“Magakalipay Ka sing Bug-os”

“Hiwaton mo ang piesta para kay Jehova . . . , kag magakalipay ka sing bug-os.”—DEUTERONOMIO 16:15.

1. (a) Ano nga mga hulusayon ang ginpautwas ni Satanas? (b) Ano ang gintagna ni Jehova sa tapos maglalis sanday Adan kag Eva?

SANG ginsulay ni Satanas sanday Adan kag Eva nga maglalis sa ila Manunuga, nagpautwas sia sing duha ka importante gid nga hulusayon. Una, ginhangkat niya ang pagkamasaligan ni Jehova kag ang pagkanagakaigo sang iya paggahom. Ikaduha, ginpahangop ni Satanas nga ang mga tawo nagaalagad lamang sa Dios bangod sa makagod nga mga rason. Ang ikaduha nga hulusayon maathag nga ginpabutyag sang adlaw ni Job. (Genesis 3:1-6; Job 1:9, 10; 2:4, 5) Apang, naghulag gilayon si Jehova agod solbaron ang kahimtangan. Antes pa ginpagua sanday Adan kag Eva sa hardin sang Eden, gintagna na ni Jehova kon paano Niya solbaron ang mga hulusayon. Gintagna niya ang pag-abot sang isa ka “binhi” nga sa tapos madugmok sa tikod, magadugmok kay Satanas sa ulo.—Genesis 3:15.

2. Ano nga kapawa ang ginhatag ni Jehova kon paano niya tumanon ang tagna nga narekord sa Genesis 3:15?

² Samtang nagaligad ang tion, si Jehova naghatag sing dugang nga kapawa sa sini nga tagna, busa ginapakita ang pagkapat-od sang katumanan sini sa ulihi. Halimbawa, ginsilingan sang Dios si Abraham nga ang “binhi” magalutaw sa iya mga kaanakan. (Genesis 22:15-18) Ang apo ni Abraham nga si Jacob nangin amay sang 12 ka tribo sang Israel. Sang 1513 B.C.E., sang nangin pungsod ini nga mga tribo, ginhatagan sila ni Jehova sing isa ka sistema sang mga kasuguan nga naglakip sing nanuhaytuhay nga kapiestahan kada tuig. Si apostol Pablo nagsiling nga ini nga mga kapiestahan “landong sang mga butang nga magaabot.” (Colosas 2:16, 17; Hebreo 10:1) Nagaunod ini sang laragway sang katumanan sang katuyuan ni Jehova para sa Binhi. Ang pagsaulog sini nga mga kapiestahan nagdala sing daku nga kalipay sa Israel. Ang malip-ot nga pagbinagbinag sa sini magapabakod sang aton pagtuo sa pagkamasaligan sang mga saad ni Jehova.

Naglutaw ang Binhi

3. Sin-o ang ginsaad nga Binhi, kag paano gindugmok ang iya tikod?

³ Kapin sa 4,000 ka tuig pagkatapos sang una nga tagna ni Jehova, nag-abot ang ginsaad nga Binhi. Ini amo si Jesus. (Galacia 3:16) Subong isa ka himpit nga tawo, ginhuptan ni Jesus ang iya integridad tubtob sa kamatayon kag busa ginpamatud-an nga butig ang mga panumbungon ni Satanas. Dugang pa, sanglit wala sing sala si Jesus, ang iya kamatayon isa ka halad nga may daku nga balor. Paagi sa sini, gin-aman ni Jesus ang kahilwayan gikan sa sala kag kamatayon para sa matutom nga mga kaanakan nanday Adan kag Eva. Ang kamatayon ni Jesus sa usok sang pag-antos amo ang ‘pagdugmok sa tikod’ sa ginsaad nga Binhi.—Hebreo 9:11-14.

