Ang Ginhalinan sang Kalautan Ginbuyagyag!

SANG unang siglo, ginhulat sang madamo nga Judiyo ang pag-abot sang ginsaad nga Mesias. (Juan 6:14) Sang mag-abot si Jesus, naghatag sia sing lugpay kag dugang nga paghangop sa Pulong sang Dios. Gin-ayo niya ang mga masakiton, ginpakaon ang mga gutom, ginpakalma ang tiempo, ginbanhaw pa gani ang mga patay. (Mateo 8:26; 14:14-21; 15:30, 31; Marcos 5:38-43) Nagpamulong man sia sing mga pulong ni Jehova kag naghatag sing paglaum nga kabuhi nga walay katapusan. (Juan 3:34) Paagi sa iya mga ginhambal kag mga ginhimo, ginpakita ni Jesus nga sia ang Mesias, ang isa nga magahilway sa mga tawo gikan sa sala kag sa tanan nga kalautan nga resulta sini.

Nagakaigo kuntani nga ang Judiyo nga relihioso nga mga lider amo ang una nga magaabiabi kay Jesus, magapamati sa iya, kag malipayon nga magasunod sa iya pagtuytoy. Apang, wala nila ini ginhimo. Sa baylo, gindumtan kag ginhingabot nila sia, kag naghimbon sila nga patyon sia!—Marcos 14:1; 15:1-3, 10-15.

Gani, dapat gid sila pakamalauton ni Jesus. (Mateo 23:33-35) Apang, nahibaluan ni Jesus nga may isa pa nga dapat basulon tungod sa ila mga kalautan. Nagsiling sia: “Gikan kamo sa inyo amay nga Yawa, kag luyag ninyo himuon ang mga kailigbon sang inyo amay. Manugpatay sia sing tawo sang nagsugod sia sa iya kalautan, kag wala sia magpabilin nga malig-on sa kamatuoran, bangod ang kamatuoran wala sa iya. Kon maghambal sia sang kabutigan, nagahambal sia suno sa iya kinaugali, bangod butigon sia kag amay sang kabutigan.” (Juan 8:44) Bisan pa ginbaton ni Jesus nga ang mga tawo makasarang sa paghimo sing mga kalautan, gintudlo niya ang ginhalinan gid sang kalautan—si Satanas nga Yawa.

Paagi sa pagsiling nga si Satanas ‘wala magpabilin nga malig-on sa kamatuoran,’ ginpakita ni Jesus nga ining espiritu nga tinuga isa anay ka matutom nga alagad sang Dios apang nagbiya sia sa husto nga dalanon. Ngaa nagrebelde si Satanas kay Jehova? Bangod ginhatagan niya sing sobra nga importansia ang iya kaugalingon tubtob sa punto nga naibog sia sa pagsimba nga para lamang sa Dios. *—Mateo 4:8, 9.

Nadayag ang pagrebelde ni Satanas sa hardin sang Eden sang ginlimbungan niya si Eva sa pagkaon sang ginadumilian nga bunga. Paagi sa paghimo sang una nga pagbinutig kag paagi sa pagpasipala kay Jehova, ginhimo ni Satanas ang iya kaugalingon nga “amay sang kabutigan.” Dugang pa, sang ginsulay niya sanday Adan kag Eva nga maglapas, nangin makasasala sila, kag nagresulta ini sang ulihi sa ila kamatayon kag sa kamatayon sang palaabuton nga mga kaliwatan. Busa, ginhimo man ni Satanas ang iya kaugalingon nga ‘manugpatay sing tawo’—sa pagkamatuod, ang labing malaut nga manugpatay!—Genesis 3:1-6; Roma 5:12.

Ang malaut nga impluwensia ni Satanas naglab-ot pa gani sa duog sang mga espiritu, diin ginbuyok niya ang iban pa nga mga anghel nga magrebelde upod sa iya. (2 Pedro 2:4) Kaangay ni Satanas, ining malauton nga mga espiritu di-nagakaigo man nga nangin interesado sa mga tawo. Apang, interesado sila sa pagpangasawa, nga may yara malaglagon kag malain nga mga resulta.

