Sugilanon sang Kabuhi

Kon Ngaa Nalipay Ako sa Paghimo sing mga Disipulo

PANUGIRON NI PAMELA MOSELEY

Nagadabdab ang inaway sa Inglaterra sang 1941 sang gin-upod ako sang akon iloy sa kombension sang mga Saksi ni Jehova sa Leicester. Nabatian namon si Joseph Rutherford nga naghatag sang pinasahi nga pamulongpulong tuhoy sa mga kabataan. Sang ginbawtismuhan kami ni Nanay sa sadto nga kombension, nakita ko nga ang mga nagbulig sa amon nga mag-uswag sa espirituwal nalipay gid. Wala ko pa sadto mahangpan ang daku nga kalipay sang paghimo sing mga disipulo ni Jesucristo.

ANG amon pag-uswag nga mangin mga disipulo nagsugod sang tuig antes sini. Madumduman ko pa yadtong makakulugmat nga adlaw sang Septiembre 1939 sang nagsugod ang Bug-os Kalibutan nga Inaway II. Nakita ko ang mga luha nga nagtululagay sa pisngi sang akon iloy samtang sulitsulit sia nga nagapamangkot, “Ngaa indi makasapo sing paghidait ang kalibutan?” Ang akon mga ginikanan mga soldado sadtong Bug-os Kalibutan nga Inaway I kag naeksperiensiahan nila ang kakugmat sini. Ginpamangkot ni Nanay sa Anglikano nga ministro sa Bristol ang iya pamangkot. Nagsiling lang sia: “Pirme nga may mga inaway kag magapabilin ini nga amo sini.”

Apang, wala madugay pagkatapos sadto, isa ka tigulang nga babayi ang nagduaw sa amon balay. Isa sia sa mga Saksi ni Jehova. Ginpamangkot sia sang akon iloy sang amo man nga pamangkot: “Ngaa indi makasapo sing paghidait ang kalibutan?” Ginpaathag sang Saksi nga ang mga inaway bahin sang tanda nga yari na kita sa katapusan sining masingki nga sistema sang mga butang. (Mateo 24:3-14) Wala madugay ang iya anak nga babayi nagdumala sing pagtuon sa Biblia upod sa  amon. Lakip sila nga duha sa malipayon nga tumalan-aw sang ginbawtismuhan kami. Ngaa nalipay gid ang mga tawo sa paghimo sing mga disipulo? Sang ulihi, nahibaluan ko ang sabat kon ngaa. Sugiran ko kamo sang pila nga natun-an ko sa sulod sang kapin sa 65 ka tuig nga paghimo sing mga disipulo.

Pagtukib sa Kalipay sang Pagpanudlo

Nagsugod ako sa pagbantala sang Ginharian sa Bristol sang 11 anyos ako. Isa ka utod nga lalaki ang naghatag sa akon sing ponograpo kag testimony card kag nagsiling: “Kadtui ang tanan nga balay sa sina nga bahin sang dalan.” Gani naglakat ako, nga nagaisahanon lamang. Siempre pa, ginkulbaan gid ako. Ginpatokar ko ang isa ka narekord nga pamulongpulong sa Biblia kag nian ginpabasa sa tagbalay ang testimony card, nga nagaagda sa mga tawo nga batunon ang literatura sa Biblia.

Sugod sang katuigan 1950, ginhatagan sing pagpadaku ang pagbasa gikan sa Biblia sa tion sang amon pagpamalaybalay. Bangod mahuluy-on ako, nabudlayan ako sang primero nga makighambal sa mga estranghero kag magpaathag sang mga teksto sang Biblia. Apang nakatigayon ako sang ulihi sing kaisog. Amo yadto ang tion nga nanamian gid ako sa pagministeryo. Naghunahuna ang iban nga mga tawo nga mga manugbaligya lamang kami sing mga libro, apang sang basahan kag paathagan namon sila sang mga teksto sa Biblia, ginkilala nila kami subong mga manunudlo sang Pulong sang Dios. Nanamian gid ako sa sini amo nga luyag ko makigbahin sing dugang pa. Gani sang Septiembre 1955, nagsulod ako sa bug-os tion nga ministeryo subong isa ka payunir.