4. Paano ginalandong ang halad ni Jesus?

⁴ Si Jesus napatay sang Nisan 14, 33 C.E. * Sa Israel, ang Nisan 14 isa ka malipayon nga adlaw sa pagsaulog sang Paskua. Kada tuig sa sina nga adlaw, ang mga pamilya nagakinaon, kag lakip sa ila handa ang isa ka bataon kag walay dagta nga kordero. Sa sining paagi, madumduman nila ang papel sang dugo sang kordero sa kaluwasan sang Israelinhon nga panganay sang ang nagapamatay nga anghel nagpamatay sang panganay sang mga Egiptohanon sang Nisan 14, 1513 B.C.E. (Exodo 12:1-14) Ang kordero sang Paskua nagalandong kay Jesus, nga sa iya si apostol Pablo nagsiling: “Nahalad na ang aton halad sa paskua, si Cristo.” (1 Corinto 5:7) Kaangay sang dugo sang kordero sang Paskua, ang ginpatulo nga dugo ni Jesus nag-aman sing kaluwasan para sa madamo.—Juan 3:16, 36.

 ‘Ang Nahauna nga Bunga sang mga Patay’

5, 6. (a) San-o ginbanhaw si Jesus, kag paano ina nga hitabo ginalandong sa Kasuguan? (b) Paano ang pagkabanhaw ni Jesus nagpaposible nga matuman ang Genesis 3:15?

⁵ Sang ikatlo nga adlaw, ginbanhaw si Jesus agod ipresentar ang balor sang iya halad sa iya Amay. (Hebreo 9:24) Ang iya pagkabanhaw ginalandong sa tion sang isa pa ka piesta. Ang adlaw sa tapos sang Nisan 14 amo ang pagsugod sang Piesta sang Tinapay nga Walay Tapay. Pagkadason nga adlaw, Nisan 16, nagadala ang mga Israelinhon sing linaylay nga binugkos sang nahaunang mga bunga sang inani nga sebada, ang una nga ani sa Israel, agod habugon sang saserdote sa atubangan ni Jehova. (Levitico 23:6-14) Nagakaigo nga sang tuig 33 C.E., sa sina mismo nga adlaw, ginpaslaw ni Jehova ang mapintas nga mga panikasog ni Satanas agod patyon sing dayon ang iya “matutom kag matuod nga saksi”! Sang Nisan 16, 33 C.E., ginbanhaw ni Jehova si Jesus gikan sa minatay padulong sa di-mamalatyon nga espiritu nga kabuhi.—Bugna 3:14; 1 Pedro 3:18.

⁶ Si Jesus nangin “ang nahauna nga bunga sa mga nagtulog sa kamatayon.” (1 Corinto 15:20) Indi kaangay sang mga ginbanhaw anay nga napatay liwat sang ulihi, si Jesus wala napatay liwat. Sa baylo, nagkayab sia sa langit sa tuuhan ni Jehova, diin naghulat sia tubtob gintangdo sia subong Hari sang langitnon nga Ginharian ni Jehova. (Salmo 110:1; Binuhatan 2:32, 33; Hebreo 10:12, 13) Sugod sang naglingkod si Jesus subong Hari, sarang na niya madugmok sa ulo kag busa malaglag sing dayon, ang dakung kaaway nga si Satanas kag ang iya binhi.—Bugna 11:15, 18; 20:1-3, 10.

Dugang Pa nga Katapo sang Binhi ni Abraham

7. Ano ang Piesta sang mga Semana?

⁷ Si Jesus amo ang Binhi nga ginsaad sa Eden kag paagi sa iya ‘laglagon ni Jehova ang mga binuhatan sang Yawa.’ (1 Juan 3:8) Apang, sang nakighambal si Jehova kay Abraham, ginpakita Niya nga ang “binhi” ni Abraham indi lamang isa ka tawo. Ini mangin “subong sang kabituunan sa mga langit kag subong sang balas nga yara sa baybayon.” (Genesis 22:17) Ang paglutaw sang iban nga katapo sang “binhi” ginalandong sang isa pa ka malipayon nga piesta. Singkuenta ka adlaw pagkatapos sang Nisan 16, ginasaulog sang Israel ang Piesta sang mga Semana. Ang Kasuguan nahanungod sini nagsiling: “Mag-isip kamo sing kalim-an ka adlaw tubtob sa adlaw nga madason sa tapos sang ikapito nga inugpahuway, kag maghalad kamo sing bag-ong halad nga kalan-on kay Jehova. Magdala kamo gikan sa inyo mga puluy-an sing duha ka bilog nga tinapay nga sa halad nga ginahabog. Ini sila kinahanglan nga hinimo sa duha ka ikapulo nga bahin sang isa ka epa sang mapino nga harina. Kinahanglan nga lutuon sila nga may tapay, subong nga nahaunang mga bunga kay Jehova.” *—Levitico 23:16, 17, 20.

