Kon Ngaa Malapit na Madula ang Tanan nga Pag-antos
Kon Ngaa Malapit na Madula ang Tanan nga Pag-antos
“Ang Igang, himpit ang iya binuhatan.”—DEUTERONOMIO 32:4.
1, 2. (a) Ngaa ginapakabahandi mo ang paglaum nga mabuhi sing dayon? (b) Ngaa indi magpati ang madamo nga may Dios nga nagsaad sing makalilipay nga palaabuton?
NALIPAY ka bala sa paghanduraw sang kabuhi sa Paraiso? Ayhan ginahanduraw mo nga nagalagulad ka sa sining dalayawon nga planeta kag nagatuon tuhoy sa madamo gid nga sahi sang buhi nga butang. Ukon ayhan ginahanduraw mo nga nalipay ka gid samtang nagapangabudlay ka upod sa iban sa pagtatap sang duta kag nagabulig sa paghimo sini nga isa ka tugob-globo nga parke. Ukon ayhan ginahanduraw mo ang mga ikasarang nga mahimo mo mapalambo sa patag sang taliambong, arkitektura, musika, ukon iban pa nga butang nga indi mo matigayon bangod sa kasakuon sang pagkabuhi karon. Diin man sa sini, ginapakabahandi mo ang paglaum nga ginatawag sang Biblia nga “matuod nga kabuhi”—ang kabuhi nga gintuyo ni Jehova nga maangkon naton sing dayon.—1 Timoteo 6:19.
2 Makalilipay kag hamili gid nga pribilehiyo ang pagsugid sa iban sining pasad sa Biblia nga paglaum, indi bala? Apang, madamo ang indi magpati sa sini nga paglaum. Ginakabig nila ini subong imahinasyon, isa ka damgo para sa madali papatihon nga mga tawo. Indi gid gani sila magpati nga ang Dios nagsaad sang kabuhi nga wala sing katapusan sa Paraiso. Ngaa? Indi magpati ang iban bangod sang masami nga ginatawag nga problema tuhoy sa kalautan. Nagapati sila nga kon may Dios nga labing gamhanan kag mahigugmaon, wala kuntani sing kalautan kag pag-antos sa kalibutan. Imposible nga may nagaluntad nga Dios nga nagapahanugot sang kalautan, pangatarungan nila—ukon kon may yara gid man, indi sia labing gamhanan kag wala sia nagaulikid sa aton. Para sa iban, daw makapakumbinsi ini nga sahi sang pangatarungan. Eksperto gid si Satanas sa pagbulag sang panghunahuna sang tawo.—2 Corinto 4:4.
3. Mabuligan naton ang mga tawo sa pagsabat sa anong mabudlay nga pamangkot, kag ngaa kita lamang ang makahimo sini?
3 Subong mga Saksi ni Jehova, may pinasahi kita nga kahigayunan agod buligan ang mga tawo nga napatalang ni Satanas kag sang kaalam sining kalibutan. (1 Corinto 1:20; 3:19) Nahangpan naton kon ngaa madamo ang indi magpati sa mga saad sang Biblia. Wala nila makilala si Jehova. Mahimo nga wala nila mahibaluan ang iya ngalan ukon ang kahulugan sini, kag mahimo nga halos wala gid sila sing nahibaluan tuhoy sa iya mga kinaiya ukon tuhoy sa iya pagtuman sang iya mga saad. Bulahan kita kay nahibaluan naton ini. Mapuslanon nga usisaon naton sa pulupanag-on kon paano naton mabuligan ang mga tawo nga ‘nadulman sa ila panghunahuna’ nga makasapo sing sabat sa isa sa pinakamabudlay nga pamangkot nga ginapautwas sang mga tawo, “Ngaa ginpahanugutan sang Dios ang kalautan kag ang pag-antos?” (Efeso 4:18) Una, binagbinagon naton kon paano naton sabton sing maayo ini nga pamangkot. Nian hambalan naton kon paano ang mga kinaiya ni Jehova makita sa iya pamaagi sa paglubad sang kalautan.
Nagakaigo nga Pagsabat sa Pamangkot
4, 5. Ano ang aton dapat anay himuon kon may magpamangkot kon ngaa ginapahanugutan sang Dios ang pag-antos? Ipaathag.
