Buligi ang Iban sa Pagtuman kon ano ang Ginatudlo sang Biblia

“Kon tuhoy sa nagtupa sa maayo nga duta, sila amo ang nakabati sing pulong nga may maminatud-on kag maayo nga tagipusuon, nga nagahupot sini kag nagapamunga nga may pagbatas.”—LUCAS 8:15.

1, 2. (a) Sa ano nga katuyuan gindesinyo ang libro nga Ano Gid ang Ginatudlo Sang Biblia? (b) Sining ulihi nga mga tinuig, paano ginpakamaayo ni Jehova ang mga panikasog sang iya katawhan sa paghimo sing mga disipulo?

“TUMALAGSAHON gid ini nga libro. Naluyagan gid ini sang akon mga estudyante. Naluyagan ko man ini. Paagi sa sini nga libro posible makasugod sing mga pagtuon sa Biblia sa mga tawo sa ila mismo ganhaan.” Amo sini ang ginsiling sang isa ka bug-os tion nga payunir nga ministro sang mga Saksi ni Jehova tuhoy sa libro nga Ano Gid ang Ginatudlo Sang Biblia? * Tuhoy sini gihapon nga libro, ang isa ka may edad na nga manugbantala sang Ginharian nagsiling: “Pribilehiyo ko nga mabuligan ang madamo nga tawo nga makilala si Jehova sa sulod sang 50 ka tuig nga aktibo ako sa ministeryo. Apang masiling ko nga tumalagsahon gid ini nga publikasyon. Ang nagapapagsik nga mga paglaragway kag mga ilustrasyon makawiwili gid.” Amo bala sini ang imo nabatyagan tuhoy sa libro nga Ginatudlo Sang Biblia? Ining bulig sa pagtuon sa Biblia gindesinyo agod buligan ka nga matuman ang sugo ni Jesus: “Busa lakat kamo kag maghimo sing mga disipulo sa mga tawo sang tanan nga pungsod, . . . nga nagapanudlo sa ila nga tumanon ang tanan nga butang nga ginsugo ko sa inyo.”—Mateo 28:19, 20.

² Wala sing duhaduha nga nalipay si Jehova nga makita ang mga 6.6 ka milyon niya nga mga Saksi nga kinabubut-on nga nagatuman sang sugo ni Jesus nga maghimo sing mga disipulo. (Hulubaton 27:11) Maathag nga ginapakamaayo ni Jehova ang ila mga panikasog. Sang 2005, halimbawa, ang maayong balita ginbantala sa 235 ka kadutaan kag, sa promedyo, kapin sa 6,061,500 ka pagtuon sa Biblia ang gindumalahan. Subong resulta, madamo nga tawo ang ‘nakabati sang pulong sang Dios kag nagbaton sini, indi subong pulong sang tawo, kundi kon ano gid ini sa pagkamatuod, subong pulong sang Dios.’ (1 Tesalonica 2:13) Sa nagligad nga kapin sa duha ka tuig, kapin sa tunga sa milyon nga bag-o nga mga disipulo ang nagpahisuno sang ila kabuhi sa mga talaksan ni Jehova kag nagdedikar sang ila kaugalingon sa Dios.

3. Ano nga mga pamangkot tuhoy sa paggamit sang Ginatudlo Sang Biblia nga libro ang binagbinagon sa sining artikulo?

³ Nabatyagan mo bala ang kalipay sang pagdumala sing isa ka pagtuon sa Biblia sining karon lang? Sa bug-os nga kalibutan, may mga indibiduwal pa gihapon nga may “maminatud-on kag maayo nga tagipusuon” nga sa pagkabati sang pulong sang Dios “nagahupot sini kag nagapamunga nga may pagbatas.” (Lucas 8:11-15) Binagbinagon naton kon paano mo magamit ang Ginatudlo sang Biblia nga libro sa hilikuton nga paghimo sing disipulo. Binagbinagon naton ang tatlo ka pamangkot: (1) Paano ka makasugod sang isa ka pagtuon sa Biblia? (2) Ano ang labing epektibo nga pamaagi sa pagtudlo? (3) Paano mo mabuligan ang isa ka tawo nga mangin indi lamang isa  ka estudyante kundi isa man ka manunudlo sang nasulat nga Pulong sang Dios, ang Biblia?