8. Anong talalupangdon nga hitabo ang natabo sang Pentecostes 33 C.E.?

⁸ Sang si Jesus yari sa duta, ang Piesta sang mga Semana gintawag nga Pentecostes (gikan sa Griego nga tinaga nga nagakahulugan sing “ikakalim-an”). Sang Pentecostes 33 C.E., ginbubo sang daku pa nga Mataas nga Saserdote, ang ginbanhaw nga si Jesucristo, ang balaan nga espiritu sa diutay nga grupo sang 120 ka disipulo nga  nagtipon sa Jerusalem. Busa, yadtong mga disipulo nangin hinaplas nga mga anak sang Dios kag mga utod ni Jesucristo. (Roma 8:15-17) Nangin bag-o sila nga pungsod, “ang Israel sang Dios.” (Galacia 6:16) Halin sa diutay nga kadamuon, ini nga pungsod magadamo sing 144,000.—Bugna 7:1-4.

9, 10. Paano ginalandong ang kongregasyon sang hinaplas nga mga Cristiano sa tion sang Pentecostes?

⁹ Ang kongregasyon sang hinaplas nga mga Cristiano ginalandong sang duha ka tinapay nga may tapay nga ginahabog sa atubangan ni Jehova kon Pentecostes. Ang mga tinapay nga may tapay nagapakita nga ang hinaplas nga mga Cristiano may dagta pa sang napanubli nga sala. Walay sapayan sini, makapalapit sila kay Jehova pasad sa halad gawad ni Jesus. (Roma 5:1, 2) Ngaa duha ka tinapay? Mahimo nga bangod ini sa katunayan nga ang hinaplas nga mga anak sang Dios magagikan sa ulihi sa duha ka grupo—una gikan sa kinaugali nga mga Judiyo kag dayon gikan sa mga Gentil.—Galacia 3:26-29; Efeso 2:13-18.

¹⁰ Ang duha ka tinapay nga ginahalad kon Pentecostes naghalin sa nahaunang mga bunga sang inani nga trigo. Sing kaanggid, ang ginpanganak sa espiritu nga mga Cristiano gintawag nga “isa ka sahi sang nahaunang mga bunga sang iya mga tinuga.” (Santiago 1:18) Sila ang una nga ginpatawad sang ila mga sala pasad sa ginpatulo nga dugo ni Jesus, kag bangod sini mahatagan sila sing di-mamalatyon nga kabuhi sa langit, diin magagahom sila kaupod ni Jesus sa iya Ginharian. (1 Corinto 15:53; Filipos 3:20, 21; Bugna 20:6) Sa sina nga katungdanan, sa malapit nga palaabuton ‘bantayan nila ang mga pungsod paagi sa bilugon nga salsalon’ kag makita nga ‘madugmok si Satanas sa idalom sang ila mga tiil.’ (Bugna 2:26, 27; Roma 16:20) Si apostol Juan nagsiling: “Sila amo ang padayon nga nagasunod sa Kordero bisan diin sia magkadto. Ginbakal sila gikan sa katawhan subong una nga mga bunga sa Dios kag sa Kordero.”—Bugna 14:4.

Isa ka Adlaw nga Nagapadaku sing Pagluwas

11, 12. (a) Ano ang nagakatabo kon Adlaw sang Katumbasan? (b) Ano nga mga benepisyo ang nabaton sang Israel gikan sa mga halad nga baka kag mga kanding?

