“Ang Nahauna nga Pagkabanhaw”​—Nagakahanabo Na!

“Ang mga napatay nga nahiusa kay Cristo una nga mabanhaw.”—1 TESALONICA 4:16.

1, 2. (a) Ano ang paglaum para sa mga napatay? (b) Ano ang sadsaran sang imo pagpati sa pagkabanhaw? (Tan-awa ang footnote.)

“ANG mga buhi nakahibalo nga mapatay sila.” Nangin matuod ini sugod sang nagpakasala si Adan. Sa bug-os nga maragtas, nahibaluan sang kada isa nga sa ulihi mapatay sia, kag madamo ang nagapalibog: ‘Ano dayon ang matabo? Ano ang kahimtangan sang mga patay?’ Ang Biblia nagasabat: “Nahanungod sa mga patay, wala sila makahibalo sing bisan ano.”—Manugwali 9:5.

² Kon amo, may paglaum pa bala ang mga napatay? Huo. Sa katunayan, may yara paglaum para sa mga napatay kon matuman ang orihinal nga katuyuan sang Dios para sa katawhan. Sa sulod sang mga siglo, ang mainunungon nga mga alagad sang Dios nagpakita sing pagtuo sa saad ni Jehova tuhoy sa isa ka Binhi nga magalaglag kay Satanas kag magadula sang halit nga iya  ginhimo. (Genesis 3:15) Kalabanan sini sa ila patay na. Agod makita nila ang katumanan sini nga saad kag ang iban pa nga saad ni Jehova, dapat banhawon sila. (Hebreo 11:13) May pagkabanhaw gid bala? Huo, posible gid ina. Si apostol Pablo nagsiling: “May pagkabanhaw sang mga matarong kag mga di-matarong.” (Binuhatan 24:15) Ginbanhaw anay ni Pablo ang pamatan-on nga si Eutico, nga nahulog sa bintana gikan sa ikatlo nga panalgan kag “patay na sang ginhakwat.” Amo ini ang katapusan sa siam ka pagkabanhaw nga narekord sa Biblia.—Binuhatan 20:7-12. *

3. Ano nga paumpaw ang natigayon mo gikan sa pinamulong ni Jesus nga narekord sa Juan 5:28, 29?

³ Ining siam ka ginbanhaw nagaaman sing sadsaran agod patihan ang pinamulong ni Pablo. Ginapabakod sini ang aton pagtuo sa pasalig ni Jesus: “Magaabot ang tion nga ang tanan nga yara sa handumanan nga mga lulubngan makabati sang tingog [ni Jesus] kag magagua.” (Juan 5:28, 29) Makapalig-on gid nga mga pulong! Kag daw ano ka makapaumpaw para sa minilyon nga namatyan sang ila mga hinigugma!

4, 5. Anong tuhay nga pagkabanhaw ang ginsambit sa Biblia, kag ano ang pagabinagbinagon sa sini nga artikulo?

⁴ Ang kalabanan sang mga ginbanhaw magapuyo liwat sa mahidaiton nga duta sa idalom sang Ginharian sang Dios. (Salmo 37:10, 11, 29; Isaias 11:6-9; 35:5, 6; 65:21-23) Apang, ang iban nga pagkabanhaw mahanabo antes sini. Una, banhawon si Jesucristo agod ipresentar ang balor sang iya halad sa Dios tungod sa aton. Si Jesus napatay kag ginbanhaw sang 33 C.E.

⁵ Masunod, ang hinaplas nga mga katapo sang “Israel sang Dios” dapat magaupod kay Ginuong Jesucristo sa langitnon nga himaya, diin ‘mangin kaupod sila pirme sang Ginuo.’ (Galacia 6:16; 1 Tesalonica 4:17) Ini nga hitabo gintawag nga “mas temprano nga pagkabanhaw” ukon “nahauna nga pagkabanhaw.” (Filipos 3:10, 11; Bugna 20:6) Kon matapos na ini nga pagkabanhaw, malapit na ang tion nga banhawon ang minilyon sa duta nga may paglaum nga matigayon ang kabuhi nga walay katapusan  sa Paraiso. Gani, sa langit man ukon sa duta ang aton paglaum, interesado gid kita sa “nahauna nga pagkabanhaw.” Ano ini nga sahi sang pagkabanhaw? San-o ini natabo?

