Mga Tigulang​—Isa ka Pagpakamaayo sa mga Pamatan-on

“Bisan tubtob magtigulang ako kag mag-ubanon, O Dios, dili ako pagbayai, tubtob nga mapahayag ko ang tuhoy sa imo butkon sa kaliwatan, sa tanan nga magaabot, ang tuhoy sa imo kagamhanan.”—SALMO 71:18.

1, 2. Ano ang dapat mahangpan sang tigulang nga mga alagad sang Dios, kag ano ang binagbinagon naton karon?

GINDUAW sang isa ka Cristianong gulang sa Katundan nga Aprika ang isa ka tigulang nga hinaplas nga utod nga lalaki kag ginpamangkot sia, “Kamusta ka na?” Ang utod nagsabat samtang nagamuestra, “Makadalagan gihapon ako, makatumbo, makalukso, kag makatintin.” “Apang,” siling pa niya, “indi gihapon ako makalupad.” Nahangpan sang gulang ang luyag niya ipahangop. ‘Ang masarangan ko himuon, ginahimo ko, apang ang indi ko masarangan, wala ko ginahimo.’ Ang gulang nga nagduaw sa iya otsentahon na ang edad karon, apang indi niya gihapon malipatan ang pagkapalalahog kag ang katutom sadto nga utod.

² Indi gid malipatan sang iban ang diosnon nga mga kinaiya sang mga tigulang. Sa pagkamatuod, natigayon sining mga tigulang ang kaalam kag tulad-Cristo nga mga kinaiya bangod ginpanikasugan nila ini. (Manugwali 4:13) Ang Biblia nagasiling: “Ang ubanon nga ulo amo ang purongpurong sang katahom kon makita ini sa dalanon sang pagkamatarong.” (Hulubaton 16:31) Kon ikaw tigulang na, nahibaluan mo bala kon daw ano ka makapalig-on sa iban ang imo ginahambal kag ginahimo? Binagbinaga ang pila ka halimbawa sa Biblia nga nagapakita kon daw ano ka makapalig-on ang mga tigulang sa mga pamatan-on.

 Pagtuo nga May Mapinadayunon nga Epekto

3. Ano ang epekto sang katutom ni Noe sa tanan nga nagakabuhi karon?

³ Ang pagtuo kag katutom ni Noe makapalig-on bisan tubtob karon. Manug-600 anyos na si Noe sang ginhimo niya ang arka, gintipon ang mga sapat, kag nagbantala sa iya mga isigkatawo. (Genesis 7:6; 2 Pedro 2:5) Bangod sang iya diosnon nga kahadlok, si Noe kag ang iya pamilya naluwas sa daku nga Anaw kag nangin katigulangan sang tanan nga tawo karon. Matuod, malawig ang kabuhi sang mga tawo sang adlaw ni Noe. Apang, bisan pa sang tigulang na gid si Noe, matutom gihapon sia, kag nagresulta ini sa talalupangdon nga mga pagpakamaayo. Sa ano nga mga paagi?

4. Paano nakapanginpulos ang mga alagad sang Dios karon sa katutom ni Noe?

⁴ Manug-800 anyos na si Noe sang nagplano si Nimrod nga magtukod sing Torre sang Babel bilang pagpamatok sa sugo ni Jehova nga “tugbon ang duta.” (Genesis 9:1; 11:1-9) Apang, wala magbuylog si Noe sa pagrebelde ni Nimrod. Gani, mahimo nga wala nabag-o ang iya lenguahe sang gingumon ang lenguahe sang mga rebelde sadto. Ang pagtuo kag katutom ni Noe nga makita indi lamang sang tigulang na sia kundi sa bug-os niya nga pagkabuhi, takus gid ilugon sang mga alagad sang Dios ano man ang ila edad.—Hebreo 11:7

Maayo nga Impluwensia sa Pamilya

5, 6. (a) Ano ang ginsugo ni Jehova sang 75 anyos na si Abraham? (b) Ano ang ginhimo ni Abraham sang ginsugo sia sang Dios?

