si Jesus namangkot: ‘Indi gid bala pahanabuon sang Dios nga mahatag ang katarungan?’ Kag kon tuhoy kay Jehova, si Jesus nagsiling: “Pahanabuon niya sing madasig nga mahatagan sila sing katarungan.” (Lucas 18:3, 5, 7, 8) San-o ilabi na ‘ihatag sang Dios ang katarungan’?

10. (a) San-o ginpadapat ang katarungan sang unang siglo? (b) San-o kag paano ihatag ang katarungan para sa mga alagad sang Dios karon?

¹⁰ Sang unang siglo, ang “mga adlaw sa pagpadapat sing katarungan” (ukon, “mga adlaw sang pagtimalos,” Kingdom Interlinear) nag-abot sang 70 C.E. sang ginlaglag ang Jerusalem kag ang templo sini. (Lucas 21:22) Para sa katawhan sang Dios karon, ihatag ang katarungan sa “dakung adlaw ni Jehova.” (Sofonias 1:14; Mateo 24:21) Sa sina nga tion, ‘balusan ni Jehova sing kapipit-an ang mga nagahatag sing kapipit-an’ sa iya katawhan “samtang ginatimalusan [ni Jesucristo] ang mga wala nagakilala sa Dios kag ang mga wala nagatuman sa maayong balita tuhoy sa aton Ginuong Jesus.”—2 Tesalonica 1:6-8; Roma 12:19.

11. Sa anong paagi nga ang katarungan magaabot sing “madasig”?

¹¹ Apang, paano naton hangpon ang pasalig ni Jesus nga ihatag ni Jehova ang katarungan sing “madasig”? Ginapakita sang Pulong sang Dios nga “bisan pa daw nagapalantang [si Jehova],” ipadapat niya sing madasig ang katarungan kon mag-abot na ang sibu nga tion. (Lucas 18:7, 8; 2 Pedro 3:9, 10) Sang adlaw ni Noe, sang mag-abot ang Anaw, ginlaglag gilayon ang mga malauton. Sing kaanggid, sang adlaw ni Lot, sang mag-ulan sing kalayo gikan sa langit, nalaglag ang mga malauton. Si Jesus nagsiling: “Mangin amo man sini sa adlaw nga ipahayag ang Anak sang tawo.” (Lucas 17:27-30) Sa liwat, maeksperiensiahan sang mga malauton ang “hinali nga kalaglagan.” (1 Tesalonica 5:2, 3) Sa pagkamatuod, makasalig gid kita nga indi pagtugutan ni Jehova ang kalibutan ni Satanas nga maglawig pa sangsa ginapatuman sang katarungan.

‘Pahanabuon Niya nga Mahatag ang Katarungan’

12, 13. (a) Ano nga leksion ang ginatudlo sang ilustrasyon ni Jesus tuhoy sa balo kag hukom? (b) Ngaa mapat-od naton nga pamatian ni Jehova ang aton mga pangamuyo kag ihatag ang katarungan?

¹² Ang ilustrasyon ni Jesus tuhoy sa balo kag hukom nagapadaku sing pila pa ka importante nga kamatuoran. Sa pag-aplikar sa ilustrasyon, si Jesus nagsiling: “Pamatii ninyo ang ginsiling sang hukom, bisan pa di-matarong! Kon amo, indi gid bala pahanabuon sang Dios nga mahatagan sing katarungan ang iya mga pinili?” Matuod, wala ginapaanggid ni Jesus si Jehova sa hukom nga daw subong bala nga ang Dios magatratar sa mga tumuluo sa amo man nga paagi. Sa baylo, gintudluan ni Jesus ang iya mga sumulunod sing leksion tuhoy kay Jehova paagi sa pagpadaku sang kinatuhayan sang hukom kag sang Dios. Sa ano nga mga butang sila magkatuhay?

¹³ Ang hukom sa ilustrasyon ni Jesus “di-matarong,” samtang “ang Dios matarong nga Hukom.” (Salmo 7:11; 33:5) Ang hukom wala gid sing personal nga interes sa balo, apang si Jehova interesado gid sa tagsa ka indibiduwal. (2 Cronica 6:29, 30) Ang hukom indi handa nga buligan ang balo, apang si Jehova handa—huo, nalangkag—nga buligan ang mga nagaalagad sa Iya. (Isaias 30:18, 19) Ano ang leksion? Kon ang di-matarong nga hukom nagpamati sa pangabay sang balo kag naghatag sa iya sing katarungan, labi pa gid nga pamatian ni Jehova ang mga  pangamuyo sang iya katawhan kag ihatag sa ila ang katarungan!—Hulubaton 15:29.

