Mapainubuson nga Nagapasakop sa Mahigugmaon nga mga Manugbantay

“Mangin matinumanon sa mga nagapanguna sa inyo kag mangin mapinasakupon.”​—HEBREO 13:17.

1, 2. Ano nga mga kasulatan ang nagapakita nga si Jehova kag si Jesus mahigugmaon nga mga Manugbantay?

SI Jehova nga Dios kag ang iya Anak, si Jesucristo, mahigugmaon nga mga Manugbantay. Si Isaias nagtagna: “Yari karon! Ang Soberanong Ginuong Jehova magaabot subong sang isa nga makusog, kag ang iya butkon magagahom para sa iya. . . . Kaangay sang manugbantay bantayan niya ang iya panong. Paagi sa iya butkon tipunon niya ang mga kordero; kag dalhon niya sila sa iya dughan. Tuytuyan niya sing mahalungon ang mga nagapasuso.”—Isaias 40:10, 11.

² Ining tagna sang pagpasag-uli una nga natuman sang ang mga Judiyo nga nagkalabilin nagpauli sa Juda sang 537 B.C.E. (2 Cronica 36:22, 23) Liwat ini nga natuman sang ang hinaplas nga nagkalabilin ginhilway sa “Babilonia nga Daku” sang 1919 sang Daku Pa nga Ciro, si Jesucristo. (Bugna 18:2; Isaias 44:28) Sia amo ang “butkon” ni Jehova sa paggahom, pagtipon sa mga karnero kag pagbantay sa ila sing mapinalanggaon. Si Jesus mismo nagsiling: “Ako ang maayo nga manugbantay, kag kilala ko ang akon mga karnero kag ang akon mga karnero nakakilala sa akon.”—Juan 10:14.

3. Paano ginapakita ni Jehova ang mahigugmaon nga pag-ulikid sa iya mga karnero?

³ Ginapadaku sang tagna sa Isaias 40:10, 11 ang mapinalanggaon nga pagbantay ni Jehova sa iya katawhan. (Salmo 23:1-6) Sa iya ministeryo sa duta, nagpakita man si Jesus sang pag-ulikid sa iya mga disipulo kag sa katawhan sa kabilugan. (Mateo 11:28-30; Marcos 6:34) Pareho nga ginpakamalaut ni Jehova kag ni Jesus ang kapintas sang mga manugbantay, ukon mga lider, sang Israel, nga nagpatumbaya gid kag naghingalit sa ila mga panong. (Ezequiel 34:2-10; Mateo 23:3, 4, 15) Si Jehova nagsaad: “Luwason ko ang akon mga karnero, kag indi na sila mangin butang nga inagaw; kag magahukom ako sa tunga sang karnero kag karnero. Kag magabutang ako sing isa ka manugbantay sa ila, ang akon alagad nga si David. Kag pahalbon niya sila, kag sia mangin ila manugbantay.” (Ezequiel 34:22, 23) Sa sining tion sang katapusan, si Jesucristo, ang Daku nga David, amo ang “isa ka manugbantay” nga gintangdo ni Jehova sa tanan Niya nga alagad sa duta, ang mga hinaplas sang espiritu nga mga Cristiano kag “iban nga mga karnero.”—Juan 10:16.

 Mga Dulot Gikan sa Langit Para sa Kongregasyon

4, 5. (a) Ano nga hamili nga dulot ang ginhatag ni Jehova sa iya katawhan sa duta? (b) Ano nga dulot ang ginhatag ni Jesus sa iya kongregasyon?

⁴ Paagi sa pagtangdo sang “isa ka manugbantay”—si Jesucristo—para sa iya mga alagad sa duta, naghatag si Jehova sing isa ka hamili nga dulot para sa Cristianong kongregasyon. Ining dulot nga isa ka langitnon nga Lider gintagna sa Isaias 55:4: “Yari karon! Subong saksi sa pungsudnon nga mga grupo ginhatag ko sia, subong lider kag kumandante sa pungsudnon nga mga grupo.” Ang hinaplas nga mga Cristiano kag ang “dakung kadam-an” gintipon gikan sa tanan nga pungsudnon nga mga grupo, tribo, katawhan, kag hambal. (Bugna 5:9, 10; 7:9) Nagahuman sila sa isa ka internasyonal nga kongregasyon, “isa ka panong,” sa pagpanguna sang “isa ka manugbantay,” si Cristo Jesus.