⁵ Ang maayo nga impluwensia sang mga tigulang sa pagtuo sang katapo sang ila pamilya makita sa pagkabuhi sang mga patriarka sang wala na si Noe. Mga 75 anyos ang pangidaron ni Abraham sang nagsiling sa iya ang Dios: “Halin ka sa imo duta kag sa imo kahimataan kag sa balay sang imo amay pakadto sa duta nga akon igapakita sa imo; kag himuon ko gikan sa imo ang isa ka daku nga pungsod kag pakamaayuhon ko ikaw kag padakuon ang imo ngalan; kag mangin pagpakamaayo ikaw.”—Genesis 12:1, 2.

⁶ Handurawa nga ginsugo ka nga biyaan mo ang imo puluy-an, mga abyan, pungsod nga natawhan, kag suod nga mga himata kag magkadto ka sa pungsod nga indi mo kabisado. Amo sina ang ginpahimo kay Abraham. ‘Naglakat sia suno sa ginpamulong ni Jehova sa iya,’ kag sa nabilin nga bahin sang iya kabuhi, nag-istar sia sa mga tolda subong dumuluong kag manlulugayaw sa duta sang Canaan. (Genesis 12:4; Hebreo 11:8, 9) Bisan pa nagsiling si Jehova nga mangin “isa ka daku nga pungsod” si Abraham, madugay na sia nga napatay sang nagdamo ang iya kaliwatan. Si Isaac lang ang nangin anak nila ni Sara, kag nag-anak sila pagkatapos pa sang 25 ka tuig nga pagpanglugayaw sa Ginsaad nga Duta. (Genesis 21:2, 5) Apang, si Abraham wala ginlapyo kag wala nagbalik sa siudad sang Ur. Maayo gid sia nga halimbawa sa pagtuo kag pagbatas!

7. Ano ang epekto sang pagbatas ni Abraham sa iya anak nga si Isaac, kag ano ang epekto sini sa katawhan?

⁷ Ang pagbatas ni Abraham may daku nga epekto sa iya anak nga si Isaac, nga naghinguyang sang iya bug-os nga kabuhi—180 ka tuig—subong isa ka dumuluong sa duta sang Canaan. Ang pagbatas ni Isaac napasad sa iya pagtuo sa saad sang Dios, pagtuo nga ginpatudok sang iya tigulang nga mga ginikanan kag sang ulihi ginpabakod pa gid sang saad mismo ni Jehova sa iya. (Genesis 26:2-5) Ang katutom ni Isaac may importante gid nga papel sa katumanan sang ginsaad ni Jehova nga “binhi” para pakamaayuhon ang tanan nga katawhan nga magagikan sa pamilya ni Abraham. Ginatos ka tuig sang ulihi, si Jesucristo, ang panguna nga bahin sang “binhi,” nagbukas sing dalan agod makapanumbalik sa Dios ang tanan nga magatuo sa iya kag mabuhi sing walay katapusan.—Galacia 3:16; Juan 3:16.

8. Paano ginpakita ni Jacob ang mabaskog nga pagtuo, kag ano ang epekto sini?

⁸ Si Isaac naman nagbulig sa iya anak nga si Jacob sa pagpalambo sang mabakod nga pagtuo nga nagsakdag sa iya tubtob sa tion sang iya katigulangon. Si Jacob 97 anyos sang nakigdumog sia sa isa ka anghel sa bug-os nga gab-i agod pakamaayuhon. (Genesis 32:24-28) Antes sia napatay sa edad nga 147 anyos kag maluya na ang lawas, ginpanikasugan gid ni Jacob nga  pakamaayuhon ang iya 12 ka anak nga lalaki. (Genesis 47:28) Ang iya gintagna, nga narekord karon sa Genesis 49:1-28, natuman gid kag padayon nga nagakatuman.

9. Ano ang masiling sa impluwensia sang hamtong sa espirituwal nga mga tigulang sa ila pamilya?

⁹ Maathag nga ang tigulang nga matutom nga mga alagad sang Dios may maayo gid nga impluwensia sa katapo sang ila pamilya. Ang mga instruksion gikan sa Kasulatan upod ang maalamon nga laygay kag halimbawa sa pagbatas makabulig gid agod ang pamatan-on magadaku nga may mabakod nga pagtuo. (Hulubaton 22:6) Indi dapat pagpakadiutayon sang mga tigulang ang ila mapuslanon gid nga impluwensia sa ila pamilya.

