Si Samuel Nagpasanyog sang Matuod nga Pagsimba

GINSABDONG sang isa ka manalagna ang iya mga masigkatumuluo kay nagpangayo sila sang isa ka tawhanon nga hari kag ginlaygayan niya sila nga tumanon ang Dios. Agod ipakita ang iya awtoridad, nagpangayo sia kay Jehova sing isa ka tanda sa dagway sang isa ka unos. Talagsa lang nagaulan sing mabunok sa Israel sa sini nga tion sang tuig, ang tig-alani sang trigo. Apang, nagpadala ang Dios sing daguob kag ulan. Gani, hinadlukan gid ang mga tawo kay Jehova kag sa iya tiglawas, si Samuel.—1 Samuel 12:11-19.

Ang manalagna nga si Samuel isa man ka manunulat. Ang iya puno sing aksion nga mga sinulatan tuhoy sa maragtas nagatuptop sing mga 330 ka tuig kag nagalakip sang tumalagsahon nga mga buhat sang mga Hukom sang Israel. Halimbawa, ang matuodtuod nga sugilanon ni Samson, ang pinakamakusog nga tawo nga nagkabuhi, nangin topiko sang binalaybay kag opera subong man sang iban pa nga mga palaguaon sa entablado kag mga pelikula. (Hukom, kapitulo 13-16) Nagsulat man si Samuel tuhoy kay Rut kag sa iya ugangan nga babayi, si Noemi, nga lunsay mga balo kag mga pigado. Ang malipayon nga katapusan sining matuodtuod nga sugilanon tuman gid ka makawiwili kaangay man sang sugilanon ni Samson.—Rut, kapitulo 1-4.

Ano nga mga leksion ang matun-an naton gikan sa mga sinulatan ni Samuel kag sa iya kabuhi? Paano niya ginpasanyog ang matuod nga pagsimba?

Ang Iya Pagkapamatan-on

Ang amay ni Samuel, si Elcana, isa ka sumilimba ni Jehova kag isa ka mahigugmaon nga bana. Ang asawa ni Elcana nga si Ana isa ka babayi nga may mabakod nga espirituwalidad. Sa balay ni Jehova sa Shilo, ang baw-as nga si Ana nagpangamuyo sing hugot kag nanumpa: “O Jehova sang mga kasuldadusan, kon pat-od gid nga tan-awon mo ang kapipit-an sang imo ulipon nga babayi kag dumdumon gid ako, indi mo pagkalimtan ang imo ulipon nga babayi kag hatagan mo gid ang imo ulipon nga babayi sing anak nga lalaki, ihatag ko sia kay Jehova sa tanan nga adlaw sang iya kabuhi, kag wala sing labaha nga magaagi sa iya ulo.” (1 Samuel 1:1-11) Nagkahulugan ini nga idedikar ang bata sa pag-alagad kay Jehova.

Nagpangamuyo sing hipos si Ana. “Ang iya mga bibig lamang ang naghulag,” siling sang rekord. Nasal-an sia nga hubog sang Mataas nga Saserdote nga si Eli kag ginsabdong sia. Apang, matinahuron nga ginpaathag ni Ana ang iya kahimtangan, kag si Eli nagsiling: “Lakat ka sa paghidait, kag kabay nga ihatag sang Dios sang Israel ang imo pangabay nga ginpangayo mo sa iya.” Ginsabat ni Jehova ang pangabay ni Ana, kay ang rekord nagsiling pa gid: “Sang nagsapol ang tion nagpanamkon si Ana kag nag-anak sing lalaki, kag ginhingalanan sia Samuel, kay nagasiling sia, ‘ginpangayo ko sia kay Jehova.’”—1 Samuel 1:12-20.