Kon Paano Ka Makasugod sang Isa ka Pagtuon sa Biblia

4. Ngaa mahimo mangalag-ag ang iban sa pagtuon sa Biblia, kag paano mo sila mabuligan agod indi sila magpangalag-ag?

⁴ Kon pangabayon ka nga tabukon ang isa ka daku nga sapa paagi sa isa lamang ka paglukso, mahimo nga mangindi ka. Pero kon may mga bato nga ginbutang agod matapakan mo sa imo pagtabok, posible tilawan mo nga tabukon ini. Sing kaanggid, ang isa ka masako nga tawo mahimo magpangalag-ag sa pagtuon sa Biblia. Mahimo maghunahuna ang tagbalay nga madamo nga tion kag daku nga panikasog ang kinahanglan agod tun-an ini. Paano mo sia mabuligan agod indi sia magpangalag-ag? Paagi sa pagdumala sing isa ka serye sang malip-ot kag impormatibo nga pagbinagbinag, magamit mo ang libro nga Ginatudlo Sang Biblia agod buyukon ang tawo sa isa ka regular nga pagtuon sa Biblia. Kon handaan mo ini sing maayo, ang tagsa ka pagduaw liwat sa iya mangin daw kaangay sang bato nga matapakan niya padulong sa iya pagpakig-abyan kay Jehova.

5. Ngaa dapat mo basahon ang libro nga Ginatudlo Sang Biblia?

⁵ Apang, antes mo mabuligan ang iban nga makabenepisyo gikan sa libro nga Ginatudlo Sang Biblia, dapat pamilyar ka sa kaundan sini. Nabasa mo na bala ang bug-os nga libro? Gindala sang mag-asawa ini nga publikasyon sang nagbakasyon sila kag ginbasa ini samtang nagapahunayhunay sa higad-baybay. Sang nagpalapit sa ila ang isa ka tumandok nga babayi nga nagabaligya sa mga turista, natalupangdan niya ang tig-ulo nga Ano Gid ang Ginatudlo Sang Biblia? Ginsugiran niya ang mag-asawa nga pila ka oras pa lang ang nagligad, amo gid ini nga pamangkot ang ginpangamuyo niya kag nangabay sia sa Dios nga sabton sia. Malipayon nga ginhatag sang mag-asawa ang libro sa babayi. Imo bala ‘ginabakal ang tion’ agod basahon ini nga publikasyon, kon posible suliton liwat, samtang may ginahulat ka ukon nagapahuwayhuway sa trabaho ukon sa eskwelahan? (Efeso 5:15, 16) Kon ginahimo mo ini, mangin pamilyar ka sa sining bulig sa pagtuon sa Biblia kag mahimo ka makahigayon nga makapakighambal sa iban tuhoy sa kaundan sini.

6, 7. Paano mo gamiton ang libro nga Ginatudlo Sang Biblia sa pagsugod sing mga pagtuon sa Biblia?

⁶ Kon nagatanyag sining libro sa pangpubliko nga ministeryo, gamita sing epektibo ang mga ilustrasyon, mga teksto, kag mga pamangkot sa pahina 4, 5, kag 6. Halimbawa, mahimo ka makasugod sa pagpakigsugilanon paagi sa pagpamangkot, “Bangod sa mga problema nga ginaatubang sang katawhan karon, ano sa banta mo ang pinakamasaligan nga tuburan sang panuytoy?” Pagkatapos mapamatian sing maayo ang iya sabat, basaha ang 2 Timoteo 3:16, 17, kag ipaathag nga ang Biblia nagahatag gid sing solusyon sa mga problema sang tawo. Nian, ipakita sa tagbalay ang pahina 4 kag 5, kag mamangkot: “Sa mga problema nga makita mo sa sini nga mga pahina, diin ang nagpahanusbo gid sa imo?” Kon may pilion ang tagbalay, pauyati sa iya ang libro samtang ginabasa mo ang may kaangtanan sa sini nga teksto sa imo Biblia. Masunod, basaha ang pahina 6, kag pamangkuta ang tagbalay, “Sa anom ka pamangkot nga ginhinambitan sa ubos sining pahina, diin ang luyag mo nga masabat?” Kon nakapili na sia, ipakita  sa iya ang kapitulo nga nagasabat sa sina nga pamangkot, bilinan sia sing libro, kag maghimo sing pat-od nga kahimusan agod makaduaw ka liwat kag mabinagbinag ina nga pamangkot.