Maayo nga Impluwensia sa mga Masigkatumuluo

10. Ano ang sugo ni Jose “nahanungod sa iya mga tul-an,” kag ano ang nangin epekto sini?

¹⁰ Ang mga tigulang maayo man nga impluwensia sa ila mga masigkatumuluo. Si Jose, nga anak ni Jacob, tigulang na sang naghimo sia sing isa ka simple nga buhat sang pagtuo kag napalig-on gid sa sini ang minilyon ka matuod nga mga sumilimba sang masunod nga kaliwatan. Siento-dies anyos sia sang “naghatag sia sang sugo nahanungod sa iya mga tul-an,” nga nagasiling nga kon ang mga Israelinhon maggua sa Egipto, dal-on nila ang iya mga tul-an. (Hebreo 11:22; Genesis 50:25) Ini nga sugo nagpasalig gid nga may rason nga maglaum ang mga Israelinhon nga luwason sila gikan sa malawig nga tion sang mapintas nga pag-ulipon sa ila sang napatay na si Jose.

11. Ano ang mahimo nangin impluwensia sang tigulang nga si Moises kay Josue?

¹¹ Isa si Moises sa mga napalig-on sa pagtuo ni Jose. Sang 80 anyos si Moises, pribilehiyo niya nga dal-on ang mga tul-an ni Jose paggua sa pungsod sang Egipto. (Exodo 13:19) Sa amo man nga tion, nangin suod sia sa mas lamharon nga si Josue. Sa masunod nga 40 ka tuig, si Josue nangin suod nga alagad ni Moises. (Numeros 11:28) Gin-updan niya si Moises sa pagsaka sa Bukid Sinai kag sia ang nagsugata kay Moises sang magpanaug sa bukid dala ang tapitapi sang Pagpamatuod. (Exodo 24:12-18; 32:15-17) Tuburan gid sang madamo nga masaligan nga laygay kag kaalam ang tigulang nga si Moises para kay Josue!

12. Paano nangin maayo nga impluwensia si Josue sa pungsod sang Israel sa iya bug-os nga pagkabuhi?

¹² Si Josue naman nagpalig-on sa pungsod sang Israel sa bug-os niya nga pagkabuhi. Ang Hukom 2:7 nagasiling: “Ang katawhan padayon nga nag-alagad kay Jehova sa tanan nga mga adlaw ni Josue kag sa tanan nga mga adlaw sang tigulang nga mga lalaki nga ang mga adlaw naglawig pagkatapos ni Josue kag nakakita sang tanan nga dalagku nga buhat ni Jehova nga ginhimo niya para sa Israel.” Apang, sang napatay si Josue kag ang iban pa gulang nga mga lalaki, nagkimpangkimpang ang Israel sa ulot sang matuod kag butig nga pagsimba sa sulod sang 300 ka tuig, nga naglab-ot sa panahon ni manalagna Samuel.

Si Samuel “Naghimo Sang Pagkamatarong”

13. Paano si Samuel “naghimo sang pagkamatarong”?

¹³ Wala ginsambit sa Biblia kon pila ang edad ni Samuel sang napatay sia, apang ang mga hitabo nga ginsulat sa tulun-an sang Nahaunang Samuel natabo sa sulod sang mga 102 ka  tuig, kag nasaksihan pa ni Samuel ang kalabanan sini. Sa Hebreo 11:32, 33, mabasa naton nga ang matadlong nga mga hukom kag mga manalagna “naghimo sang pagkamatarong.” Huo, naimpluwensiahan ni Samuel ang iban nga tawo sang panahon niya nga likawan ukon biyaan ang pagpakasala. (1 Samuel 7:2-4) Paano? Matutom sia kay Jehova sa bug-os niya nga kabuhi. (1 Samuel 12:2-5) Wala sia mahadlok nga ihatag bisan sa hari ang matigdas nga laygay. (1 Samuel 15:16-29) Dugang pa, si Samuel, nga “tigulang kag ubanon na,” huwaran gid sa pagpangamuyo para sa iban. Sia nagsiling nga “malayo matabo . . . nga magpakasala [sia] batok kay Jehova paagi sa pag-untat sa pagpangamuyo” tungod sa iya masigka-Israelinhon.—1 Samuel 12:2, 23.

