Mainunungon kay Cristo kag sa Iya Matutom nga Ulipon

“Tangduan [sia sang iya agalon] sa pagdumala sa tanan niya nga pagkabutang.”​—MATEO 24:45-47.

1, 2. (a) Suno sa Kasulatan, sin-o ang aton lider? (b) Ano ang nagapakita nga si Cristo aktibo nga nagapanguna sa kongregasyon?

“INDI man kamo magpatawag nga ‘mga lider,’ kay isa lamang ang inyo Lider, ang Cristo.” (Mateo 23:10) Sa sini nga mga pulong, ginpaathag ni Jesus sa iya mga sumulunod nga wala sang bisan sin-o nga tawo ang mahimo nga mangin ila lider. Ang ila Lider magahalin sa langit—si Jesucristo mismo. Ang Dios ang nagtangdo kay Jesus nga Lider. “Ginbanhaw [sia ni Jehova] gikan sa mga patay kag . . . ginhimo sia nga ulo sa ibabaw sang tanan nga butang sa kongregasyon, nga amo ang iya lawas.”—Efeso 1:20-23.

² Sanglit si Cristo amo ang “ulo sa ibabaw sang tanan nga butang” may kahilabtanan sa Cristianong kongregasyon, may awtoridad sia sa tanan nga nagakatabo sa sulod sang kongregasyon. Nakita gid niya ang tanan nga nagakatabo sa sulod sang kongregasyon. Interesado gid sia sa espirituwal nga kahimtangan sang tagsa ka grupo sang mga Cristiano, ukon kongregasyon. Maathag ini nga ginpakita sa ginbugna kay apostol Juan sang hingapusan nga bahin sang nahaunang siglo C.E. Lima ka beses nga nagsiling si Jesus sa pito ka kongregasyon nga nahibaluan niya ang ila mga buhat, ang ila maayo nga mga kinaiya, kag ang ila mga kaluyahon, kag gani naghatag sia sing laygay kag pagpalig-on sa ila. (Bugna 2:2, 9, 13, 19; 3:1, 8, 15) Makasalig gid kita nga nahibaluan man niya ang espirituwal nga kahimtangan sang iban pa nga mga kongregasyon sa Asia Minor, Palestina, Siria, Babilonia, Gresya, Italya, kag sa iban pa nga mga duog. (Binuhatan 1:8) Kamusta naman karon?

 Isa ka Matutom nga Ulipon

3. Ngaa nagakaigo nga ipaanggid si Jesus sa isa ka ulo kag ang iya kongregasyon sa isa ka lawas?

³ Pagkatapos sang iya pagkabanhaw kag antes gid lamang magkayab sa iya Amay sa langit, si Jesus nagsiling sa iya mga disipulo: “Ginhatag sa akon ang bug-os nga awtoridad sa langit kag sa duta.” Nagsiling man sia: “Yari karon! ako kaupod ninyo sa tanan nga adlaw tubtob sa katapusan sang sistema sang mga butang.” (Mateo 28:18-20) Padayon sia nga mangin kaupod nila subong ila Ulo nga aktibo nga nagasakdag sa ila. Sa iya mga sulat sa mga Cristiano sa Efeso kag Colosas, ginpaanggid ni apostol Pablo ang Cristianong kongregasyon sa isa ka “lawas,” nga si Cristo amo ang Ulo. (Efeso 1:22, 23; Colosas 1:18) Ang The Cambridge Bible for Schools and Colleges nagsiling nga ining metapora “nagapahangop nga indi lamang kinahanglan nga magkooperar ang mga miembro sa Ulo, kundi dapat nga ang Ulo may awtoridad sa mga miembro. Sila ang Iya mga instrumento.” Ano nga grupo ang gingamit ni Cristo subong iya instrumento sugod sang nangin hari sia sang Ginharian sang 1914?—Daniel 7:13, 14.

4. Subong sang gintagna ni Malaquias, ano ang nasapwan ni Jehova kag ni Jesus sang ila gin-inspeksion ang espirituwal nga templo?

