Si Jehova Isa ka Mainapresyahon nga Dios
Si Jehova Isa ka Mainapresyahon nga Dios
“Ang Dios indi di-matarong nga kalimtan ang inyo binuhatan kag ang gugma nga ginpakita ninyo para sa iya ngalan.”—HEBREO 6:10.
1. Paano ginpakita ni Jehova ang iya apresasyon sa Moabnon nga si Rut?
GINAAPRESYAR gid ni Jehova ang mga panikasog sadtong hanuot nga nagatinguha sa paghimo sang iya kabubut-on, kag ginapakamaayo niya sila sing bugana. (Hebreo 11:6) Pamilyar ang matutom nga si Boaz sa sining talalupangdon nga bahin sang personalidad sang Dios, kay nagsiling sia sa Moabnon nga si Rut, nga mapinalanggaon nga nagtatap sa iya balo nga ugangan nga babayi: “Kabay nga balusan ni Jehova ang imo ginhimo, kag kabay nga may himpit nga suhol para sa imo gikan kay Jehova.” (Rut 2:12) Ginpakamaayo bala sang Dios si Rut? Huo! Ginpasulat pa gani ang iya sugilanon sa Biblia! Dugang pa, napamana niya si Boaz kag nangin katigulangan sia nanday Hari David kag Jesucristo. (Rut 4:13, 17; Mateo 1:5, 6, 16) Isa lamang ini sang madamo nga halimbawa sa Biblia nga nagapamatuod nga ginaapresyar ni Jehova ang iya mga alagad.
2, 3. (a) Ngaa tumalagsahon ang pagpakita sing apresasyon ni Jehova? (b) Ngaa mapabutyag ni Jehova ang matuod nga pag-apresyar? Iilustrar.
2 Di-matarong para kay Jehova kon indi sia magpakita sing apresasyon. Ang Hebreo 6:10 nagasiling: “Ang Dios indi di-matarong nga kalimtan ang inyo binuhatan kag ang gugma nga ginpakita ninyo para sa iya ngalan, kay nag-alagad kamo sa mga balaan kag padayon nga nagaalagad.” Ang talalupangdon gid sa sining pinamulong amo nga ginaapresyar sang Dios ang matutom nga mga tawo walay sapayan nga makasasala sila kag wala makalab-ot sa iya himaya.—Roma 3:23.
3 Bangod sang aton pagkadi-himpit, mahimo magbatyag kita nga ang aton mga buhat sang diosnon nga debosyon wala sing kabilinggan kag indi takus nga pakamaayuhon sang Dios. Apang, nahangpan gid ni Jehova ang aton motibo kag kahimtangan, kag ginaapresyar gid niya ang aton bug-os kalag nga pag-alagad. (Mateo 22:37) Sa pag-ilustrar: Ang isa ka iloy nakakita sing regalo—isa ka baratuhon nga kulintas—sa iya lamesa. Mahimo indi niya pagpabaloran ang regalo kag balewalaon ini. Apang, ang kaupod sini nga kard nagapakita nga ginregalo ini sang iya gamay nga bata nga babayi, nga ang tanan niya nga sinuptan ang iya ginbakal sini. Mahimo magbag-o ang pagtamod sang iloy sa regalo. Ayhan samtang nagahibi, hakson niya nga iya bata kag ipabutyag ang iya tinagipusuon nga apresasyon sa sini.
4, 5. Paano gin-ilog ni Jesus si Jehova sa pagpakita sing apresasyon?
4 Bangod nakahibalo sang aton motibo kag mga limitasyon, ginaapresyar gid ni Jehova kon ihatag naton ang aton bug-os nga masarangan, diutay man ini ukon daku. Tuhoy sa sini, si Jesus amo ang himpit nga larawan sang iya Amay. Dumduma ang rekord sang Biblia tuhoy sa diutay nga amot sang balo nga babayi. “Sang nagtan-aw [si Jesus] nakita niya ang mga manggaranon nga nagahulog sang ila mga dulot sa mga bahandian. Nian nakita niya ang isa ka imol nga balo nga babayi nga naghulog didto sing duha ka gamay nga sensilyo nga may tuman ka diutay nga balor, kag nagsiling sia: “Sa pagkamatuod nagasiling ako sa inyo, Ini nga balo nga babayi, bisan pa imol, naghulog sing kapin pa sa ila tanan. Kay sila tanan naghulog sing mga dulot gikan sa ila mga sobra, apang ini nga babayi gikan sa iya kinawad-on naghulog sang iya bug-os nga palangabuhian.’”—Lucas 21:1-4.
