Kon Paano Ka Mangin Madinalag-on
Kon Paano Ka Mangin Madinalag-on
SUBONG nga ginaatipan sang mga ginikanan ang ila kabataan kag luyag nila nga magmadinalag-on ang mga ini, ginaatipan man kita sang aton langitnon nga Amay kag luyag niya nga magmadinalag-on kita. Agod ipakita ang iya mahigugmaon nga pag-ulikid, nag-aman sia sing madamo nga impormasyon tuhoy sa kadalag-an kag kapaslawan. Ang matuod, sang ginpatuhuyan sini ang tawo nga nagatalupangod sa ginasiling sang Dios, ang Biblia nagapasalig: “Ang tanan nga ginahimo niya magamadinalag-on.”—Salmo 1:3.
Kon matuod ini, ngaa madamo nga tawo ang indi madinalag-on, malipayon, kag kontento sa ila kabuhi? Ang pagbinagbinag sa sini nga salmo magahatag sa aton sing sabat kag magabulig sa aton nga magmadinalag-on.
“Laygay sang mga Malauton”
Ang salmista nagapaandam sa katalagman sang paglakat sa “laygay sang mga malauton.” (Salmo 1:1) Ang panguna nga “malauton” amo si Satanas nga Yawa. (Mateo 6:13) Ginasugiran kita sang Kasulatan nga sia “ang manuggahom sini nga kalibutan” kag nga “ang bug-os nga kalibutan yara sa gahom sang isa nga malauton.” (Juan 16:11; 1 Juan 5:19) Busa, indi makapakibot nga kalabanan nga laygay nga mabatian sa kalibutan nagapakita sang panghunahuna sinang isa nga malauton.
Ano nga sahi sang laygay ang ginahatag sang mga malauton? Sa masami, ginatamay sang mga malauton ang Dios. (Salmo 10:13) Ang ila laygay nga nagatamay ukon wala nagasapak sa Dios, lapnag kaayo. Ginapasanyog sang katilingban karon “ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa.” (1 Juan 2:16) Ginapaulanan kita sang media sing materyalistiko nga pilosopiya nga “pagustuhi ang imo kaugalingon sang tanan mo nga luyag.” Sa bug-os nga kalibutan, ang mga kompanya nagagasto sing kapin sa 500 bilyones dolyares (U.S.) kada tuig sa pasayod agod ganyaton ang mga tawo nga magbakal sang ila mga produkto—kinahanglan man ini sang mga kostumer ukon indi. Kag ini nga mga pasayod nag-apektar indi lamang sa batasan sa pagbakal sang mga tawo. Ginpatiko pa sini ang pagtamod sang kalibutan tuhoy sa kadalag-an.
Bangod sini, bisan pa madamo sa karon ang nagapanag-iya sang mga butang nga sang nagligad nga tinuig ginahandum lang, wala gihapon sila sing kaayawan para sa dugang pa nga pagkabutang. Ang panimuot amo nga kon wala ka sining mga butang, indi ka malipayon ukon madinalag-on. Ini nga panghunahuna indi matuod kag “wala maghalin sa Amay, kundi naghalin sa kalibutan.”—1 Juan 2:16.
Nahibaluan sang aton Manunuga kon ano ang makahatag sa aton sing matuod nga kadalag-an. Ang iya laygay tuhay sa “laygay sang mga malauton.” Gani, ang pagpanikasog nga kahamut-an sang Dios samtang nagalakat sa dalanon padulong sa kadalag-an sini nga kalibutan kaangay sa pagpanikasog nga maglakat sa duha ka magkatuhay nga dalan sing dungan. Imposible gid ini. Indi katingalahan nga ang Biblia nagpaandam: “Dili kamo magpauyon sa sining kalibutan”!—Roma 12:2, Ang Biblia, PBS.
Indi Ka Magpadihon sa Kalibutan
Ang kalibutan nga ginaimpluwensiahan ni Satanas daw interesado sa imo kaayuhan. Apang, dapat kita maghalong. Dumduma nga makagod nga ginlimbungan ni Satanas ang una nga babayi nga si Eva agod makuha ang iya luyag. Nian gingamit niya si Eva agod impluwensiahan si Adan nga magpakasala. Sa karon, ginagamit man ni Satanas ang mga tawo agod mahimo ang iya malaut nga pahito.
Halimbawa, si David nga ginsambit sa nauna nga artikulo, dapat mag-overtime kag masami nga nagabiyahe agod atipanon ang negosyo. “Temprano pa ako nagahalin kon Lunes sang aga kag Huebes sang gab-i na ako nagapauli,” siling ni David. Nahangpan sang iya mga abyan, pamilya, kag mga kaupod sa trabaho nga ini nga sakripisyo kinahanglan agod mangin madinalag-on sa kalibutan, gani ginpalig-on nila si David nga “Himuon ini para sa imo pamilya.” Suno sa ila pila man lang ka tuig nga amo sini ang rutina sang iya kabuhi, tubtob nga makapundar na sia. Si David nagpaathag: “Nangatarungan sila nga maayo ini para sa akon pamilya kay mas daku nga kuarta ang akon maaman sa ila kag mangin madinalag-on pa gid ako. Bisan pa nga malayo ako sa akon pamilya, ginapapati ako sang akon mga abyan nga sa pagkamatuod mas madamo ako sing ginahatag sa akon pamilya.” Kaangay ni David, madamo ang nagapangabudlay sing lakas agod maaman sa ila pamilya ang tanan nga sa banta nila kinahanglan sang ila mga hinigugma. Apang ang pagsunod bala sa sining sahi sang laygay nagadul-ong sa kadalag-an? Ano gid ang matuod nga kinahanglanon sang isa ka pamilya?