⁵ Si Jesus naghatag man sing isa ka hamili nga dulot sa iya kongregasyon sa duta. Nagtangdo sia sing matutom nga kabulig nga mga manugtatap, nga bilang pag-ilog kay Jehova kag Jesus, nagabantay man sa panong nga may mapinalanggaon nga pag-ulikid. Ginhinambitan ni apostol Pablo ining mahigugmaon nga dulot sa iya sulat sa mga Cristiano sa Efeso. Sia nagsulat: “‘Sang nagkayab sia sa kahitaasan nagdala sia sang mga bihag; naghatag sia sang dulot nga mga lalaki.’ . . . Ginhatag niya ang iban subong mga apostoles, ang iban subong mga manalagna, ang iban subong mga ebanghelisador, ang iban subong mga manugbantay kag mga manunudlo, agod pasibuon ang mga balaan, para sa hilikuton sa pag-alagad, sa pagpabakod sa lawas ni Cristo.”—Efeso 4:8, 11, 12.

6. Paano ginlaragway ang hinaplas nga mga manugtatap nga nagaalagad sa mga hubon sang mga gulang nga ginlaragway sa Bugna 1:16, 20, kag ano ang masiling tuhoy sa gintangdo nga mga gulang nga katapo sang iban nga mga karnero?

⁶ Ining “dulot nga mga lalaki” amo ang mga manugtatap, ukon mga gulang, nga gintangdo ni Jehova kag sang iya Anak, paagi sa balaan nga espiritu, agod magbantay sa mga karnero sing mapinalanggaon. (Binuhatan 20:28, 29) Sang primero, ang tanan nga manugtatap hinaplas sang espiritu nga Cristianong mga lalaki. Ang mga miembro sang mga hubon sang mga gulang sa sulod sang hinaplas nga kongregasyon ginlaragway sa Bugna 1:16, 20 subong “mga bituon” ukon “mga anghel” sa tuo nga kamot ni Cristo, nga amo, napaidalom sa iya pagdumala. Apang, sa sining tion sang katapusan, samtang ang kadamuon sining hinaplas nga mga manugtatap padayon nga nagabuhin, ang kalabanan nga Cristianong mga gulang sa kongregasyon katapo sang iban nga mga karnero. Bangod gintangdo sila sang mga tiglawas sang Nagadumala nga Hubon paagi sa pagtuytoy sang balaan nga espiritu, masiling man nga sila yara sa tuo nga kamot (ukon, ginatuytuyan) sang Maayo nga Manugbantay, si Jesucristo. (Isaias 61:5, 6) Bangod ang mga gulang sa aton mga kongregasyon nagapasakop kay Cristo, ang Ulo sang kongregasyon, takus sila sang aton bug-os nga kooperasyon.—Colosas 1:18.

 Pagkamatinumanon kag Pagkamapinasakupon

7. Ano nga laygay ang ginhatag ni apostol Pablo tuhoy sa dapat mangin pagtamod naton sa Cristianong mga manugtatap?

⁷ Ginapaabot sang aton langitnon nga mga Manugbantay, si Jehova nga Dios kag si Jesucristo, nga mangin matinumanon kita kag mapinasakupon sa kabulig nga mga manugbantay nga gintulinan nila sing mga katungdanan sa sulod sang kongregasyon. (1 Pedro 5:5) Ang gin-inspirar nga si apostol Pablo nagsulat: “Dumduma ang mga nagapanguna sa inyo, nga naghambal sang pulong sang Dios sa inyo, kag samtang ginapanilagan ninyo ang resulta sang ila paggawi iluga ang ila pagtuo. Mangin matinumanon sa mga nagapanguna sa inyo kag mangin mapinasakupon, kay ginabantayan nila ang inyo kalag subong nga sila ang manabat; agod himuon nila ini nga may kalipay kag wala nagapanghayhay, kay makahalit ini sa inyo.”—Hebreo 13:7, 17.

