Mga Pamangkot Gikan sa mga Bumalasa

Ginagarantiyahan bala sang Hulubaton 22:6 nga kon hanason sang Cristiano nga mga ginikanan ang ila kabataan, indi sila magtalikod sa dalanon ni Jehova?

Ini nga bersikulo nagasiling: “Hanasa ang bata suno sa dalanon nga para sa iya; bisan kon magtigulang na sia indi sia magtalikod sa sini.” Kon paano ang korte sang isa ka kahoy nagadepende sa imo pagdihon samtang linghod pa ang mga sanga sini, ang padayon nga pag-alagad sang bata kay Jehova tubtob sa iya pagdaku nagadepende man sa imo maayo nga paghanas sa iya samtang bata pa sia. Nahibaluan sang tanan nga ginikanan nga ini nga paghanas nagakinahanglan sing daku nga tion kag panikasog. Agod mangin Cristiano nga mga disipulo ang ila mga kabataan, dapat magmaukod ang mga ginikanan sa pagtudlo, paglaygay, pagpalig-on, kag pagdisiplina kag subong man sa pagpahamtang sing maayo nga halimbawa sa ila mga kabataan. Dapat himuon nila ini sing padayon kag sing mahigugmaon samtang nagadaku ang mga kabataan.

Apang, kon magtalikod ang bata sa pag-alagad kay Jehova, buot bala sini silingon nga indi nagakaigo ang paghanas sa iya sang iya mga ginikanan? Kon kaisa, mahimo nga kulang ang panikasog sang mga ginikanan nga padakuon ang ila mga kabataan sa disiplina kag nagatuytoy nga panghunahuna ni Jehova. (Efeso 6:4) Apang, ang hulubaton wala nagagarantiya nga ang nahanas nga mga kabataan magamatutom sa Dios. Indi puede nga ipilit sang mga ginikanan ang ila luyag sa ila mga kabataan. Kaangay sang mga adulto, ang mga kabataan may kahilwayan sa pagbuot kag sa ulihi dapat magpili sila sang ila kaugalingon nga dalanon sa kabuhi. (Deuteronomio 30:15, 16, 19) Walay sapayan sang hanuot gid nga mga panikasog sang mga ginikanan, ang iban nga kabataan nangin di-matutom kaangay ni Solomon, ang nagsulat sang ginabinagbinag naton nga bersikulo. Bisan gani si Jehova may mga anak man nga nangin di-matutom.

Gani, ini nga teksto wala nagakahulugan nga ang tanan nga nahanas nga kabataan ‘indi magtalikod sa sini’ apang masami nga mangin maayo ang resulta sang paghanas. Daw ano nga pagpalig-on ini sa mga ginikanan! Malipay ang mga ginikanan nga ang ila hanuot nga mga panikasog sa paghanas sa ila mga kabataan sa dalanon ni Jehova may maayo nga resulta. Sanglit may daku sila nga impluwensia sa ila mga kabataan, ginapalig-on ang mga ginikanan nga tumanon nila ang ila katungdanan.—Deuteronomio 6:6, 7.

Bisan pa nag-untat na ang mga kabataan sa pag-alagad kay Jehova, makalaum ang mga ginikanan nga bangod nahanas sila, mahimo nga makamarasmas sila sa ulihi. Ang kamatuoran sang Biblia gamhanan, kag ang paghanas sang ginikanan indi madali malimtan.—Salmo 19:7.