⁷ Ang presentasyon nga bag-o lang ginpaathag mahimo maglawig sing mga lima ka minuto. Apang, sa sining pila lang ka minuto, mahibaluan mo kon ano gid ang ginakabalak-an sang tagbalay, mabasa ninyo kag mabinagbinag ang duha ka kasulatan, kag mapahamtang ang sadsaran para sa isa ka pagduaw liwat. Ang imo malip-ot nga pagpakigsugilanon sa tagbalay mahimo nga amo ang makapalig-on gid kag makalilipay nga pagpakigsugilanon niya sa sulod sang malawig nga tion. Subong resulta, bisan ang masako nga tawo mahimo malangkag sa paghinguyang sing pila pa ka minuto sa pagpakighambal sa imo samtang ginabuligan mo sia sa paghimo sang masunod nga tikang agod makalakat sa “dalan nga nagapadulong sa kabuhi.” (Mateo 7:14) Sa ulihi, samtang nagalambo ang interes sang tagbalay, mapalawig mo na ang inyo pagtuon. Mahimo mo ini paagi sa paghagad sa iya nga maglingkod kag magtuon kamo sa ginkasugtan nga kalawigon sang tion.

Ang Labing Epektibo nga Pamaagi sa Pagtudlo

8, 9. (a) Paano mo mabuligan ang imo estudyante sa Biblia nga malandas ang mga balagbag kag mga pagtilaw nga mahimo masumalang niya? (b) Diin masapwan ang indi masunog nga mga materyales sa pagtukod sing mabakod nga pagtuo?

⁸ Sa tion nga ginatuman na sang isa ka tawo kon ano ang ginatudlo sang Biblia, mahimo nga makasumalang sia sing mga balagbag nga makaupang sa iya pag-uswag. Si apostol Pablo nagsiling: “Ang tanan nga maluyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Timoteo 3:12) Ginpaanggid ni Pablo ini nga mga pagtilaw sa kalayo nga mahimo makasunog sang mapigaw nga mga materyales apang indi makasunog sang mga materyales kaangay sang bulawan, pilak, kag malahalon nga mga bato. (1 Corinto 3:10-13; 1 Pedro 1:6, 7) Agod mabuligan mo ang estudyante sa Biblia nga mapalambo ang mga kinaiya nga kinahanglanon agod mabatuan ang mga pagtilaw nga masumalang niya, dapat buligan mo sia paagi sa pagtukod nga nagagamit sing indi masunog nga mga materyales.

⁹ Ginpaanggid sang salmista “ang mga pulong ni Jehova” sa “pilak nga gin-ulay sa tulunawan nga hurno sa duta, nga gintinluan sing makapito.” (Salmo 12:6) Sa pagkamatuod, ang Biblia nagaunod sang tanan nga bilidhon nga mga materyales nga sarang magamit sa pagtukod sing mabakod nga pagtuo. (Salmo 19:7-11; Hulubaton 2:1-6) Kag ang libro nga Ginatudlo Sang Biblia nagabulig sa imo kon paano gamiton sing epektibo ang Kasulatan.