14. Ngaa indi kita dapat madulaan sing pagtuo sa nagapakari nga adlaw sang paghukom sang Dios?

¹⁴ Busa, ang mga nadulaan sing pagtuo sa nagapakari nga adlaw sang paghukom sang Dios nakasala sing daku. Ngaa? Paagi sa pagsikway sang ila malig-on nga pagpati nga “ang dakung adlaw ni Jehova,” malapit na, ginapakita nila nga ginaduhaduhaan nila ang pagkamasaligan ni Jehova sa pagtuman sang iya mga saad. Apang wala gid sing makatarunganon nga makaduhaduha sa katutom sang Dios. (Job 9:12) Ang nagakaigo nga pamangkot amo, Kita bala sing personal magapabilin nga matutom? Kag amo gid ini nga topiko ang ginpautwas ni Jesus sa ulihi nga bahin sang ilustrasyon tuhoy sa balo kag hukom.

“Makakita Gid Bala Sia Sing Pagtuo sa Duta?”

15. (a) Ano ang ginpamangkot ni Jesus, kag ngaa? (b) Ano ang dapat naton ipamangkot sa aton kaugalingon?

¹⁵ Si Jesus may makapainteres nga pamangkot: “Kon mag-abot ang Anak sang tawo, makakita gid bala sia sing pagtuo sa duta?” (Lucas 18:8) Ang ekspresyon nga “pagtuo” nagapakita nga ginpatuhuyan ni Jesus, indi ang pagtuo sa kabilugan, kundi ang pagtuo nga kaangay sa iya sang balo. Wala ginsabat ni Jesus ang iya pamangkot. Ginpamangkot niya ini agod nga ang iya mga disipulo maghunahuna tuhoy sa kalidad sang ila mismo pagtuo. Amat-amat bala ini nga nagaluya, amo nga yara sila sa katalagman nga balikan ang mga butang? Ukon may yara bala sila pagtuo nga kaangay sa ginpakita sang balo? Dapat man naton karon pamangkuton ang aton kaugalingon, ‘Ano nga sahi sang pagtuo ang masapwan sang “Anak sang tawo” sa akon tagipusuon?’

16. Ano nga sahi sang pagtuo ang yara sa balo?

¹⁶ Agod matigayon naton ang katarungan ni Jehova, dapat naton sundon ang ginhimo sang balo. Ano nga sahi sang pagtuo ang yara sa iya? Ginpakita niya ang iya pagtuo paagi sa padayon nga “pagkadto [sa hukom], nga nagasiling, ‘Pat-ura nga makatigayon ako sing katarungan.’” Ining balo nagpamilit agod makabaton sing katarungan gikan sa di-matarong nga tawo. Sing kaanggid, makasalig man ang mga alagad sang Dios karon nga makabaton sila sing katarungan ni Jehova—bisan pa nagakinahanglan ini sing kapin pa nga tion sangsa ginapaabot nila. Dugang pa, ginapakita nila ang ila pagsalig sa mga saad sang Dios paagi sa padayon nga pagpangamuyo—huo, paagi sa ‘pagtuaw kay Jehova sa adlaw kag gab-i.’ (Lucas 18:7) Sa pagkamatuod, kon ang isa ka Cristiano mag-untat sa pagpangamuyo nga ihatag ang katarungan, ginapakita niya nga nadula niya ang iya pagsalig nga si Jehova magahikot para sa iya mga alagad.

17. Ano ang aton mga rason nga magpadayon sa pangamuyo kag huptan ang aton pagtuo sa pat-od nga pagkari sang adlaw sang paghukom ni Jehova?