4 Kon may mamangkot kon ngaa ginapahanugutan sang Dios ang pag-antos, paano naton sia sabton? Ayhan naanad kita nga ipaathag gilayon ini sing detalyado, sugod sa natabo anay sa hardin sang Eden. Sa pila ka kahimtangan, ayhan nagakaigo ini. Apang, dapat kita maghalong. Mahimo nga kinahanglan anay nga himuon naton ang pila ka importante nga mga tikang antes kita magsabat. (Hulubaton 25:11; Colosas 4:6) Binagbinagon anay naton ang tatlo ka punto kon paano naton sia mabuligan antes naton sabton ang iya pamangkot.
5 Una, kon nabalaka gid ang isa ka tawo sa paglapnag sang kalautan sa kalibutan, mahimo gid nga apektado sia kag ang iya mga hinigugma sa sini. Ayhan maalamon nga ipabatyag sa iya nga nahangpan mo sia. Ginlaygayan ni apostol Pablo ang mga Cristiano: “Maghibi upod sa mga tawo nga nagahibi.” (Roma 12:15) Ang pagpakita sing kahanuklog, ukon “simpatiya,” mahimo makatandog sa tawo. (1 Pedro 3:8) Kon mabatyagan niya nga nagaulikid kita sa iya, magapamati gid sia sa aton.
6, 7. Ngaa dapat naton hatagan sing komendasyon ang tawo nga nagapautwas sing isa ka makalilibog nga pamangkot?
6 Ikaduha, mahimo naton hatagan sing komendasyon ang sinsero nga tawo sa iya pagpamangkot. Abi sang iban wala na sila sing pagtuo ukon pagtahod sa Dios bangod nagapamangkot sila sini. Ayhan basi amo sini ang ginsiling sa ila sang isa ka klero. Apang, indi ini matuod. Kay man, ang matutom nga mga tawo sang panahon sang Biblia nagpautwas man sini nga pamangkot. Halimbawa, ang salmista nga si David nagpamangkot: “Ngaa bala nga malayo ka, O Jehova? Ngaa bala nagapanago ka sa mga tion sang kagamo?” (Salmo 10:1) Sing kaanggid si manalagna Habacuc nagpamangkot: “Tubtob san-o, O Jehova, magapangayo ako sing bulig, kag indi ka magpamati? Tubtob san-o ako magapangayo sa imo sing bulig gikan sa kasingki, kag indi ka magaluwas? Ngaa ginapakita mo sa akon ang makasakit sa buot, kag ginatulok mo lang ang kagamo? Kag ngaa ang pagpang-ati kag kasingki yara sa atubangan ko, kag ngaa may pag-ilinaway, kag ngaa may pagpinuyas?”—Habacuc 1:2, 3.
7 Matutom sila nga mga tawo nga may tudok nga pagtahod sa Dios. Ginsabdong bala sila bangod ginpautwas nila ining makalilibog nga mga pamangkot? Wala, kay ginpasulat pa gani ni Jehova ang ila sinsero nga mga pamangkot sa iya Pulong. Sa karon, ang tawo nga natublag sa pagkalapnag sang kalautan mahimo ginagutom sa espirituwal—nagahingamo sing mga sabat nga Biblia lamang ang makahatag. Dumduma nga gindayaw ni Jesus ang mga ginagutom sa espirituwal, ukon ang mga “mahunahunaon sang ila espirituwal nga kinahanglanon.” (Mateo 5:3) Daku gid nga kadungganan ang pagbulig sa ila nga masapwan ang kalipay nga ginasaad ni Jesus!
8. Ano ang makalilibog nga mga panudlo ang kabangdanan nga nagpati ang mga tawo nga ang Dios amo ang balasulon sa pag-antos, kag paano naton sila buligan?
8 Ikatlo, dapat nga buligan naton ang tawo nga mahangpan nga ang Dios indi amo ang balasulon sa paglapnag sang kalautan sa kalibutan. Madamo nga tawo ang gintudluan nga ang Dios amo ang nagagahom sa kalibutan nga aton ginakabuhian, nga gintalana na nga daan sang Dios ang tanan nga matabo sa aton, kag nga sia may indi matungkad nga mga rason sa pagpahanabo sing kapiutan sa katawhan. Sayop ini nga mga panudlo. Ginapakahuy-an nila ang Dios kag ginpagua nga sia amo ang responsable sa kalautan kag pag-antos sa kalibutan. Gani mahimo gamiton naton ang Pulong sang Dios agod tadlungon ining mga butang. (2 Timoteo 3:16) Indi si Jehova ang nagagahom sa sining malaut nga sistema sang mga butang; kundi si Satanas nga Yawa. (1 Juan 5:19) Wala ni Jehova gintalana nga daan ang matabo sa iya intelihente nga mga tinuga; ginhatagan niya ang tagsa sa ila sing kahilwayan kag kahigayunan nga magpili sing maayo kag malain, sing husto kag sayop. (Deuteronomio 30:19) Kag indi gid si Jehova ang ginhalinan sang kalautan; ginakangil-aran niya ang kalautan kag nagaulikid sia sa mga nagaantos.—Job 34:10; Hulubaton 6:16-19; 1 Pedro 5:7.
