Kaumhan nga ‘Maputi Na Agod Anihon’

Ang Guajira Peninsula nahamtang sa punta sang naaminhan nga bahin sang Bagatnan nga Amerika. Yara ini sa naaminhan sang Colombia kag sa naaminhan-nakatundan sang Venezuela. Ang nagatagiti nga init kag limitado lamang nga ulan amo ang problema sining daw desyerto nga duog, diin ang temperatura nagalab-ot sa 43 digri Celsius. Walay sapayan sini nga klima, ang mga tawo diri masako kag mapatubason nga mga mangunguma. Ang dalayon nga huyop sang hangin gikan sa dagat kag ang hangin nga amihan nagahatag sing kasulhay sa kabuhi, kag nagaganyat sa mga bisita agod makita ang matahom nga mga danyag kag mga baybayon.

GINAABIABI kamo sa lugar sang mga Wayuu Indian. Mga 305,000 ang mga Wayuu, kag 135,000 sa ila ang nagapuyo sa Colombia. Ini nga tribo madugay na nga nagapuyo diri antes mag-abot ang mga Espanyol.

Ang panguna nga palangitan-an sang mga Wayuu amo ang pagsagod sing sapat kag pagpanguma. Nagapangisda man sila kag nagabulante. Sampaton ang mga babayi sa paghimo sing hinabol nga mga tela nga may masili nga mga duag, kag naluyagan gid sang mga turista ang ila mga produkto.

Kilala ang mga Wayuu nga sinsero kag maabiabihon. Apang, nagakabuhi man sila sa “makahalanguyos nga mga tion nga mabudlay atubangon.” (2 Timoteo 3:1) Ang kaimulon isa sang ila pinakadaku nga problema nga nangin kabangdanan sang iban pa nga mga problema subong sang iliterasya, mga bata nga kulang sing masustansia nga pagkaon, kulang nga mga doktor kag mga bulong kag, sa iban nga mga duog, paghimo sing krimen sang mga pamatan-on.

Sa sulod sang madamo nga tinuig, nagpadala ang mga relihion sang Cristiandad sing mga misyonero agod magpuyo sa tunga sang mga Wayuu. Amo kon ngaa, nangin kontrolado sang simbahan ang kalabanan nga eskwelahan para sa paghanas sa mga manunudlo kag ang mga dalayunan sang mga estudyante. Madamo nga Wayuu ang nagbaton sang ginatawag nga Cristiano nga mga kustombre, subong sang pagsimba sa mga imahen kag pagpabunyag sa mga lapsag, apang wala nila ginbiyaan ang mga pagtuluuhan kag mga rito nga naghalin sa tradisyonal nga mitolohiya kag mga disparatis.

Sa kabilugan, mahinadlukon sa Dios ang mga Wayuu, kag naluyagan nila ang mga kamatuoran sang Biblia nga ginatudlo sang mga Saksi ni Jehova. Sang mga katuigan 1980, pito lamang ang Wayuu nga mga Saksi sa Guajira, ang tatlo sa ila nagapuyo sa Ríohacha, ang kapital. Magluwas sa tumandok nga mga Saksi, 20 pa ka manugbantala ang nagabantala didto sing maayong balita sang Ginharian sa Espanyol nga hambal.

Mensahe sa Ila Mismo Hambal

Ang kalabanan nga mga Wayuu nga nagapuyo sa Ríohacha nagahambal sing diutay nga Espanyol magluwas sa ila tumandok nga hambal nga Wayuunaiki. Sang primero, indi tanto ka madinalag-on ang pagbantala sang mensahe sang Ginharian didto. Daw ginalikawan sang mga tumandok ang mga arijunas nga amo ang pagtawag nila sa mga tawo nga indi Wayuu. Kon magduaw gani ang mga Saksi sa ila puluy-an, ang kalabanan nga Wayuu nagasabat sa ila hambal, indi sa Espanyol. Amo nga nagasaylo na lang ang mga Saksi sa madason nga balay.

 Apang, sang nagahingapos ang tuig 1994, nagpadala ang sanga talatapan sang mga Saksi ni Jehova sing isa ka grupo sang mga espesyal payunir, ukon bug-os tion nga mga manunudlo sing Biblia, agod mag-alagad sa Kongregasyon sang Ríohacha. Nagpatudlo ang mga payunir sa isa ka Wayuu nga Saksi sa paghambal sing Wayuunaiki. Sang makasaulo na sila sing simple lamang nga presentasyon, naggua sa latagon ining mga ministro kag natalupangdan nila gilayon ang daku nga pagbag-o sa reaksion sang mga tawo. Bisan pa indi talunsay ang paghambal sini nga mga manunudlo sang Biblia sing Wayuunaiki, nakibot gid ang mga tagbalay kag namati sila, kon kaisa nagapakighambal pa gani sila nga ginagamit ang ila limitado nga Espanyol!

