Si Amos​—Manugtipon Ukon Manugtuslok sang mga Igos?

SADTO anay sang ikasiam nga siglo B.C.E., ginsugo sang malaut nga si Amasias, nga isa ka saserdote nga nagasimba sa tinday nga baka, si manalagna Amos nga mag-untat sa pagpanagna sa Israel. Nagpamatok si Amos, nga nagasiling: “Manugbantay ako sang kahayupan kag manugtuslok sang mga igos sang kahoy nga sicomoro. Kag ginkuha ako ni Jehova gikan sa pagsunod sa panong, kag si Jehova nagsiling sa akon, ‘Lakat ka, magpanagna ka sa akon katawhan nga Israel.’” (Amos 7:14, 15) Huo, ginpadala ni Jehova si Amos subong isa ka manalagna; indi ini kaugalingon lang niya nga ideya. Apang ano ang buot silingon ni Amos sang nagsiling sia nga “manugtuslok” sia sang mga igos sang kahoy nga sicomoro?

Isa lamang ka bes makita sa New World Translation ining ginbadbad nga Hebreo nga ekspresyon. Ang iban nga mga badbad sang Biblia nagabadbad sini subong “manugtipon,” “manugtanom,” “manugkorte,” ukon, “mangunguma,” sa baylo nga “manugtuslok,” sang sicomoro nga mga igos. Apang, ang dyurnal nga Economic Botany nagsiling nga ang nagakaigo nga badbad para sa sini nga tinaga amo ang “manugtuslok” (piercer) bangod ini nga tinaga nagapakita sang isa ka pinasahi nga aksion sang manugtanom sang sicomoro nga mga igos.

Ang buhat nga pagtuslok, nga amo, ang madalom nga pagpilas sing diutay sa sicomoro nga mga igos, ginahimo sing lapnag sa Egipto kag Cipre sugod sang una pa. Ang pagtuslok wala na ginahimo sa modernong-adlaw nga Israel bangod lain na nga baridad sang mga igos ang ginatanom sa sina nga pungsod. Apang, ang pagtuslok ginahimo anay sang mga Israelinhon sang panahon ni Amos, kay ang mga sicomoro nga gintanom sa Israel sadto nga tion naghalin sa mga baridad gikan sa Egipto.

Maathag nga bangod sang pagtuslok sa mga igos, nagasalupsop ini sang tubig kag nangin maduga. Ginapadamo man sini ang produksion nga ethylene gas, nga nagapadasig sang pagtanang, nga nagaresulta sa mas dalagku kag mas matam-is nga prutas. Dugang pa, indi mapierde sang mga buyog ang bunga bangod madasig ini magtanang.

Walay sapayan sang kubos nga ginhalinan subong manugbantay kag manugtuslok sang mga igos, si Amos wala mahadlok sa iya mga kaaway. Sa baylo, maisugon nga ginpahayag niya ang mensahe sang paghukom ni Jehova batok sa Israel. Daw ano kaayo nga halimbawa para sa mga alagad sang Dios karon, nga dapat magpahayag man sang mensahe nga indi maluyagan sang madamo nga tawo!—Mateo 5:11, 12; 10:22.