9. Ano ang pila ka galamiton nga ginhanda sang “matutom kag mainandamon nga ulipon” agod buligan ang mga tawo nga mahangpan kon ngaa ginapahanugutan ni Jehova nga Dios ang pag-antos?
9 Kon nahimo mo na ining mga butang, mahimo nga luyag na sang imo ginasugilanon nga mahibaluan kon ngaa ginapahanugutan sang Dios nga magpadayon ang pag-antos. Agod buligan ka, “ang matutom kag mainandamon nga ulipon” naghanda sing madamo nga galamiton. (Mateo 24:45-47) Halimbawa, sa “Diosnon nga Pagkamatinumanon” Distrito nga Kombension sang 2005/06, ginpagua ang isa ka tract nga ginatig-uluhan Malapit Na Madula ang Tanan nga Pag-antos! Kon ini nga tract nabadbad sa inyo lenguahe, ngaa indi mangin pamilyar sa mga kaundan sini? Subong man, ang libro nga Ano Gid ang Ginatudlo Sang Biblia?, matigayon na karon sang 157 ka lenguahe, may isa ka kapitulo nga nagabinagbinag sining importante nga pamangkot. Gamita gid sing maayo ini nga mga galamiton. Ginapaathag sini sing maayo paagi sa Kasulatan ang hulusayon tuhoy sa pagkasoberano sa bug-os nga uniberso nga ginbangon sa Eden kag kon ngaa amo sini ang pamaagi ni Jehova sa paglubad sining hulusayon. Dumduma man nga samtang ginabinagbinag ninyo ini nga topiko, ginatudlo mo sa tagpalamati ang labing importante nga ihibalo. Ini amo ang ihibalo tuhoy kay Jehova kag sa iya dalayawon nga mga kinaiya.
Ipadaku ang mga Kinaiya ni Jehova
10. Ngaa nabudlayan sa paghangop ang madamo tuhoy sa pagpahanugot sang Dios sa pag-antos, kag ano nga ihibalo ang makabulig sa ila?
10 Samtang ginabuligan mo ang mga tawo nga mahangpan nila kon ngaa ginpahanugutan ni Jehova ang mga tawo nga maggahom sa idalom sang impluwensia ni Satanas, ipadaku ang dalayawon nga mga kinaiya ni Jehova. Madamo nga tawo ang nakahibalo nga gamhanan ang Dios; nahibaluan nila ini bangod nabatian nila nga ang Dios Labing Gamhanan. Apang, indi nila mahangpan kon ngaa wala niya gingamit ang iya daku nga gahom agod dulaon gilayon ang inhustisya kag pag-antos. Mahimo nga wala nila mahangpi ang iban pa nga mga kinaiya ni Jehova, subong sang pagkabalaan, katarungan, kaalam, kag gugma. Ginapakita ni Jehova ining mga kinaiya sa himpit kag balanse nga paagi. Amo nga ang Biblia nagsiling: “Himpit ang iya binuhatan.” (Deuteronomio 32:4) Paano mo ipadaku ining mga kinaiya samtang ginasabat mo ang mga pamangkot nga pirme ginapautwas may kaangtanan sa sini nga hulusayon? Binagbinagon naton ang pila ka halimbawa.
11, 12. (a) Ngaa ang pagpatawad indi solusyon sang nagpakasala sanday Adan kag Eva? (b) Ngaa indi pagtugutan ni Jehova nga magapadayon ang sala tubtob san-o?
11 Ngaa wala na lang ginpatawad ni Jehova sanday Adan kag Eva? Ang pagpatawad indi amo ang solusyon sa sini nga kahimtangan. Subong himpit nga mga tawo, hungod nga namat-od sanday Adan kag Eva nga sikwayon ang pagkasoberano ni Jehova kag batunon ang panuytoy ni Satanas. Indi makapakibot nga wala maghinulsol ining mga rebelde. Apang, kon mamangkot ang mga tawo kon ngaa wala na lang sila ginpatawad ni Jehova, ayhan mahimo ginahunahuna nila nga kuntani ginpanubo na lang ni Jehova ang iya talaksan kag pabay-an na lang ang sala kag pagrebelde. Ang sabat sa sini naangot sa isa ka importante nga kinaiya ni Jehova—ang iya pagkabalaan.—Exodo 28:36; 39:30.
