Sugilanon sang Kabuhi

Paghulat sa Ginharian nga “Indi Bahin Sini nga Kalibutan”

PANUGIRON NI NIKOLAI GUTSULYAK

Sa sulod sang 41 ka adlaw kag gab-i, naipit ako sa pagribok sa sulod sang isa ka bilangguan. Sa hinali lamang, nakabugtaw ako gikan sa katulugon bangod sang paglupok sang kanyon. Nag-arangka ang mga tangke kag mga soldado pasulod sa kampo sang bilangguan, kag ginsulong ang mga bilanggo. Ang akon kabuhi nabutang sa katalagman.

NGAA nabutang ako sa amo nga kahimtangan? Ipaathag ko sa inyo kon ngaa. Natabo ini sang 1954. Treinta anyos ako sadto. Kaangay sang madamo nga mga Saksi ni Jehova nga nagkabuhi sa idalom sang rehimen sang Sobyet, ginbilanggo ako bangod sang pagpabilin nga neutral sa politika kag bangod sang pagbantala sa iban tuhoy sa Ginharian sang Dios. Kami nga mga Saksi nga bilanggo may kadamuon nga 46 ka lalaki kag 34 ka babayi. Ginbilanggo kami sa isa ka kampo sang pilit nga pagpangabudlay malapit sa minuro sang Kengir sa sentral Kazakhstan. Didto kami nagkabuhi kaupod sang linibo ka iban pa nga mga bilanggo.

Si Joseph Stalin, nga lider sang Unyon Sobyet, napatay isa ka tuig antes sini. Madamo nga bilanggo ang naglaum nga pamatian sang bag-o nga rehimen sa Moscow ang ila mga reklamo tuhoy sa indi maayo nga mga kahimtangan sa bilangguan. Ang pagkadikontento sang mga bilanggo nagresulta sang ulihi sa rebelyon sa bilangguan. Sa nagsunod nga pag-engkwentrohanay, dapat namon klaruhon sa nagprotesta nga mga rebelde kag ipaathag man sa mga guardia ang panindugan namon nga mga Saksi. Kinahanglan ang pagtuo sa Dios agod mahimo namon ining neutral nga panindugan.

 Nagsugod ang Pagribok!

Sang Mayo 16 ang rebelyon sa kampo sang bilangguan nagsugod. Duha ka adlaw sang ulihi, ang kapin sa 3,200 ka bilanggo nangindi sa pagtrabaho, kag nagpangabay sila sing mas maayo nga kahimtangan sa kampo kag sing pinasahi nga pribilehiyo para sa politikal nga mga bilanggo. Madasig ang mga hitabo. Una ginpuersa sang mga rebelde ang mga guardia sa paggua sa kampo. Nian ginbuhuan nila ang palibot nga kudal. Masunod ginguba nila ang mga dingding nga nagapain sa mga lalaki gikan sa mga babayi, sa amo nagresulta ini sa pag-upod sang tanan nga bilanggo. Sa makahalawathawat nga mga adlaw nga nagsunod, ang iban nga mga bilanggo nagminyo pa gani, kag ginkasal sila sang bilanggo man nga mga pari. Sa tatlo ka seksion sang kampo diin natabo ang pagribok, ang kalabanan sang 14,000 ka bilanggo nakigbahin sa rebelyon.

Ang mga rebelde nag-organisar sing isa ka komite sa kampo agod makignegosyar sa mga militar. Apang, nagbangig sang ulihi ang mga miembro sang komite, kag ang kampo napaidalom sa kontrol sang mga sobra ka panatiko. Labi pa nga naggamo ang kahimtangan. Ang mga lider sang mga rebelde nagtukod sing departamento sa seguridad, departamento sang militar, kag departamento sa propaganda agod huptan ang “kahim-ong.” Naggamit sila sing mga loudspeaker nga gintakod sa mga poste sa palibot sang kampo agod iwaragwag ang maakigon nga mga mensahe, nga labi nga nagpainit sang balatyagon sa pagrebelde. Ginpunggan sang mga rebelde ang iban nga magpalagyo, ginsilutan ang mga nagpamatok sa ila, kag gindeklarar ang ila kahanda nga patyon ang bisan sin-o nga indi nila mauyunan. May hinuringhuring nga ang iban nga mga bilanggo ginpatay na.