5 Huo, bangod nahibaluan niya ang kahimtangan sang babayi—nga sia balo kag imol—nahangpan ni Jesus ang matuod nga balor sang iya amot, kag gin-apresyar gid niya ini. Amo man sini si Jehova. (Juan 14:9) Indi bala makapalig-on nga mahibaluan nga bisan ano man ang imo kahimtangan, mahimo ka mahamut-an sang mainapresyahon nga Dios kag sang iya Anak?
Ginpakamaayo ni Jehova ang Mahinadlukon sa Dios nga Etiopianhon
6, 7. Ngaa kag paano ginpakita ni Jehova ang iya apresasyon kay Ebed-melec?
6 Madamong beses nga ginpakita sa Kasulatan nga ginaapresyar gid ni Jehova ang mga nagahimo sang iya kabubut-on. Binagbinaga ang iya pagpakig-angot sa mahinadlukon sa Dios nga Etiopianhon nga si Ebed-melec, nga kadungan ni Jeremias kag alagad sang panimalay sang di-matutom nga si Hari Sedequias sang Juda. Nabalitaan ni Ebed-melec nga ginpatutuan sing sedisyon sang mga prinsipe sang Juda si manalagna Jeremias kag ginhulog sia sa isa ka bubon agod mapatay sia didto sa gutom. (Jeremias 38:1-7) Bangod nahibaluan niya nga gindumtan gid si Jeremias bangod sang mensahe nga iya ginabantala, ginbutang ni Ebed-melec sa katalagman ang iya kabuhi kag nag-apelar sa hari. Maisugon nga nagsiling ang Etiopianhon: “O Ginuo ko nga hari, ini nga mga tawo naghimo sing malaut sa tanan nga ginhimo nila kay Jeremias nga manalagna, nga ginhulog nila sa bubon, agod mapatay sia sa kon diin sia bangod sa tiggulutom.” Sa mando sang hari, si Ebed-melec nagkuha sing 30 ka lalaki kag ginluwas ang manalagna sang Dios.—Jeremias 38:8-13.
7 Nakita ni Jehova nga may pagtuo nga nanghikot si Ebed-melec, nga amo ang nagbulig sa iya agod malandas ang iya kahadlok. Busa, ginpakita ni Jehova ang iya apresasyon kag nagsiling kay Ebed-melec paagi kay Jeremias: “Yari karon, pahanabuon ko nga magmatuod ang akon ginsiling sa sini nga siudad sa kalaglagan kag indi sa kaayuhan . . . Kag luwason ko ikaw sa sadto nga adlaw, . . . kag indi ka pag-itugyan sa mga kamot sang mga tawo nga imo ginakahadlukan. Kay sa pagkamatuod amanan ko ikaw sing mapalagyuhan . . . ; kag pat-od nga mangin imo ang imo kalag subong inati, bangod nagsalig ka sa akon.” (Jeremias 39:16-18) Huo, ginluwas ni Jehova si Ebedmelec, subong man si Jeremias, gikan sa malauton nga mga prinsipe sang Juda kag sang ulihi gikan sa mga Babilonianhon, nga naglaglag sang Jerusalem. “[Si Jehova] nagabantay sa mga kalag sang mga mainunungon sa iya; ginaluwas niya sila sa kamot sang mga malauton,” siling sang Salmo 97:10.
“Ang Imo Amay nga Nagatan-aw sa Tago Magabalos sa Imo”
8, 9. Subong sang ginpakita ni Jesus, ano nga sahi sang mga pangamuyo ang ginaapresyar ni Jehova?
8 Ang isa pa ka pamatuod nga ginaapresyar kag ginapabaloran ni Jehova ang aton pagpakita sing diosnon nga debosyon makita sa ginasiling sang Biblia tuhoy sa pangamuyo. “Ang pangamuyo sang mga matadlong kalahamut-an sa [Dios],” siling sang maalam nga tawo. (Hulubaton 15:8) Sang panahon ni Jesus madamong relihioso nga mga lider ang nagpangamuyo sing dayag, indi bangod sang tunay nga pagkadiosnon, kundi bangod sang handum nga magpadayaw sa mga tawo. “Nabaton na nila ang ila bug-os nga padya,” siling ni Jesus. “Apang, kon mangamuyo ka,” tudlo niya sa iya mga sumulunod, “magsulod ka sa imo hulot kag isira ang ganhaan, kag mangamuyo sa imo Amay nga indi makita; nian ang imo Amay nga nagatan-aw sa tago magapadya sa imo.”—Mateo 6:5, 6.