Ginpadaku si Samuel sa “disiplina kag nagatuytoy nga panghunahuna ni Jehova.” (Efeso 6:4) Sang malutas na si Samuel, gindala sia ni Ana sa balay sang Dios sa Shilo kag ginpresentar sa Mataas nga Saserdote nga si Eli. Sa idalom sang iya pag-atipan, ang bata “nangin ministro ni Jehova.” Ang daku nga kalipay ni Ana ginpabutyag sa iya makatalandog nga pagpasalamat nga ginsulat mismo sang ulihi ni Samuel.—1 Samuel 2:1-11.

Kon ikaw isa ka ginikanan, ginapalig-on mo bala ang imo mga anak nga himuon nga karera ang pag-alagad kay Jehova? Ang pagpasanyog sa matuod nga pagsimba amo ang pinakamaayo nga paagi nga magamitan sang isa ka tawo sang iya kusog.

Nagpasibu si Samuel sa kabuhi sa santuaryo. “Padayon [sia] nga nagdaku sa atubangan ni Jehova” kag nangin “labi nga kalahamut-an sa pagtamod ni Jehova kag sang mga tawo.” Gin-ilog niya ang mga kinaiya sang Dios amo nga ginpalangga sia sang iban.—1 Samuel 2:21, 26.

Indi ini masiling sa walay pulos nga mga anak nga lalaki ni Eli, nga sanday Hofni kag Finehas, nga “wala magkilala kay Jehova.” Naghimo sila sing seksuwal nga imoralidad kag ginkuha nila ang pinakamaayo nga mga bahin sang mga halad nga  gindala sang mga tawo sa santuaryo. Nagpadala na ang Dios sing isa ka manalagna agod ipahibalo ang silot nga mapaabot ni Eli, kag naglakip ini sang kamatayon sang iya duha ka anak nga lalaki. (1 Samuel 2:12, 15-17, 22-25, 27, 30-34) Gamiton ni Jehova si Samuel sa paghatag sang isa pa ka mensahe sang paghukom.

Si Samuel Nag-alagad Subong Manalagna

Ang Dios nagsiling kay Samuel: “Sugiran mo [si Eli] nga hukman ko ang iya panimalay tubtob sa tion nga walay pat-od tungod sa kasaypanan nga nahibaluan niya, bangod ginsumpa sang iya mga anak nga lalaki ang Dios, kag wala niya sila ginsaway.” Yadto nga mensahe indi mahapos ihambal, kag namilit si Eli nga indi pag-ilikom sa iya ang mensahe sang Dios. Gani ginsugid ni Samuel ang tanan nga ginsiling ni Jehova. Nagkinahanglan gid yadto sing kaisog!—1 Samuel 3:10-18.

Samtang nagahamtong si Samuel, nahibaluan sang bug-os nga Israel nga manalagna sia sang Dios. (1 Samuel 3:19, 20) Natuman ang paghukom nga gintagna ni Samuel sang ang Israel makahalapay nga ginlutos sang mga Filistinhon. Napatay sa inaway sanday Hofni kag Finehas, kag gin-agaw sang mga Filistinhon ang kaban sang katipan ni Jehova. Sang mabalitaan ni Eli ang tuhoy sa pagkapatay sang iya mga anak nga lalaki kag sa natabo sa Kaban, si Eli nagtingkaya sa iya lingkuranan, nalunggo ang iya liog, kag napatay.—1 Samuel 4:1-18.

Pagligad sang duha ka pulo ka tuig, ginlaygayan ni Samuel ang mga Israelinhon nga talikdan ang butig nga pagsimba. Naghulag sila paagi sa pagsikway sang ila mga idolo, pagpuasa, kag pagtu-ad sang ila mga sala. Nangamuyo si Samuel kag nagdulot sing halad nga sinunog tungod sa ila. Ang resulta? Sang nagsalakay ang mga Filistinhon, gingumon sila sang Dios, kag nalutos sang mga Israel ang kaaway. Bangod sang pagpakamaayo ni Jehova, ang kahimtangan sang mga Israelinhon nag-uswag sing daku, kag nabawi nila ang teritoryo nga gin-agaw sa ila sang mga Filistinhon.—1 Samuel 7:3-14.