12 Madamong beses nga ginapatalupangod sang Biblia ang pagkabalaan ni Jehova. Apang, sing makapasubo pila lamang ka tawo sa sining malaut nga kalibutan ang nakahangop sining kinaiya. Si Jehova matinlo, putli, kag wala gid sing sala. (Isaias 6:3; 59:2) Nag-aman na sia sing katumbasan para sa sala agod madula ini. Kon tugutan ni Jehova nga magpabilin ang sala, wala kita sing paglaum sa palaabuton. (Hulubaton 14:12) Sa iya gintalana nga tion, ipasag-uli ni Jehova nga mangin balaan ang tanan nga tinuga. Pat-od gid ini, kay amo ini ang kabubut-on sang Isa nga Balaan.
13, 14. Ngaa wala paglaglaga ni Jehova ang mga rebelde sa Eden?
13 Ngaa wala na lang ginlaglag ni Jehova ang mga rebelde sa Eden kag nagtuga liwat sing tawo? May gahom gid sia sa paghimo sini; sa indi madugay gamiton niya ini nga gahom agod laglagon ang tanan nga malauton. ‘Ngaa,’ mahimo ipamangkot sang iban, ‘wala niya ini ginhimo sang tatlo pa lang ang makasasala sa uniberso? Indi bala nga natapna kuntani ang paglapnag sang sala kag ang tanan nga pag-antos nga nakita naton sa sini nga kalibutan?’ Ngaa wala ini ginhimo ni Jehova? Ang Deuteronomio 32:4 nagasiling: “Ang tanan niya nga dalanon katarungan.” Importante gid kay Jehova ang katarungan. Ang matuod, “si Jehova mahigugmaon sang katarungan.” (Salmo 37:28) Bangod ginahigugma niya ang katarungan, wala ni Jehova ginlaglag ang mga rebelde sa Eden. Ngaa?
14 Ang pagrebelde ni Satanas nagpautwas sing isa ka hangkat tuhoy sa pagkamatarong sang pagkasoberano sang Dios. Suno sa katarungan ni Jehova dapat hatagan sing nagakaigo nga sabat ang hangkat ni Satanas. Kon ginlaglag gilayon ang mga rebelde, nga nagakabagay man kon ginhimo sadto mismo sa ila, indi ini makahatag sing sabat. Ang paglaglag gilayon sa mga rebelde mahimo magpamatuod sa pagkagamhanan ni Jehova, apang indi ang iya gahom ang ginhangkat. Dugang pa, nahambal na ni Jehova ang iya katuyuan para kanday Adan kag Eva. Magapanganak sila kag tugbon nila ang duta, gamhan ini, kag magpakaagalon sa tanan nga tinuga sa duta. (Genesis 1:28) Kon ginlaglag ni Jehova sanday Adan kag Eva, ang iya ginpahayag nga katuyuan tuhoy sa katawhan mangin wala sing pulos. Ang katarungan ni Jehova indi magtugot nga matabo ini, bangod ang iya katuyuan matuman gid.—Isaias 55:10, 11.
15, 16. Kon magpanugda ang mga tawo sang lain nga pamaagi sa “paglubad” sa hangkat nga ginbangon sa Eden, paano naton sila mahimo mabuligan?
15 May makalabaw pa bala sa kaalam ni Jehova kon paano lubaron ang pagrebelde? Mahimo nga ang iban nga tawo magpanugda sang ila “mga solusyon” kon paano lubaron ang pagrebelde sa Eden. Apang, kon himuon nila ini, indi bala nga daw ginapahangop nila nga mas maayo pa sila sa Dios? Ayhan indi malain ang ila motibo, apang indi nila kilala kon sin-o gid si Jehova kag indi nila matungkad ang iya kaalam. Sa iya sulat sa mga Cristiano sa Roma, si apostol Pablo nagdayaw gid sa kaalam sang Dios, lakip na sa “sagrado nga likom” tuhoy sa katuyuan ni Jehova nga gamiton ang Mesianikong Ginharian agod gawaron ang matutom nga katawhan kag pakabalaanon ang Iya balaan nga ngalan. Ano ang masiling ni Pablo sa kaalam sang Dios nga naghimo sini nga katuyuan? Ginhinakpan sang apostol ang iya sulat sa sining pinamulong: “Sa Dios, nga amo lamang ang maalam, mangin sa iya ang himaya paagi kay Jesucristo sing dayon. Kabay pa.”—Roma 11:25; 16:25-27.