9 Sa pagkamatuod, wala ginpakamalaut ni Jesus ang dayag nga pangamuyo, bangod sia mismo nagpangamuyo man sing dayag sa pila ka higayon. (Lucas 9:16) Ginaapresyar gid ni Jehova kon mangamuyo kita sa iya sing tinagipusuon, nga wala sing tuyo nga magpadayawdayaw sa iban. Ang aton pribado nga mga pangamuyo, sa pagkamatuod, isa ka maayo nga patimaan sang aton tudok nga gugma sa Dios kag sang aton pagsalig sa iya. Busa, indi katingalahan kon ngaa masami nga nagkadto si Jesus sa pahain nga duog agod mangamuyo. Isa ka bes, ginhimo niya ini sang “kaagahon, samtang madulom pa.” Sa isa pa ka higayon, “nagtaklad sia sa bukid sing isahanon agod mangamuyo.” Kag antes niya ginpili ang iya 12 ka apostoles, nangamuyo si Jesus sing isahanon sa bug-os nga gab-i.—Marcos 1:35; Mateo 14:23; Lucas 6:12, 13.
10. Kon ang aton mga pangamuyo sinsero kag hanuot gid, ano ang mapat-od naton?
10 Hunahunaa kon paano ginpamatian sing maayo ni Jehova ang tinagipusuon nga pangamuyo sang iya Anak! Sa pagkamatuod, si Jesus nagpangamuyo kon kaisa “nga may mabaskog nga paghibi kag mga luha, kag ginpamatian sia nga may kahamuot tungod sa iya diosnon nga kahadlok.” (Hebreo 5:7; Lucas 22:41-44) Kon ang aton mga pangamuyo sinsero kag hanuot gid kaangay sini, mapat-od naton nga ang aton langitnon nga Amay magapamati sing maayo kag sing mainapresyahon. Huo, “si Jehova malapit sa tanan nga . . . nagapanawag sa iya sa kamatuoran.”—Salmo 145:18.
11. Ano ang ginabatyag ni Jehova sa aton ginahimo bisan wala sing nakakita?
11 Kon ginaapresyar ni Jehova ang aton tago nga pagpangamuyo sa iya, pat-od gid nga apresyahon man niya ang aton pagtuman sa iya bisan lipod ini sa ihibalo sang iban! Huo, nahibaluan gid ni Jehova ang aton ginahimo bisan wala sing nakakita. (1 Pedro 3:12) Sa pagkamatuod, kon kita matutom kag matinumanon bisan nga wala sing iban nga nagatan-aw, isa ini ka maayo nga patimaan nga may yara kita “himpit nga tagipusuon” kay Jehova, isa nga putli sing motibo kag malig-on sa kon ano ang husto. (1 Cronica 28:9) Ining paggawi nagapahalipay gid kay Jehova!—Hulubaton 27:11; 1 Juan 3:22.
12, 13. Paano naton mabantayan ang aton hunahuna kag tagipusuon kag mangin kaangay sang matutom nga disipulo nga si Natanael?
12 Gani, ang matutom nga mga Cristiano nagabantay batok sa likom nga mga sala nga nagadagta sang hunahuna kag tagipusuon, subong sang pagtan-aw sing pornograpiya kag kasingki. Bisan pa ang iban nga mga sala matago sa mga tawo, nahibaluan naton nga “ang tanan nga butang hublas kag dayag gid sa iya mga mata kag manabat kita sa iya.” (Hebreo 4:13; Lucas 8:17) Paagi sa pagpanikasog nga likawan ang mga butang nga nagapaakig kay Jehova, ginahuptan naton ang matinlo nga konsiensia kag nalipay kita nga mahibaluan nga nahamuot ang Dios sa aton. Huo, wala sing duhaduha nga ginaapresyar gid ni Jehova ang tawo nga “nagalakat nga walay kasawayan kag nagahimo sing pagkamatarong kag nagapamulong sing kamatuoran sa iya tagipusuon.”—Salmo 15:1, 2.
13 Apang, paano naton mabantayan ang aton hunahuna kag tagipusuon sa isa ka kalibutan nga puno sing kalautan? (Hulubaton 4:23; Efeso 2:2) Dugang pa sa pagpanginpulos sing bug-os sa tanan nga espirituwal nga mga aman, dapat manikasog gid kita nga sikwayon ang kalautan kag himuon ang maayo, nga nagahulag gilayon agod nga ang di-nagakaigo nga handum indi magpanamkon kag magbun-ag sing sala. (Santiago 1:14, 15) Hunahunaa ang imo kalipay kon silingan ka ni Jesus kaangay sang ginsiling niya kay Natanael: “Tan-awa, [ang tawo] nga sa iya wala sing daya.” (Juan 1:47) Si Natanael, nga gintawag man nga Bartolome, may pribilehiyo sang ulihi nga mangin isa sa 12 ka apostoles ni Jesus.—Marcos 3:16-19.