“Sa Ano nga Sahi sang Lawas?”

6, 7. (a) Ano ang dapat matabo antes makapalangit ang hinaplas nga mga Cristiano? (b) Sa ano nga sahi sang lawas sila banhawon?

⁶ Sa iya una nga sulat sa mga taga-Corinto, namangkot si Pablo tuhoy sa nahauna nga pagkabanhaw: “Paano banhawon ang mga patay? Huo, sa ano nga sahi sang lawas sila magabalik?” Nian, ginsabat niya ang iya pamangkot: “Ang imo ginsab-ug indi mabuhi kon indi anay ini mapatay . . . apang ginahatagan ini sang Dios sing lawas suno sa nahamut-an niya . . . Ang himaya sang langitnon nga mga lawas isa ka sahi, kag tuhay naman ang himaya sang dutan-on nga mga lawas.”—1 Corinto 15:35-40.

⁷ Ginapakita sang pinamulong ni Pablo nga ang mga Cristiano nga ginhaplas sang balaan nga espiritu dapat mapatay antes nila mabaton ang ila padya sa langit. Kon mapatay sila, ang ila dutan-on nga lawas nagabalik sa yab-ok. (Genesis 3:19) Sa gintangdo nga tion sang Dios, banhawon sila nga may isa ka sahi sang lawas nga nagakabagay sa langitnon nga kabuhi. (1 Juan 3:2) Ginhatagan man sila sang Dios sing pagkadimamalatyon. Indi ini isa ka butang nga natigayon nila sugod sa pagkabun-ag, nga daw subong bala nga ang di-mamalatyon nga kalag ginhuyop sa ila. “Ini nga mamalatyon dapat magsuklob sing pagkadimamalatyon,” siling ni Pablo. Ang pagkadimamalatyon isa ka regalo halin sa Dios, nga ‘ginasuklob’ sang mga nagapakig-ambit sa nahauna nga pagkabanhaw.—1 Corinto 15:50, 53; Genesis 2:7; 2 Corinto 5:1, 2, 8.

8. Paano naton nahibaluan nga wala nagpili ang Dios sing 144,000 gikan sa katapo sang nanuhaytuhay nga relihion?

⁸ Ang 144,000 lamang ang nakabaton sing nahauna nga pagkabanhaw. Ginsugdan ni Jehova ang pagpili sa ila sang Pentecostes 33 C.E., wala madugay pagkatapos nga ginbanhaw niya si Jesus. Tanan sila may “ngalan [ni Jesus] kag ngalan sang iya Amay nga nasulat sa ila agtang.” (Bugna 14:1, 3) Busa, wala sila ginpili gikan sa nanuhaytuhay nga relihion. Tanan sila mga sumulunod ni Cristo, kag tanan sila may pagpabugal kag dungog nga nagadala sang ngalan sang Amay—si Jehova. Kon banhawon sila, mabaton nila ang ila hilikuton sa langit. Ang paglaum nga alagaron ang Dios sa sining direkta nga paagi makakulunyag gid sa ila.

Nagakahanabo Na?

9. Paano ang Bugna 12:7 kag 17:14 nagabulig sa aton nga mabantabanta ang tion kon san-o nagsugod ang nahauna nga pagkabanhaw?

⁹ San-o natabo ang nahauna nga pagkabanhaw? May mabakod nga pamatuod nga nagakahanabo na ini. Halimbawa, ipaanggid ang duha ka kapitulo sang Bugna. Una, tan-awa ang Bugna kapitulo 12. Diri aton mabasa nga ang bag-o naglingkod nga si Jesucristo upod sa iya balaan nga mga anghel, nagpakig-away batok kay Satanas kag sa iya mga demonyo. (Bugna 12:7-9) Subong sang masami nga ginapakita sini nga magasin, ini nga inaway nagsugod sang 1914. * Apang, talupangda nga indi kaupod ni Jesus sa sining langitnon nga inaway ang hinaplas nga mga sumulunod ni Cristo. Karon, tan-awa ang kapitulo 17 sang Bugna. Aton mabasa diri nga pagkatapos sang kalaglagan sang “Babilonia nga Daku,” daugon sang Kordero ang mga pungsod. Nian, nagdugang pa ini: “Subong man, ang mga gintawag kag pinili kag matutom nga kaupod niya magadaug man.” (Bugna 17:5, 14) Dapat nga nabanhaw na ang mga “gintawag kag pinili kag matutom” agod nga makaupod sila ni Jesus sa katapusan nga kalaglagan sang kalibutan ni Satanas. Gani, makatarunganon lamang nga ang mga hinaplas nga napatay antes sang Armagedon banhawon sa ulot sang 1914 kag Armagedon.

