Mga Demonyo​—Paano Naton Sila Mapamatukan?

“Ang mga anghel nga wala magpabilin sa ila orihinal nga kahimtangan kundi nagbiya sang ila nagakaigo nga puluy-an gintigana [sang Dios] sa mga gapos nga dayon sa mangitungito nga kadudulman para sa paghukom sa dakung adlaw.”—JUDAS 6.

1, 2. Ano nga mga pamangkot ang nagautwas tuhoy kay Satanas nga Yawa kag sa mga demonyo?

“HUPTI ninyo ang inyo kaligdong, mangin mabinantayon,” paandam ni apostol Pedro. “Ang inyo kaaway, ang Yawa, nagaluyong subong sang nagangurob nga leon, nga nagapangita sing matukob.” (1 Pedro 5:8) Tuhoy sa mga demonyo, si apostol Pablo nagsiling: “Indi ko luyag nga mangin mga umalambit kamo upod sa mga demonyo. Indi kamo makainom sa kopa ni Jehova kag sa kopa sang mga demonyo; indi kamo makaambit sa ‘lamesa ni Jehova’ kag sa lamesa sang mga demonyo.”—1 Corinto 10:20, 21.

² Apang, sin-o si Satanas kag ang mga demonyo? Paano kag san-o sila nagluntad? Gintuga bala sila sang Dios? Daw ano kabaskog sang ila impluwensia sa mga tawo? Ano ang aton pangamlig, kon may yara gid man, batok sa ila?

Paano Nagluntad si Satanas kag ang mga Demonyo?

3. Paano nangin Satanas nga Yawa ang isa ka anghel sang Dios?

³ Sa panugod sang maragtas sang tawo, sang nagapuyo pa anay sa hardin sang Eden ang mga tawo, nagrebelde ang isa ka anghel sang Dios. Ngaa? Bangod indi sia kontento sa iya papel sa organisasyon ni Jehova sa langit. Sang natuga na sanday Adan kag Eva, nakakita sia sing kahigayunan agod buyukon sila nga sia ang tumanon kag simbahon sa baylo nga ang matuod nga Dios. Bangod nagrebelde sia sa Dios kag ginsulay ang una nga mag-asawa nga magpakasala, ginhimo sini nga anghel ang iya kaugalingon nga Satanas nga Yawa. Sang ulihi, nagbuylog ang iban nga anghel sa iya pagrebelde. Paano?—Genesis 3:1-6; Roma 5:12; Bugna 12:9.

4. Ano ang ginhimo sang pila ka rebelyuso nga mga anghel antes sang Anaw sang adlaw ni Noe?

⁴ Ang inspirado nga Kasulatan nagasugid sa aton nga antes sang daku nga Anaw sang adlaw ni Noe, ang iban nga mga anghel nakabatyag sang indi kinaugali nga pagkaluyag sa mga babayi sa duta. Bangod may malain nga katuyuan, “nakita sang [langitnon nga] mga anak nga lalaki sang matuod nga Dios ang mga anak nga babayi sang mga tawo, nga matahom sila,” siling sang Biblia, “kag nagkuha sila sing mga asawa para sa ila kaugalingon,  kon sayuron, sang tanan nga ila napili.” Ini nga pag-asawahay indi kinaugali, kag nanganak sila sing mestiso nga nakilala subong mga Nefilim. (Genesis 6:2-4) Ang espiritu nga mga tinuga nga naglalis sa Dios nagbuylog kay Satanas sa pagrebelde batok kay Jehova.

5. Ano ang natabo sa mga rebelde sang naglaglag si Jehova paagi sa Anaw?

⁵ Sang ginpahanabo ni Jehova ang Anaw sa katawhan, nalaglag ang mga Nefilim kag ang ila tawhanon nga mga iloy. Napilitan ang rebelyuso nga mga anghel nga huklason ang ila tawhanon nga mga lawas kag magbalik sa duog sang mga espiritu nga tinuga. Apang, wala na sila makabalik sa “ila orihinal nga kahimtangan” upod sa Dios. Sa baylo, ginpahamtang sila sa “mangitungito [nga espirituwal] nga kadudulman,” nga ginatawag Tartaro.—Judas 6; 2 Pedro 2:4.

