Ang Handum ni Adryana

SI Adryana, ang seis-anyos nga bata nga babayi nga taga-Tulsa, Oklahoma, E.U.A., may handum gid. Kaangay ini sa handum sang salmista nga si David, nga nag-amba: “Isa ka butang ang ginapangayo ko kay Jehova—ini ang pangitaon ko, nga makapuyo ako sa balay ni Jehova sa tanan nga adlaw sang akon kabuhi, agod makita ang pagkamakahalamuot ni Jehova kag magtulok nga may apresasyon sa iya templo.”—Salmo 27:4.

Sang anom ka bulan pa lang si Adryana, nasayasat nga may yara sia delikado gid nga tumor. Bangod sining makamamatay nga balatian naparalisar ang iya duha ka tiil. Pila ka beses nga gin-operahan sia sang mga doktor kag gin-chemotherapy sia sing mga isa ka tuig.

Ang amay ni Adryana, nga lain sing relihion kay Adryana kag sa iya iloy, nakig-angot sa isa ka organisasyon agod magpangabay nga kuntani makakadto ang iya bata sa isa ka amusement park nga bantog sa bug-os nga kalibutan. Antes ihatag ini nga pangabay, gin-interbyu anay sang organisasyon si Adryana. Ginpasalamatan niya ang ila tanyag apang nagsiling sia nga mas luyag niya nga makakadto sa Bethel, ang sentro sang bug-os kalibutan nga hilikuton sang mga Saksi ni Jehova sa New York. Sang nahibaluan niya ang tuhoy sa pangabay sang iya amay, nagpangamuyo si Adryana kay Jehova nga hatagan sia sing kahigayunan nga makakadto sa Bethel. Bisan pa nga sang primero, nagaduhaduha ang organisasyon nga basi indi man manamian si Adryana sa Bethel, nagpasugot ang organisasyon sa luyag ni Adryana sang wala mamatok ang iya amay.

Upod sa iya iloy, magulang nga babayi, kag amiga, nagkadto si Adryana sa New York agod magduaw sa Bethel sa una nga tion. “Ginsabat ako ni Jehova,” siling ni Adryana. “Nahibaluan ko nga abiabihon niya kita sa Bethel. Nakita ko kon paano ginahimo ang mga libro, magasin, kag Biblia. Mas maayo ini sangsa amusement park.”

‘Nakita ni Adryana ang pagkamakahalamuot ni Jehova’ kag nagatulok sia nga may apresasyon sa pagpanghikot sang sentro sang mga hilikuton sang katawhan ni Jehova karon. Ginaagda ka man nga magduaw sa Bethel. Magluwas sa ulong talatapan sang mga Saksi ni Jehova sa New York, may yara pa mga sanga talatapan sa nanuhaytuhay nga bahin sang kalibutan.