16 Nahibaluan ni Pablo nga si Jehova amo “lamang ang maalam”—ang pinakamaalam sa bug-os nga uniberso. Sin-o sa di-himpit nga mga tawo ang makalubad sang tanan nga problema, ilabi na ang hangkat ni Satanas tuhoy sa pagkasoberano sang Dios? Dapat gid naton buligan ang mga tawo nga mahalawhaw man kaangay sang nabatyagan naton sa Dios nga “maalam sa tagipusuon.” (Job 9:4) Kon mahangpan naton sing maayo ang kaalam ni Jehova, labi pa gid nga magsalig kita sa pamaagi niya sa paglubad sang hulusayon.—Hulubaton 3:5, 6.
Pag-apresyar sa Nagapangibabaw nga Kinaiya ni Jehova
17. Paano ang masangkad nga paghangop sang gugma ni Jehova makabulig sa mga wala nakahangop kon ngaa ginapahanugutan sang Dios ang kalautan?
17 “Ang Dios gugma.” (1 Juan 4:8) Paagi sa sining talalupangdon nga mga pulong, ginpakilala sang Biblia ang nagapangibabaw nga kinaiya ni Jehova, ang labi ka makagalanyat sa tanan niya nga kinaiya kag labi nga makapaumpaw para sa mga ginagamuhan bangod sa paglapnag sang kalautan karon. Ginpakita ni Jehova ang gugma sa tanan nga aspekto sang iya pamaagi sa paglubad sang daku nga halit sang sala sa iya mga tinuga. Gugma ang nagpahulag kay Jehova nga hatagan sing paglaum ang makasasala nga kaliwat nanday Adan kag Eva, nag-aman sing pamaagi nga makapalapit sila sa Iya kag makatigayon sing maayo nga kaangtanan sa Iya. Gugma ang nagpahulag sa Dios nga mag-aman sing gawad agod matigayon nila ang bug-os nga kapatawaran kag mapasag-uli sa himpit kag dayon nga kabuhi. (Juan 3:16) Kag gugma man ang nagpahulag sa iya nga mangin mapailubon sa mga tawo, nga naghatag sing kahigayunan sa madamo nga sikwayon si Satanas kag pilion si Jehova subong ila Soberano.—2 Pedro 3:9.
18. Ano nga butang ang aton nahangpan, kag ano ang aton hambalan sa masunod nga artikulo?
18 Sang ang isa ka pastor nagpamulongpulong sa mga tagpalamati nga nagtipon agod dumdumon ang anibersaryo sang makahalapay nga pag-atake sang terorista, sia nagsiling: “Wala kita makahibalo kon ngaa ginpahanugutan sang Dios ang kalautan kag pag-antos nga magpadayon.” Makapasubo gid! Wala bala kita nalipay bangod nahangpan naton ini nga butang? (Deuteronomio 29:29) Kag bangod si Jehova maalam, makatarunganon, kag mahigugmaon, nahibaluan naton nga sa indi madugay dulaon niya ang tanan nga pag-antos. Ang matuod, ginsaad niya nga amo sini ang iya himuon. (Bugna 21:3, 4) Apang, kamusta naman ang tanan nga nagkalamatay? Ang pamaagi ni Jehova sa paglubad sang hulusayon wala bala sing mahatag nga paglaum sa ila? May yara. Ang gugma nagpahulag sa iya nga mag-aman man para sa ila, paagi sa pagkabanhaw. Amo ini ang aton hambalan sa masunod nga artikulo.
Ano ang Imo Sabat?
• Ano ang isabat naton sa isa ka tawo nga nagapamangkot kon ngaa ginapahanugutan sang Dios ang pag-antos?
• Paano ginpakita ang pagkabalaan ni Jehova kag ang iya katarungan sa ginhimo niya sa mga rebelde sa Eden?
• Ngaa dapat naton buligan ang mga tawo nga mahangpan nila sing maayo ang gugma ni Jehova?
[Mga Pamangkot sa Pagtinuon]
[Piktyur sa pahina 21]
Buligi ang iban nga nagakabalaka sa pag-antos sa kalibutan
[Mga piktyur sa pahina 23]
Ang mga matutom nga sanday David kag Habacuc sinsero nga nagpamangkot sa Dios