10, 11. (a) Sin-o ang 24 ka gulang, kag ano ang ginpahayag sang isa sa ila kay Juan? (b) Ano ang mahinakop naton sa sini?

¹⁰ Masiling bala naton sing espesipiko pa gid kon san-o nagsugod ang nahauna nga pagkabanhaw? Ang isa ka makawiwili nga ideya masapwan sa Bugna 7:9-15, diin ginlaragway ni apostol Juan  ang iya palanan-awon sang “isa ka dakung kadam-an, nga wala gid sing tawo nga makaisip.” Ang identidad sining dakung kadam-an ginsugid kay Juan sang isa sa 24 ka gulang, kag ining mga gulang nagarepresentar sa 144,000 ka kaupod nga mga manunubli ni Cristo sa ila langitnon nga himaya. * (Lucas 22:28-30; Bugna 4:4) Si Juan mismo may langitnon nga paglaum; apang sanglit tawo pa sia sa duta sang nakighambal ang gulang sa iya, sa palanan-awon ginarepresentar ni Juan ang mga hinaplas sa duta nga wala pa makabaton sang ila langitnon nga padya.

¹¹ Ano nian, ang aton mahinakop gikan sa katunayan nga ginpakilala sang isa sa 24 ka gulang ang dakung kadam-an kay Juan? Ang mga ginbanhaw sa 24 ka gulang nga grupo mahimo nga nadalahig sa pagpahibalo sang mga kamatuoran sang Dios karon. Ngaa importante ini? Bangod ang husto nga identidad sang dakung kadam-an ginpahayag sa hinaplas nga mga alagad sang Dios sa duta sang 1935. Kon ang isa sa 24 ka gulang gingamit agod ipaalinton ang importante nga kamatuoran, nabanhaw na sia antes sang 1935. Nagapakita ini nga ang nahauna nga pagkabanhaw nagsugod sa ulot sang 1914 kag 1935. May yara bala espesipiko gid nga tion?

12. Ipaathag kon ngaa ang tigpamulak sang 1918 mahimo kabigon subong posible nga tion sang pagsugod sang nahauna nga pagkabanhaw.

¹² Sa sini nga punto, maayo nga binagbinagon ang mga hitabo sa Biblia nga ginatamod nga magkaanggid. Si Jesucristo gintangdo subong palaabuton nga Hari sang Ginharian sang Dios sang tigragas sang 29 C.E. Tatlo ka tuig kag tunga sang ulihi, sang tigpamulak sang 33 C.E., ginbanhaw sia subong isa ka gamhanan nga espiritu nga persona. Masiling bala nga sanglit ginpalingkod si Jesus sang tigragas sang 1914, ang pagkabanhaw sang iya matutom nga hinaplas nga mga sumulunod nagsugod tatlo ka tuig kag tunga sang ulihi, sang tigpamulak sang 1918? Isa ini ka makawiwili nga posibilidad. Bisan pa nga indi ini direkta nga mapamatud-an sa Biblia, nahisuno ini sa iban pa nga teksto nga nagapakita nga nagakahanabo na ang nahauna nga pagkabanhaw wala madugay pagkatapos nga nagsugod ang presensia ni Cristo.

13. Paano ginapahangop sang 1 Tesalonica 4:15-17 nga ang nahauna nga pagkabanhaw nahanabo sa maaga nga bahin sang presensia ni Cristo?