¹¹ Sa ikapulo nga adlaw sang Etanim (sang ulihi gintawag nga Tishri), * ginasaulog sang Israel ang isa ka piesta nga nagalandong kon paano maaplikar ang mga kapuslanan sang halad gawad ni Jesus. Sa sina nga adlaw, ang bug-os nga  pungsod nagatipon para sa Adlaw sang Katumbasan agod magdulot sing mga halad tungod sa ila sa pagtabon sang ila mga sala.—Levitico 16:29, 30.

¹² Sa Adlaw sang Katumbasan, ginaihaw sang mataas nga saserdote ang isa ka tinday nga baka, kag sa Labing Balaan nga duog, ginawisik niya ang dugo sini sing makapito sa tabon sang Kaban, busa sing malaragwayon nagahalad sing dugo sa atubangan ni Jehova. Ina nga dulot para sa mga sala sang mataas nga saserdote kag sa “iya panimalay,” ang kabulig nga mga saserdote kag mga Levinhon. Dayon, ang mataas nga saserdote nagakuha sang duha ka kanding. Ginaihaw niya ang isa ka kanding subong halad tungod sa sala “para sa katawhan.” Ang dugo sini ginawisik man sa tabon sang Kaban sa Labing Balaan nga duog. Pagkatapos, ginabutang sang mataas nga saserdote ang iya duha ka kamot sa ulo sang ikaduha nga kanding kag ginatu-ad ang tanan nga kalautan sang mga anak ni Israel. Nian ipadala niya ang kanding sa kamingawan sa pagdala sang mga sala sang pungsod sa simbuliko nga paagi.—Levitico 16:3-16, 21, 22.

13. Paano ang mga hitabo kon Adlaw sang Katumbasan nagalandong sa papel nga ginatungdan ni Jesus?

¹³ Subong sang ginalandong sadto nga mga buhat, si Jesus, ang dakung Mataas nga Saserdote, naggamit sang balor sang iya kaugalingon nga dugo agod mag-aman sing kapatawaran sang mga sala. Una, ang balor sang iya dugo gin-aplikar sa “espirituwal nga balay” sang 144,000 nga hinaplas nga mga Cristiano, nga nagpaposible sa ila nga mapahayag nga matarong kag matigayon ang matinlo nga tindog sa atubangan ni Jehova. (1 Pedro 2:5; 1 Corinto 6:11) Ginalandong ini sang halad nga baka. Sa amo may kahigayunan sila nga mabaton ang ila langitnon nga palanublion. Ikaduha, ang balor sang dugo ni Jesus gin-aplikar sa minilyon nga iban pa nga nagpakita sing pagtuo kay Cristo, subong sang ginpakita sang halad nga kanding. Hatagan sila sing kabuhi nga walay katapusan diri sa duta, ang palanublion nga nawasi nanday Adan kag Eva. (Salmo 37:10, 11) Pasad sa ginpatulo nga dugo ni Jesus, gindala niya ang mga sala sang katawhan, subong nga gindala sang buhi nga kanding ang mga sala sang Israel sa kamingawan sa simbuliko nga paagi.—Isaias 53:4, 5.

Pagkalipay sa Atubangan ni Jehova

14, 15. Ano ang nagakatabo sa tion sang Piesta sang mga Payagpayag, kag ano ang ginapahanumdom sini sa mga Israelinhon?

¹⁴ Sa tapos sang Adlaw sang Katumbasan, ginasaulog sang mga Israelinhon ang Piesta sang mga Payagpayag, ang labing malipayon nga piesta sang Judiyong tuig. (Levitico 23:34-43) Ini nga  piesta nagasugod sa ika-15 tubtob sa ika-21 sang Etanim kag nagatapos sa isa ka maligdong nga pagtinipon sa ika-22 sini nga bulan. Nagatanda ini sa pagtapos sang pagtipon sang ani kag tion sang pagpasalamat tungod sa bugana nga kaayo sang Dios. Tungod sini ginasugo ni Jehova ang mga nagasaulog: “Pakamaayuhon ka ni Jehova nga imo Dios sa tanan mo nga patubas kag sa tanan nga buluhaton sang imo kamot, kag magakalipay ka sing bug-os.” (Deuteronomio 16:15) Daw ano gid ka malipayon ini nga tion!