⁴ Si Malaquias nagtagna nga si Jehova, “ang matuod nga Ginuo,” upod sa iya “mensahero sang katipan,” ang iya bag-o lang ginpalingkod nga Anak, si Cristo Jesus, magahukom kag magainspeksion sang Iya “templo,” ukon espirituwal nga balay sang pagsimba. “Ang gintalana nga tion” para sa pagsugod sang ‘paghukom sa balay sang Dios’ maathag nga nag-abot sang 1918. * (Malaquias 3:1; 1 Pedro 4:17) Ang mga nagapangangkon nga nagarepresentar sa Dios kag sa iya matuod nga pagsimba sa duta nagakaigo nga gin-usisa. Ginsikway ang mga simbahan sang Cristiandad nga sa sulod sang mga siniglo nagtudlo sang mga doktrina nga nagpakahuya sa Dios kag nagpakigbahin gid sa pagpamatay sadtong Bug-os Kalibutan nga Inaway I. Ang matutom nga nagkalabilin sang hinaplas sang espiritu nga mga Cristiano gintilawan, nga daw ginpaputli sa kalayo, kag ginkahamut-an, kag nangin “katawhan sila kay Jehova nga nagadulot sing mga halad sang pagkamatarong.”—Malaquias 3:3.

5. Nahisanto sa tagna ni Jesus tuhoy sa iya “presensia,” sin-o ang matutom nga “ulipon”?

⁵ Nahisanto sa tagna ni Malaquias, ang kabilugan nga tanda nga ginhatag ni Jesus sa iya mga disipulo agod mahibaluan nila ang tion sang iya “presensia kag ang katapusan sang sistema sang mga butang” naglakip sang pagpakilala kon sin-o ang isa ka grupo nga “ulipon.” Si Jesus nagsiling: “Sin-o gid ang matutom kag mainandamon nga ulipon nga gintangdo sang iya agalon sa pagdumala sa iya panimalay, sa paghatag sa ila sang ila pagkaon sa nagakaigo nga tion? Malipayon ini nga ulipon kon masapwan sia sang iya agalon nga nagahimo sini sa iya pag-abot! Sa pagkamatuod nagasiling ako sa inyo, Tangduan niya sia sa pagdumala sa tanan niya nga pagkabutang.” (Mateo 24:3, 45-47) Sa iya “pag-abot” agod inspeksionon ang “ulipon” sang 1918, nasapwan ni Cristo ang isa ka hinaplas sang espiritu nga nagkalabilin sang matutom nga mga disipulo nga sugod pa sang 1879, naggamit sini nga balasahon kag sang iban pa nga pasad sa Biblia nga mga publikasyon sa pag-aman sing espirituwal nga “pagkaon sa nagakaigo nga tion.” Ginkilala niya sila subong iya instrumento, ukon “ulipon,” kag sang 1919 ginsalig niya sa ila ang pagdumala sa tanan niya nga pagkabutang sa duta.

Pagdumala sa mga Pagkabutang ni Cristo sa Duta

6, 7. (a) Ano ang isa pa ka pagtawag ni Jesus sa iya matutom nga “ulipon”? (b) Ano ang ginapahangop sang paggamit ni Jesus sing tinaga nga “tulugyanan”?

⁶ Mga pila ka bulan antes gintagna ni Jesus ang tanda sang iya presensia, lakip ang pagluntad sang isa ka “ulipon” nga magatiglawas sa iya sa duta, may gingamit sia nga isa pa ka termino tuhoy sini nga “ulipon” nga nagasugid sang mga katungdanan sang ulipon. Si Jesus nagsiling: “Sin-o gid ang matutom nga tulugyanan, ang isa nga mainandamon, nga itangdo sang iya agalon sa iya hubon sang mga alagad agod padayon nga maghatag sa ila sang bastante nga pagkaon sa nagakaigo nga tion? Sa pagkamatuod nagasiling ako sa inyo, Tangduan niya sia sa pagdumala sa tanan niya nga pagkabutang.”—Lucas 12:42, 44.

⁷ Gintawag diri ang ulipon nga tulugyanan, ang  tinaga nga ginbadbad gikan sa isa ka Griego nga tinaga nga nagakahulugan sing “manugdumala sa isa ka panimalay ukon propiedad.” Ang tulugyanan indi lamang isa ka grupo sang maalam nga mga tawo nga nagapaathag sang makawiwili nga mga butang gikan sa Biblia. Magluwas sa pag-aman sing espirituwal nga pagkaon “sa nagakaigo nga tion,” “ang matutom nga tulugyanan” gintangduan sa pagdumala sa bug-os nga hubon sang mga alagad ni Cristo kag sa tanan nga mga intereses ni Cristo sa duta, “ang tanan niya nga mga pagkabutang.” Ano ining mga pagkabutang?