¹³ Halimbawa, si Pablo nagsulat: “Kita nga buhi nga nabilin tubtob sa presensia sang Ginuo [indi, sa katapusan sang iya presensia] indi gid mag-una sa mga nagtulog na sa kamatayon; bangod ang Ginuo mismo magapanaug gikan sa langit nga may mabaskog nga pagmando, nga may tingog sang arkanghel kag may trumpeta sang Dios, kag ang mga napatay nga nahiusa kay Cristo una nga mabanhaw. Pagkatapos, kita nga buhi nga nabilin sabniton sing tingob upod sa ila sa mga panganod agod sugataon ang Ginuo sa kahanginan; kag sa amo mangin kaupod kita pirme sang Ginuo.” (1 Tesalonica 4:15-17) Busa, ang hinaplas nga mga Cristiano nga napatay antes sang presensia ni Cristo una nga ginbanhaw sa langitnon nga kabuhi sangsa mga buhi pa sa tion sang presensia ni Cristo. Nagakahulugan ini nga ang nahauna nga pagkabanhaw mahimo nagsugod sa maaga nga bahin sang presensia ni Cristo, kag nagapadayon ini “sa tion sang iya presensia.” (1 Corinto 15:23) Sa baylo nga banhawon sing tingob, ang nahauna nga pagkabanhaw mahanabo sa sulod sang isa ka hut-ong sang tion.

“Ang Kada Isa sa Ila Ginhatagan sing Puti nga Malaba nga Panapton”

14. (a) San-o matuman ang mga palanan-awon nga narekord sa Bugna kapitulo 6? (b) Ano ang ginalaragway sa Bugna 6:9?

¹⁴ Binagbinaga man ang pamatuod nga makita sa Bugna kapitulo 6. Ginalaragway diri si Jesus nga nagasakay subong isa ka mandadaug nga Hari. (Bugna 6:2) Ang mga pungsod nadalahig sa pagpakig-away sa tuman nga kasangkaron. (Bugna 6:4) May yara lapnag nga tiggulutom. (Bugna 6:5, 6) Ang makamamatay nga mga kalalat-an nagahalit sa katawhan. (Bugna 6:8) Tanan ining gintagna nga mga hitabo nagabagay gid sa mga kahimtangan sa kalibutan sugod sang 1914. Apang isa pa ka butang ang nagakatabo. Ang aton igtalupangod ginpatuhoy sa halaran. Sa idalom  sini yara “ang mga kalag sang mga ginpamatay bangod sa pulong sang Dios kag bangod sa pagpanaksi nga ila ginhimo.” (Bugna 6:9) Sanglit “ang kalag [ukon, kabuhi] sang unod yara sa dugo,” ang ginarepresentar sang yara sa tiilan sang halaran amo ang dugo sang matutom nga mga alagad ni Jesus nga ginpamatay bangod sang ila maisog kag makugi nga pagpanaksi.—Levitico 17:11.

15, 16. Ipaathag kon ngaa ang pinamulong sang Bugna 6:10, 11 nagapatuhoy sa nahauna nga pagkabanhaw.

¹⁵ Kaangay sang dugo sang matarong nga si Abel, ang dugo sining Cristianong mga martir nagasinggit sing katarungan. (Genesis 4:10) “Nagsinggit sila sa mabaskog nga tingog, nga nagasiling: ‘Soberanong Ginuo nga balaan kag matuod, tubtob san-o nga magpugong ka sa paghukom kag sa pagtimalos sang amon dugo batok sa mga nagapuyo sa duta?’” Ano dayon ang natabo? “Ang kada isa sa ila ginhatagan sing puti nga malaba nga panapton; kag ginsilingan sila nga magpahuway sa malip-ot pa nga tion, tubtob makompleto man ang kadamuon sang ila mga masigkaulipon kag mga kauturan nga malapit na patyon kaangay man sa ila.”—Bugna 6:10, 11.

¹⁶ Ginhatag bala ining puti nga malaba nga panapton sa nagadanaw nga dugo nga nahamtang sa tiilan sang halaran? Wala! Ang mga panapton ginhatag sa mga indibiduwal nga ang dugo ginpatulo sing malaragwayon sa halaran. Ginhalad nila ang ila kabuhi sa ngalan ni Jesus kag ginbanhaw na karon subong mga espiritu. Paano naton nahibaluan? Sa nauna nga bahin sang tulun-an sang Bugna, aton mabasa: “Sia nga nagadaug magasuksok sing puti nga mga panapton; kag indi ko gid pagpanason ang iya ngalan sa libro sang kabuhi. Dumduma man nga ang 24 ka gulang “nagasuksok sing puti nga mga panapton, kag sa ila ulo may bulawan nga korona.” (Bugna 3:5; 4:4) Gani, pagkatapos nga hapayon sang inaway, gutom, kag peste ang duta, ang mga katapo sang 144,000 nga napatay, nga ginarepresentar sang dugo sa tiilan sang halaran, ginbanhaw sa langitnon nga kabuhi kag simbuliko nga napanaptan sing puti nga malaba nga mga panapton.

