Mapasangkad Mo Bala ang Imo Gugma?

ANG kadena nga ginaangtan sang angkla sang barko dapat makasarang magpugong agod nga indi maanod ang sakayan. Apang, dapat mapag-on kag mabakod ang kadena. Kay kon indi, mabugto ini.

Kaangay man sini ang kahimtangan sang Cristianong kongregasyon. Agod mabakod kag mapagros ang kongregasyon, ang tagsa ka katapo dapat nahugpong sing tingob sa paghiusa. Ano ang nagahugpong sa ila? Ang gugma, nga amo ang pinakamabakod nga puersa sang paghiusa. Indi katingalahan nga ginsugo ni Jesucristo ang iya mga disipulo: “Nagahatag ako sa inyo sing isa ka bag-o nga sugo, nga higugmaon ninyo ang isa kag isa; subong nga ako naghigugma sa inyo, nga higugmaon man ninyo ang isa kag isa. Sa sini ang tanan makahibalo nga kamo mga disipulo ko, kon maghigugmaanay kamo.” Huo, ang matuod nga mga Cristiano may gugma sa isa kag isa nga labaw pa sa pag-abyanay kag pagtinahaay lamang. Ginapalambo nila ang masinakripisyuhon nga gugma.—Juan 13:34, 35.

Pag-apresyar sa Aton mga Masigkatumuluo

Madamo nga kongregasyon ang ginahuman sang mga tawo nga nanuhaytuhay ang edad, rasa, nasyonalidad, kultura, lenguahe, kag gindak-an. Ang kada katapo may mga luyag kag indi luyag, mga ginalauman kag ginakabalak-an, kag sa masami ang kada isa may ginadala nga lulan—ayhan indi maayo nga panglawas ukon kapigaduhon. Ining pagkananuhaytuhay mahimo mangin hangkat sa Cristianong paghiusa. Ano, nian, ang makabulig sa aton nga mapasangkad ang aton gugma kag mahuptan ang paghiusa walay sapayan sining hangkat? Ang matuod nga apresasyon sa tagsa ka katapo sang kongregasyon makabulig agod mapabakod pa gid ang aton gugma sa isa kag isa.

Apang, ano ang buot silingon sang pag-apresyar sa isa ka tawo? Suno sa The New Shorter Oxford English Dictionary, ang tinaga nga “pag-apresyar” nagakahulugan sing “mangin mahinantupon ukon mahangpunon; nagakaigo nga pagpabalor; ginakilala nga malahalon ukon ekselente; mapinasalamaton.” Kon ginaapresyar naton ang aton mga masigkatumuluo, ginahangop naton ang ila mga kinahanglanon, ginapabaloran naton sila, ginakilala naton ang ila pagkaekselente, kag mapinasalamaton nga tanan kita nagasimba sa isa lang ka Dios. Subong resulta, nagadugang ang aton gugma sa ila. Ang malip-ot nga pagbinagbinag sa sulat ni apostol Pablo sa unang siglo nga mga Cristiano sa Corinto makabulig sa aton nga mahangpan kon paano naton mapakita ang Cristianong gugma sa bug-os nga masarangan naton.

“Ginapiutan” ang mga Taga-Corinto

Ginsulat ni Pablo ang iya una nga sulat sa mga taga-Corinto sang 55 C.E. kag ang iya ikaduha nga sulat pagligad sang isa ka tuig. Ginpakita sang iya ginsiling nga ang pila sa kongregasyon sa Corinto wala sing apresasyon sa ila mga masigkatumuluo. Ginlaragway ni Pablo ang kahimtangan sa masunod nga mga pinamulong: “Naghambal kami sing tampad sa inyo, mga taga-Corinto, ang amon tagipusuon nagsangkad. Wala kamo ginapiutan sa sulod namon, apang ginapiutan kamo sa inyo mismo mapinalanggaon nga balatyagon.” (2 Corinto 6:11, 12) Ano ang buot silingon ni Pablo sang ginlaragway niya sila subong “ginapiutan”?

