“Ginuo, Ngaa Naghipos Ka Lang?”

AMO ini ang ginsiling ni Papa Benedict XVI sang nagduaw sia sa anay kampo konsentrasyon sa Auschwitz, Poland, sang Mayo 28, 2006. Sa duog diin ginpatay sang mga Nazi ang ginatos ka libo nga mga Judiyo kag iban pa, nagsiling pa sia: “Kadamo gid sang mga pamangkot sa sini nga duog! Ang masami nga pamangkot amo: Diin ang Dios sadto nga tion? Ngaa naghipos lang sia? Ngaa gintugutan niya ining walay untat nga pagpamatay, ining pagdaug sang kalautan? . . . Dapat padayon kita nga magtuaw sing mapainubuson apang sing pursigido sa Dios: Maghimo ka sing paagi! Indi pagkalimti ang katawhan, ang imo tinuga!”

Lainlain ang reaksion sa pamulongpulong sang papa. Namutikan sang iban nga ginlikawan niya ang pila ka importante nga topiko, subong sang pag-ihig-ihig sa mga Judiyo nga naangot sa mga pagpamintas sa Auschwitz. Ginhangop naman sang iban ang ginsiling niya subong isa ka paagi agod kapankapanon ang pagpangayo ni Papa John Paul II sing pasaylo sa mga sala nga ginhimo sang simbahan. Si Filippo Gentiloni, isa ka Katoliko nga dyurnalista, nagsiling: “Apang, rasonable gid nga sa baylo nga sabton sang madamo nga komentarista ang mabudlay nga pamangkot tuhoy sa kon diin sadto ang Dios—ang pamangkot nga wala sing sabat—mas luyag nila sabton ang mahapos nga pamangkot: Diin sadto si Pius XII?” Ginapatuhuyan sang mga komentarista ang paghipos ni Papa Pius XII sang natabo ang Holocaust.

Ang Holocaust kag ang tanan iban pa nga mga buhat sang pagpapas sa isa ka rasa nga ginhimo sa bug-os nga maragtas sang tawo nagapamatuod nga “gingamhan sang tawo ang tawo sa iya kasamaran.” (Manugwali 8:9) Dugang pa, ang Manunuga sang tawo wala maghipos sa sining tuman ka makakulugmat nga hitabo. Ginasugid niya sa Biblia kon ngaa gintugutan niya ang kalautan. Ginpasalig man kita sang Dios nga wala niya malimtan ang katawhan. Sa katunayan, malapit na matapos ang tion nga gintugot sang Dios nga gamhan sang tawo ang iya kaugalingon. (Jeremias 10:23) Luyag mo bala mahibaluan pa gid kon ano ang katuyuan sang Dios para sa aton? Ang mga Saksi ni Jehova malipay gid sa pagbulig sa imo nga mahibaluan ang sabat sang Biblia sa mga pamangkot nga nagpalibog kay Papa Benedict XVI.

[Credit Line sang piktyur sa pahina 32]

Oświęcim Museum