10. Paano mo ipatalupangod ang Biblia sa estudyante?

¹⁰ Sa tion sang pagtuon, ipatalupangod sa estudyante ang mga Kasulatan sa tagsa ka kapitulo nga ginabinagbinag. Maggamit sing mga pamangkot nga magabulig sa estudyante nga mahangpan ang panguna nga mga teksto sa Biblia kag maaplikar niya ini. Maghalong ka nga wala mo sia ginadiktahan kon ano ang dapat niya himuon. Sa baylo, iluga ang halimbawa ni Jesus. Sang ginpamangkot sia sang isa ka tawo nga batid sa Kasuguan, si Jesus nagsabat: “Ano ang nasulat sa Kasuguan? Ano ang nahangpan mo sa imo nabasa?” Nagsabat ang tawo pasad sa Kasulatan, kag ginpahangop sia ni Jesus kon paano niya iaplikar ang prinsipio. Paagi sa paggamit sing ilustrasyon, ginpahangop man ni Jesus ang tawo kon paano sia dapat maapektuhan sang gintudlo sa iya. (Lucas 10:25-37) Ang Ginatudlo Sang Biblia nga libro may madamo nga simple nga ilustrasyon nga magamit mo sa pagbulig sa estudyante sa iya pag-aplikar sang Makasulatanhon nga mga prinsipio.

11. Daw ano kadamo nga materyal ang dapat tuptupan sa kada pagtuon?

¹¹ Ang libro nga Ginatudlo Sang Biblia nagagamit sing simple, direkta nga tinaga sa pagpaathag sang Pulong sang Dios, subong nga si Jesus nagpaalinton sang masibod nga ideya sa simple nga tinaga. (Mateo 7:28, 29) Iluga ang iya halimbawa. Ipaalinton ang impormasyon sing simple, maathag, kag sibu. Indi magpadali. Sa baylo, ibagay sa kahimtangan kag ikasarang sang estudyante kon pila ka parapo ang binagbinagon sa kada pagtuon. Nahibaluan ni Jesus ang mga limitasyon sang iya mga disipulo kag wala niya sila ginpabug-atan sing mga impormasyon nga labaw sa ila ginakinahanglan sa amo nga tion.—Juan 16:12.

12. Paano dapat gamiton ang apendise?

¹² Ang Ginatudlo Sang Biblia nga libro may apendise nga may 14 ka topiko. Pasad sa kinahanglanon sang estudyante, dapat nahibaluan mo subong nagatudlo sa iya kon paano gamiton sing labing maayo  ang materyal. Halimbawa, kon ang isa ka estudyante nabudlayan sa paghangop sang isa ka topiko ukon may mga pamangkot sia tuhoy sa isa ka espesipiko nga butang bangod sang iya ginapatihan anay, mahimo bastante na nga ipakita sa iya ang topiko sa apendise kag sia na lang ang magbinagbinag sang materyal. Sa pihak nga bahin, mahimo nga duha kamo ang magabinagbinag sang materyal depende sa iya kinahanglanon. Ang apendise may importante nga Makasulatanhon nga mga topiko, subong sang “‘Kalag’ kag ‘Espiritu’—Ano Gid ang Kahulugan Sini nga mga Tinaga” kag “Kon Ano ang ‘Babilonia nga Daku.’” Ayhan luyag mo nga binagbinagon ini nga topiko upod sa imo estudyante. Bangod wala sing mga pamangkot sa mga topiko nga ginabinagbinag sa apendise, dapat nga pamilyar ka sa mga impormasyon agod makahimo ka sing mapuslanon nga mga pamangkot.

13. Ano ang mahimo sang pangamuyo sa pagpalig-on sang pagtuo?

¹³ “Kon indi si Jehova ang magpatindog sing balay, nagapangabudlay sa wala sing pulos ang mga nagapatindog sini,” siling sang Salmo 127:1. Busa, samtang nagahanda ka sa pagdumala sing pagtuon sa Biblia, mangamuyo sing bulig kay Jehova. Ipakita sa imo nagabukas kag nagatakop nga pangamuyo sa tagsa ka pagtuon ang imo suod nga kaangtanan kay Jehova. Palig-una ang estudyante sa pagpangayo sing kaalam paagi sa pangamuyo kay Jehova agod mahangpan niya ang Iya Pulong kag sing kusog agod maaplikar niya ang laygay sini. (Santiago 1:5) Kon ginahimo niya ini, mapalig-on ang estudyante nga batason ang mga pagtilaw kag padayon nga mangin malig-on sa pagtuo.