Buot niya silingon wala sila nagapasangkad kag  indi bukas ang ila tagipusuon. Ang isa ka iskolar sang Biblia nagapati nga ang gugma sang mga taga-Corinto kay Pablo “ginbalabagan sang di-maayo nga kaangtanan bangod sang indi matuod nga pangduhaduha . . . kag kasakit sang buot.”

Talupangda ang ginlaygay ni Pablo: “Subong balos—nagahambal ako subong nga sa mga anak—kamo man magpasangkad.” (2 Corinto 6:13) Ginpalig-on ni Pablo ang mga taga-Corinto nga pasangkaron ang ila gugma sa ila mga masigkatumuluo. Nagakahulugan ini nga dapat sila pahulagon sang positibo nga panimuot kag bukas nga tagipusuon, indi sang di-pagsalig kag di-salapakon nga mga sinuay.

Pagpasangkad sang Gugma Karon

Makalilipay makita nga ang matuod nga mga sumilimba sang Dios karon nagapanikasog gid nga pasangkaron ang ila gugma sa isa kag isa. Ang matuod, ang pagpasangkad indi mahapos. Indi ini tubtob sa hambal lang. Ang pagpasangkad nagakahulugan nga kinahanglan ang aton paggawi tuhay sa mga tawo nga wala nagasunod sa talaksan sang Biblia. Ini nga mga tawo masami nga wala sing apresasyon sa iban. Ayhan dasudaso, di-matinahuron, kag mayubiton sila. Gani, indi kita dapat magpaimpluwensia sa sining mga panimuot. Daw ano ka makapasubo kon ang aton gugma, kaangay sa iya sang mga taga-Corinto, tabunan sang di-pagsalig! Mahimo ini matabo kon madasig kita magtalupangod sa kakulangan sang isa ka Cristianong utod apang wala naton ginatan-aw ang iya maayong mga kinaiya. Mahimo man naton ini nga sayop kon wala kita sing pag-ulikid sa isa ka utod bangod tuhay ang iya kultura.

Sa kabaliskaran, ang alagad sang Dios nga nagapasangkad sang iya gugma may matuod nga apresasyon sa mga masigkatumuluo. Ginapabaloran niya sila, ginapadunggan sila, kag ginahangop ang ila mga kinahanglanon. Bisan pa may rason sia nga  magreklamo, handa sia nga magpatawad kag wala sia nagadumot. Sa baylo, nagasalig sia nga maayo ang motibo sang iya mga masigkatumuluo. Ang iya bukas nga tagipusuon nagabulig sa iya nga ipakita ang gugma nga ginapatuhuyan ni Jesus sang magsiling sia: “Sa sini ang tanan makahibalo nga kamo mga disipulo ko, kon nagahigugmaanay kamo.”—Juan 13:35.

Magpakita sing Interes kag Mangita sing Bag-o nga mga Abyan

Ang tudok nga gugma magapahulag sa aton nga magpakita sing interes indi lamang sa aton mga abyan kundi makig-upod man sa mga katapo sang kongregasyon nga sa masami indi naton mapakig-angutan. Sin-o ini nga mga tawo? Ang iban sa aton Cristianong mga kauturan mahuluy-on, kag sa nanuhaytuhay nga rason diutay lang ang ila mga abyan. Ayhan sa primero magabatyag kita nga daw tuhay gid sila sa aton, nga sa relihion lang kita pareho. Apang indi bala nga ang labing suod nga mga mag-abyan sa Biblia, mga tawo nga kon tan-awon, daw indi gid magsahuay?