Ang Pagbatas Nagaresulta sa mga Padya

Ang isa sa una nga mga leksion nga natun-an ko amo nga ang pagbatas nagaresulta sa mga padya. Sang isa ka okasyon, nabilinan ko sing isa ka kopya sing Ang Lalantawan ang isa ka babayi, si Violet Morice. Sang nagbalik ako agod duawon sia, gin-abrihan niya sing daku ang puertahan, nagkorsimano sia, kag nagpamati sing maayo samtang ginapaathag ko ang mga Kasulatan sa iya. Kada magduaw ako, daw interesado gid sia. Apang, sang gintanyagan ko sia sing isa ka regular nga pagtuon sa Biblia, nagsiling sia: “Indi ko. Matuon lang ako kon magdalagku na ang akon mga bata.” Nahanusbo gid ako! Ang Biblia nagasiling tuhoy sa “tion sa pagpangita kag sa tion sa pag-ampo.” (Manugwali 3:6) Namat-od ako nga indi mag-ampo.

Pagligad sang isa ka bulan, nagbalik ako kag ginbinagbinag ang pila pa ka kasulatan kay Violet. Wala madugay, nagtuon na sia sa Biblia kada semana sa iya puertahan. Sang ulihi nagsiling sia: “Mas maayo pa nga magdayon ka.” Nangin maayo gid nga masigkatumuluo kag abyan si Violet sa akon! Huo, ginbawtismuhan si Violet subong isa sang mga Saksi ni Jehova.

Isa ka adlaw nakibot gid si Violet sang mahibaluan niya nga ginbaligya sang iya bana ang ila balay nga lipod sa iya ihibalo kag ginbayaan sia. Maayo na lang nga sa bulig sang isa ka Saksi nga abyan, nakakuha sia sing isa pa ka balay sadto mismo nga hapon. Bilang pagpasalamat kay Jehova, namat-od sia nga ihinguyang ang nabilin nga bahin sang iya kabuhi subong isa ka payunir. Sang nakita ko ang iya kakugi sa matuod nga pagsimba bangod sang espiritu ni Jehova, nahangpan ko kon ngaa ang paghimo sing mga disipulo nagahatag sing amo nga kalipay. Huo, ini amo ang mangin karera ko!

Sang 1957, gindestino kami ni Mary Robinson nga magpayunir sa industriyal nga duog sang Rutherglen sa Glasgow, Scotland. Nagbantala kami sa tanan nga sahi sang paniempo, apang takus ini. Isa ka adlaw nakilala ko si Jessie. Nalipay gid ako nga magtuon sa Biblia upod sa iya. Ang iya bana, nga si Wally, isa ka Komunista, kag ginlikawan niya ako sang primero. Sang nagtuon si Wally sa Biblia kag nahangpan niya nga ang Ginharian sang Dios lamang ang makapaluntad sang maayo gid nga kahimtangan sa mga tawo, nalipay gid sia. Sang ulihi, sila nga duha nangin mga manughimo sing disipulo.

 Ang Una nga mga Reaksion Mahimo nga Malimbungon

Nakabaton kami sang ulihi sing bag-o nga asaynment sa Paisley, Scotland. Isa ka adlaw samtang nagabantala ako didto, ginsirhan ako sing puertahan sang isa ka babayi. Apang dugaydugay lang ginpangita niya ako kag nagpangayo sing pasaylo. Sang nagbalik ako sang masunod nga semana, nagsiling sia: “Daw subong bala nga ang Dios ang ginsirhan ko sing puertahan. Gani naglakat ako kag ginpangita ka.” Pearl ang iya ngalan. Ginsugiran niya ako nga ginpaslaw sia sang iya mga abyan kag mga himata amo nga nangamuyo sia sa Dios nga makakita sia sing matuod nga abyan. “Kag nian nagduaw ka,” siling niya. “Karon ko narealisar nga ayhan ikaw yadtong matuod nga abyan.”