8. Ano ang gin-agda sa aton ni Pablo nga ‘panilagan,’ kag paano kita dapat “mangin matinumanon”?

⁸ Talupangda nga gin-agda kita ni Pablo nga ‘panilagan,’ ukon talupangdon sing maayo, ang resulta sang paggawi sang matutom nga mga gulang kag ilugon ang ila mga halimbawa sang pagtuo. Dugang pa, ginalaygayan niya kita nga mangin matinumanon kag mangin mapinasakupon sa panuytoy sining gintangdo nga mga lalaki. Ang iskolar sang Biblia nga si R. T. France nagpaathag nga sa orihinal nga Griego, ang tinaga nga ginbadbad diri nga “mangin matinumanon” indi ang “kinaandan nga termino para sa pagkamatinumanon, kundi sing literal ‘nakumbinsi,’ nagapahangop sang kinabubut-on nga pagkilala sa ila pagpanguna.” Ginatuman naton ang mga gulang indi lamang bangod ginasugo kita sang Pulong sang Dios nga himuon ini kundi bangod nakumbinsi man kita nga ang ila ginahimo para gid sa intereses sang Ginharian kag sa aton kaayuhan. Malipay gid kita kon handa kita nga batunon ang ila pagpanguna.

9. Ngaa, magluwas sa pagkamatinumanon, dapat mangin ‘mapinasakupon’ kita?

⁹ Apang, ano abi kon indi kita kumbinsido sa panuytoy ukon desisyon sang mga gulang? Sa sini nga tion kinahanglan ang pagpasakop. Mahapos magtuman kon nagaugyon kita sa ila desisyon, apang mapakita naton nga mapinasakupon kita kon nagasunod kita sa ila bisan pa wala naton mahangpan ini. Si Pedro, nga nangin apostol sang ulihi, nagpakita sini nga sahi sang pagpasakop.—Lucas 5:4, 5.

Apat ka Rason Kon Ngaa Dapat Kinabubut-on nga Magkooperar

10, 11. Sa anong paagi ang mga manugtatap “naghambal sang pulong sang Dios” sa ila mga masigka-Cristiano sang nahaunang siglo kag karon?

¹⁰ Sa Hebreo 13:7, 17, nga ginkutlo kaina, ginhatag ni apostol Pablo ang apat ka rason kon ngaa dapat kita magtuman kag magpasakop sa Cristianong mga manugtatap. Una, “naghambal [sila] sang pulong sang Dios” sa aton. Dumduma nga ang “dulot nga mga lalaki” ginhatag ni Jesus sa kongregasyon agod “pasibuon ang mga balaan.” (Efeso 4:11, 12) Ginpasibu niya ang panghunahuna kag paggawi sang unang siglo nga mga Cristiano paagi sa matutom nga kabulig nga mga manugbantay, ang iban sa ila gin-inspirar sa pagsulat sa mga kongregasyon. Gingamit niya ining gintangdo sang espiritu nga mga manugtatap sa pagtuytoy kag sa pagpalig-on sa nahauna nga mga Cristiano.—1 Corinto 16:15-18; 2 Timoteo 2:2; Tito 1:5.

¹¹ Sa karon, ginatuytuyan kita ni Jesus paagi sa “matutom kag mainandamon nga ulipon,” nga ginatiglawas sang Nagadumala nga Hubon sini kag sang gintangdo nga mga gulang. (Mateo 24:45) Bilang pagtahod sa “puno nga manugbantay,” si Jesucristo, ginatuman naton ang laygay ni Pablo: “Tahuron ang mga nagapangabudlay sing lakas sa tunga ninyo kag nagadumala sa inyo sa Ginuo kag nagalaygay sa inyo.”—1 Pedro 5:4; 1 Tesalonica 5:12; 1 Timoteo 5:17.