Halimbawa, sanday Rut kag Noemi, daku ang antad sa edad, magkatuhay ang ila nasyonalidad kag kultura, kag indi pareho ang ila lenguahe. Apang, wala naapektuhan sining mga kinatuhayan ang ila pag-abyanay. Si Jonatan isa ka prinsipe, kag si David manugbantay sang karnero. Daku ang diperensia sang ila edad, apang ang ila pag-abyanay amo ang isa sa pinakasuod nga pag-abyanay nga ginsambit sa Balaan nga Kasulatan. Ini nga mga pag-abyanay nangin tuburan sang kalipay kag espirituwal nga bulig sa mga natungdan.—Rut 1:16; 4:15; 1 Samuel 18:3; 2 Samuel 1:26.

Sa karon may suod man nga mga pag-abyanay nga nagaluntad sa tunga sang matuod nga mga Cristiano nga daku ang antad sa edad kag tuhay gid ang kahimtangan sa kabuhi. Halimbawa, si Regina isa ka nagasolo nga ginikanan kag may duha ka anak nga tin-edyer. * Masako gid sia kag halos wala sing tion nga makig-upod sa iban. Sanday Harald kag Ute retirado nga mag-asawa nga wala sing bata. Kon tan-awon lang, ining duha ka pamilya daw magkatuhay gid. Apang gin-aplikar nanday Harald kag Ute ang laygay sang Biblia nga magpasangkad. Nagpakita sila sing interes kag ginlakip sanday Regina kag ang iya kabataan sa madamo nga hilikuton, nga nagahinguyang sing tion nga magbantala kag maglingawlingaw upod sa ila.

Magluwas sa aton suod nga mga abyan, makapasangkad pa bala kita? Ngaa indi magpanikasog nga makigsuod sa mga masigkatumuluo nga tuhay sing nasyonalidad, kultura, ukon edad?

Indi Magpabaya sa Kinahanglanon sang Iban

Ang bukas nga tagipusuon magapahulag sa aton nga talupangdon ang kinahanglanon sang iban. Ano nga mga kinahanglanon? Ti, panilagi ang mga katapo sang Cristianong kongregasyon. Kinahanglan sang mga pamatan-on ang pagtuytoy, kinahanglan sang mga tigulang ang pagpalig-on, kinahanglan sang mga yara sa bug-os tion nga pagministeryo ang komendasyon kag pagsakdag, kag kinahanglan sang mga masigkatumuluo nga ginaluyahan sing buot nga may magapamati sa ila. Ang tanan may kinahanglanon. Luyag naton pun-an ining mga kinahanglanon sa bug-os nga masarangan naton.

Ang pagpasangkad nagakahulugan man nga ipakita naton ang paghangop sa mga may pinasahi nga kinahanglanon. May kilala ka bala nga may malubha nga balatian ukon nagaatubang sing iban pa nga sahi sang pagtilaw? Ang pagpasangkad sang aton gugma kag pagpalambo sang kaayo makabulig sa aton nga mahangpan kag masakdag ang mga may kinahanglan.

Samtang nagakatuman ang mga tagna sang Biblia para sa palaabuton, ang mabakod nga mga higot sang paghiusa sa sulod sang Cristianong kongregasyon may labi pa nga balor sangsa mga pagkabutang, ikasarang, ukon mga katigayunan. (1 Pedro 4:7, 8) Ang tagsa sa aton makaamot sa pagpabakod sa higot sang paghiusa sa aton kongregasyon paagi sa pagpasangkad sang aton gugma sa aton mga masigkatumuluo. Makasalig kita nga pakamaayuhon kita ni Jehova sing bugana kon manghikot kita nahisuno sa pinamulong sang iya Anak, nga si Jesucristo, nga nagsiling: “Ini amo ang akon sugo, nga maghigugmaanay kamo subong nga ako nagahigugma sa inyo.”—Juan 15:12.

[Footnote]

[Blurb sa pahina 10]

Ang pag-apresyar sa aton mga kauturan nagakahulugan nga ginapabaloran naton sila, ginatahod ang ila dignidad, kag ginahangop naton ang ila mga kinahanglanon