8, 9. Anong “mga pagkabutang” ang ginpaatipan sa ulipon?

⁸ Ang mga katungdanan sang ulipon nagalakip sang pagtatap sa mga pasilidad nga ginagamit sang mga sumulunod ni Cristo sa paghimo sang ila Cristianong mga hilikuton, subong sang bug-os kalibutan nga talatapan kag sang sanga talatapan sang mga Saksi ni Jehova, subong man sang ila mga duog sa pagsimba—mga Kingdom Hall kag mga Assembly Hall—sa bug-os nga kalibutan. Kapin ka importante, ginadumalahan man sang ulipon ang makapalig-on sa espirituwal nga mga programa sa pagtuon sa Biblia sa semanal nga mga miting kag sa mga asambleya kag mga kombension nga regular nga ginahiwat kada tuig. Sa sini nga mga pagtinipon, ginapagua ang mga impormasyon tuhoy sa katumanan sang mga tagna sa Biblia, kag ginahatag ang suno sa tion nga panuytoy kon paano iaplikar ang mga prinsipio sa Biblia sa adlaw-adlaw nga pagkabuhi.

⁹ Ang mga katungdanan sang tulugyanan nagalakip man sang pagtatap sa importante gid nga hilikuton nga pagbantala sing “maayong balita sang ginharian” kag paghimo sing “mga disipulo sa nga tawo sang tanan nga kapungsuran.” Nagadalahig ini sang pagtudlo sa mga tawo nga tumanon ang tanan nga butang nga ginsugo ni Cristo, ang Ulo sang kongregasyon, sa sining tion sang katapusan. (Mateo 24:14; 28:19, 20; Bugna 12:17) Bangod sa pagbantala kag pagpanudlo sang mga hinaplas nga nagkalabilin, ang ila matutom nga kaupod, “ang dakung kadam-an,” natipon. Ining “kalahamut-an nga butang sang tanan nga pungsod” pat-od gid nga nalakip sa hamili nga “mga pagkabutang” ni Cristo nga ginatatap sang matutom nga ulipon.—Bugna 7:9; Hageo 2:7.

Isa ka Tiglawas nga Nagadumala nga Hubon

10. Ano nga hubon ang nagahimo sing mga desisyon sang unang siglo, kag ano ang epekto sini sa mga kongregasyon?

¹⁰ Ang mabug-at nga mga katungdanan sang matutom nga ulipon maathag nga nagalakip sang paghimo sing madamo gid nga desisyon. Sa Cristianong kongregasyon sang una, ang mga apostoles kag mga gulang sa Jerusalem nagtiglawas sa ulipon nga klase, nga nagahimo sing mga desisyon para sa bug-os nga Cristianong kongregasyon. (Binuhatan 15:1, 2) Ang mga desisyon sining unang siglo nga nagadumala nga hubon ginapadala sa mga kongregasyon paagi sa sulat kag sa nagalakbay nga mga tiglawas. Ang unang mga Cristiano nalipay sa pagbaton sining maathag nga panuytoy, kag ang ila kinabubut-on nga pagpakigkooperar sa nagadumala nga hubon nagpasanyog sang paghidait kag kahim-ong.—Binuhatan 15:22-31; 16:4, 5; Filipos 2:2.

11. Sin-o ang ginagamit ni Cristo karon agod tuytuyan ang iya kongregasyon, kag paano naton dapat tamdon ining grupo sang hinaplas nga mga Cristiano?

 ¹¹ Kaangay sadtong panahon sang una nga mga Cristiano, ang diutay nga grupo sang hinaplas sang espiritu nga mga manugtatap ginatapuan sang Nagadumala nga Hubon sang mga sumulunod ni Cristo sa duta karon. Paagi sa iya “tuo nga kamot,” nga simbuliko nga nagarepresentar sang iya ginagamit nga gahom, ginatuytuyan ni Cristo, ang Ulo sang kongregasyon, ining matutom nga mga lalaki samtang ginadumalahan nila ang hilikuton sang Ginharian. (Bugna 1:16, 20) Sa sugilanon sang iya kabuhi, si Albert Schroeder, isa ka madugay na nga katapo sang Nagadumala nga Hubon nga sining karon lang nakatapos sang iya dutan-on nga kabuhi, nagsulat: “Ang Nagadumala nga Hubon nagatipon kada Mierkoles, ginabuksan ang ila miting sa pangamuyo kag ginapangabay ang panuytoy sang espiritu ni Jehova. Ginapanikasugan gid nga pat-uron nga ang tanan nga butang ginatatap sing maayo kag ang tanan nga desisyon ginahimo nahisuno sa Pulong sang Dios ang Biblia.” * Masaligan gid naton ining matutom nga hinaplas nga mga Cristiano. Ilabi na tuhoy sa ila, dapat tumanon naton ang laygay ni apostol Pablo: “Mangin matinumanon sa mga nagapanguna sa inyo kag mangin mapinasakupon, kay ginabantayan nila ang inyo kalag.”—Hebreo 13:17.