Indi mahapos mangin abyan ni Pearl. Nagapuyo sia sa isa ka mataas nga pukatod, kag kinahanglan ko ini taklaron. Sang ginsugat ko sia agod magtambong sia sa iya nahauna nga miting, diutayan lang ako mapalid bangod sang mabaskog nga hangin kag ulan. Ginhaboy ko ang akon payong sang magisi ini. Pagligad sang anom ka bulan nga ginsirhan niya ako sing puertahan, ginsimbuluhan ni Pearl ang iya dedikasyon sa Dios paagi sa pagpabawtismo sa tubig.

Wala madugay pagkatapos sadto, namat-od ang iya bana nga magtuon sa Biblia, kag sa sulod sang malip-ot lamang nga tion, nag-upod sia sa akon sa pagpamalaybalay. Subong sang kinaandan, nagaulan sadto. “Indi ka magkabalaka,” siling niya. “Ginaagwanta ko ang paniempo kaangay sini sa sulod sang mga inoras sa pagtan-aw sing football, gani mahimo ko man ini para kay Jehova.” Bilib gid ako sa determinasyon sang mga taga-Scotland.

Daw ano gid ka makalilipay para sa akon nga makabalik pagligad sang madamo nga tinuig kag makita nga ang kalabanan sang gintun-an ko anay nagabatas gihapon sa pagtuo! Amo ina ang kalipay sang paghimo sing mga disipulo. (1 Tesalonica 2:17-20) Sang 1966, pagkatapos sang kapin sa walo ka tuig nga pagpayunir sa Scotland, gin-agda ako sa Watchtower Bible School of Gilead agod hanason subong misyonero.

Sa Dumuluong nga Teritoryo

Gindestino ako sa Bolivia, sa tropiko nga banwa sang Santa Cruz, diin may isa ka kongregasyon nga ginatapuan sang 50 ka utod. Ang banwa nagpahanumdom sa akon sang Wild West nga ginpakita sa mga pelikula sang Hollywood. Sa paghinumdom sang nagligad, para sa akon, isa lamang ako ka ordinaryo nga misyonero. Wala ko maagihan nga atakehon sang mga buaya, palibutan sang akig nga kadam-an, magtalang sa desyerto, ukon malunod sa barko sa kadagatan. Apang, para sa akon, ang paghimo sing mga disipulo nangin mas makakulunyag.

Ang isa sa nahauna nga mga babayi nga gintun-an ko sa Biblia sa Santa Cruz amo si Antonia. Nabudlayan gid ako nga magtudlo sa Espanyol. Isa ka bes, ang bata nga lalaki ni Antonia nagsiling: “Mommy, ginahungod bala niya nga magsala agod magkadlaw kita?” Nangin disipulo sang ulihi si Antonia, kag amo man ang iya anak nga babayi nga si Yolanda. Si Yolanda may abyan nga isa ka estudyante sa abogasiya, nga ang iya ngalan amo si Dito, kag nagtuon man sia sa Biblia kag nagtambong sa amon mga miting. Isa ka butang tuhoy sa pagtudlo sing kamatuoran sa Biblia ang natun-an ko sa pagdumala sing pagtuon sa iya: Kon kaisa kinahanglan sang mga tawo ang mahinay nga pagtiklod.

Sang nagpalya na si Dito sa iya pagtuon, nagsiling ako: “Dito, wala ka ginapilit ni Jehova nga suportahan ang iya Ginharian. Kinahanglan nga mamat-od ka.” Sang nagsabat sia nga luyag niya nga mag-alagad sa Dios, nagsiling ako: “May mga larawan ka diri sang isa ka rebolusyonaryo nga lider. Kon makita ini sang isa ka bisita, magasiling bala sia nga namat-od ka na nga suportahan ang Ginharian sang Dios?” Amo yadto ang mahinay nga pagtiklod nga kinahanglan niya.

