Mga Pamatan-on​—Apektado sang Inyo Ginahimo ang Inyo mga Ginikanan

“WALA na ako sing daku pa nga rason sa pagpasalamat sangsa sining mga butang, nga mabatian nga ang akon mga anak padayon nga nagalakat sa kamatuoran,” sulat sang tigulang na nga si apostol Juan. (3 Juan 4) Bisan pa nga ang mga anak nga ginsambit sa sini nga bersikulo nagapatuhoy sa Cristianong mga disipulo, madali mahangpan sang isa ka mahinadlukon sa Dios nga ginikanan ining balatyagon nga ginpautwas ni Juan. Subong nga ang mga ginikanan may daku nga epekto sa kabuhi sang ila kabataan, ang mga anak may daku man nga epekto sa kabuhi sang ila mga ginikanan.

Nahibaluan ni Hari Solomon sang Israel kon daw ano ang epekto sang mga anak sa ila mga ginikanan. Nagsulat sia: “Ang anak nga maalam amo ang isa nga nagapasadya sa amay, kag ang anak nga buangbuang kalisod sang iya iloy.” (Hulubaton 10:1) Busa, dapat binagbinagon sang tanan nga kabataan—bisan sang mga dalagku na—kon paano maapektuhan ang ila amay kag iloy sang ila mga ginahimo. Ngaa nagakaigo ini?

Hunahunaa lamang ang tanan nga pag-atipan nga ginhimo sang imo mahinadlukon sa Dios nga mga ginikanan sa pagpadaku sa imo! Ginakabalak-an kag ginapangamuyo ka na nila bisan wala ka pa natawo. Sang matawo ka na, ginpalangga ka sang imo mga ginikanan kag mahimo nga ginpasalamatan gid nila ang Dios bangod sa makalilipay—apang serioso—nga pribilehiyo kag responsibilidad sang pagkaginikanan. May alatipanon na sila karon nga isa ka lapsag, kag subong mga sumilimba ni Jehova, gin-atipan ka nila sing maayo gid.

Bangod matuod nga mga Cristiano ang imo mga ginikanan, nagkuha sila sing masaligan nga panuytoy gikan sa Biblia kag pasad sa Biblia nga mga literatura, kag nangayo man sila sing laygay sa mga nakapadaku na sing mga anak. Padayon man nila nga ginapangamuyo sa Dios ang ila mga kabalaka. (Hukom 13:8) Samtang nagadaku ka, nahibaluan sang imo mga ginikanan ang imo maayo nga mga kinaiya, apang nahibaluan man nila ang imo mga kakulangan. (Job 1:5) Sang pamatan-on ka na, nag-utwas ang bag-o nga mga problema. May mga tion nga ayhan daw nagarebelde ka, kag ang imo mga ginikanan labi pa gid nga nagapangamuyo, nagabasa, kag nagahunahuna kon paano ka buligan nga makapadayon sa pagsimba sa imo langitnon nga Amay nga si Jehova.

Ang imo amay kag iloy wala nag-untat sa ila pagkaginikanan. Padayon ang ila kabalaka sa imo pisikal, mental, emosyonal, kag espirituwal nga kaayuhan bisan pa nga daku ka na. Apang, sugod  sang gamay ka tubtob karon nga daku ka na, nahibaluan sang imo mga ginikanan nga may kahilwayan ka sa pagbuot kag indi pat-od kon ano ang imo madangatan. Sa ulihi, ikaw ang magadesisyon kon ano nga dalanon ang imo sundon.

Indi bala nga kon ‘wala na sing daku pa nga rason sa pagpasalamat’ ang mga ginikanan sangsa mabatian nga ang ila mga anak “padayon nga nagalakat sa kamatuoran,” ang kabaliskaran sini matuod man? Maathag nga ang mga anak nga nagahimo sing kabuangan nagapasubo sa ila mga ginikanan. Si Solomon nagsiling: “Ang anak nga buangbuang kalisod sa iya amay, kag kapaitan sa nag-anak sa iya.” (Hulubaton 17:25) Daku gid nga kasubo sa mga ginikanan kon talikdan sang isa ka anak ang pagsimba sa matuod nga Dios!

Maathag nga may daku ka nga impluwensia sa imo pamilya kag sa iban. Ang imo paggawi may daku nga epekto sa imo mga ginikanan. Kon sikwayon mo ang Dios kag ang iya mga prinsipio, masakitan gid ang imo mga ginikanan. Apang, matuod man ang kabaliskaran sini. Kon magpabilin ka nga matutom kag matinumanon kay Jehova, magakalipay ang imo mga ginikanan. Mangin determinado nga pahalipayon ang imo mga ginikanan! May mas hamili pa bala nga regalo nga mahatag mo sa mga nagapadaku, nagaamlig kag nagapalangga sa imo?