14, 15. Paano mailog sang mga tigulang karon si Samuel tuhoy sa pangamuyo?

¹⁴ Ginapakita sini tanan kon paano mangin maayo nga halimbawa ang mga tigulang sa ila mga masigkatumuluo. Walay sapayan sang ila mga limitasyon bangod sang ila panglawason ukon iban pa nga mga kasablagan, ang mga tigulang makapangamuyo para sa iban. Mga tigulang, nahibaluan bala ninyo kon daw ano kadaku ang inyo mabulig sa kongregasyon paagi sa inyo mga pangamuyo? Bangod sang inyo pagtuo sa ginpatulo nga dugo ni Cristo, ginakahamut-an kamo Jehova, kag bangod sang inyo pagbatas, ang inyo pagtuo nakatigayon sing “natilawan nga kinaiya.” (Santiago 1:3; 1 Pedro 1:7) Indi gid pagkalimti: “Ang pag-ampo sang matarong nga tawo, kon nagapanghikot ini, may daku nga puersa.”—Santiago 5:16.

¹⁵ Ang inyo pangamuyo para sa pagbantala nga hilikuton kag sang pagpanghikot sang kongregasyon kinahanglanon. Ang iban naton nga mga kauturan nabilanggo bangod sang ila Cristianong neutralidad. Ang iban nahalitan sang kinaugali nga mga kalamidad, mga inaway, kag inaway sibil. Ang iban naman, nga yara sa aton mismo kongregasyon, nagaatubang sing pagsulay ukon pagpamatok. (Mateo 10:35, 36) Ang mga nagapanguna sa pagbantala kag sa pagdumala sa mga kongregasyon nagakinahanglan man nga ipangamuyo ninyo sing regular. (Efeso 6:18, 19; Colosas 4:2, 3) Makalilipay gid kon ipangamuyo naton ang aton mga masigkatumuluo, subong sang ginhimo anay ni Epafras!—Colosas 4:12.

Pagtudlo sa Kaliwatan nga Magaabot

16, 17. Ano ang gintagna sa Salmo 71:18, kag paano ini natuman?

¹⁶ Ang pagpakig-upod sa mga matutom sang “diutay nga panong,” yadtong may langitnon nga paglaum, naghatag sing mapuslanon nga paghanas sa “iban nga mga karnero,” nga may paglaum nga mabuhi sing dayon sa paraiso sa duta. (Lucas 12:32; Juan 10:16) Gintagna ini sa Salmo 71:18, nga nagasiling: “Bisan tubtob magtigulang ako kag mag-ubanon, O Dios, dili ako pagbayai, tubtob nga mapahayag ko ang tuhoy sa imo butkon sa kaliwatan, sa tanan nga magaabot, ang tuhoy sa imo kagamhanan.” Antes sila magkadto sa langit agod mangin kaupod ni Jesucristo, ang mga hinaplas sang espiritu nalangkag gid sa paghanas sa iban nga mga karnero para sa dugang pa nga mga responsibilidad.

¹⁷ Ang ginsiling sang Salmo 71:18 tuhoy sa pagtudlo “sa tanan nga magaabot” maaplikar man sa iban nga karnero, nga nakabaton sing instruksion gikan sa mga hinaplas sang Dios. Gintulin ni Jehova sa mga tigulang ang pribilehiyo nga magpanaksi tuhoy sa iya sa mga nagabaton karon sang matuod nga pagsimba. (Joel 1:2, 3) Mapinasalamaton gid ang iban nga mga karnero sa ila mga natun-an gikan sa mga hinaplas kag napahulag sila nga itudlo man sa iban nga luyag mag-alagad kay Jehova ang ila natun-an gikan sa Kasulatan.—Bugna 7:9, 10.

18, 19. (a) Anong hamili nga impormasyon ang mahimo masugid sang tigulang nga mga alagad ni Jehova? (b) Sa ano dapat makasalig ang tigulang nga mga Cristiano?

