Mga Pamangkot Gikan sa mga Bumalasa

Sa ano nga kahulugan nga ang manugtipon nakasapo sing “isa [lamang] ka lalaki sa isa ka libo” apang wala sia sing nasapwan nga “isa ka babayi sa ila tanan”?—Manugwali 7:28.

Agod mahangpan naton sing husto ining inspirado nga mga pulong, dapat anay naton mahangpan kon paano ginatamod sang Dios ang mga babayi. Ang Biblia nagsiling nga ang balo nga umagad nga babayi ni Naomi nga si Rut “isa ka maayo gid nga babayi.” (Rut 3:11) Suno sa Hulubaton 31:10, ang “bili sang [maayo nga asawa] labaw pa sangsa mga korales.” Gani, ano ang buot silingon ni Hari Solomon sang dumaan nga Israel sang nagsiling sia: “Nakasapo ako . . . sing isa ka matuod nga lalaki sa isa ka libo, apang wala sing isa ka matuod nga babayi”?—Moffatt.

Ginapakita sang konteksto nga mahimo gid nga manubo ang talaksan sa moral sang mga babayi sang panahon ni Solomon. (Manugwali 7:26) Mahimo nga resulta ini sang impluwensia sang dumuluong nga mga babayi nga nagasimba kay Baal. Bisan gani si Hari Solomon ginpatalang sang madamo niya nga dumuluong nga asawa. “Sia may pito ka gatos ka asawa, mga prinsesa, kag tatlo ka gatos ka mga babayi,” siling sang Biblia kag “ginpatalang sang iya mga asawa ang iya tagipusuon” sa pagsimba sa butig nga mga dios. (1 Hari 11:1-4) Ang talaksan sa moral sang mga lalaki manubo man—haluson ka makakita sing isa ka matarong nga lalaki sa isa ka libo. “Ini lamang ang nakita ko,” hinakop ni Solomon, “nga ang matuod nga Dios naghimo sang katawhan nga matadlong, apang sila nagpangita sing madamo nga plano.” (Manugwali 7:29) Isa ini ka konklusion tuhoy sa katawhan—ang lalaki subong ang tawhanon nga rasa, indi ang lalaki kon ipaanggid sa babayi. Gani, ang mga pulong nga mabasa sa Manugwali 7:28 dapat hangpon nga isa ka komento tuhoy sa kahimtangan sa moral sang mga tawo sa kabug-usan sang adlaw ni Solomon.

Apang, ini nga bersikulo posible nga may isa pa ka kahulugan. Mahimo nga matagnaon ini, kay wala pa gid sing babayi nga himpit nga nagtuman kay Jehova. Apang may isa na ka lalaki nga himpit nga nagtuman sa iya—si Jesucristo.—Roma 5:15-17.

[Piktyur sa pahina 31]

“Isa ka lalaki sa isa ka libo”