“Isa ka Maluluy-on kag Matutom nga Mataas nga Saserdote”
14. Ano ang reaksion ni Jesus sa ginhimo ni Maria nga tuhay sa reaksion sang iban?
14 Bangod “larawan sang di-makita nga Dios,” nga si Jehova, himpit nga ginasunod pirme ni Jesus ang iya Amay sa pagpakita sing apresasyon sa mga nagaalagad sa Dios nga may putli nga tagipusuon. (Colosas 1:15) Halimbawa, lima ka adlaw antes sia mapatay, si Jesus kag ang pila niya ka disipulo mga bisita sa balay ni Simon nga taga-Betania. Sina nga gab-i, si Maria, nga utod ni Lazaro kag si Marta, ‘nagkuha sing mga tunga sa litro nga mahumot nga lana, nga puro nga nardo kag malahalon gid’ (nagabalor sang isa ka tuig nga sueldo), kag ginbubo ini sa ulo kag mga tiil ni Jesus. (Juan 12:3) “Ngaa gin-uyangan ini?” siling sang iban. Apang, tuhay gid ang pagtamod ni Jesus sa ginhimo ni Maria. Gintamod niya ini subong isa ka buhat sang daku nga kaalwan kag sang daku nga pagpabalor bangod sang iya nagahilapit nga kamatayon kag lubong. Gani, sa baylo nga akigan si Maria, ginpadunggan sia ni Jesus. “Bisan diin ibantala ining maayong balita sa bug-os nga kalibutan,” siling niya, “ang ginhimo sini nga babayi isugid man bilang pagdumdom sa iya.”—Mateo 26:6-13.
15, 16. Paano kita nakabenepisyo sa pagkabuhi kag pag-alagad ni Jesus sa Dios bilang tawo?
15 Daw ano gid nga pribilehiyo nga ang aton Lider nga si Jesus subong sini ka mainapresyahon! Ang matuod, ang kabuhi ni Jesus subong isa ka tawo naghanda sa iya para sa hilikuton nga gintigana ni Jehova para sa iya—ang mag-alagad subong Mataas nga Saserdote kag Hari, una para sa kongregasyon sang mga hinaplas kag nian sang kalibutan.—Colosas 1:13; Hebreo 7:26; Bugna 11:15.
16 Antes magkari sa duta, interesado na kag may pinasahi nga kahamuot si Jesus sa mga tawo. (Hulubaton 8:31) Paagi sa pagkabuhi bilang tawo, nahangpan niya sing bug-os ang mga kabudlayan nga aton naeksperiensiahan sa aton pag-alagad sa Dios. “Kinahanglan [si Jesus] mangin kaangay sa iya ‘mga kauturan’ sa tanan nga paagi,” sulat ni apostol Pablo, “agod sia mangin isa ka maluluy-on kag matutom nga mataas nga saserdote . . . Kay bangod sia mismo nag-antos sang ginatilawan sia, makasarang sia sa pagbulig sa mga ginatilawan.” Si Jesus “mahanuklog sa aton mga kaluyahon” bangod sia “natilawan sa tanan nga butang kaangay sa aton, apang wala sing sala.”—Hebreo 2:17, 18; 4:15, 16.
17, 18. (a) Ano ang ginapakita sang mga sulat sa pito ka kongregasyon sa Asia Minor tuhoy sa daku nga paghangop ni Jesus? (b) Para sa ano ginhanda ang hinaplas nga mga Cristiano?
17 Ang daku pa nga paghangop ni Jesus sa mga pagtilaw nga gin-atubang sang iya mga sumulunod nangin maathag pagkatapos sang iya pagkabanhaw. Binagbinaga ang iya mga sulat sa pito ka kongregasyon sa Asia Minor, nga ginsulat ni apostol Juan. Sa kongregasyon sang Smirna, si Jesus nagsiling: “Nahibaluan ko ang imo kapipit-an kag kaimulon.” Daw nagasiling si Jesus, ‘Nahangpan ko gid ang imo mga problema; nahibaluan ko gid ang imo ginaantos.’ Nian, bangod nag-antos man sia anay tubtob sa kamatayon, mainawaon kag may awtoridad nga nagsiling si Jesus: “Pamatud-i nga matutom ka tubtob sa kamatayon, kag ihatag ko sa imo ang korona sang kabuhi.”—Bugna 2:8-10.
