Magkalipay sa Aton Matahom nga Duta

NAKITA sang mga astronomo nga ang ginapuy-an sang tawo isa lamang ka gamay nga pintok sa tuman kalapad nga uniberso. Wala na sing kabuhi nga nasapwan sa iban nga duog sa pisikal nga uniberso. Ang planeta nga Duta lamang ang may nagakaigo nga kahimtangan agod mapuy-an.

Dugang pa, malipay kita nga magkabuhi sa sining matahom nga globo. Kanami gid magpainit-init sa silak sang adlaw kon matugnaw! Sin-o sa aton ang wala nagadayaw sa tuman katahom nga pagbutlak ukon pagtunod sang adlaw? Siempre pa, ang adlaw wala lamang nagapahalipay sa aton. Importante man ini sa aton pagluntad.

Sa sulod sang minilyon ka tuig, ang magnet sang adlaw amo ang nagapugong sa duta kag sa iban nga planeta nga indi magtalang sa orbito sini. Kag subong sang natun-an sang mga estudyante sa eskwelahan, ang bug-os nga sistema solar nagalibot sa orbito nga yara sa sentro sang aton Milky Way nga galaksiya. Apang ang adlaw isa lamang sa kapin sa 100 bilyones ka bituon nga nagalakbay sa aton galaksiya.

Ang Milky Way nga galaksiya nalakip sa isa ka pungpong sang mga 35 ka galaksiya. Ang mas dalagku nga mga pungpong may linibo ka galaksiya. Ang aton sistema solar mahimo indi amo gid sini kalig-on kon yara ini sa mas daku, mas madamo nga pungpong sang galaksiya. Apang, subong sang ginapakita, pila lang ka duog sa uniberso ang “nagakabagay sa masibod nga kabuhi subong sang aton,” siling ni Guillermo Gonzalez kag Jay W. Richards sa ila libro nga The Privileged Planet.

Natabuan lamang bala ang pagluntad sang kabuhi sa sini nga planeta? Ukon may katuyuan gid bala ang kabuhi sa sining matahom nga planeta nga Duta?

Madamo nga tawo ang nagahinakop nga ang duta nga aton ginapuy-an gindesinyo sa pagsakdag sang kabuhi. * Pila ka siglo ang nagligad, isa ka Hebreo nga mamalaybay ang nagtalupangod sang duta kag mga langit. Sia nagsulat: “Kon makita ko ang imo kalangitan, ang binuhatan sang imo mga tudlo, ang bulan kag ang kabituunan nga imo ginhanda, ano bala ang mamalatyon nga tawo?” (Salmo 8:3, 4) Ini nga mamalaybay nagapati nga may Manunuga gid. Makatarunganon bala ini nga paghinakop suno sa siensia karon?

[Footnote]

[Kahon/Piktyur sa pahina 3]

“Sa malayo, ang Duta nagaidlak kaangay sang asul nga hiyas sa madulom nga espasyo,” siling sang The Illustrated Science Encyclopedia—Amazing Planet Earth.

[Credit Line]

Globe: U.S. Fish & Wildlife Service, Washington, D.C./NASA