 Napuno sing Kalautan ang Duta

Ang Biblia nagasugid sa aton: “Sang ang mga tawo nagsugod sa pagbuad . . . kag natawo sa ila ang mga anak nga babayi, nian nakita sang mga anak nga lalaki sang matuod nga Dios ang mga anak nga babayi sang mga tawo, nga matahom sila; kag nagkuha sila sing mga asawa para sa ila kaugalingon, kon sayuron, sang tanan nga ila napili.” (Genesis 6:1, 2) Sin-o ining “mga anak nga lalaki sang matuod nga Dios”? Sila amo ang espiritu nga mga tinuga, indi mga tawo. (Job 1:6; 2:1) Paano naton ini nahibaluan? Una, mga 1,500 ka tuig na nga nagaasawahay ang mga tawo kag wala sing rason nga sambiton pa ini. Paagi sa pagpatalupangod sa pag-asawahay sang “mga anak nga lalaki sang matuod nga Dios” nga nagmateryalisar kag nagminyo sa “mga anak nga babayi sang mga tawo,” maathag nga ginapatuhuyan sini ang butang nga karon pa lang natabo kag indi normal.

Ang ila nangin mga anak isa ka pamatuod nga ini nga pag-asawahay indi normal. Ang ila mga anak gintawag nga mga Nefilim kag mga higante sila. Mapiguson man sila. Sa katunayan, ang “Nefilim” nagakahulugan sing “Manugpukan,” ukon “sila nga nagapukan sa iban.” Ginlaragway sila subong “mga gamhanan sadto, mga lalaki nga bantog.”—Genesis 6:4.

Wala sing tupong ang kalautan sang mga Nefilim kag sang ila mga amay. “Ang duta naguba sa itululok sang matuod nga Dios kag . . . napun-an sing kasingki,” siling sang Genesis 6:11. Huo, gin-ilog sang mga tawo ang ila kasingki kag kalautan.

Paano gin-impluwensiahan sang mga Nefilim kag sang ila mga amay ang mga tawo? Paagi sa pagpukaw sa makasasala nga huyog kag handum sang mga tawo. Ang resulta? “Ginguba sang tanan nga unod ang ila dalanon sa duta.” Sang ulihi, ginlaglag ni Jehova yadto nga kalibutan sa isa ka bug-os kalibutan nga Anaw, kag ang matarong nga si Noe kag ang iya pamilya lamang ang nakalampuwas. (Genesis 6:5, 12-22) Apang, ang nagmateryalisar nga malaut nga mga anghel nagbalik sa duog sang mga espiritu. Padayon nga ginpamatukan sang mga demonyo ang Dios kag ang iya matarong nga pamilya sang mainunungon nga mga anghel. Maathag gid nga halin sadto, gindumilian na sang Dios ining malauton nga mga espiritu nga magmateryalisar. (Judas 6) Apang, ginaimpluwensiahan gihapon nila sing daku ang mga hilikuton sang mga tawo.

Ang Isa nga Malauton Ginbuyagyag sing Bug-os!

Ginasugid sang 1 Juan 5:19 ang kasangkaron sang malaut nga impluwensia ni Satanas, nga nagasiling: “Ang bug-os nga kalibutan yara sa gahom sang isa nga malauton.” Ginaimpluwensiahan sang Yawa ang katawhan sa paghimo sing madamo nga kailo. Sa katunayan, determinado pa gid sia karon sa paghimo sing kahalitan. Ngaa? Bangod sia kag ang iya mga demonyo gintabog gikan sa langit sang gintukod ang Ginharian sang Dios sang 1914. Tuhoy sini nga pagtabog, ang Biblia nagtagna: “Kailo sa duta . . . , bangod ang Yawa nagpanaug sa inyo, nga may daku nga kaakig, kay nahibaluan niya nga malip-ot na lamang ang iya tion.” (Bugna 12:7-12) Kon amo, paano karon ginaimpluwensiahan ni Satanas ang katawhan?

Panguna na nga ginahimo ini ni Satanas paagi sa pagpukaw sa isa ka panimuot nga nagakontrol sang panghunahuna kag paggawi sang tawo. Gani, ginatawag sang Efeso 2:2 ang Yawa nga “manugdumala sang awtoridad sang hangin, ang espiritu [ukon, dominante nga panimuot] nga nagapanghikot karon sa mga anak sang  pagkadimatinumanon.” Sa baylo nga palig-unon ang diosnon nga kahadlok kag kaayo, ginapalig-on sining yawan-on nga “hangin” ang pagrebelde batok sa Dios kag sa mga talaksan niya. Gani ginapabaskog kag ginapalala ni Satanas kag sang iya mga demonyo ang mga kalautan nga ginahimo sang mga tawo.