18 Mabanaag sa mga tinaga nga gingamit sa mga sulat sa pito ka kongregasyon ang daku nga paghangop ni Jesus sa mga pagtilaw nga ginaatubang sang iya mga disipulo kag ang iya daku nga apresasyon sa ila pagkabuhi nga may integridad. (Bugna 2:1–3:22) Dumduma nga ang ginsulatan ni Jesus amo ang hinaplas nga mga Cristiano nga may paglaum nga maggahom upod sa iya sa langit. Bilang pagsunod sa tikang sang ila Ginuo, ginhanda sila para sa ila dungganon nga papel sa pagbulig nga ipadapat nga may labing daku nga pagkaawa ang benepisyo sang halad nga gawad ni Cristo sa nagaantos nga katawhan.—Bugna 5:9, 10; 22:1-5.
19, 20. Paano ginapakita sang “dakung kadam-an” ang ila apresasyon kay Jehova kag sa iya Anak?
19 Sa pagkamatuod, indi lamang ang hinaplas nga mga sumulunod ni Jesus ang iya ginahigugma kundi ang iya man matutom nga “iban nga mga karnero,” nga ang minilyon sa ila nagahuman karon sa palaabuton nga “dakung kadam-an . . . gikan sa tanan nga pungsod,” nga makalampuwas sa nagapakari nga “dakung kapipit-an.” (Juan 10:16; Bugna 7:9, 14) Nagadugok sila kay Jesus bangod sang ila pag-apresyar sa iya halad gawad kag bangod sa ila paglaum nga kabuhi nga wala sing katapusan. Paano nila ginapakita ang ila apresasyon? Ginapakita nila ini paagi sa ‘paghimo sing sagrado nga pag-alagad sa Dios sa adlaw kag gab-i.”—Bugna 7:15-17.
20 Ang bug-os kalibutan nga report para sa 2006 nga tuig sang pag-alagad, nga makita sa pahina 27 tubtob 30, nagahatag sing maathag nga pamatuod nga ining matutom nga mga ministro nagahimo sing “sagrado nga pag-alagad sa adlaw kag gab-i” kay Jehova. Sa katunayan, sa sulod sang isa ka tuig, upod sa nagadiutay nga hubon sang hinaplas nga mga Cristiano naghinguyang sila sing kabug-usan nga 1,333,966,199 ka oras sa publiko nga ministeryo—katumbas sang 150,000 ka tuig!
Padayon nga Ipakita ang Apresasyon!
21, 22. (a) May kaangtanan sa pagpakita sing apresasyon, ngaa mas labi nga maghalong ang mga Cristiano karon? (b) Ano ang binagbinagon sa masunod nga artikulo?
21 Sa pagpakig-angot sa di-himpit nga mga tawo, si Jehova kag ang iya Anak nagpakita sing tuman ka daku nga apresasyon. Apang, makapasubo nga halos wala ginadumdom sang kalabanan nga mga tawo ang Dios, kundi ang ila kaugalingon lamang. Nagalaragway sang katawhan nga nagakabuhi sa “katapusan nga mga adlaw,” si Pablo nagsulat: “Ang mga tawo magamahigugmaon sa kaugalingon, mahigugmaon sang kuarta . . . di-mapinasalamaton.” (2 Timoteo 3:1-5) Tuhay gid sila sa matuod nga mga Cristiano, nga paagi sa tinagipusuon nga pangamuyo, pagkamatinumanon, kag bug-os kalag nga pag-alagad nagpakita sang ila apresasyon sa tanan nga ginhimo sang Dios para sa ila!—Salmo 62:8; Marcos 12:30; 1 Juan 5:3.
22 Sa masunod nga artikulo, binagbinagon naton ang pila sa madamo nga espirituwal nga mga aman nga mahigugmaon nga ginhatag ni Jehova sa aton. Samtang ginabinagbinag naton ining ‘maayong dulot,’ kabay nga maglambo pa gid ang aton apresasyon.—Santiago 1:17.
Paano Mo Sabton?
• Paano ginpakita ni Jehova nga isa sia ka mainapresyahon nga Dios?
• Kon wala sing iban nga nagatan-aw, paano naton mapahalipay ang tagipusuon ni Jehova?
• Sa ano nga mga paagi nagpakita si Jesus sing apresasyon?
• Paano ang pagkabuhi bilang tawo nagbulig kay Jesus nga mangin mainawaon kag mainapresyahon nga manuggahom?
[Mga Pamangkot sa Pagtinuon]
[Piktyur sa pahina 17]
Subong nga ang isa ka ginikanan nahamuot sa simple nga regalo sang iya anak, si Jehova nahamuot man kon ginahatag naton sa iya ang aton bug-os nga masarangan