Buligi ang mga Estudyante sa Biblia nga Mangin mga Manunudlo

14. Ano nga pag-uswag ang dapat himuon sang imo mga estudyante sa Biblia?

¹⁴ Agod matuman sang aton mga estudyante sa Biblia ang “tanan nga butang” nga ginsugo ni Jesus sa iya mga disipulo, indi sila dapat magpabilin nga mga estudyante lamang sang Pulong sang Dios kundi mag-uswag man nga mangin mga manunudlo sini. (Mateo 28:19, 20; Binuhatan 1:6-8) Paano mo mabuligan ang isa ka estudyante sa paghimo sing amo sina nga sahi sang espirituwal nga pag-uswag?

15. Ngaa dapat mo palig-unon ang imo mga estudyante sa Biblia nga magtambong sa Cristianong mga miting?

¹⁵ Halin sa umpisa pa lang sang pagtuon, hagara ang estudyante nga magtambong sa mga miting sang kongregasyon. Ipaathag sa iya nga natigayon mo ang paghanas subong isa ka manunudlo sang Pulong sang Dios gikan sa mga miting. Sa sulod sang pila ka semana, maghinguyang sing pila ka minuto sa tapos sang tagsa ka pagtuon sa Biblia agod ipaathag ang programa sang espirituwal nga pagtudlo nga nabaton mo sa nanuhaytuhay nga mga miting kag mga asambleya. Isugid sing malangkagon ang mga benepisyo nga natigayon mo sa sining mga pagtilipon. (Hebreo 10:24, 25) Sa tion nga regular na nga nagatambong sa mga miting ang estudyante, may posibilidad nga mangin isa sia ka manunudlo sang Pulong sang Dios.

16, 17. Ano ang pila ka tulumuron nga mahimo ipahamtang kag lab-uton sang isa ka estudyante sa Biblia?

¹⁶ Buligi ang estudyante sa Biblia nga maghimo sing mga tulumuron nga sarang niya malab-ot. Halimbawa, palig-una sia nga isugid ang iya natun-an sa iya abyan ukon himata. Subong man, palig-una sia nga himuon nga tulumuron nga basahon ang bug-os nga Biblia. Kon mabuligan mo sia sa pagtukod kag sa paghimo sing padayon sang isa ka rutina sang regular nga pagbasa sa Biblia, daku ang mabulig sini sa iya bisan madugay na sia nga nabawtismuhan. Dugang pa, ngaa indi mo pagpalig-unon ang estudyante nga himuon niya nga tulumuron nga  sauluhon bisan ang isa lang ka teksto sa Biblia nga nagasabat sang panguna nga pamangkot gikan sa tagsa ka kapitulo sang Ginatudlo Sang Biblia nga libro? Paagi sa paghimo sini, sia mangin “isa ka manugpangabudlay nga wala sing ginakahuya, kag ginagamit sing husto ang pulong sang kamatuoran.”—2 Timoteo 2:15.

¹⁷ Sa baylo nga tudluan ang estudyante nga sauluhon ang iya ginhanda nga mga teksto ukon ihambal lang ang ideya sini, palig-una sia nga ipaathag kon paano ang pila ka teksto sa Biblia naangot sa topiko nga ginahambalan kon nagasabat sia sa mga nagapamangkot tuhoy sa iya ginapatihan. Ang malip-ot nga mga sesyon sa pag-ensayo mahimo makabulig, nga ikaw kuno abi ang iya himata ukon katrabaho nga nagpangabay sa iya nga ipaathag ang iya mga ginapatihan. Samtang nagasabat ang estudyante, ipakita sa iya kon paano magsabat nga may “malulo nga buot kag pagtahod.”—1 Pedro 3:15.