¹⁵ Sa tion sini nga piesta, ang mga Israelinhon nagapuyo sa mga payagpayag sa sulod sang pito ka adlaw. Sa amo ginapahanumdom sila nga nagpuyo sila anay sa mga payagpayag sa kamingawan. Ang kapiestahan nagahatag sa ila sing bastante nga kahigayunan agod pamalandungan ang amaynon nga pag-atipan ni Jehova. (Deuteronomio 8:15, 16) Kag sanglit ang tanan, manggaranon man ukon imol, nagapuyo sa magkaanggid nga mga payagpayag, ginapahanumdom ang mga Israelinhon nga may kaangtanan sa kapiestahan, tanan sila alalangay.—Nehemias 8:14-16.

16. Ano ang ginalandong sang Piesta sang mga Payagpayag?

¹⁶ Ang Piesta sang mga Payagpayag isa ka piesta sa tig-alani, isa ka malipayon nga selebrasyon sang pagtipon, kag nagalandong ini sa malipayon nga pagtipon sa mga nagpakita sing pagtuo kay Jesucristo. Ang pagtipon nagsugod sang Pentecostes 33 C.E., sang ginhaplas ang 120 ka disipulo ni Jesus nga mangin bahin sang “isa ka balaan nga pagkasaserdote.” Subong nga ang mga Israelinhon nagapuyo sa mga payagpayag sing pila ka adlaw, nahibaluan sang mga hinaplas nga sila “temporaryo nga mga pumuluyo” sa sining di-diosnon nga kalibutan. Ang ila paglaum sa langit. (1 Pedro 2:5, 11) Ini nga pagtipon sa hinaplas nga mga Cristiano magahingapos sa sining tion sang “katapusan nga mga adlaw,” kon ang katapusan sa 144,000 matipon.—2 Timoteo 3:1.

17, 18. (a) Ano ang nagapakita nga may iban pa luwas sa hinaplas nga mga Cristiano nga nakabenepisyo gikan sa halad ni Jesus? (b) Sin-o sa karon ang nagabenepisyo gikan sa antitipiko nga Piesta sang mga Payagpayag, kag san-o magadangat sa putukputukan sini ining malipayon nga piesta?

¹⁷ Talalupangdon nga sa tion sini nga piesta  sang una, ginahalad ang 70 ka baka. (Numeros 29:12-34) Ang numero nga 70 nagarepresentar sing 7 nga ginpamuad sa 10, mga numero nga sa Biblia nagarepresentar sing langitnon kag dutan-on nga pagkahimpit. Busa, ang mga matutom gikan sa tanan nga 70 ka kaliwatan sang katawhan nga naghalin kay Noe magabenepisyo sa halad ni Jesus. (Genesis 10:1-29) Nahisuno sa sini, ang pagtipon sa aton tion nagsangkad pa kag naglakip sa mga indibiduwal gikan sa tanan nga pungsod nga nagpakita sing pagtuo kay Jesus kag may paglaum nga mabuhi sa paraiso nga duta.

¹⁸ Nakita ni apostol Juan ining modernong-adlaw nga pagtipon sa palanan-awon. Una, nabatian niya ang pahibalo sang pagpat-in sa katapusan sang 144,000. Dayon, nakita niya ang “isa ka dakung kadam-an, nga wala sing tawo nga makaisip,” nga nagatindog sa atubangan ni Jehova kag ni Jesus, nga may “mga paklang sang palma sa ila mga kamot.” Ini sila “naggua gikan sa dakung kapipit-an” padulong sa bag-ong kalibutan. Sila man sa karon temporaryo nga mga pumuluyo sa sining daan nga sistema sang mga butang, kag malangkagon sila nga nagapaabot nga may pagsalig sa tion nga “ang Kordero . . . magabantay sa ila, kag magatuytoy sa ila sa mga tuburan sang mga tubig sang kabuhi.” Sa sina nga tion, “pahiran sang Dios ang tagsa ka luha sa ila mga mata.” (Bugna 7:1-10, 14-17) Ang antitipiko nga Piesta sang mga Payagpayag magadangat sa putukputukan sini sa tapos sang Isa ka Libo ka Tuig nga Paggahom ni Cristo kon ang dakung kadam-an upod ang mga matutom nga ginbanhaw hatagan sing kabuhi nga walay katapusan.—Bugna 20:5.