6. Paano ginapatalang sang mga demonyo ang katawhan?

⁶ Kutob sang wala na makabalik ang malaut nga mga anghel sa “ila orihinal nga kahimtangan,” sila nangin mga demonyo nga kaupod ni Satanas kag nagasakdag sang iya malaut nga mga katuyuan. Kutob sadto tubtob karon, ang mga demonyo indi na makamateryalisar. Apang, mahimo nila sulayon ang mga lalaki kag mga babayi nga makigbahin sa nanuhaytuhay nga sahi sang seksuwal nga kalainan. Padayon man nga ginapatalang sang mga demonyo ang katawhan paagi sa espiritismo, nga mahimo maglakip sang pagpanghiwit, voodoo, kag mga espiritista. (Deuteronomio 18:10-13; 2 Cronica 33:6) Ang madangatan sang malaut nga mga anghel kaanggid man sa iya sang Yawa—dayon nga kalaglagan. (Mateo 25:41; Bugna 20:10) Apang, samtang wala pa ini, dapat kita magtindog sing malig-on kag magpamatok sa ila. Maalamon nga binagbinagon naton kon daw ano ka gamhanan si Satanas kag kon paano naton madinalag-on nga pamatukan sia kag ang iya mga demonyo.

Daw Ano ka Gamhanan si Satanas?

7. Daw ano kagamhanan si Satanas sa kalibutan?

⁷ Ginpasipalahan ni Satanas si Jehova sa bug-os nga maragtas. (Hulubaton 27:11) Kag naimpluwensiahan niya ang kalabanan nga tawo. “Ang bug-os nga kalibutan yara sa gahom sang isa nga malauton,” siling sang 1 Juan 5:19. Amo kon ngaa ginsulay sang Yawa si Jesus paagi sa pagtanyag sa iya sing awtoridad kag sing himaya sang “tanan nga ginharian sang napuy-an nga duta.” (Lucas 4:5-7) Tuhoy kay Satanas, si apostol Pablo nagasiling: “Karon, kon matuod nga ang maayong balita nga ginapahayag namon gintabunan, ginatabunan ini sa tunga sang mga nagakalaglag, nga sa tunga nila ginbulag sang dios sining sistema sang mga butang ang mga hunahuna sang mga di-tumuluo, agod ang kapawa sang mahimayaon nga maayong balita tuhoy kay Cristo, nga larawan sang Dios, indi magsilak.” (2 Corinto 4:3, 4) Si Satanas ‘butigon kag amay sang kabutigan,’ apang nagapakunokuno sia nga “anghel sang kapawa.” (Juan 8:44; 2 Corinto 11:14) May gahom sia kag mga pahito nga makabulag sang hunahuna sang mga gumalahom sang kalibutan kag sang ila mga sakop. Paagi sa sayop nga panudlo kag relihioso nga mga mito kag mga kabutigan, napatalang niya ang katawhan.

8. Ano ang ginapakita sang Biblia tuhoy sa impluwensia ni Satanas?

⁸ Ang gahom kag impluwensia ni Satanas makita sang panahon ni manalagna Daniel, mga lima ka siglo ang nagligad antes sang aton Kumon nga Dag-on. Sang ginpadala ni Jehova ang isa ka anghel agod palig-unon si Daniel, ginpamatukan ang anghel sang “[isa ka espiritu nga] prinsipe sang ginharian sang Persia.” Ang matutom nga anghel naatrasar sing 21 ka adlaw tubtob nga “si Miguel, nga isa sang puno nga prinsipe,” nag-abot agod magbulig sa iya. Ang amo gihapon nga rekord nagsiling man tuhoy sa “prinsipe [nga demonyo] sang Gresya.” (Daniel 10:12, 13, 20) Kag sa Bugna 13:1, 2, si Satanas ginlaragway subong “dragon” nga naghatag sa politikal nga mapintas nga sapat “sang gahom sini sang trono sini kag sang awtoridad sini.”

