Isa ka Huwaran sang Pagkabunayag

SINING karon lang, gintilawan ang Cristianong integridad ni Nelma, nga nagatrabaho subong hairdresser sa Cruzeiro do Sul, Brazil. Sang ginbahaan ang ila lugar, nakabaton si Nelma sing donasyon nga mga panapton gikan sa isa sang iya mga kliyente. Samtang ginapainpain niya ang mga panapton, nakakita sia sing kuarta nga katumbas sa $1,000 (U.S.) sa mga bulsa sang delargo.

Ang kuarta nga nakita ni Nelma mga pito ka bulan niya nga sueldo, kag kinahanglanon gid niya ini. Ang iya balay nahalitan sang baha, kag nadula ang halos tanan nga pagkabutang sang iya amay kag mga utod. Kon gamiton niya ang kuarta, mapakay-o niya ang iya balay kag may sobra pa nga mabulig niya sa iya pamilya. Apang, ang nahanas sa Biblia nga konsiensia ni Nelma wala magtugot nga kuhaon niya ang kuarta.—Hebreo 13:18.

Temprano pa pagkaaga, nagkadto sia sa iya ulubrahan antes magsugod ang iya trabaho kag gintawgan niya ang negosyante nga nagdonar sang mga panapton. Ginpasalamatan sia ni Nelma sa mga panapton nga ginhatag niya kag nagsiling nga luyag niya iuli ang iya nakita nga kuarta. Nalipay gid ang babayi sang gin-uli sa iya ang kuarta. Ginpain gali niya ato nga kuarta agod i-sueldo sa iya mga tinawo. “Ang pagkabunayag talagsa na lang masapwan,” siling sang negosyante.

Sa pagkamatuod, ang iban mahimo magbatyag nga wala na sing pulos ang mangin bunayag. Apang, ang pagkabunayag isa ka kinaiya nga ginapabaloran gid sang mga nagapanikasog nga pahamut-an ang matuod nga Dios nga si Jehova. (Efeso 4:25, 28) “Indi gid ako makatulog kon wala ko ato gin-uli,” siling ni Nelma.