Pagpakita sing Nagakaigo nga Pagtahod sa Matutom nga Ulipon

12, 13. Ano ang Makasulatanhon nga mga rason nga dapat naton pakitaan sing pagtahod ang ulipon nga klase?

¹² Ang panguna nga rason nga ginatahod naton ang matutom nga ulipon nga klase amo nga kon ginatahod naton sila, ang aton gid ginatahod amo ang Agalon, si Jesucristo. Si Pablo nagsulat tuhoy sa sining mga hinaplas: “Sia nga gintawag sang sia hilway nga tawo amo ang ulipon ni Cristo. Ginbakal kamo sa daku nga bili.” (1 Corinto 7:22, 23; Efeso 6:6) Busa, kon mainunungon kita nga nagapasakop sa panuytoy sang matutom nga ulipon kag sa Nagadumala nga Hubon sini, nagapasakop kita kay Cristo, ang Agalon sang ulipon. Ang aton nagakaigo nga pagtahod sa instrumento nga ginagamit ni Cristo sa pagtatap sa iya mga pagkabutang sa duta isa ka paagi nga ‘dayag nga ginakilala naton nga si Jesucristo Ginuo sa himaya sang Dios nga Amay.’—Filipos 2:11.

¹³ Ang isa pa ka Makasulatanhon nga rason nga dapat naton tahuron ang matutom nga ulipon amo nga ang hinaplas nga mga Cristiano sa duta malaragwayon nga gintawag nga “templo” nga ginapuy-an ni Jehova “paagi sa espiritu.” Bangod sini, “balaan” sila. (1 Corinto 3:16, 17; Efeso 2:19-22) Sa sining balaan nga templo nga grupo gintugyan ni Jesus ang iya mga pagkabutang sa duta, nga nagakahulugan nga ang pila ka awtoridad kag responsibilidad sa sulod sang Cristianong kongregasyon para lamang sa sining kabilugan nga ulipon. Bangod sini, ginatamod sang tanan sa kongregasyon nga ila sagrado nga katungdanan ang pag-aplikar kag pagsakdag sa panuytoy sining matutom nga ulipon kag sa Nagadumala nga Hubon sini. Sa pagkamatuod, ginakabig sang “iban nga mga karnero” nga pribilehiyo ang pagbulig sa ulipon nga klase sa pagtatap sa mga intereses sang ila Agalon.—Juan 10:16.

Paghatag sing Mainunungon nga Pagsakdag

14. Subong sa gintagna ni Isaias, paano ang iban nga mga karnero nagalakat sa likuran sang hinaplas nga ulipon nga klase kag nagaalagad subong “wala ginabayaran nga mga mamumugon”?

¹⁴ Ang mapainubuson nga pagpasakop sang iban nga mga karnero sa hinaplas nga katapo sang espirituwal nga Israel gintagna ni Isaias: “Amo ini ang ginsiling ni Jehova: ‘Ang wala ginabayaran nga mga mamumugon sang Egipto kag ang mga manugpatikang sang Etiopia kag ang mga Sabeanhon, mga tawo nga mataas, magakari gid sa imo, kag sila mangin imo. Magalakat sila sa likuran mo; magakari sila nga may talikala, kag magayaub sila sa imo. Magapangamuyo sila sa imo, nga nagasiling, “Matuod gid nga ang Dios nahiusa sa imo, kag wala na sing iban pa; wala na sing iban nga Dios.”’” (Isaias 45:14) Sing malaragwayon, ang iban nga mga karnero sa karon nagalakat sa likuran sang hinaplas nga ulipon nga klase kag sang Nagadumala nga Hubon sini, sa amo nagasunod sa ila pagpanguna. Subong “wala ginabayaran nga mga mamumugon,” ang iban nga mga karnero kinabubut-on nga nagahinguyang sang ila pisikal nga kusog kag sang ila mga pagkabutang sa pagsakdag  sa bug-os kalibutan nga hilikuton nga ginsugo ni Cristo sa iya hinaplas nga mga sumulunod sa duta.—Binuhatan 1:8; Bugna 12:17.

