Ang Mapintas nga Kalibutan Karon

SI María 64 anyos kag solo lang nga nagakabuhi. Nasapwan sia nga patay na sa iya puluy-an, hanog ang kalawasan kag ginkuga paagi sa kable.

Ginpululihan sang akig nga mga tawo ang tatlo ka pulis, bangod ginkidnap kuno sini nga mga pulis ang duha ka menor-de-edad nga bata. Ginbubuan sining akig nga mga tawo sing gasolina ang duha ka pulis kag ginsindutan, amo nga nasunog sila. Nakapalagyo ang ikatlo nga pulis.

Bangod sang isa ka tawag sa telepono sang wala magpakilala nga tawo isa ka makakulugmat nga insidente ang natukiban. Nakutkutan sa isa ka hardin ang bangkay sang apat ka lalaki nga nagbakasyon sa sini nga lugar. May tabon ang ila mga mata, kag nagapos ang ila mga kamot. Sang gin-usisa ang ila bangkay, napamatud-an nga ginlubong sila nga buhi.

Ini nga mga kapintas indi bahin sang mapintas kag masingki nga kalahadlukan nga mga pelikula. Ini nga mga balita matuod tanan nga natabo kag nangin ulong-dinalan wala pa lang madugay sa isa ka pungsod sa Latin-Amerika. Apang, indi lamang ini nga pungsod ang subong sini sa kalibutan karon.

Kinaandan na karon ang mapintas nga mga buhat. Ang mga pagpamomba, mga pag-atake sang mga terorista, mga pagpatay, mga pagsalakay, mga pagpangluthang, kag mga paglugos pila lamang sa sini nga sahi sang mga insidente. Pirme ginapakita sa mga balita ang maathag nga detalye sang mga kapintas, kag madamo nga tawo ang wala na ginakibang kon makakita ukon makabati sini nga sahi sang kapintas.

Ayhan nagapalibog ka gid: ‘Ngaa amo na sini ang nagakatabo sa kalibutan karon? Wala na gid bala sing patugsiling kag respeto sa kabuhi sang iban?’ Ngaa subong sini ang kalibutan nga ginapuy-an naton karon?

Apang, binagbinaga ang 69 anyos nga si Harry nga may kanser. May balatian man ang iya asawa, apang ginabuligan sila sang ila mga kaingod kag mga abyan. “Ambot kon ano na lang ang himuon namon kon wala ining tanan nga tawo nga nagabulig sa amon,” siling ni Harry. Sa Canada, nga iya ginapuy-an, ginapakita sang pag-usisa nga kapin sa 50 porsiento sang mga manug-atipan sa mga tigulang ang nagabulig sa iban nga tawo nga indi nila paryente. Walay duhaduha nga may kilala ka nga ordinaryo nga mga tawo nga maluluy-on kag mabinuligon. Huo, may ikasarang ang tawo sa pagpakita sing kaluoy kag kaayo sa baylo sang kapintas.

Ti, ngaa nagakatabo ang mga pagpamintas? Ngaa nagapamintas ang mga tawo? Mabag-o pa ayhan ang mapintas nga mga tawo? Madula pa ayhan ang kapintas? Kon huo, paano kag san-o pa?

[Credit Line sang piktyur sa pahina 3]

Train: CORDON PRESS