‘Maputi Na Agod Anihon’

Ginpaanggid ni apostol Pablo ang paghimo sing disipulo nga hilikuton sang mga Cristiano sa pagpanguma, isa ka paanggid nga nahangpan gid sang mga mangunguma nga Wayuu. (1 Corinto 3:5-9) Sa malaragwayon nga kahulugan, matuod gid nga ang kaumhan sang mga Wayuu ‘maputi na agod anihon.’—Juan 4:35.

Si Neil, isa ka Wayuu Indian nga nagapuyo sa Manaure, natawo nga may diperensia sa lawas. Ginbasol ni Neil ang Dios sa iya kahimtangan kag daku gid ang iya kasubo amo nga diutayan na lang sia maghikog. Ang isa ka Saksi nga nagkalit sa pagbantala sa kabalayan samtang nagabiyahe sia sa lainlain nga banwa bangod sang iya trabaho nakighambal kay Neil tuhoy sa Ginharian ni Jehova. Katorse anyos lang sadto si Neil. Sang masat-uman sang Saksi nga interesado si Neil, ginsugdan niya ang pagtuon sa Biblia upod sa iya. Nalipay si Neil nga matun-an ang tuhoy sa mahigugmaon nga personalidad ni Jehova, amo nga naghinakop sia nga indi ang Dios ang kabangdanan sang iya pag-antos. Natandog gid sia sang mabasa niya ang tuhoy sa ginasaad sang Dios nga isa ka dutan-on nga paraiso, diin wala na sing balatian!—Isaias 33:24; Mateo 6:9, 10.

Sadto nga tion, indi maayo ang relasyon sang pamilya ni Neil sa isa pa ka pamilya. Agod masigurado nga maproteksionan sila, naghimo ang mga paryente ni Neil sing pila ka ritwal sang ila tribo. Naghinumdom si Neil: “Sang primero, nahadlok ako makighambal sa akon pamilya tuhoy sa akon bag-o nga pagtuluuhan, ilabi na sa mga ulo sang pamilya, nga ginatahod gid.” Naakig ang mga ginikanan ni Neil sang mahibaluan nila nga indi sia magsunod sa pagtuluuhan nga wala sa Biblia ukon sa paghimo sing espiritistiko nga mga kustombre. Gani, nagsaylo si Neil sa Ríohacha kag nagsugod sa pagpakig-upod sa kongregasyon didto. Nabawtismuhan sia sang ulihi. Sang 1993, gintangdo sia subong isa ka ministeryal nga alagad, kag pagligad pa sang tatlo ka tuig nagregular payunir sia. Nian sang 1997 gintangdo sia subong isa ka gulang sa kongregasyon. Sang tuig 2000, ginpasangkad niya ang iya ministeryo kag nangin espesyal payunir.

Binagbinaga man ang kaso ni Teresa, isa ka Wayuu nga tumandok nga nagsugod sa pagtuon sa Biblia upod sa mga Saksi. Ginayaguta sia ni Daniel nga iya ginapuyopuyo kag ginasakit sia kag ang ila tatlo ka kabataan. Bisan pa nagsugot si Daniel sang ulihi nga magtuon sa Biblia upod kay Teresa, masami gihapon sia nga nagapahubog upod sa iya mga abyan, kon kaisa sa sulod sang apat ukon lima ka adlaw. Bangod sini, pigado gid ang iya pamilya. Nagpadayon si Teresa sa pagtuon kag sa pagtambong sa Cristiano nga mga miting. Nakabulig ini kay Daniel agod makita niya ang importansia sang pagtuon sa Biblia. Nian, aksidente nga nahulog ang isa sa ila kabataan sa nagaindakal nga tubig kag napatay bangod sang grabe nga mga  paso. Luwas sa daku nga kasubo bangod namatyan sing anak nga lalaki, dapat atubangon ni Teresa ang mga pag-ipit sang mga abyan kag mga kasilingan nga sundon ang mga kustombre sa lubong nga wala nagahisanto sa Biblia.

Sa sulod sining mabudlay nga tion, nakabaton ini nga mag-asawa sing makapalig-on nga bulig kag lugpay gikan sa mga katapo sang kaiping nga mga kongregasyon. Pagkatapos sang lubong, nalugpayan sila sang padayon nga pagduaw sang mga kauturan gikan sa lokal nga kongregasyon nga nagagamit sing Wayuu nga hambal. Sang makita ni Daniel ang gugma nga ginpakita sang mga katapo sang mga kongregasyon, napahulag sia nga mag-uswag sa espirituwal. Gin-untatan niya ang pagpahubog kag pagsakit kay Teresa. Nagpakasal si Daniel kag si Teresa, kag nagpangabudlay si Daniel sing lakas agod masakdag ang iya pamilya. Nag-uswag sila sa espirituwal kag nabawtismuhan sang 2003. Pareho sila nga nagadumala sing mga pagtuon sa Biblia. Bangod sa ekselente nga pagpanaksi ni Teresa sa iya pamilya, nagapamati na karon ang iya mga paryente kon magduaw ang mga Saksi sa ila. Ang isa sa mga hinablos nga lalaki ni Daniel isa na ka di-bawtismado nga manugbantala, kag duha sa iya mga hinablos nga babayi ang nagatuon sing Biblia kag nagatambong sa mga miting sang kongregasyon. Ang bayaw nga babayi ni Teresa, nga namatyan man sing anak nga lalaki sa isa ka aksidente, kag ang iya pamilya nagpakita sing interes sa pagtuon sing Biblia.

