May Sablag​—Apang Nagaalagad

KON makita mo si Leonardo sa una nga tion, ayhan indi ka gid maghunahuna nga nagatrabaho sia sa isa ka konstruksion. Wala sia sing kamot, kay nautod ini sang maaksidente sia anay sa trabaho. Apang, bisan may kasablagan sia, si Leonardo mapisan nga nagapangabudlay sa isa ka konstruksion sa Acajutla, El Salvador, subong sang makita mo sa laragway.

Agod makapakigbahin sa sina nga konstruksion, naghimo si Leonardo sang iya kaugalingon nga gamit. Ginagulo niya ang iya tuo nga butkon sa tipulon nga metal nga naangot sa puno sang pala kag sagad nga ginagamit ini sa paghakop sang duta pakadto sa wheelbarrow. Sa baylo sang ordinaryo nga uluyatan sang wheelbarrow, naghimo sia sing tipulon nga metal nga maguluan niya sang iya butkon agod matulod niya ang wheelbarrow. Ano ang nagtiklod sa iya nga makigbahin sa sini nga proyekto?

Luyag ni Leonardo nga makigbahin sa pagpatindog sing Kingdom Hall, ukon duog sang pagsimba para sa lokal nga kongregasyon sang mga Saksi ni Jehova. Madamo sia sing rason nga indi makapakigbahin sa hilikuton nga pagpatindog. May sekular nga trabaho sia, may kasablagan, kag ministeryal nga alagad pa sa ila kongregasyon. Apang, luyag niya nga himuon ang iya masarangan agod maalagad ang Dios bisan sa duog sang konstruksion.

Kaangay man bala sini ang imo panimuot sa pag-alagad sa Dios? Sa baylo nga himuon nga rason ang iya kasablagan agod indi makapakigbahin, gingamit ni Leonardo ang iya kaalam agod maghimo sang iya kaugalingon nga gamit agod nga mahimo niya ang hilikuton nga daw imposible nga mahimo niya. Ginaalagad niya ang Dios sa ‘iya bug-os nga hunahuna.’ (Mateo 22:37) May kasablagan man ukon wala, ang mga manugpangabudlay nga nagapakigbahin sa pagpatindog sing mga Kingdom Hall sang mga Saksi ni Jehova sa bug-os nga kalibutan may espiritu sang pagboluntaryo. Ang ila mga miting bukas sa publiko, kag ginaagda ka nga magtambong.