Mas Importante pa Sangsa Paniempo

ANG halos tanan nga pungsod may mga hulubaton tuhoy sa paniempo: Langit nga mapula kon gab-i, kalipay sang mga marinero; langit nga mapula kon aga, paandam sa mga marinero. Ginapaathag sang mga meteorologo sa karon kon ngaa ang paniempo mahimo nga kaangay sa ginasiling sang hulubaton.

Sang panahon man ni Jesus, naandan na sang mga tawo nga magtangla sa langit kag hangpon kon ano ang buot silingon sang dagway sini. Si Jesus nagsiling sa pila ka Judiyo: “Kon magsirom naanad na kamo sa pagsiling, ‘Mangin maayo ang tiempo, kay pula ang langit’; kag kon aga, ‘Mangin matugnaw kag maulan ang tiempo karon nga adlaw, kay pula ang langit, apang magal-um.’ Makahibalo kamo maghangop sa dagway sang langit, apang . . . ” Apang ano? Ginpadayon ni Jesus ang iya talalupangdon nga pinamulong: “Indi kamo makahangop sa mga tanda sang mga tion.”—Mateo 16:2, 3.

Ano ining “mga tanda sang mga tion”? Amo ini ang maathag nga mga tanda nga si Jesus ang matuod nga Mesias nga ginpadala sang Dios. Ang iya mga binuhatan makilala sing maathag subong sang kapula sang langit. Apang, wala ginsapak sang kalabanan nga Judiyo ang mga tanda nga nagapakita nga nag-abot na ang Mesias—isa ka hitabo nga nagadala sing pagbag-o nga mas importante pa sangsa paniempo.

Sa karon man, may tanda nga mas importante pa sangsa paghangop sa duag sang literal nga langit. Gintagna ni Jesus nga ining malauton nga kalibutan malapit na laglagon agod buslan sang mas maayo nga kalibutan. Ginsambit niya ang madamo nga mga hitabo nga magapakita kon malapit na ini nga pagbag-o. Lakip sa sini ang bug-os kalibutan nga mga inaway kag tiggulutom. Nagsiling si Jesus nga kon makita na ini nga mga butang, malapit na ang pagpasilabot sang Dios.—Mateo 24:3-21.

Nahangpan mo bala “ang mga tanda sang mga tion”?