Espirituwal nga Pagkaon sa Wayuunaiki

Sang 1998 ang pulyeto nga Agoma ang Kabuhi sa Duta Sing Dayon! * ginpagua sa Wayuunaiki. Nangin isa ini ka mapuslanon nga kasangkapan para sa pagpalambo sa Wayuu nga kaumhan kag sa pagdumala sing mga pagtuon sa Biblia sa puluy-an. Ginhimo ang mga kahimusan sang 2003 nga hanason ang pila ka kauturan nga lalaki agod badbaron ang mga publikasyon sang mga Saksi ni Jehova sa Wayuunaiki. Bangod sa lakas nga pagpangabudlay sang isa ka grupo sang mga manugbadbad sa Ríohacha, dugang pa nga mga brosyur ang nabadbad, amo nga nag-uswag pa sa espirituwal ang nagahambal sing Wayuunaiki nga mga disipulo.

Halin sang 2001, ang iban nga mga bahin sa programa sang distrito nga kombension ginabadbad sa Wayuunaiki. Madali mapahulag sa espirituwal ang mga estudyante sa Biblia kon mabatian nila ang programa sa ila mismo hambal. Ginapaabot man nila ang adlaw nga ipresentar ang pasad sa Biblia nga drama sa Wayuunaiki nga hambal.

Nagalambo nga Kaumhan

Ang Uribia isa ka banwa nga nahamtang mga 100 kilometros sa naaminhan-nasidlangan sang Ríohacha. Ang Kongregasyon sang Wayuu sa Uribia may 16 ka manugbantala sang Ginharian, ang madamo sa ila nagapasangkad sang ila panikasog nga mabantalaan ang mga Indian nga nagapuyo sa uma. Amo sini ang ginsiling sang isa sa mga gulang sang kongregasyon tuhoy sa isa sini nga paglakbay agod magpanaksi: “Ginduaw namon sa isa ka ransuhan ang mga isa ka dosena nga balay nga may manubo nga mga atop kag magagmay nga mga bintana. Sa atubang sang tagsa ka balay may isa ka matapan nga atop nga human sa yotojolo, ang matig-a nga unod sang kaktus. Nagahatag ini sing proteksion sa pamilya kag sa mga bisita gikan sa nagatagiti nga init sang adlaw. Nalipay kami nga madamo ang nagpakita sing daku nga interes, amo nga naghimo kami sing kahimusan nga magduaw liwat kag sugdan ang mga pagtuon sa Biblia. Pagbalik namon, natalupangdan namon nga madamo ang indi makahibalo magbasa. Ginsugiran nila kami nga may eskwelahan sadto sa ila lugar apang nagsira ini bangod kulang sing inuggastos. Gintugutan kami sang tawo nga nagabantay nga gamiton ang isa sa mga hulot-klasehan agod hiwatan sing klase para tudluan ang mga interesado sa pagbasa kag sa pagsulat kag magdumala sing mga pagtuon sa Biblia. Anom ka Wayuu ang nakatuon sa pagbasa kag pagsulat kag nagauswag sila sa ila pagtuon sa Biblia. Natandog kami sa apresasyon nga ginpakita nila, gani nagaplano kami nga maghiwat sing mga miting sa ransuhan.”

May pila ka indi tumandok nga mga Saksi nga nakatuon sa paghambal sing Wayuunaiki, kag ginaapresyar gid ang ila bulig. Sa Guajira Peninsula, walo ka kongregasyon kag duha ka grupo ang nagagamit karon sini nga hambal.

Dayag gid ang pagpakamaayo ni Jehova sa sini nga mga panikasog. Walay duhaduha nga kapin pa ang matigayon sa pagbantala sing maayong balita sa mga Wayuu. Maayo ang ginapaabot nga mangin resulta, bangod nangin Cristiano nga mga disipulo ang mga mahunahunaon sang ila espirituwal nga kinahanglanon. Kabay nga magpadala si Jehova sing dugang pa nga mga ministro agod palambuon ini nga kaumhan, nga ‘maputi na agod anihon.’—Mateo 9:37, 38.

[Footnote]

[Mga mapa sa pahina 16]

(Para sa aktual nga pormat, tan-awa ang publikasyon)

VENEZUELA

COLOMBIA

LA GUAJIRA

Manaure

Ríohacha

Uribia

[Credit Line sang piktyur sa pahina 16]

Wayuu camp below: Victor Englebert