¹⁷ Ginapakita sang kahimtangan sadto nga balo nga may rason gid kita nga magpadayon sa pagpangamuyo. Binagbinaga ang pila ka kinatuhayan sang iya sitwasyon kag sang aton. Ang balo padayon nga nagapalapit sa hukom bisan pa nga wala gid sing nagapalig-on sa iya nga himuon ini, apang ang Pulong sang Dios nagahatag sa aton sing daku nga pagpalig-on nga “magpadayon sa pangamuyo.” (Roma 12:12) Wala sing pasalig ang balo nga ang iya mga pangabay ihatag, apang si Jehova nagapasalig sa aton nga ipadapat niya ang katarungan. Paagi sa iya manalagna, si Jehova nagsiling: “Bisan pa magpalantang ini, padayon nga paabuta ini; kay pat-od nga magaabot ini. Indi ini magpalantang.” (Habacuc 2:3; Salmo 97:10) Ang balo wala sing kabulig nga magapakitluoy para sa iya agod mahatagan sing dugang nga puersa ang iya pangabay. Apang may gamhanan  kita nga kabulig, si Jesus “nga yara sa tuo sang Dios, nga nagapakiluoy man para sa aton.” (Roma 8:34; Hebreo 7:25) Busa, kon ang balo, walay sapayan sang iya mabudlay nga kahimtangan, padayon nga nagpakiluoy sa hukom nga nagalaum nga mahatag ang katarungan, labi pa gid nga dapat naton huptan ang aton pagtuo sa pat-od nga pagkari sang adlaw sang paghukom ni Jehova!

18. Paano ang pangamuyo nagapabakod sang aton pagtuo kag nagabulig sa aton nga makabaton sing katarungan?

¹⁸ Ang ilustrasyon tuhoy sa balo nagatudlo sa aton nga ang pangamuyo naangot gid sa pagtuo kag nga ang aton padayon nga pagpangamuyo makabato sa mga impluwensia nga makapaluya sa aton pagtuo. Sa pagkamatuod, wala ini nagakahulugan nga ang pakitakita nga pagpangamuyo solusyon batok sa pagkadula sang pagtuo. (Mateo 6:7, 8) Kon nagapangamuyo kita bangod narealisar naton nga nagasandig gid kita sing bug-os sa Dios, nian ang pangamuyo nagapasuod sa aton sa Dios kag nagapabakod sang aton pagtuo. Kag bangod ang pagtuo kinahanglanon para sa kaluwasan, indi katingalahan nga nahibaluan ni Jesus nga kinahanglan niya palig-unon ang iya mga disipulo nga “magpangamuyo sila pirme kag indi magpangampo”! (Lucas 18:1; 2 Tesalonica 3:13) Matuod nga ang “dakung adlaw ni Jehova” wala nasandig sa aton mga pangamuyo—magaabot ini pangamuyuon man naton ini ukon indi. Apang, nasandig gid sa aton pagtuo kag sa aton mapinangamuyuon nga dalanon kon bala makabaton kita sing katarungan kag makalampuwas sa inaway sang Dios ukon indi.

19. Paano naton ginapamatud-an nga nagapati gid kita nga ‘pahanabuon sang Dios nga mahatag ang katarungan’?

¹⁹ Subong sang madumduman naton, si Jesus namangkot: “Kon mag-abot ang Anak sang tawo, makakita gid bala sia sing pagtuo sa duta?” Ano ang sabat sa iya makapainteres nga pamangkot? Malipayon gid kita nga minilyon ka matutom nga alagad ni Jehova sa bug-os nga duta karon ang nagapamatuod paagi sa ila mga pangamuyo, pagpailob, kag pagbatas nga may amo sila sini nga pagtuo. Busa, ang pamangkot ni Jesus masabat gid sing positibo. Huo, walay sapayan sang mga inhustisya nga ginapahanabo sang kalibutan ni Satanas sa aton karon, nagapati gid kita nga “pahanabuon sang Dios nga mahatagan sing katarungan ang iya mga pinili.”

[Nota]

Madumduman Mo Bala?

• Ano ang kabangdanan sang pagkadula sang pagtuo sang pila ka Cristiano?

• Ngaa may malig-on kita nga pagtuo sa nagapakari nga adlaw sang paghukom ni Jehova?

• Ano ang aton mga rason sa pagpadayon sa pagpangamuyo?

• Paano makabulig ang padayon nga pagpangamuyo agod indi naton madula ang aton pagtuo?

[Mga Pamangkot sa Pagtinuon]

[Retrato sa pahina 26]

Ano ang ginpadaku sang ilustrasyon tuhoy sa balo kag sa hukom?

[Mga retrato sa pahina 29]

Minilyon karon ang nagapati gid nga ‘pahanabuon sang Dios nga mahatag ang katarungan’