18. Kon ang isa ka estudyante sa Biblia kalipikado na nga mangin di-bawtismado nga manugbantala, ano pa ang imo mabulig sa iya?

¹⁸ Sa ulihi, ang estudyante mahimo nga kalipikado na nga makigbahin sa pagministeryo. Ipadaku nga ang pagtugot nga makapakigbahin sa sini nga hilikuton isa ka pribilehiyo. (2 Corinto 4:1, 7) Sa tion nga mapat-od sang mga gulang nga ang estudyante kalipikado na nga mangin isa ka di-bawtismado nga manugbantala, buligi sia sa paghanda sing isa ka simple nga presentasyon kag nian updi sia sa pag-alagad sa latagon. Padayon nga magpanghikot sing regular kaupod niya sa nanuhaytuhay nga aspekto sang pangpubliko nga ministeryo, kag tudlui sia kon paano maghanda kag maghimo sing epektibo nga mga pagduaw liwat. Ang imo huwaran mangin maayo nga impluwensia.—Lucas 6:40.

“Maluwas Mo ang Imo Kaugalingon kag ang mga Nagapamati sa Imo”

19, 20. Ano dapat ang aton mangin tulumuron, kag ngaa?

¹⁹ Walay duhaduha nga kinahanglan gid ang lakas nga panikasog agod buligan ang isa ka tawo nga makadangat “sa sibu nga ihibalo sang kamatuoran.” (1 Timoteo 2:4) Apang, pila lamang nga kalipay sa kabuhi ang mapaanggid sa kalipay nga mabuligan ang iban nga tumanon ang ginatudlo sang Biblia. (1 Tesalonica 2:19, 20) Sa pagkamatuod, daw ano nga pribilehiyo nga mangin “mga masigkamanugpangabudlay sang Dios” sa bug-os kalibutan nga pagtudlo nga hilikuton!—1 Corinto 3:9.

²⁰ Paagi kay Jesucristo kag sa gamhanan nga mga anghel, sa indi madugay hukman ni Jehova ang “mga wala nagakilala sa Dios kag ang mga wala nagatuman sa maayong balita tuhoy sa aton Ginuong Jesus.” (2 Tesalonica 1:6-8) Madamo nga kabuhi ang yara sa katalagman. Mahimo mo bala nga mangin tulumuron ang pagdumala sing bisan isa lang ka pagtuon sa Biblia sa puluy-an sa libro nga Ano Gid ang Ginatudlo Sang Biblia? Samtang nagapakigbahin ka sa sini nga hilikuton, may kahigayunan ka nga “maluwas mo ang imo kaugalingon kag ang mga nagapamati sa imo.” (1 Timoteo 4:16) Ilabi na gid nga hilingagawon karon nga buligan naton ang iban nga tumanon kon ano ang ginatudlo sang Biblia.

[Footnote]

Ano ang Imo Natun-an?

• Sa ano nga katuyuan gindesinyo ang libro nga Ginatudlo Sang Biblia?

• Paano ka makasugod sang mga pagtuon sa Biblia nga nagagamit sang Ginatudlo Sang Biblia nga libro?

• Anong mga pamaagi sa pagtudlo ang epektibo gid?

• Paano mo buligan ang isa ka estudyante sa Biblia nga mangin isa ka manunudlo sang Pulong sang Dios?

[Mga Pamangkot sa Pagtinuon]

[Piktyur sa pahina 26]

Ginagamit mo bala sing maayo ini nga libro?

[Piktyur sa pahina 27]

Ang malip-ot nga paghambalanay mahimo mag-engganyo sa isa nga magkuha sing dugang pa nga ihibalo sa Biblia

[Piktyur sa pahina 29]

Ano ang mahimo mo agod mapatalupangod sa estudyante ang Biblia?

[Piktyur sa pahina 30]

Buligi ang estudyante sang Biblia nga mag-uswag