Duha ka semana sang ulihi, isa ka kinagubot ang natabo, kag nagtirohay ang mga estudyante sang unibersidad kag ang mga pulis. “Magpalayo kita diri!” singgit ni Dito sa iya abyan. “Indi. Amo na ini ang importante nga adlaw nga ginahulat naton,” sabat sang iya abyan, kag ginkuha niya ang riple kag nagdalagan pakadto sa atop sang unibersidad. Isa sia sa walo ka abyan ni Dito nga napatay sadto nga adlaw. Mahunahuna bala ninyo ang akon kalipay sang nakita ko si Dito, nga ayhan napatay na kon wala sia namat-od nga mangin matuod nga Cristiano?

Saksi sa Pagpanghikot Sang Espiritu ni Jehova

Isa ka adlaw gintawag ako sang ginang sang puluy-an sang isa ka balay nga ginligaran ko lang, kay nagdumdom ako nga naduaw na namon ini nga balay. Ignacia ang iya ngalan. Kilala niya ang mga  Saksi ni Jehova, apang bangod sang pagpamatok sang iya bana—isa ka mabukod nga pulis nga nagahingalan kay Adalberto—wala sia mag-uswag sa espirituwal. Indi niya mahangpan ang madamo nga sadsaran nga mga panudlo sang Biblia, gani nagsugod kami sa pagtuon sa Biblia. Bisan pa desidido si Adalberto nga pauntaton ini nga mga pagtuon sa Biblia, nasugilanon ko sia sing malawiglawig tuhoy sa iban nga mga topiko. Amo yadto ang una nga tikang sang amon pag-abyanay.

Handurawa ang akon kalipay nga makita si Ignacia nga nangin isa ka mainabyanon nga katapo sang kongregasyon, nga nagaatipan sa espirituwal kag pisikal nga kaayuhan sang madamo nga nagakinahanglan sing lugpay. Sang ulihi, ang iya bana kag ang tatlo sang iya mga anak nangin mga Saksi. Sa katunayan, sang nahangpan sang ulihi ni Adalberto ang kahulugan sang maayong balita, nagbalik sia sa estasyon sang pulis kag nakighambal sing dinamiko amo nga nakatigayon sia sing 200 ka suskripsion sang Ang Lalantawan kag Magmata gikan sa mga pulis.

Ginapatubo Ini ni Jehova

Pagkatapos sang anom ka tuig nga pag-alagad sa Santa Cruz, gindestino ako sa panguna nga siudad sang Bolivia, ang La Paz, diin ginhinguyang ko ang masunod nga 25 ka tuig. Sang maaga nga bahin sang katuigan 1970, ang sanga talatapan sang mga Saksi ni Jehova sa La Paz may 12 lamang ka katapo. Samtang nagasangkad ang hilikuton nga pagbantala, amo nga kinahanglan ang dakudaku nga mga pasilidad, isa ka bag-o nga tinukod sang sanga ang gintukod sa madasig mag-uswag nga siudad sang Santa Cruz. Ang sanga ginsaylo liwat didto sang 1998, kag gin-agda ako nga mangin katapo sang sanga, nga ginatapuan na karon sang kapin sa 50.

Ang nagaisahanon nga kongregasyon sadtong 1966 sa Santa Cruz nangin kapin sa 50 ka kongregasyon. Ang kabug-usan nga 640 ka Saksi sadto nangin halos 18,000 na karon!

Makalilipay nga ang akon asaynment sa Bolivia mapatubason. Apang, napalig-on gid ako sang katutom sang mga masigka-Cristiano bisan diin. Nalipay kita tanan nga makita ang pagpakamaayo ni Jehova sa hilikuton nga pagbantala sing Ginharian. Makalilipay gid nga makapakigbahin sa hilikuton nga paghimo sing mga disipulo.—Mateo 28:19, 20.

[Piktyur sa pahina 13]

Pagpayunir sa Scotland

[Mga retrato sa pahina 15]

Pag-alagad sa sanga talatapan sa Bolivia; (ginsal-ot) sa gradwasyon sang ika-42 nga klase sang Gilead