19. Paano kita makabenepisyo gikan sa pagbinagbinag sa mga piesta nga ginasaulog sa Israel?

¹⁹ Kita man ‘magakalipay sing bug-os’ samtang ginapamalandungan naton ang kahulugan sang mga piesta sang Judiyo sang una. Makalilipay gid binagbinagon nga nag-aman si Jehova sing halimbawa kon paano ang iya tagna nga ginhatag sadto sa Eden matuman, kag makakulunyag nga makita ang amat-amat nga katumanan sini. Sa karon, nahibaluan naton nga naglutaw na ang Binhi kag gindugmok na ang iya tikod. Karon Hari na sia sa langit. Dugang pa, ginpamatud-an na sang kalabanan nga 144,000 ang ila katutom tubtob sa kamatayon. Ano pa dapat ang himuon? San-o matuman sing bug-os ini nga tagna? Pagabinagbinagon ini sa masunod nga artikulo.

[Mga Footnote]

Mapaathag Mo Bala?

• Ano ang ginalandong sang kordero sang Paskua?

• Ano nga pagtipon ang ginalandong sang Piesta sang Pentecostes?

• Ano nga mga bahin sang Adlaw sang Katumbasan ang nagatudlo kon paano gin-aplikar ang halad gawad ni Jesus?

• Sa anong paagi ang pagtipon sa mga Cristiano ginalandong sang Piesta sang mga Payagpayag?

[Mga Pamangkot sa Pagtinuon]

[Tsart sa pahina 22, 23]

(Para sa detalye, tan-awa ang publikasyon)

Paskua

Nisan 14

Hitabo:

Gin-ihaw ang kordero sang Paskua

Ginalandong:

Ginhalad si Jesus

Piesta sang Tinapay nga Walay Tapay (Nisan 15-21)

Nisan 15

Hitabo:

Adlaw nga Inugpahuway

Nisan 16

Hitabo:

Ginhalad ang sebada

Ginalandong:

Ginbanhaw si Jesus

50 ka adlaw

Piesta sang mga Semana (Pentecostes)

Sivan 6

Hitabo:

Ginhalad ang duha ka tinapay

Ginalandong:

Ginpresentar ni Jesus ang iya hinaplas nga mga kauturan kay Jehova

Adlaw sang Katumbasan

Tishri 10

Hitabo:

Ginhalad ang isa ka baka kag duha ka kanding

Ginalandong:

Ginhalad ni Jesus ang balor sang iya dugo tungod sa tanan nga katawhan

Piesta sang mga Payagpayag (Pagtipon, Tabernakulo)

Tishri 15-21

Hitabo:

Ang mga Israelinhon malipayon nga nagpuyo sa mga payagpayag kag nagkasadya sa ani, ginhalad ang 70 ka baka

Ginalandong:

Pagtipon sa hinaplas kag sa “dakung kadam-an”

[Mga piktyur sa pahina 21]

Kaangay sang dugo sang kordero sang Paskua, ang ginpatulo nga dugo ni Jesus nag-aman sing kaluwasan para sa madamo

[Mga piktyur sa pahina 22]

Ang unang mga bunga sang inani nga sebada nga ginahalad kon Nisan 16 nagalandong sa pagkabanhaw ni Jesus

[Mga piktyur sa pahina 23]

Ang duha ka tinapay nga ginahalad kon Pentecostes nagalandong sa kongregasyon sang hinaplas nga mga Cristiano

[Mga piktyur sa pahina 24]

Ang Piesta sang mga Payagpayag nagalandong sa malipayon nga pagtipon sa mga hinaplas kag sa “dakung kadam-an” gikan sa tanan nga pungsod