Mga Pamangkot Gikan sa mga Bumalasa

Ano nga pagpat-in ang ginapatuhuyan sa Bugna 7:3?

Ang Bugna 7:1-3 nagasiling: “Nakita ko ang apat ka anghel nga nagatindog sa apat ka pamusod sang duta, nga nagapugong sa apat ka hangin sang duta, agod wala sing hangin nga maghuyop sa duta ukon sa dagat ukon sa bisan ano nga kahoy. Kag nakita ko ang isa pa ka anghel nga nagakayab gikan sa ginabutlakan sang adlaw, nga nagadala sing pat-in sang buhi nga Dios; kag nagsinggit sia sa mabaskog nga tingog sa apat ka anghel nga gintugutan sa paghalit sa duta kag sa dagat, nga nagasiling: ‘Indi ninyo paghaliti ang duta ukon ang dagat ukon ang mga kahoy, tubtob mapat-inan na namon sa ila agtang ang mga ulipon sang aton Dios.’”

Kon buy-an na “ang apat ka hangin,” matabo ang “dakung kapipit-an,” ang kalaglagan sang butig nga relihion kag sang tanan nga bahin sang malaut nga kalibutan. (Bugna 7:14) “Ang mga ulipon sang aton Dios” amo ang hinaplas nga mga utod ni Jesus sa duta. (1 Pedro 2:9, 16) Busa, ginapakita sining tagna nga ang pagpat-in sa mga utod ni Jesus natapos na kon magsugod ang dakung kapipit-an. Apang, ginapakita sang iban nga bersikulo sa Biblia nga may nahauna nga pagpat-in sa mga hinaplas. Gani, kon kaisa, nagapamulong kita tuhoy sa nahauna nga pagpat-in kag sa katapusan nga pagpat-in. Ano ang kinatuhayan sining duha?

Binagbinagon naton ang kahulugan sang tinaga nga “napat-inan.” Sang una nga panahon, ang pat-in isa ka instrumento nga ginagamit agod markahan ang isa ka dokumento. Ini nga tinaga mahimo man magpatuhoy sa marka mismo. Sadto, kinaandan ang pagbutang sing pat-in sa isa ka dokumento ukon sa iban pa nga butang agod ipakita ang pagkamaminatud-on ukon pagpanag-iya sa sini.—1 Hari 21:8; Job 14:17.

 Ginpaanggid ni Pablo ang balaan nga espiritu sa isa ka pat-in sang sia magsiling: “Sia nga nagagarantiya nga kamo kag kami iya ni Cristo kag sia nga naghaplas sa aton amo ang Dios. Ginbutang man niya ang iya pat-in sa amon kag ginhatagan kami sing kalig-unan sang kon ano ang magaabot, nga amo, ang espiritu, sa amon tagipusuon.” (2 Corinto 1:21, 22) Busa, ginahaplasan ni Jehova ining mga Cristiano sang iya balaan nga espiritu agod ipakita nga sila ginapanag-iyahan niya.

Apang, may duha ka hut-ong ang pagpat-in sa mga hinaplas. Ang nahauna nga pagpat-in tuhay sa katapusan nga pagpat-in (1) sa katuyuan kag (2) sa tion. Ang nahauna nga pagpat-in para sa pagpili sang bag-o nga katapo nga gindugang sa hinaplas nga mga Cristiano. Ang pagpat-in sa katapusan nga kahulugan amo ang nagapamatuod nga ining pinili kag napat-inan nga indibiduwal bug-os nga nagpakita sang iya pagkamainunungon. Sa amo, permanente nga ibutang ang pat-in ‘sa agtang’ sang isa ka hinaplas, sa tion lamang sang katapusan nga pagpat-in, nga walay duhaduha nga nagapakilala sa iya subong natilawan kag matutom nga “ulipon sang aton Dios.” Ang pagpat-in nga ginsambit sa Bugna kapitulo 7 nagapatuhoy sa katapusan nga hut-ong sining pagpat-in.—Bugna 7:3.

Tuhoy sa tion sang nahauna nga pagpat-in, si apostol Pablo nagsulat sa hinaplas nga mga Cristiano: “Naglaum man kamo sa iya sa tapos ninyo mabatian ang pulong sang kamatuoran, ang maayong balita tuhoy sa inyo kaluwasan. Paagi man sa iya, sa tapos kamo magtuo, ginpat-inan kamo sing ginsaad nga balaan nga espiritu.” (Efeso 1:13, 14) Madamo nga rekord sa Biblia ang nagapakita nga ang unang-siglo nga mga Cristiano ginpat-inan sa tapos nila nabatian ang maayong balita kag nangin mga tumuluo ni Cristo. (Binuhatan 8:15-17; 10:44) Ini nga pagpat-in nagapakita nga ginakahamut-an sila sang Dios. Apang, wala ini nagakahulugan nga permanente na gid ini nga kahamuot sang Dios. Ngaa?

Si Pablo nagsiling nga ang hinaplas nga mga Cristiano ‘ginpat-inan para sa adlaw sang paghilway.’ (Efeso 4:30) Ginapakita sini nga magaligad pa ang tion, masami sing tinuig, sa tapos sining nahauna nga pagpat-in. Ang mga hinaplas dapat magpabilin nga matutom sugod sa adlaw nga ginpat-inan sila sang balaan nga espiritu tubtob sa ‘adlaw nga ginhilway sila’ sa ila undanon nga lawas—buot silingon, tubtob sa ila kamatayon. (Roma 8:23; Filipos 1:23; 2 Pedro 1:10) Gani, sa hingapusan lamang sang kabuhi ni Pablo nga sia makasiling: “Nadalagan ko na ang dalaganon tubtob sa katapusan, natuman ko na ang pagtuo. Sugod karon natigana sa akon ang purongpurong sang pagkamatarong.” (2 Timoteo 4:6-8) Dugang pa, si Jesus nagsiling sa kongregasyon sang hinaplas nga mga Cristiano: “Pamatud-i nga matutom ka bisan tubtob sa kamatayon, kag ihatag ko sa imo ang korona sang kabuhi.”—Bugna 2:10; 17:14.

Ang tinaga nga “korona” nagahatag sing dugang nga pamatuod nga may tion nga nagligad sa ulot sang nahauna nga pagpat-in kag sang katapusan nga pagpat-in. Ngaa? Sang una nga panahon, kinabatasan nga koronahan ang isa ka manugdalagan nga nagdaug sa palumba. Agod mabaton ang korona, wala lamang sia nagaentra sa palumba. Dapat sia magdalagan tubtob sa katapusan. Sing kaanggid, ang hinaplas nga mga Cristiano dapat magpadayon tubtob sa katapusan sang ila kabuhi—sugod sa nahauna nga pagpat-in tubtob sa katapusan nga pagpat-in—agod makoronahan sila sing di-mamalatyon nga kabuhi sa langit.—Mateo 20:22; Santiago 1:12.

San-o katapusan nga pat-inan ang nagkalabilin sang hinaplas nga mga Cristiano nga nakabaton na sing nahauna nga pagpat-in? Ang sin-o man nga buhi pa sa duta pat-inan “sa ila agtang” antes magsugod ang dakung kapipit-an. Kon buy-an na ang apat ka hangin sang kapipit-an, napat-inan na ang bug-os nga espirituwal nga Israel, bisan may pila pa nga buhi sa unod kag wala pa makatapos sang ila dutan-on nga dalanon.