“Amligi ang Imo Tagipusuon”

Ini nga “hangin” makita sa pagdagsa sang pornograpiya, nga nagapasilabo sang di-nagakaigo nga kaibog sa sekso kag nagahimo sang di-normal nga paggawi nga makagalanyat. (1 Tesalonica 4:3-5) Ang paglugos, sadismo, paglugos sang gang, bestialidad, kag paghimulos sa mga bata amo ang pila sang mga butang nga ginapatalupangod sang pornograpiya subong makalilingaw. Bisan sa indi tanto ka makahalalit nga mga porma sini, ang pornograpiya makapagiyan kag nagahalit sa mga nagatan-aw ukon nagabasa sini, sa amo mangin batasan na nila ang manglingling. * Isa ini ka kalautan nga nagahalit sang kaangtanan sang mga tawo sa isa kag isa kag sa Dios. Ginapakita sang pornograpiya ang malaut nga mentalidad sang mga demonyo nga nagapauswag sini—mga rebelde nga may di-nagakaigo na nga kaibog sa sekso antes pa matabo ang Anaw sang panahon ni Noe.

May rason gid ang maalam nga tawo nga si Solomon sa paglaygay: “Labaw sa tanan nga dapat bantayan, amligi ang imo tagipusuon, kay nagagikan sa sini ang mga tuburan sang kabuhi.” (Hulubaton 4:23) Kon sa aton pa, agod maamligan mo ang imo tagipusuon gikan sa siod sang pornograpiya, mahimo nga dapat mo lisuon ang estasyon sang imo telebisyon ukon patyon ang imo kompyuter kon ang mga palaguaon nagapasilabo na sang balatyagon, kag importante gid nga himuon mo ini sa gilayon! Hunahunaa ang imo kaugalingon subong isa ka soldado nga nagasagang sang misil nga ginapuntariya sa imo tagipusuon. Ginapuntariya ni Satanas ang imo malaragwayon nga tagipusuon—ang imo sentro sang motibasyon kag handum—kag ginatinguhaan niya nga maglain ini.

Dapat mo man amligan ang imo tagipusuon nga indi sini paghigugmaon ang kasingki, kay nahibaluan sang Yawa nga “ang bisan sin-o nga nagahigugma sang kasingki ginadumtan [ni Jehova].” (Salmo 11:5) Indi kinahanglan nga pahimuon ka ni Satanas sing kasingki agod mangin kaaway ka sang Dios; kinahanglan lang niya nga palambuon mo ang gugma sa kasingki. Ang pagdagsa sang kasingki sa media, nga masami nga may tema nga okulto, indi natabuan lamang. Ang mga Nefilim patay na, apang ang ila mga kinaiya kag paggawi buhi gid gihapon! Ang imo bala ginapili nga kalingawan nagapakita nga ginapamatukan mo ang mga padugi ni Satanas?—2 Corinto 2:11.

 Kon Paano Pamatukan ang Malaut nga Impluwensia ni Satanas

Mabudlay pamatukan ang kalautan. Ginapatalupangod sang Biblia nga yadtong nagapanikasog nga pahamut-an ang Dios “nagapakigdumog . . . batok sa malaut nga mga puersa nga espiritu sa langitnon nga mga duog,” wala labot nga nagapakigbato sa ila di-himpit nga unod. Agod magmadinalag-on kag matigayon ang kahamuot sang Dios, dapat naton himuslan ang madamo nga aman sang Dios.—Efeso 6:12; Roma 7:21-25.

