“Ginpilit Niya Kami nga Magkadto”

KILALA nga maabiabihon ang mga taga-Sidlangan. Halimbawa, sa India, pakamaayuhon pa sang isa ka pamilya nga magutuman agod lamang mapakaon ang isa ka wala ginapaabot nga bisita. Sa Iran naman, pirme ginapuno sang isa ka iloy ang repridyeretor sing pagkaon agod maamuma niya ang wala ginapaabot nga mga bisita.

Ining pagkamahinatagon makita man sa madamo nga tawo nga ginsambit sa Biblia. Ang isa ka tumalagsahon nga halimbawa amo si Lidia, ayhan isa ka Judiyong proselita nga nagapuyo sa Filipos, ang panguna nga siudad sa distrito sang Macedonia. Sang isa ka adlaw nga inugpahuway, nakita ni apostol Pablo kag sang iya mga kaupdanan sa paglakbay si Lidia kag ang pila pa ka babayi nga nagatipon sa higad sang suba sa gua sang Filipos. Ginbuksan ni Jehova ang iya tagipusuon samtang nagahambal si Pablo sadto nga tion. Subong resulta, sia kag ang mga katapo sang iya panimalay ginbawtismuhan. Sa tapos sini gin-agda niya ang mga nagalakbay: “Kon ginakabig ninyo ako nga matutom kay Jehova, magsulod kamo sa akon balay.” Ang kaupod ni Pablo nga si Lucas nagsiling: “Ginpilit niya kami nga magkadto.”—Binuhatan 16:11-15.

Kaangay ni Lidia, ginaabiabi man karon sang mga Cristiano ang ila mga masigkatumuluo, subong sang mga nagalakbay nga manugtatap kag sang ila mga asawa. ‘Ginapilit sila sang mga tagbalay nga magkadto.’ Bangod sini, napalig-on man ang maabiabihon nga mga tagbalay sa ila paghambalanay kag espirituwal nga pagpakig-upod. Bisan pa ang kalabanan nga mga Saksi ni Jehova wala sing sarang, ginasunod nila “ang dalanon sang pagkamaabiabihon.” (Roma 12:13; Hebreo 13:2) Ang ila pagkamahinatagon nagapahalipay sa ila. Husto gid si Jesus sang nagsiling sia: “May kapin nga kalipay sa paghatag sangsa pagbaton.”—Binuhatan 20:35.