Ginpasanyog gid ni Samuel ang matuod nga pagsimba. Halimbawa, ginpat-od niya nga ang pila sang mga inati sa inaway gamiton sa pagmentinar sa tabernakulo. Nagbulig sia sa paghimo sing mga kahimusan tuhoy sa mga pagsaulog sang Paskua kag sa pag-alagad sang mga manugbantay sang mga Levinhon sa gawang. (1 Cronica 9:22; 26:27, 28; 2 Cronica 35:18) Halin sa iya puluy-an sa Rama, naglakbay si Samuel kada tuig sa paghukom sa nagkalainlain nga mga siudad. Natigayon niya ang reputasyon subong bunayag kag walay ginapasulabi. Bangod gintahod sang mga tawo si Samuel, nabuligan niya sila sa espirituwal. (1 Samuel 7:15-17; 9:6-14; 12:2-5) Bangod sang iya pagkabunayag kag espirituwalidad, napahulag gid niya ang madamo nga sundon ang iya huwaran. Napahulag ka man bala sang ginhimo ni Samuel?

Ang Israel Nagpangayo sing Hari

Sang tigulang na si Samuel, gintangdo niya ang iya mga anak nga lalaki, nga sanday Joel kag Abias, nga mga hukom. “Wala [sila] maglakat sa iya mga dalanon, kundi naglipas sa paghingamo sang di-matarong nga daug kag nagbaton sing mga hamham kag nagpatiko sang katarungan.” Bangod sang ila paggawi, ang mga tigulang sang Israel nagpangayo sing hari. (1 Samuel 8:1-5) Malain ini sa panan-aw ni Samuel. Apang, sang ginpangamuyo niya ini, si Jehova nagsiling: “Indi ikaw ang ila ginsikway, kundi ako ang ila ginsikway nga maghari sa ila.” (1 Samuel 8:6, 7) Ginsugo sang Dios si Samuel nga ihatag ang luyag sang mga tawo kag paandaman sila nga mawasi nila ang ila sadsaran nga mga kinamatarong kag mga kahilwayan sa idalom sang isa ka hari. Sang nagpamilit ang mga tawo, naghimo si Jehova sing kahimusan nga tangduan ni Samuel si Saul subong hari.—1 Samuel 8:6–22; 9:15-17; 10:1.

Ginsuportahan ni Samuel ini nga kahimusan  walay sapayan sang iya mga duhaduha. Sang malutos sang mga Israelinhon ang mga Amonhon, gintipon niya ang katawhan sa Gilgal kag ginsakdag ang paghari ni Saul. (1 Samuel 10:17-24; 11:11-15) Ginrepaso ni Samuel ang maragtas sang Israel kag ginlaygayan ang hari kag ang katawhan nga tumanon si Jehova. Ginsabat sang Dios ang pangamuyo ni Samuel paagi sa indi pa tiempo nga pagdaguob kag pag-ulan nga ginsambit sa umpisa. Bangod sang unos, ginbaton sang katawhan ang ila sayop nga ginsikway nila si Jehova. Sang ginpangabay nila si Samuel nga mangamuyo tungod sa ila, nagsabat sia: “Malayo sa akon nga magpakasala ako batok kay Jehova paagi sa pag-untat sa pagpangamuyo tungod sa inyo; kag tudluan ko kamo sang maayo kag matarong nga dalanon.” Daw ano gid nga huwaran sang mainunungon nga gugma kay Jehova kag sa iya katawhan! (1 Samuel 12:6-24) Handa ka man bala nga suportahan ang teokratiko nga mga kahimusan kag mangamuyo tungod sa mga masigkatumuluo?