Bangod ginsigahom sang mga rebelde nga sulungon sila sang mga soldado, naghimo sila sing mahalungon nga mga preparasyon agod depensahan ang ila kaugalingon. Agod siguruhon nga madepensahan sang pinakamadamo nga bilanggo ang kampo, nagmando ang mga lider nga magkapot sing armas ang tanan nga bilanggo. Gani, ginhukas nila ang kabilya sang mga bintana kag ginhimo ini nga mga kutsilyo kag iban pa nga mga hinganiban. Nakakuha pa gani sila sing mga pusil kag mga bomba.

Gin-ipit nga Magbuylog

Sadto nga tion, ginpalapitan ako sang duha ka rebelde. Ang isa nagauyat sing bag-o lang mabaid nga kutsilyo. “Kuhaa ini!” mando niya. “Kinahanglan mo ini para sa proteksion.” Mahipos ako nga nagpangayo sing bulig kay Jehova agod magpabilin nga kalma. Nagsabat ako: “Cristiano ako, isa sa mga Saksi ni Jehova. Kami sang iban pa nga mga Saksi ginbilanggo diri bangod nagapakig-away kami, indi batok sa mga tawo, kundi batok sa di-makita nga espiritu nga mga puersa. Ang amon hinganiban batok sa ila amo ang amon pagtuo kag ang amon paglaum sa Ginharian sang Dios.”—Efeso 6:12.

Sa akon kakibot, nagtango sia nga nahangpan niya ako. Apang, gintapungol ako sang kaupod niya. Nian naglakat sila. Ang mga rebelde nagkadto sa nagkalainlain nga  mga kuartel, kag ginpilit ang mga Saksi nga magbuylog sa pagribok. Apang ang tanan sang amon Cristianong mga kauturan wala magbuylog.

Ang neutral nga panindugan sang mga Saksi ni Jehova ginhambalan sa miting sang komite sang mga rebelde. “Ang mga miembro sang tanan nga relihion—mga Pentecostal, mga Adbentista, mga Baptist, kag tanantanan—nagbuylog sa pagribok. Ang mga Saksi ni Jehova lamang ang wala magbuylog,” siling nila. “Ano ang himuon naton sa ila?” May nagpanugda nga bilangguon ang isa ka Saksi sa hurnuhan sang bilangguan agod pahugon kami. Apang nagtindog ang anay opisyal sang militar, nga isa ka bilanggo nga respetado sang iban, kag nagsiling: “Indi ina maalamon. Dapat naton sila tanan ibutang sa isa ka kuartel sa dulunan sang kampo, malapit sa gawang. Sa sina nga paagi, kon sulungon kita sang mga soldado nga may mga tangke, ang mga Saksi amo ang una nga mapatay. Kag indi kita ang basulon nga napatay sila.” Nag-ugyon ang iban sa iya panugda.

Ginbutang sa Delikado nga Duog

Wala madugay pagkatapos sini, ang mga bilanggo naglibot sa kampo nga nagalakat kag nagsinggit, “Mga Saksi ni Jehova, gua kamo!” Nian gintipon nila kami tanan nga 80 sa isa ka kuartel sa dulunan sang kampo. Ginpagua nila ang mga katre sa kuartel agod magligwa ang hulot kag ginpasulod kami. Yadto nga kuartel nangin bilangguan namon sa sulod sang bilangguan.

Agod indi mag-ulupod ang mga lalaki kag mga babayi, gintahi sang Cristianong mga utod nga babayi sa amon grupo ang mga habol, kag ginhimo ini nga dingding nga nagatunga sang kuartel sa duha ka seksion—ang isa para sa mga lalaki kag ang isa naman para sa mga babayi. (Sang ulihi, gindrowing sang isa ka Saksi sa Rusya ini nga kuartel, nga makita sa ubos.) Samtang nagapuyo sa sining gutok nga kuartel, masami kami nga nagapangamuyo sing tingob, kag hanuot nga nagapangabay kay Jehova nga hatagan kami sing kaalam kag sing “gahom nga labaw sa kinaandan.”—2 Corinto 4:7.

Sa kabug-usan sadto nga tion, delikado kami nga nahamtang sa ulot sang mga rebelde kag sang Sobyet nga mga soldado. Wala sing isa sa amon ang nakahibalo kon ano ang himuon sang duha ka kampo. “Indi kamo magpamensar kon ano ang masunod nga matabo,” laygay sang isa ka mas  may edad kag matutom nga Cristianong utod nga lalaki. “Indi kita pagpabay-an ni Jehova.”