12. Paano ang mga manugtatap “nagabantay sa [aton] mga kalag”?

¹² Ang ikaduha nga rason kon ngaa dapat kita magkooperar sa Cristianong mga manugtatap amo nga ‘ginabantayan nila ang aton kalag.’ Kon may masat-uman sila sa aton panimuot ukon paggawi nga mahimo magbutang sa katalagman sang aton espirituwalidad, maabtik sila nga nagahatag sing kinahanglanon nga laygay agod pasibuon  kita. (Galacia 6:1) Ang Griegong tinaga nga ginbadbad nga “padayon nga nagabantay” literal nga nagakahulugan nga “wala nagatulog.” Suno sa isa ka iskolar sa Biblia, ini “nagapahangop sang padayon nga pagbantay sang isa ka manugbantay.” Dugang pa sa ila padayon nga pagbantay sa espirituwal, ang mga gulang mahimo nga indi makatulog bangod sa pagpamensar sa aton espirituwal nga kaayuhan. Indi bala dapat magkooperar gid kita sa sining mahigugmaon nga kabulig nga mga manugbantay, nga nagahimo gid sang ila bug-os nga masarangan agod mailog ang mapinalanggaon nga pag-atipan ni Jesucristo, “ang daku nga manugbantay sang mga karnero”?—Hebreo 13:20.

13. Kanday sin-o kag sa anong paagi manabat ang mga manugtatap kag ang tanan nga Cristiano?

¹³ Ang ikatlo nga rason nga dapat kita handa sa pagkooperar sa mga manugtatap amo nga padayon nila kita nga ginabantayan “subong nga sila ang manabat.” Ginadumdom sang mga manugtatap nga sila mga kabulig nga manugbantay, nagapangalagad sa idalom sang langitnon nga mga Manugbantay, si Jehova nga Dios kag si Jesucristo. (Ezequiel 34:22-24) Si Jehova ang Tag-iya sang mga karnero, nga “ginbakal niya paagi sa dugo sang iya Anak,” kag manabat sa iya ang gintangdo nga mga manugtatap kon paano nila ginapakig-angutan ang Iya panong, nga dapat “sing mapinalanggaon.” (Binuhatan 20:28, 29) Gani, tanan kita manabat kay Jehova kon paano naton ginatamod ang iya panuytoy. (Roma 14:10-12) Ang aton pagtuman sa gintangdo nga mga gulang nagapamatuod man sang aton pagpasakop kay Cristo, ang Ulo sang kongregasyon.—Colosas 2:19.

14. Ano ang mahimo tunaan sang “pagpanghayhay” sang Cristianong mga manugtatap sa ila pag-alagad kag ano ang mangin resulta sini?

¹⁴ Ginahatag ni Pablo ang ikap-at nga rason kon ngaa dapat kita magpasakop sing mapainubuson sa Cristianong mga manugtatap. Sia nagsulat: “Agod himuon nila ini nga may kalipay kag wala nagapanghayhay, kay makahalit ini sa inyo.” (Hebreo 13:17) Bangod sang ila daku nga mga responsibilidad sa pagtudlo, pagbantay, pagpanguna sa pagbantala, pagsakdag sa ila pamilya, kag pag-asikaso sa mga problema sa kongregasyon, mabug-at ang ginaabaga sang Cristianong mga gulang. (2 Corinto 11:28, 29) Kon indi kita magkooperar sa ila, ginapabug-atan pa gid naton sila. Nagaresulta ini sa ila ‘pagpanghayhay.’ Ang indi naton pagkooperar magapaakig kay Jehova kag makahalit sa aton. Sa baylo, kon nagapakita kita sing nagakaigo nga pagtahod kag  kooperasyon, himuon sang mga gulang ang ila mga katungdanan sing malipayon, kag nagapasanyog ini sing paghiusa kag malipayon pagpakigbahin sa pagbantala sing Ginharian.—Roma 15:5, 6.