9. Batok kay sin-o nagapakig-away ang mga Cristiano?

⁹ Indi katingalahan nga nagsulat si Pablo: “Bangod nagapakigdumog kita, indi batok sa dugo kag unod, kundi batok sa mga panguluhan, batok sa mga awtoridad, batok sa mga manuggahom sang kalibutan sining kadudulman, batok sa malaut nga mga puersa nga espiritu sa langitnon nga mga duog.” (Efeso 6:12) Bisan karon, ang indi  makita nga demoniko nga puersa nga kontrolado ni Satanas nga Yawa nagaimpluwensia sa tawhanon nga mga gumalahom kag sa mga tawo sa kabug-usan, nagasugyot sa ila nga himuon ang makangilidlis nga pagpapas sang rasa, terorismo, kag pagpamatay. Binagbinagon naton karon kon paano naton madinalag-on nga pamatukan ining gamhanan nga puersa sang mga espiritu.

Paano Naton Pamatukan ang mga Demonyo?

10, 11. Paano naton mapamatukan si Satanas kag ang iya malauton nga mga anghel?

¹⁰ Indi naton madinalag-on nga pamatukan si Satanas kag ang iya malauton nga mga anghel sa aton lang kaugalingon, sa aton pisikal man nga kusog ukon ikasarang sa paghunahuna. Ginlaygayan kita ni Pablo: “Magpadayon kamo sa pagtigayon sing kusog sa Ginuo kag sa gahom sang iya kusog.” Dapat kita mapangabay sing pangamlig sa Dios. Si Pablo nagsiling pa: “Isuklob ang kompleto nga hinganib gikan sa Dios agod makatindog kamo sing malig-on batok sa mga pahito sang Yawa . . . Isuklob ninyo ang kompleto nga hinganib gikan sa Dios, agod kon mag-abot ang malaut nga adlaw makabato kamo, kag sa tapos ninyo mahimo sing madinalag-on ang tanan nga butang, makatindog kamo sing malig-on.”—Efeso 6:10, 11, 13.

¹¹ Makaduha nga ginlaygayan ni Pablo ang iya masigka-Cristiano nga isuklob ang “kompleto nga hinganib gikan sa Dios.” Ang tinaga nga “kompleto” nagapahangop nga ang pahapyaw nga panikasog indi gid magmadinalag-on batok sa pagsalakay sang mga demonyo. Busa, ano ang importante nga espirituwal nga mga hinganib nga kinahanglanon gid karon sang mga Cristiano agod mapamatukan ang mga demonyo?

“Magtindog Kamo sing Malig-on”—Paano?

12. Paano mawagkusan sang mga Cristiano ang ila mga balikawang sing kamatuoran?

¹² Si Pablo nagsiling: “Busa, magtindog kamo sing malig-on nga ang inyo mga balikawang nawagkusan sing kamatuoran, kag nakasuklob sang pagkamatarong subong panaming sa dughan.” (Efeso 6:14) Ang duha nga hinganib nga ginahinambitan diri amo ang wagkus, ukon isa ka paha, kag ang panaming sa dughan. Dapat hugton pirme sang isa ka soldado ang iya paha agod amligan ang iya balikawang (hita kag pus-on) kag agod masukbitan sang iya espada. Sing kaanggid, ang kamatuoran sang Biblia dapat daw nawagkus sing hugot sa aton, agod magkabuhi kita nahisuno sa sini. May iskedyul bala kita sa pagbasa sing Biblia adlaw-adlaw? Nagapakigbahin bala sa sini ang inyo bug-os nga pamilya? Ginabinagbinag bala naton ang teksto kada adlaw subong isa ka pamilya? Dugang pa, nagapakigdungan bala kita sa mga paathag sang mga publikasyon nga gin-aman sang “matutom kag mainandamon nga ulipon”? (Mateo 24:45) Kon ginahimo naton ini, ginapanikasugan naton nga iaplikar ang laygay ni Pablo. May mga video man kita kag mga DVD nga nagaunod sing laygay gikan sa Kasulatan. Ang padayon nga pagpabalor sa kamatuoran makabulig sa aton nga makahimo sing maalamon nga mga desisyon kag makaamlig sa aton gikan sayop nga dalanon.