15. Paano ginpakita sang tagna sa Isaias 61:5, 6 ang kaangtanan sang iban nga mga karnero kag sang espirituwal nga Israel?

¹⁵ Ang iban nga mga karnero malipayon kag mapinasalamaton nga nagaalagad kay Jehova sa idalom sang pagdumala sang ulipon nga klase kag sang Nagadumala nga Hubon sini. Ginakilala nila ang mga hinaplas subong mga katapo sang “Israel sang Dios.” (Galacia 6:16) Subong malaragwayon nga “mga estranghero” kag “mga dumuluong” nga nagapakig-upod sa espirituwal nga Israel, malipayon sila nga nagapangalagad subong “mga mangunguma” kag “manugtatap sang ubas” sa idalom sang pagtuytoy sang mga hinaplas, ang “mga saserdote ni Jehova” kag ‘mga ministro sang Dios.’ (Isaias 61:5, 6) Makugi sila sa pagbantala sining maayong balita sang Ginharian kag sa paghimo sing disipulo sa mga tawo sang tanan nga pungsod. Bug-os tagipusuon ang ila pagbulig sa ulipon nga klase sa pagbantay kag pag-atipan sa bag-uhan nga mga tulad-karnero.

16. Ano ang nagpahulag sa iban nga mga karnero nga sakdagon sing mainunungon ang matutom kag mainandamon nga ulipon?

¹⁶ Ginakilala sang iban nga mga karnero nga daku gid ang ila benepisyo gikan sa maukod nga panikasog sang matutom nga ulipon sa pag-aman sa ila sing suno sa tion nga espirituwal nga pagkaon. Mapainubuson nga ginakilala nila nga kon indi bangod sa matutom kag mainandamon nga ulipon, diutay lamang ukon wala gid sila sing nahibaluan sa hamili nga mga kamatuoran sang Biblia, subong sang pagkasoberano ni Jehova, pagpakabalaan sang iya ngalan, Ginharian, bag-ong langit kag bag-ong duta, kalag, kahimtangan sang patay, kag matuod nga identidad ni Jehova, sang iya Anak, kag sang balaan nga espiritu. Bangod sang ila pagpasalamat kag pagkamainunungon, ang iban nga mga karnero mahigugmaon nga nagasakdag sa hinaplas nga mga “kauturan” ni Cristo sa duta sa sining tion sang katapusan.—Mateo 25:40.

17. Ano ang nasapwan sang Nagadumala nga Hubon nga kinahanglan himuon, kag ano ang binagbinagon sa masunod nga artikulo?

¹⁷ Bangod sang ila nagadiutay nga kadamuon, ang mga hinaplas indi makapakig-upod sa tanan nga kongregasyon agod dumalahan ang mga pagkabutang ni Cristo. Busa, ang Nagadumala nga Hubon nagatangdo sang mga lalaki gikan sa iban nga mga karnero nga dumalahan ang mga sanga talatapan, mga distrito, mga sirkito, kag mga kongregasyon sang mga Saksi ni Jehova. Ang aton bala pagtamod sa sining kabulig nga mga manugbantay nagaapektar sa aton katutom kay Cristo kag sa iya matutom nga ulipon? Binagbinagon ini sa masunod nga artikulo.

[Mga nota]

Bilang Pagrepaso

• Sin-o ang aton Lider, kag ano ang nagapakita nga nahibaluan niya ang kahimtangan sa sulod sang kongregasyon?

• Sa pag-inspeksion sa “templo,” sin-o ang nasapwan subong matutom nga ulipon, kag ano nga mga pagkabutang ang ginsalig sa ila?

• Ano ang Makasulatanhon nga mga rason nga dapat mainunungon nga sakdagon ang matutom nga ulipon?

[Mga Pamangkot sa Pagtinuon]

[Mga Piktyur sa pahina 23]

Ang “mga pagkabutang” nga ginatatap sang “tulugyanan” nagalakip sang materyal nga propiedad, espirituwal nga mga programa, kag ang pagbantala

[Piktyur sa pahina 25]

Ang mga katapo sang iban nga mga karnero nagasakdag sa matutom nga ulipon nga klase paagi sa ila makugi nga pagbantala