Ang amon pinalangga nga Cristianong mga utod nga babayi—bata kag tigulang—nagpakita sing tumalagsahon nga pagbatas. Ang isa mga 80 anyos ang edad kag nagkinahanglan sing dugang nga bulig. Ang iban naman nagamasakit kag kinahanglan nga ipabulong. Sa kabug-usan sadto nga tion, ang puertahan sang kuartel dapat pabay-an nga bukas agod mabantayan kami pirme sang mga rebelde. Kon gab-i, ang armado nga mga bilanggo nagasulod sa kuartel. Kon kaisa mabatian namon sila nga nagasiling, “Ang Ginharian sang Dios nagakatulog.” Kon adlaw, kon tugutan nila kami nga magkadto sa hulot kalan-an sang kampo, pirme kami nagaupdanay kag nagapangamuyo nga amligan kami ni Jehova gikan sa mga tawo nga masingki.

Sa kuartel, gintinguhaan namon nga alay-ayan ang isa kag isa sa espirituwal. Halimbawa, sa masami ang isa ka utod nga lalaki nagasaysay sing isa ka sugilanon gikan sa Biblia, sa kabaskugon nga igo-igo lang nga mabatian namon. Nian ginaaplikar niya ang sugilanon sa amon kahimtangan. Ang isa ka may edad nga utod nga lalaki nanamian gid sa pagsaysay tuhoy sa hangaway ni Gideon. “Sa ngalan ni Jehova, ang 300 ka lalaki nga may ginauyatan nga mga instrumento sa musika nakig-away batok sa 135,000 ka armado nga mga soldado,” pahanumdom niya sa amon. “Ang tanan nga 300 nagbalik nga wala mahalitan.” (Hukom 7:16, 22; 8:10) Ini kag ang iban pa nga mga halimbawa sa Biblia naghatag sa amon sing espirituwal nga kabaskog. Bag-uhan lang ako nga Saksi sang nabilanggo kami, apang ang mabakod nga pagtuo sang mas eksperiensiado nga mga kauturan nagpalig-on gid sa akon. Nabatyagan ko nga kaupod gid namon si Jehova.

Nagsugod ang Engkwentrohanay

Nagligad ang mga semana, kag labi pa gid nga nag-init ang tension sa kampo. Nag-init ang negosasyon sa ulot sang mga rebelde kag sang mga awtoridad. Nag-insister ang mga lider sang mga rebelde nga magpadala ang sentral nga gobierno sa Moscow sing tiglawas sa pagpakigsapol sa ila. Nagmando ang mga awtoridad nga mag-ampo na ang mga rebelde, isungka ang ila mga hinganiban, kag magbalik sa trabaho. Ang duha ka bahin indi magpakighusay. Sadto nga tion, ang kampo ginpalibutan sang mga soldado nga handa sa pagsulong sa isa lang ka mando. Ang mga rebelde handa man sa pagpakig-away, kag naghimo sila sing mga barikada kag nagtipon sing mga armas. Ginpaabot sang tanan nga sa bisan ano nga tion, magaengkwentrohanay na ang mga soldado kag ang mga bilanggo.

Sang Hunyo 26 nakabugtaw kami bangod sang makabulungol nga mga lupok sang kanyon. Gindalasa sang mga tangke ang kudal kag nagsulod sa kampo. Ginsundan ini sang pagsulong sang mga soldado samtang nagapabarak sang ila mga machine gun. Ginsugata sang mga bilanggo—mga lalaki kag mga babayi—ang nagapakari nga mga tangke, nga nagasinggit sing “Sulong!” kag naghaboy sing mga bato, mga homemade bomb, kag bisan ano nga butang nga mauyatan nila. Nagsunod ang malapuyot nga inaway, kag kami nga mga Saksi naipit sa tunga. Paano sabton ni Jehova ang amon pagpangamuyo sing bulig?

 Hinali lamang, nagsulod ang mga soldado sa amon kuartel. “Gua kamo nga mga balaan!” singgit nila. “Dali, magkadto kamo sa gua sang kudal!” Ginmanduan sang kumander ang mga soldado nga indi kami pagluthangon kundi updan kami kag protektahan kami. Samtang nagainit ang engkwentrohanay, nagpungko kami sa mahilamon nga duog sa gua lamang sang kampo. Apat ka oras kami nga nagpamati sa mga linupok, luthanganay, siniyagit, kag mga ugayong halin sa sulod sang kampo. Nian, nagtinong. Sang ulihi, sa kaagahon, nakita namon ang mga soldado nga nagahakwat sang mga bangkay pagua sa kampo. Nabalitaan namon nga ginatos ang napilasan ukon napatay.