13. Paano naton maamligan ang aton malaragwayon nga tagipusuon?

¹³ Ang literal nga panaming sa dughan nagaamlig sa dughan, tagipusuon, kag iban pa importante nga organo sang mga soldado. Maamligan sang Cristiano ang iya malaragwayon nga tagipusuon—ang iya nasulod nga pagkatawo—paagi sa pagpalambo sang gugma sa pagkamatarong sang Dios kag paagi sa pagtuman sa matarong nga mga talaksan ni Jehova. Ang malaragwayon nga panaming sa dughan nagaamlig sa aton nga indi pagpakadiutayon ang Pulong sang Dios.  Samtang ‘ginadumtan naton ang malaut, kag ginahigugma ang maayo,’ ginapunggan naton ang aton mga tiil “gikan sa tagsa ka malain nga banas.”—Amos 5:15; Salmo 119:101.

14. Ano ang buot silingon nga ang aton “mga tiil nasuksukan sing kahanda sa pagbantala sing maayong balita sang paghidait”?

¹⁴ Ang Romanong soldado masami nga nagasuksok sing nagakaigo nga sapatos para sa malawig nga pagmartsa sa ginatos ka milya nga mga haywey sang Roma nga nagasinangasanga sa bug-os nga imperyo. Ano ang buot silingon para sa mga Cristiano sang pinamulong nga “ang mga tiil nasuksukan sing kahanda sa pagbantala sing maayong balita sang paghidait”? (Efeso 6:15) Nagakahulugan ini nga handa kita sa pagpanghikot. Handa kita sa pagbantala sing maayong balita sa tagsa ka nagakaigo nga higayon. (Roma 10:13-15) Ang aton pagkaaktibo sa Cristianong ministeryo isa ka pangamlig batok sa “mga pahito” ni Satanas.—Efeso 6:11.

15. (a) Ano ang nagapamatuod nga ang pagtuo subong sang daku nga taming importante gid? (b) Anong “nagadabadaba nga mga baslay” ang makahalit sa aton pagtuo?

¹⁵ “Labaw sa tanan,” padayon ni Pablo, “kuhaa ang pagtuo subong daku nga taming, nga paagi sini mapalong ninyo ang tanan nga nagadabadaba nga baslay sang isa nga malauton.” (Efeso 6:16) Ang laygay nga kuhaa ang pagtuo subong daku nga taming ginsugdan paagi sa pinamulong nga “labaw sa tanan,” nagapahangop nga ining hinganib importante gid. Dapat wala gid sing depekto ang aton pagtuo. Kaangay sang daku nga taming, ang aton pagtuo nagaamlig sa aton gikan sa “nagadabadaba nga mga baslay” ni Satanas. Ano ang ginarepresentar sini karon? Ini mahimo ang masakit nga mga insulto, kabutigan, kag hapaw nga kamatuoran nga ginapalapnag sang mga kaaway kag mga apostata nga luyag magpaluya sang aton pagtuo. Ini nga “mga baslay” mahimo man ang  mga pagsulay nga mangin materyalistiko, amo nga mangin masako kita sa pagbakal sing madamo nga butang kag sa pagpakig-indis pa gani sa mga tawo nga may pakitakita nga estilo sang pagkabuhi. Ayhan nagbakal sila sing mas dalagku kag mas matahom nga mga balay kag mga salakyan ukon nagapahambog sang ila malahalon nga mga alahas kag pinakabag-o nga mga uso sang panapton. Bisan ano man ang ginahimo sang iban, kinahanglan nga may mabakod kita nga pagtuo nga makapalong sining “nagadabadaba nga mga baslay.” Paano kita makatukod kag makahupot sing mabakod nga pagtuo?—1 Pedro 3:3-5; 1 Juan 2:15-17.

16. Ano ang makabulig sa aton agod mapalambo ang mabakod nga pagtuo?

¹⁶ Mahimo kita mangin suod sa Dios paagi sa regular nga personal nga pagtuon sa Biblia kag paagi sa hanuot nga pangamuyo. Makapakitluoy kita kay Jehova para sa isa ka malig-on nga pagtuo kag nian magpanghikot nahisuno sa aton mga pangamuyo. Halimbawa, ginahandaan bala naton sing maayo ang aton semanal nga Pagtinuon sa Ang Lalantawan agod makapakigbahin sa sini? Ang aton pagtuo mangin malig-on kon ginatun-an naton ang Biblia kag ang pasad sa Biblia nga mga publikasyon.—Hebreo 10:38, 39; 11:6.