Nakita ni David ang matuod nga kinahanglanon sang iya pamilya sang ato sia sa biyahe. “Ginaistorya ko sa telepono ang akon bata nga si Angelica, sang magsiling sia: ‘Tatay, ngaa indi mo luyag magtener sa balay upod sa amon?’ Makapasubo gid ini,” siling ni David. Ang ginsiling sang iya bata amo ang nagpabaskog sa iya handum nga maghalin sa iya trabaho. Nagdesisyon si David nga iaman sa iya pamilya ang matuod gid nga kinahanglan nila—ang iya presensia, tion, kag atension.
Ang Pag-aplikar sa Laygay sang Dios Nagadala sing Kadalag-an
Paano mo mapamatukan ang makapatalang nga mga impormasyon nga lapnag sa sini nga kalibutan? Ginasugiran kita sang salmista nga ang madinalag-on kag malipayon nga tawo amo ang isa nga “ang iya kalipay yara sa kasuguan ni Jehova, kag sa iya kasuguan nagabasa sia sing mahinay sa adlaw kag gab-i.”—Salmo 1:2.
Sang gintangdo sang Dios si Josue nga pangunahan ang pungsod sang Israel, ginsugo sia: “Basahon mo [ang Pulong sang Dios] sa mahinay nga tingog sa adlaw kag gab-i.” Huo, kinahanglan ang pagbasa kag pagpamalandong sa Pulong sang Dios, apang dapat man ‘himuon ni Josue ang suno sa tanan nga nasulat sa sini.’ Siempre pa, indi ka insigida nga magmadinalag-on kon magbasa ka lang sing Biblia. Dapat mo iaplikar ang imo nabasa. Ginsilingan si Josue: “Nian magamadinalag-on ang imo dalanon kag nian makapanghikot ka sing maalamon.”—Josue 1:8.
Handurawa ang isa ka malipayon nga bata nga nagasabak sa iya mahigugmaon nga amay samtang magkaupod sila nga nagabasa sang ila paborito nga istorya. Bisan pa makapila na nila ini nga nabasa, ginapakabahandi nila ining hamili nga mga tinion. Sing kaanggid, ang tawo nga nagahigugma sa Dios nanamian man magbasa sing Biblia adlaw-adlaw—ang makalilipay nga tion nga ginahinguyang niya upod sa iya langitnon nga Amay. Paagi sa pagsunod sa laygay kag panuytoy ni Jehova, ini nga tawo mangin ‘kaangay sang kahoy nga natanom sa ubay sang mga kasulgan sang tubig, nga nagapamunga sa iya panag-on kag ang iya dahon indi malaya, kag ang tanan nga ginahimo niya magamadinalag-on.’—Salmo 1:3.
Indi natabuan lang nga nagtubo ang kahoy nga ginalaragway sang salmista. Hungod ini nga gintanom malapit sa kasulgan sang tubig kag gin-atipan sang isa ka mangunguma. Sing kaanggid, ginapasibu kag ginatadlong sang aton langitnon nga Amay ang aton panghunahuna paagi sa laygay nga yara sa Kasulatan. Subong resulta, nagatubo kita kag nagapatubas sing mga kinaiya nga nahisuno sa kabubut-on sang Dios.
Apang, “ang mga malauton indi subong sini.” Matuod nga may tion nga daw nagauswag sila, pero sa katapusan indi maayo ang ila madangatan. ‘Indi sila makatindog sa paghukom.’ Sa baylo, “ang dalanon sang mga malauton mawala.”—Salmo 1:4-6.
Busa, indi magtugot nga dihunon sang kalibutan ang imo mga tulumuron kag mga prinsipio. Bisan pa may kinaadman kag potensial ka nga magmadinalag-on sa sini nga kalibutan, maghalong sa imo paggamit sang imo kinaadman ukon sa kon paano mo ini ginapagamit sa kalibutan. Ang walay pulos kag materyalistiko nga mga paghimud-os makahimo sa isa nga “malaya.” Sa pihak nga bahin, ang maayo nga kaangtanan sa Dios nagadala sing matuod nga kadalag-an kag kalipay.
Kon Paano Ka Mangin Madinalag-on
Ngaa mangin madinalag-on ang tanan nga himuon sang isa kon sundon niya ang laygay sang Dios? Wala ginapatuhuyan sang salmista ang kadalag-an sa sining kalibutan. Ang kadalag-an sang diosnon nga tawo naangot sa iya paghimo sang kabubut-on sang Dios—kag ang kabubut-on sang Dios nagamadinalag-on sa tanan nga tion. Tan-awon naton kon paano ang pag-aplikar sa mga prinsipio sa Biblia makahimo sa imo nga magmadinalag-on.