Pagpakita sang Aton Pagpasakop

15. Paano naton mapakita ang aton pagkamatinumanon kag pagkamapinasakupon?

¹⁵ Madamo sing praktikal nga mga paagi nga mapakita naton ang kooperasyon sa gintangdo nga mga manugtatap. May kaangtanan sa pagpasibu sa bag-o nga mga kahimtangan sa teritoryo, naghimo bala sing kahimusan ang mga gulang nga maghiwat sing mga miting para sa pag-alagad sa latagon sa mga adlaw kag tion nga apektado ang aton iskedyul? Panikasugan gid naton nga sakdagon ang bag-o nga mga kahimusan. Mahimo makabaton kita sing wala ginapaabot nga mga pagpakamaayo. Duawon bala sang manugtatap sang pag-alagad ang aton Pagtinuon sang Kongregasyon sa Libro? Makigbahin kita sing bug-os sa hilikuton nga pagbantala sina nga semana. Nakabaton bala kita sing bahin sa Eskwelahan Teokratiko Para sa Ministeryo? Dapat tinguhaan gid naton nga makatambong kag tungdan ang aton bahin. Ginpahibalo bala sang manugtatap sa Pagtinuon sang Kongregasyon sa Libro nga ang aton grupo amo ang magpaninlo sa Kingdom Hall? Sakdagon naton sia, suno sa masarangan sang aton panglawas kag kusog. Sa sini kag sa madamo pa nga paagi, mapakita naton ang aton pagkamapinasakupon sa mga lalaki nga gintangdo ni Jehova kag sang iya Anak nga magtatap sa panong.

16. Kon ang isa ka gulang wala nagasunod sa ginhatag nga panuytoy, ngaa indi ini dapat gamiton subong rason nga magrebelde kita?

¹⁶ Kon kaisa, mahimo nga wala ginasunod sang isa ka gulang ang panuytoy sang matutom nga ulipon nga klase kag sang Nagadumala nga Hubon. Kon padayon niya nga ginahimo ini, magapanabat sia kay Jehova, ang “manugbantay kag manugtatap sang [aton] kalag.” (1 Pedro 2:25) Apang ang mga kapaslawan ukon kasaypanan sang isa ka gulang indi dapat gamiton nga rason agod magrebelde kita. Wala ginasakdag ni Jehova ang pagkamasinupakon kag pagrebelde.—Numeros 12:1, 2, 9-11.

Ginapakamaayo ni Jehova ang Kinabubut-on nga Kooperasyon

17. Ano dapat ang aton pagtamod sa aton mga manugtatap?

¹⁷ Nahibaluan ni Jehova nga Dios nga indi himpit ang mga lalaki nga iya gintangdo. Apang, ginagamit niya sila, kag paagi sa iya espiritu, ginabantayan niya ang iya katawhan sa duta. Ginakilala sang mga gulang—kag naton man tanan—nga “ang gahom nga labaw sa kinaandan mangin iya sang Dios kag indi gikan sa [aton] kaugalingon.” (2 Corinto 4:7) Gani, magpasalamat gid kita kay Jehova sa iya ginahimo paagi sa aton matutom nga mga manugtatap, kag dapat magkooperar gid kita sa ila.

18. Paagi sa pagpasakop sa aton mga manugtatap, ano, sa pagkamatuod, ang ginahimo naton?

¹⁸ Ginahimo gid sang mga manugtatap ang ila bug-os nga masarangan agod nagakabagay sila sa paglaragway ni Jehova sa mga manugbantay nga iya gintangdo sa pagtatap sa iya panong sa katapusan nga mga adlaw, subong sang mabasa sa Jeremias 3:15: “Hatagan ko kamo sing mga manugpahalab suno sa akon tagipusuon, nga magapahalab sa inyo sing ihibalo kag paghangop.” Pat-od nga ginahimo gid sang mga gulang ang ila katungdanan nga tudluan kag amligan ang mga karnero ni Jehova. Kabay nga padayon naton pabaloran ang ila pagpangabudlay sing lakas paagi sa aton kinabubut-on nga pagkooperar, pagkamatinumanon, kag pagkamapinasakupon. Sa paghimo sini, mapakita naton ang aton apresasyon sa aton langitnon nga mga Manugbantay, si Jehova nga Dios kag si Jesucristo.

Bilang Pagrepaso

• Paano ginpamatud-an ni Jehova kag ni Jesucristo nga sila mahigugmaon nga mga Manugbantay?

• Magluwas sa pagkamatinumanon, ngaa kinahanglan ang pagkamapinasakupon?

• Sa anong praktikal nga mga pamaagi mapakita naton ang aton pagkamapinasakupon?

[Mga Pamangkot sa Pagtinuon]

[Piktyur sa pahina 27]

Ang Cristianong mga gulang nagapasakop sa pagpanguna ni Cristo

[Mga piktyur sa pahina 29]

Mapakita naton ang aton pagpasakop sa gintangdo ni Jehova nga mga manugbantay sa madamo nga paagi