 ¹⁸ Nasaksihan mismo sang tigulang nga mga alagad ni Jehova, mga hinaplas man ukon iban nga mga karnero, ang importante nga hitabo sa maragtas. Buhi pa gihapon ang pila nga nakatan-aw sang una nga ginpasalida ang “Photo-Drama of Creation.” Nakilala mismo sang iban ang nagapanguna nga mga utod nga lalaki nga ginbilanggo sang 1918. Pribilehiyo pa gani sang iban nga makawaragwag sa estasyunan sang radyo sang Watchtower, ang WBBR. Madamo pa ang makasaysay tuhoy sa mga kaso nga ginpasaka sang mga Saksi ni Jehova sa pinakamataas nga mga korte may kaangtanan sa ila kahilwayan sa relihion. Ang iban naman nanindugan para sa matuod nga pagsimba sa mga duog nga ginagamhan sang mga diktador. Huo, ang mga tigulang sarang makasugid kon paano ang paghangop sa kamatuoran amat-amat nga ginpahayag. Ang Biblia nagapalig-on sa aton nga panginpuslan ang ila madamo gid nga eksperiensia.—Deuteronomio 32:7.

¹⁹ Ang tigulang nga mga Cristiano ginpalig-on nga mangin huwaran sa mga pamatan-on. (Tito 2:2-4) Ayhan indi mo pa nakita karon ang epekto sang imo pagbatas, mga pangamuyo kag laygay sa iban. Sanday Noe, Abraham, Jose, Moises, kag ang iban pa ayhan wala gid magdahom sang daku nga epekto sang ila katutom sa kaliwatan nga magaabot. Apang, ang ila rekord sang pagtuo kag integridad makapalig-on gid; gani ang imo halimbawa makapalig-on man sa mga ulihi nga kaliwatan.

20. Ano nga mga pagpakamaayo ang matigayon sang mga naghupot nga malig-on sa ila paglaum tubtob sa katapusan?

²⁰ Daw ano gid ka makalilipay nga maagom ang “matuod nga kabuhi,” nakalampuwas ka man nga buhi sa “dakung kapipit-an” ukon ginbanhaw! (Mateo 24:21; 1 Timoteo 6:19) Handurawa ang tion nga ipasag-uli ni Jehova ang batan-on nga kapagsik sang mga tigulang sa sulod sang Isa ka Libo ka Tuig nga Paggahom ni Cristo. Sa baylo nga magluya ang aton lawas, magabugtaw kita kada adlaw nga labi nga nagapagsik—labi nga nagabaskog, labi nga nagasanag ang panan-aw, labi nga nagaanting nga palamatian, kag labi nga nagatahom! (Job 33:25; Isaias 35:5, 6) Ang mga papuy-on sa bag-o nga kalibutan sang Dios magapabilin gid nga pamatan-on tubtob sa walay katubtuban. (Isaias 65:22) Busa, kabay nga mahuptan naton tanan nga malig-on ang aton paglaum tubtob sa katapusan kag padayon nga mag-alagad kay Jehova sing bug-os kalag. Makasalig gid kita nga tumanon ni Jehova ang tanan niya nga ginsaad kag ang tanan niya nga himuon magalabaw gid sangsa mahanduraw naton.—Salmo 37:4; 145:16.

Ano ang Imo Sabat?

• Paano ginapakamaayo ang tanan nga katawhan bangod sang katutom sang tigulang nga si Noe?

• Ano ang epekto sang pagtuo sang mga patriarka sa ila mga kaliwatan?

• Sa ila katigulangon, paano sanday Jose, Moises, Josue, kag Samuel napalig-on sa ila mga masigkasumilimba?

• Ano nga palanublion ang mapapanubli sang mga tigulang?

[Mga Pamangkot sa Pagtinuon]

[Piktyur sa pahina 26]

Ang pagbatas ni Abraham may mabaskog nga epekto kay Isaac

[Piktyur sa pahina 28]

Ang hamtong nga laygay ni Moises nagpalig-on kay Josue

[Piktyur sa pahina 29]

Ang imo mga pangamuyo para sa iban daku ang mabulig

[Piktyur sa pahina 30]

Ang mga pamatan-on makapanginpulos sa pagpamati sa matutom nga mga tigulang