Pamilya: Ang Kasulatan nagalaygay sa mga bana nga “maghigugma sang ila asawa subong sang ila kaugalingon nga lawas,” kag ang Cristianong asawa dapat “may tudok nga pagtahod sa iya bana.” (Efeso 5:28, 33) Ang mga ginikanan ginapalig-on nga maghinguyang sing tion upod sa ila kabataan, magkadlaw upod sa ila, kag tudluan sila tuhoy sa importante nga mga butang sa kabuhi. (Deuteronomio 6:6, 7; Manugwali 3:4) Ang Pulong sang Dios nagalaygay man sa mga ginikanan: “Indi ninyo pagpaakiga ang inyo mga anak.” Kon iaplikar ini nga laygay, mahapos para sa kabataan nga “mangin matinumanon sa [ila] mga ginikanan” kag ‘padunggan ang [ila] amay kag ang [ila] iloy.’ (Efeso 6:1-4) Ang pagsunod sa sining laygay sang Dios magaresulta sa madinalag-on nga pagkabuhi sang pamilya.
Mga Abyan: Luyag sang kalabanan nga tawo nga may mga abyan sila. May ikasarang kita nga magpalangga kag luyag naton nga palanggaon man kita. Ginsugo ni Jesus ang iya mga sumulunod nga dapat sila “maghigugmaanay.” (Juan 13:34, 35) Sa tunga sining mga tawo, makasapo kita sing mga abyan nga aton mapalangga kag masaligan—masugid pa gani naton sa ila ang aton nasulod nga mga panghunahuna kag balatyagon. (Hulubaton 18:24) Labaw sa tanan, kon iaplikar naton ang mga prinsipio sa Biblia, ‘makapalapit kita sa Dios’ kag kaangay ni Abraham, mahimo man matawag nga “abyan ni Jehova.”—Santiago 2:23; 4:8.
Katuyuan sa Kabuhi: Sa baylo sang wala sing katuyuan nga kabuhi, ang mga madinalag-on gid nakasapo sing kahulugan kag katuyuan sa kabuhi. Ang ila kabuhi wala nasandig sa nagabag-obag-o nga kahimtangan sining sistema sang mga butang. Ang ila mga tulumuron nagapadulong sa tunay kag mapinadayunon nga kaayawan, kay nasentro ini sa matuod nga katuyuan sang kabuhi. Ano ang katuyuan sang kabuhi sang isa? “Magkahadlok sa matuod nga Dios kag magtuman sa iya mga sugo. Kay amo ini ang bug-os nga katungdanan sang tawo.”—Manugwali 12:13.
Paglaum: Ang pagpakig-abyan sa Dios nagadala man sing paglaum sa palaabuton. Ginpalig-on ni apostol Pablo ang mga Cristiano nga “ipahamtang ang ila paglaum, indi sa wala sing kapat-uran nga manggad, kundi sa Dios.” Sa sining paagi, ‘mahalungon sila nga nagatipon para sa ila kaugalingon sing maayo nga sadsaran para sa palaabuton subong ila bahandi, agod makapanguyapot sila sing malig-on sa matuod nga kabuhi.’ (1 Timoteo 6:17-19) Ining matuod nga kabuhi magaabot sa dili madugay kon ipasag-uli na sang langitnon nga Ginharian sang Dios ang Paraiso sa duta.—Lucas 23:43.
Indi madula ang mga problema bisan pa iaplikar mo ang mga prinsipio sang Biblia, apang malikawan mo ang kasakit kag kasubo nga ginatuga sang mga malauton sa ila mismo kaugalingon. Si David, nga ginsambit kaina, kag ang minilyon nga kaangay niya nakatuon sang kaayuhan sang pag-aplikar sang mga prinsipio sang Biblia sa ila kabuhi. Sang makakita sia sing trabaho nga maayo ang iskedyul, si David nagsiling: “Ginapasalamatan ko ang akon kaangtanan sa akon asawa kag kabataan subong man ang pribilehiyo nga alagaron si Jehova nga Dios subong isa ka gulang sa kongregasyon.” Indi katingalahan nga ginapatuhuyan sang salmo ang tawo nga nagatalupangod sa laygay sang Dios: “Ang tanan nga ginahimo niya magamadinalag-on”!
[Tsart sa pahina 6]
LIMA KA TIKANG AGOD MAGMADINALAG-ON
1 Indi magpadihon sa mga prinsipio sini nga kalibutan.
2 Basaha kag pamalandungi ang Pulong sang Dios adlaw-adlaw.
Iaplikar ang laygay sang Biblia sa imo kabuhi.
4 Makig-abyan sa Dios.
5 Magkahadlok sa matuod nga Dios, kag magtuman sa iya mga sugo.
[Mga piktyur sa pahina 7]
Ginasunod mo bala ang mga tikang agod magmadinalag-on?