Ini nga mga aman nagalakip sang balaan nga espiritu sang Dios, ang labing makusog nga puersa sa uniberso. Nagsulat si apostol Pablo sa mga Cristiano sang unang siglo: “Nabaton naton, indi ang espiritu sang kalibutan, kundi ang espiritu nga gikan sa Dios.” (1 Corinto 2:12) Natun-an sang mga ginatuytuyan sang espiritu sang Dios nga higugmaon ang ginahigugma sang Dios kag dumtan ang ginadumtan niya. (Amos 5:15) Paano mabaton sang isa ang balaan nga espiritu? Una paagi sa pangamuyo, pagtuon sa Biblia—ang Biblia mismo resulta sang pag-inspirar sang balaan nga espiritu—kag sa mapuslanon nga pagpakig-upod sa mga nagahigugma gid sa Dios.—Lucas 11:13; 2 Timoteo 3:16; Hebreo 10:24, 25.

Paagi sa paghimulos sa sining mga aman sang Dios, ginasugdan mo nga isuklob “ang kompleto nga hinganib gikan sa Dios,” ang lamang nga pangamlig batok sa “mga pahito sang Yawa.” (Efeso 6:11-18) Ang paghimulos sing bug-os sa sini nga mga aman labi pa gid nga kinahanglanon karon sangsa nagligad. Ngaa?

Malapit Na Madula ang Kalautan!

“Kon ang mga malauton magtubo subong sang hilamon kag kon ang tanan nga manughikot sing makasakit nga butang maglambo, ini agod nga laglagon sila sing dayon,” siling sang salmista. (Salmo 92:7) Huo, kaangay sang panahon ni Noe, ang paglapnag karon sang kalautan pamatuod nga malapit na ang paghukom sang Dios, indi lamang batok sa malauton nga katawhan kundi batok man kay Satanas kag sa iya mga demonyo, nga itagbong sa kadadalman nga indi na makapanghikot kag magadul-ong ini sa ulihi sa ila kalaglagan. (2 Timoteo 3:1-5; Bugna 20:1-3, 7-10) Sin-o ang magapatuman sang paghukom? Wala sing liwan kundi si Jesucristo, nga tuhoy sa iya aton mabasa: “Ginpadayag ang Anak sang Dios sa sini nga katuyuan, nga amo ang paglaglag sa mga binuhatan sang Yawa.”—1 Juan 3:8.

Handum mo bala nga madula ang kalautan? Kon amo, ang mga saad sang Biblia makalugpay sa imo. Ini lamang nga libro ang nagabuyagyag sang ginhalinan sang kalautan, si Satanas, kag ini lamang nga libro ang nagapakita kon paano sia kag ang tanan niya nga kalautan dulaon sa ulihi. Ginapalig-on ka namon sa pagkuha sing sibu nga ihibalo tuhoy sa Biblia agod maamligan mo karon ang imo kaugalingon batok sa malaut nga mga impluwensia ni Satanas kag maagom mo ang paglaum nga magkabuhi sa isa ka kalibutan nga wala na sing kalautan.—Salmo 37:9, 10.

[Mga nota]

[Kahon/​Piktyur sa pahina 6]

Ang mga Leyenda nga May Bahin sang Kamatuoran

Ang mga sugilanon tuhoy sa dios-tawo, higante, kag malaglagon nga anaw mabasa sa dumaan nga mga mitolohiya sa bug-os nga kalibutan. Halimbawa, ang anaw, barko, kag may mga nakalampuwas ginasambit sang Akkadianhon nga Epiko ni Gilgamesh. Si Gilgamesh mismo ginlaragway subong maulag kag masingki nga dios-tawo. Ang mitolohiya sang mga Aztec nagasugid tuhoy sa kalibutan anay nga ginpuy-an sang mga higante kag tuhoy sa daku nga anaw. Ginalaragway sang leyenda sang mga Norse ang isa ka kaliwat sang mga higante kag ang maalam nga tawo nga si Bergelmir nga naghimo sing daku nga barko kag gani sia kag ang iya asawa naluwas. Ini nga mga leyenda nagapamatuod sa ginasiling sang Biblia nga ang tanan nga tawo naghalin sa mga nakalampuwas sa anaw nga naglaglag sang malauton anay nga kalibutan.

[Piktyur]

Ang tapitapi nga ginsulatan sang Epiko ni Gilgamesh

[Credit Line]

The University Museum, University of Pennsylvania (neg. # 22065)

[Piktyur sa pahina 5]

Ang mga kinaiya sang mga Nefilim makita karon sa mga tawo

[Piktyur sa pahina 7]

Ang sibu nga ihibalo nagapabakod sa aton batok sa malaut nga mga impluwensia