Mga Sien ang Edad nga may Katuyuan sa Kabuhi

SI Elin isa sa 60 ka tawo sa Sweden nga ginlista sining karon lang nga nagaedad sing 105 ka tuig ukon kapin pa. Sia mismo nagaedad sing 105. Bisan pa nagapuyo na lang sia sa puluy-an sang mga tigulang kag indi na makaguagua, masarangan gihapon sang iya lawas nga magpadayon sa pag-alagad subong isa ka aktibo nga Saksi ni Jehova, ang dalanon sang kabuhi nga ginpili niya sa kapin na sa 60 ka tuig.

Ginailog ni Elin ang pamaagi anay ni apostol Pablo sa pagbantala sa iban sang ginbilanggo si Pablo sa balay. Ginbantalaan ni Pablo ang tanan nga nagduaw sa iya. (Binuhatan 28:16, 30, 31) Sa kaanggid man nga paagi, ginahimuslan ni Elin ang tanan nga kahigayunan nga mapaambit ang maayong balita sa Biblia sa mga manugpaninlo, dentista, doktor, hairdresser, nars, kag sa iban pa nga maistorya niya. Sa tion kag tion, ginapalig-on pa gani sang mga masigkatumuluo ni Elin sa iya kongregasyon ang ila mga estudyante sa Biblia nga duawon sia agod makabenepisyo sila gikan sa iya ihibalo kag eksperiensia.

Ang mga utod sa kongregasyon ni Elin nanamian gid sa iya pagkamasinadyahon kag pagkamausisaon. Ang isa ka Saksi nagsiling: “Bilib gid kami sa iya kay nahibaluan niya gihapon ang mga nagakalatabo sa kongregasyon. Matandaan niya ang mga ngalan sang tanan nga kabataan kag mga kauturan nga bag-o lang nagsaylo sa kongregasyon.” Kilala man si Elin nga maabiabihon, palalahog, kag may positibo nga pagtamod sa kabuhi.

Ano ang nakabulig kay Elin nga mahuptan ang iya kalipay kag magpabilin nga maathag ang iya katuyuan sa kabuhi? Nagabasa sia kada adlaw sing isa teksto gikan sa bukleta nga Pag-usisa sa Kasulatan Adlaw-adlaw, nga ginabalhag sang mga Saksi ni Jehova. Paagi sa paggamit sing lente, nagabasa man sia sing pila ka bahin sang Biblia tagsa ka adlaw. Nagahanda si Elin para sa semanal nga mga miting sang mga Saksi ni Jehova, kag bisan pa indi sia makatambong, nagapamati sia sa mga tape recording sining mga miting. Ang regular nga pagbasa sang Biblia kag pasad sa Biblia nga mga publikasyon kag ang padayon nga pagtambong sa Cristianong mga miting makabulig sa aton nga matigayon ang makaalayaw kag may katuyuan nga kabuhi walay sapayan sang aton edad.—Salmo 1:2; Hebreo 10:24, 25.