Ang Una nga Duha ka Tawhanon nga Hari sang Israel

Si Saul maugdang kag kalahamut-an sa Dios. (1 Samuel 9:21; 11:6) Apang, wala na niya sang ulihi ginsunod ang panuytoy sang Dios. Halimbawa, ginsabdong sia ni Samuel bangod sang di-mapailubon nga pagdulot sing halad sa baylo nga maghulat, subong sang ginsugo sa iya. (1 Samuel 13:10-14) Sang di-matinumanon nga ginsalbar ni Saul ang kabuhi ni Hari Agag nga Amaleknon, ginsilingan sia ni Samuel: “Gingisi ni Jehova gikan sa imo ang harianon nga paggahom sa Israel sini nga adlaw, kag ihatag niya ini sa imo isigkatawo nga maayo pa sa imo.” Si Samuel mismo ang nagpatay kay Agag kag ginlalawan niya si Saul.—1 Samuel 15:1-35.

Nagsiling sang ulihi si Jehova kay Samuel: “Tubtob pa bala san-o nga maglalaw ka kay Saul, sa ginatan-aw nga ginsikway ko sia sa pagkahari sa ibabaw sang Israel?” Gani, ginpadala ni Jehova si Samuel sa Betlehem agod tangduan ang anak nga lalaki ni Jesse subong hari. Isaisa nga ginbinagbinag ni Samuel ang mga anak nga lalaki ni Jesse tubtob nga ginhatag ni Jehova ang Iya pag-ugyon nga tangduan ang kinagot nga anak, si David. Sina nga adlaw, nakatuon si Samuel sing isa ka importante nga leksion: “Ang Dios nagatan-aw indi subong sang pagtan-aw sang tawo, bangod ang tawo nagatulok sa kon ano ang makita sang mga mata; apang tuhoy kay Jehova, nagatulok sia sa tagipusuon.”—1 Samuel 16:1-13.

Bangod nagkasubo gid si Samuel sa pagkadimatinumanon ni Saul, labi pa gid nga nagkalisod sia sang nagtanom si Saul sing daku gid nga pagdumot kay David! Walay sapayan sini nga mga pagtilaw, nagpabilin si Samuel nga aktibo bisan tigulang na sia kag ginhimo ang iya bug-os nga masarangan sa pag-alagad kay Jehova.—1 Samuel 19:18-20.

Ang Ginbilin nga Palanublion ni Samuel

Sang napatay si Samuel, ginlalawan sang Israel ining mapainubuson kag maisugon nga manalagna nga nag-impluwensia sang kabuhi sang madamo. (1 Samuel 25:1) Si Samuel indi himpit, kag kon kaisa nagsala sia sa paghukom. Apang, walay sapayan sang iya mga limitasyon, ginhatag ni Samuel kay Jehova ang eksklusibo nga debosyon kag walay kakapoy nga nagpangabudlay agod buligan ang iban sa paghimo sing amo man.

Madamo ang nagbag-o sugod sang panahon ni Samuel, apang ang rekord tuhoy sa iya kabuhi nagahatag sing hamili nga mga leksion para sa aton. Labaw sa tanan, ginhimo kag ginpasanyog ni Samuel ang matuod nga pagsimba kay Jehova. Amo bala sina ang imo ginahimo?

[Kahon sa pahina 16]

PAMALANDUNGI ANG KABUHI NI SAMUEL

• Subong nga si Samuel gintudluan sang iya mga ginikanan sang Pulong sang Dios, padakua ang imo mga anak “sa disiplina kag sa nagatuytoy nga panghunahuna ni Jehova.”—Efeso 6:4.

• Palig-una ang imo mga anak nga ilugon si Samuel paagi sa paghimo nga ila karera ang pag-alagad kay Jehova.

• Bangod sang diosnon nga mga kinaiya ni Samuel, ginpalangga sia sang iban, kag gani nagpahamtang sia sing maayo nga huwaran sa aton.

• Ginhimo ni Samuel ang iya bug-os nga masarangan agod pasanyugon ang matuod nga pagsimba, kag amo man ang dapat naton himuon.

[Piktyur sa pahina 15]

Ginpasanyog ni Samuel ang matuod nga pagsimba kag kinabubut-on nga naghatag sing espirituwal nga bulig