Ang Gahom sang Dila

ANG dila sang giraffe nagalaba sing 45 sentimetros. Maabtik kag makusog ini sa paglalas sang mga dahon sa mga sanga sang kahoy. Ang dila sang isa ka sahi sang balyena subong kabug-at sang isa ka elepante. Hunahunaa lamang ang kinahanglanon nga kusog sa pagpahulag sini!

Walawala gid ang dila sang tawo kon ipaanggid sa kadakuon, kabug-aton, kag kakusog sini. Apang, ang gahom sang dila sang tawo kapin pa sa sini. “Ang kamatayon kag kabuhi yara sa gahom sang dila,” siling sang Biblia tuhoy sa sining gamay nga bahin sang lawas sang tawo. (Hulubaton 18:21) Sa pagkamatuod, pila ka beses na kita nakabati nga ginagamit ang makamamatay nga gahom sang dila sang tawo sa paghimuhimo sing mga kabutigan kag binutig nga mga testimonya nga nagresulta sa kapahamakan, ukon sa kamatayon pa gani, sang inosente nga mga biktima?

Subong man, ginguba sang masakit nga mga tinaga ang madugay na nga mga pag-abyanay. Ginsaklaw sang matigdas nga mga pulong ang mga balatyagon. “Tubtob san-o nga ginapaugot ninyo ang akon kalag kag padayon ako nga ginadugmok paagi sa mga pulong?” tuaw ni Job, nga ginpakalain sing tuman sang iya mga abyan. (Job 19:2) Ginlaragway ni disipulo Santiago sing maathag kon daw ano ka makahalalit ang wala sing busal nga dila: “Ang dila isa ka gamay nga bahin sang lawas apang nagapabugal gid. Yari karon! Daw ano ka gamay nga kalayo ang kinahanglan agod masunog ang daku nga kagulangan! Bueno, ang dila kalayo.”—Santiago 3:5, 6.

Sa pihak nga bahin, ang dila mahimo man nga makaluwas sing kabuhi. Nalampuwasan sang iban ang depresyon kag paghikog bangod sang mapatugsilingon kag mahinuklugon nga mga tinaga. Nalikawan naman sang madamo nga tawo nga nagaabuso sa droga kag mga kriminal ang hilaw nga kamatayon bangod ginpamatian nila ang maayo nga laygay. Matuod gid nga ang bunga sang dila sang mga matarong “isa ka kahoy sang kabuhi,” kag “ang pulong nga napamulong sa husto nga tion subong sang mga mansanas nga bulawan sa pinuna nga pilak.”—Hulubaton 15:4; 25:11.

Apang, ang labing maayo nga paagi sang paggamit sa dila amo ang pagdayaw kay Jehova nga Dios, pagpahayag sing maayong balita sang Ginharian sang Dios, kag pagtudlo sa iban sing hamili nga mga kamatuoran sang Biblia. Ngaa? Nagsiling si Jesus: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”—Juan 17:3; Mateo 24:14; 28:19, 20.