Sang ulihi sina nga adlaw, isa ka opisyal nga kilala ko ang nagpalapit sa amon. “Ti, Nikolai,” matinaastaason nga pamangkot niya, “sin-o ang nagluwas sa inyo? Kami ukon si Jehova?” Hanuot namon sia nga ginpasalamatan bangod ginluwas nila ang amon kabuhi, kag nagsiling sing dugang, “Nagapati kami nga ginpahulag kamo sang amon labing gamhanan nga Dios, si Jehova, nga luwason kami, subong nga ginpahulag man niya anay ang iban nga luwason ang iya mga alagad sang panahon sang Biblia.”—Esdras 1:1, 2.

Ginpaathag sa amon sini man nga opisyal kon paano nahibaluan sang mga soldado kon sin-o kami kag kon diin kami nahamtang. Nagsiling sia nga sa isa sang mga negosasyon sa ulot sang mga militar kag sang mga rebelde, ginsumbong sang mga militar ang mga rebelde nga ginapatay nila ang mga bilanggo nga wala nagasuportar sa ila. Bilang depensa, ang mga rebelde nagsabat nga ang mga Saksi ni Jehova wala makigbahin sa pagribok apang wala sila ginpatay. Sa baylo, bilang silot, ang tanan nga Saksi ginbilanggo sa isa ka kuartel. Gintandaan yadto sang mga opisyales sang militar.

Nagtindog Kami nga Malig-on Para sa Ginharian

Ginsambit sang kilala nga Ruso nga awtor nga si Aleksandr Solzhenitsyn, sa iya libro nga The Gulag Archipelago, ang rebelyon sa bilangguan nga naagihan namon. Tuhoy sadto nga hitabo, nagsulat sia nga ang rebelyon nagsugod bangod, suno sa iya, “luyag namon ang kahilwayan, siempre pa, . . . apang sin-o ang makahatag sini sa amon?” Subong mga Saksi ni Jehova sa amo man nga kampo nga bilangguan, luyag man namon ang kahilwayan. Apang, indi lamang kahilwayan gikan sa bilangguan kundi kahilwayan nga ang Ginharian sang Dios lamang ang makahatag. Samtang didto kami sa bilangguan, nahibaluan namon nga kinahanglan namon ang kusog gikan sa Dios agod makatindog nga malig-on dampig sa iya Ginharian. Kag ginhatagan kami ni Jehova sang tanan nga amon kinahanglan. Ginhatagan niya kami sing kadalag-an nga wala naggamit sing mga kutsilyo ukon mga granada.—2 Corinto 10:3.

“Ang akon ginharian indi bahin sini nga kalibutan,” siling ni Jesucristo kay Pilato. “Kon ang akon ginharian bahin sini nga kalibutan, ang akon mga alagad nakig-away kuntani.” (Juan 18:36) Gani, subong mga sumulunod ni Cristo, wala kami makigbahin sa mga inaway sa politika. Nalipay kami nga sa tion kag sa tapos sang pagribok, nakita sang iban ang amon pagkamainunungon sa Ginharian sang Dios. Tuhoy sa amon paggawi sadto nga tion, si Solzhenitsyn nagsulat: “Ang mga Saksi ni Jehova nagbatyag nga hilway sa pagsunod pirme sang ila mga pagsulundan kag nagdumili sa pagtukod sing mga kuta ukon sa pagguardia.”

Kapin sa 50 ka tuig na ang naglipas kutob sadtong magamo nga mga tion. Apang, pirme ko ginahinumdom yadto nga tion sing mapinasalamaton bangod natun-an ko ang wala nagabalhin nga mga leksion, subong sang paghulat kay Jehova kag pagsalig sing bug-os sa iya gamhanan nga butkon. Huo, kaangay sang tuman kadamo nga iban pa nga pinalangga nga mga Saksi sa anay Unyon Sobyet, naeksperiensiahan ko nga si Jehova nagahatag gid sing kahilwayan, proteksion, kag kaluwasan sa mga nagahulat sa Ginharian nga “indi bahin sini nga kalibutan.”

[Mga piktyur sa pahina 9]

Ang kampo sang pilit nga pagpangabudlay sa Kazakhstan diin kami ginbilanggo

[Piktyur sa pahina 10]

Drowing sang kuartel sang mga Saksi, seksion sang mga babayi

[Piktyur sa pahina 11]

Kaupod sang Cristianong mga utod nga lalaki sang ginhilway kami