17. Paano naton ‘mabaton ang kaluwasan subong helmet’?

¹⁷ Ginatapos ni Pablo ang iya paglaragway sa espirituwal nga hinganib sa sini nga laygay: “Batuna man ninyo ang kaluwasan subong helmet, kag ang espada sang espiritu, nga amo, ang pulong sang Dios.” (Efeso 6:17) Ang helmet sang soldado nagaamlig sang iya ulo kag utok, nga amo ang sentro sa paghimo sing desisyon. Sing kaanggid, ang aton Cristianong paglaum nagaamlig sang aton ikasarang sang paghunahuna. (1 Tesalonica 5:8) Sa baylo nga pun-on ang aton hunahuna sing kalibutanon nga mga tulumuron kag materyalistiko nga mga handum, kaangay ni Jesus, dapat naton isentro ang aton hunahuna sa ginhatag sang Dios nga paglaum.—Hebreo 12:2.

18. Ngaa indi naton dapat pagpatumbayaan ang aton regular nga pagbasa sing Biblia?

¹⁸ Ang aton katapusan nga pangamlig batok sa impluwensia ni Satanas kag sang iya mga demonyo amo ang pulong sang Dios, ukon mensahe, nga mabasa sa Biblia. Isa pa ini ka rason kon ngaa indi naton dapat pagpatumbayaan ang aton regular nga pagbasa sing Biblia. Ang sibu kag tul-id nga ihibalo sa Pulong sang Dios nagaamlig sa aton gikan sa kabutigan ni Satanas kag sa mga propaganda sang mga demonyo subong man sa mamulayon nga mga sinulatan sang mga apostata.

“Padayon Kamo nga Magpangamuyo sa Tagsa ka Higayon”

19, 20. (a) Ano ang matabo kay Satanas kag iya mga demonyo? (b) Ano ang magapalig-on sa aton sa espirituwal?

¹⁹ Ang paglaglag kay Satanas, sa iya mga demonyo, kag sa malauton nga kalibutan malapit na. Nahibaluan ni Satanas nga “malip-ot na lamang ang iya tion.” Naakig gid sia kag nagapakig-away sa mga “nagatuman sa mga sugo sang Dios kag may hilikuton sa pagpanaksi tuhoy kay Jesus.” (Bugna 12:12, 17) Kinahanglan gid nga pamatukan naton si Satanas kag ang iya mga demonyo.

²⁰ Nagapasalamat gid kita sa pagpalig-on nga isuklob ang kompleto nga hinganib gikan sa Dios! Gintapos ni Pablo ang iya pagbinagbinag sa espirituwal nga hinganib paagi sa sining laygay: “Sa tanan nga sahi sang pangamuyo kag pag-ampo padayon kamo nga magpangamuyo sa tagsa ka higayon paagi sa espiritu. Kag sa sini nga katuyuan magpabilin kamo nga nagamata sing dalayon kag nagaampo para sa tanan nga balaan.” (Efeso 6:18) Ang pangamuyo makapalig-on sa aton sa espirituwal kag makabulig sa aton nga magpabilin nga alisto. Iaplikar gid naton ang laygay ni Pablo kag magpadayon sa pagpangamuyo, kay magabulig ini sa aton nga mapamatukan si Satanas kag ang iya mga demonyo.

Ano ang Imo Natun-an?

• Paano nagluntad si Satanas kag ang iya mga demonyo?

• Daw ano ka gamhanan ang Yawa?

• Ano ang aton pangamlig batok kay Satanas kag sa iya mga demonyo?

• Paano naton masuklob ang bug-os nga hinganib gikan sa Dios?

[Mga Pamangkot sa Pagtinuon]

[Mga piktyur sa pahina 26]

“Nakita sang mga anak nga lalaki sang matuod nga Dios ang mga anak nga babayi sang mga tawo”

[Piktyur sa pahina 28]

Mapaathag mo bala ang aton anom ka espirituwal nga hinganib?

[Mga piktyur sa pahina 29]

Paano ang pagpakigbahin sa sining mga hilikuton pangamlig batok kay Satanas kag sa iya mga demonyo?