Kalautan​—Indi Bala Ini Matapna?

Ginpudyot sang isa ka mausisaon nga bata nga lalaki ang bomba nga ginlubong sa duta amo nga nabulag sia kag nakumpol. Gin-abandona kag ginhaboy sang isa ka iloy ang iya bag-ong bun-ag nga lapsag sa basurahan sa higad-dalan. Ginbalikan sang isa ka ginpahalin nga trabahador ang iya anay ginaobrahan kag ginpaniro ang bisan sin-o nga makita niya, kag pagkatapos sini gintiro man niya ang iya kaugalingon. Ginhimuslan sang isa ka respetado nga tawo ang walay inugpangapin nga mga kabataan.

MAKAPASUBO nga ang subong sini nga mga report sang mga kalautan nangin kinaandan na lamang sa panahon naton. Ang makapasubo pa gid amo nga masami ini ginatabunan sang mga report tuhoy sa pagpapas sa isa ka etniko nga grupo kag rasa, kag terorismo. “Kon binagbinagon naton ang kasangkaron sang kalautan nga nagakatabo sa sini nga siglo, masiling gid nga siglo ini ni Satanas,” siling sang isa ka editoryal nga ginbalhag sang 1995. “Subong pa lang nga dag-on nga ang mga tawo nagpakita sing daku gid nga huyog, kag kaluyag, sa pagpatay sa minilyon ka tawo bangod sang rasa, relihion ukon kahimtangan sang katilingban.”

Subong man, ginadagtaan sang mga tawo ang hangin, ginahigkuan ang duta, ginaubos ang duna nga manggad sini, kag halos ginapapas ang madamo nga espesyi sang mga sapat. Matapna bala sang tawo ining tanan nga kalautan kag mapauswag ang kahimtangan sang kalibutan? Ukon imposible gid bala ini nga matabo? Isa ka propesor nga may madamo na nga ginsulat tuhoy sa kalautan ang nagsiling: “Kinahanglan ko gid nga bag-uhon kag pauswagon ang kahimtangan sang kalibutan. Apang maathag gid nga wala ini nagbag-o.” Ayhan amo man sini ang imo ginabatyag.

Ang direksion nga ginapadulungan sang kalibutan mapaanggid sa isa ka barko nga nagalayag sa kadagatan nga labi pa nga nagabalingaso kag nangin makatalagam kada adlaw. Bisan pa wala sing maluyag nga magpadulong sa sina nga direksion, ang tanan nga panikasog nga bag-uhon ang direksion sini wala magmadinalag-on. Madasig nga ginasugata sang barko ang makamamatay nga bagyo, kag indi ini mapunggan.

Sa pila ka kasangkaron, ining nagalain pa gid nga kahimtangan mapasibangod sa tawhanon nga pagkadihimpit. (Roma 3:23) Apang, indi lamang sa tawo mapasibangod ang sobra nga kalautan kag ang daw indi matapna nga paglapnag sini. Posible bala nga ginakontrol ang tawo sang isa ka di-makita apang gamhanan kag malaut nga puersa? Kon amo, ano ini, kag paano naton maamligan ang aton kaugalingon? Sabton sang masunod nga artikulo ini nga mga pamangkot.

[Credit Line sang piktyur sa pahina 3]

© Heldur Netocny/Panos Pictures