17. Sa anong paagi “magapahuway” ang mga nakabaton sing puti nga malaba nga mga panapton?

¹⁷ Ang mga bag-o ginbanhaw dapat “magpahuway.” Dapat nila hulaton sing mapailubon ang adlaw sang pagtimalos sang Dios. Ang ila “masigkaulipon,” nga hinaplas nga mga Cristiano nga yari pa sa duta, dapat pa magpamatuod sang ila integridad sa idalom sang pagtilaw. Kon mag-abot na ang tion sang paghukom sang Dios, ang ‘pagpahuway’ matapos na. (Bugna 7:3) Sa sina nga tion, ang mga ginbanhaw magabuylog kay Ginuong Jesucristo sa paglaglag sa mga malauton, lakip na sa mga nagpatulo sang dugo sang walay sala nga mga Cristiano.—2 Tesalonica 1:7-10.

 Kon Ano ang Kahulugan Sini Para sa Aton

18, 19. (a) Sa anong mga rason nga mahinakop mo nga ang nahauna nga pagkabanhaw nagakahanabo na? (b) Ano ang imo balatyagon sa imo nahangpan sa nahauna nga pagkabanhaw?

¹⁸ Wala ginbuyagyag sang Pulong sang Dios ang espesipiko nga petsa sang nahauna nga pagkabanhaw, apang ginpahayag sini nga nahanabo ini sa sulod sang hut-ong sang tion, sa tion sang presensia ni Cristo. Ang una nga pagabanhawon amo ang hinaplas nga mga Cristiano nga napatay antes magsugod ang presensia ni Cristo. Samtang nagapadayon ang presensia ni Cristo, ang hinaplas nga mga Cristiano nga matutom nga nagtapos sang ila dutan-on nga kabuhi pagabayluhan “sa isa ka pisok sang mata” pakadto sa gamhanan nga espiritu nga mga tinuga. (1 Corinto 15:52) Mabaton bala sang tanan nga hinaplas ang ila langitnon nga padya antes sang inaway sa Armagedon? Wala kita makahibalo. Apang, nahibaluan naton nga sa gintalana nga tion sang Dios, ang tanan nga 144,000 makita nga nagatindog sa langitnon nga Bukid Sion.

¹⁹ Nahibaluan man naton nga ang kalabanan sang 144,000 kaupod na ni Cristo karon. Pila na lamang ang nabilin sa duta. Isa gid ini ka mabakod nga pamatuod nga ang tion sang pagpadapat sang paghukom sang Dios madasig nga nagahilapit! Sa dili madugay, pagalaglagon ang bug-os kalibutan nga sistema ni Satanas. Si Satanas mismo itagbong sa kadadalman. Dayon, ang kabilugan nga pagkabanhaw magasugod, kag pasad sa halad gawad ni Jesus, ang matutom nga mga tawo sarang mabayaw sa kahimpitan nga kaanggid sa gindula ni Adan. Ang tagna ni Jehova nga narekord sa Genesis 3:15 makalilipay nga matuman. Isa gid ka daku nga pribilehiyo nga mabuhi sa sini nga tion!

[Mga nota]

Mapaathag Mo Bala?

Paano ang masunod nga mga teksto nagabulig sa aton nga mahangpan kon san-o nagsugod “ang nahauna nga pagkabanhaw”?

• Bugna 12:7; 17:14

• Bugna 7:13, 14

• 1 Corinto 15:23; 1 Tesalonica 4:15-17

• Bugna 6:2, 9-11

[Mga Pamangkot sa Pagtinuon]

[Mga Piktyur sa pahina 26]

Ano nga pagkabanhaw ang mahanabo antes banhawon ang katawhan sa kabilugan?

[Piktyur sa pahina 29]

Sa anong paagi ang isa ka maputi nga malaba nga panapton ginhatag sa pila nga nagtulog sa kamatayon?