Ginailog Mo Bala si Jehova sa Pagpakita sing Pag-ulikid sa Iban?

“ITUGYAN ninyo [sa Dios] ang tanan ninyo nga kabalaka, bangod nagaulikid sia sa inyo.” (1 Pedro 5:7) Mahigugmaon gid ini nga pangagda! Nabalaka gid si Jehova nga Dios sa iya katawhan. Amo nga masaligan naton ang iya pag-atipan sa aton.

Dapat naton palambuon kag ipakita ini man nga mahigugmaon nga pag-ulikid sa iban. Bangod indi kita himpit, dapat naton andaman ang pila ka mga tugalbong kon nagapakita kita sing personal nga interes sa iban. Antes naton binagbinagon ang pila sini nga mga tugalbong, hambalan anay naton ang pila ka paagi nga ginapakita ni Jehova ang pag-ulikid sa iya katawhan.

Gingamit ni salmista David subong ilustrasyon ang isa ka manugbantay agod ilaragway ang pag-ulikid sang Dios: “Si Jehova amo ang akon Manugbantay. Wala sing makulang sa akon. Sa madabong nga mga halalban ginapahigda niya ako; sa luyo sang tubigon nga mga palahuwayan ginatuytuyan niya ako. Ginapabaskog niya ang akon kalag. . . . Bisan pa nagalakat ako sa nalupyakan sang pitipit nga kadulom, wala ako sing nahadlukan nga malaut, kay ikaw kaupod nakon.”—Salmo 23:1-4.

Bangod manugbantay sing karnero si David, may eksperiensia sia sa pag-atipan sa panong. Ginaamligan sang manugbantay ang iya panong batok sa mga lion, mga lobo, kag mga oso. Ginatipon niya ang panong, ginapangita ang nadula nga karnero, ginakugos ang maluya nga mga kordero, kag ginaatipan ang mga nagamasakit kag nasamaran. Kada adlaw ginapainom niya ang iya panong. Indi buot silingon sini nga ginakontrol sang manugbantay ang tanan nga hulag sang karnero. Hilway sila sa paghulag apang naamligan.

Amo man sini ang pag-atipan ni Jehova sa iya katawhan. Si apostol Pedro nagsiling: ‘Ginatipigan kamo sang gahom sang Dios.’ Ang ekspresyon diri nga “ginatipigan” literal nga nagakahulugan “ginabantayan.” (1 Pedro 1:5) Matuod gid ang kabalaka ni Jehova, amo nga pirme niya kita ginabantayan kag handa sia nga magbulig kon mangayo kita sing bulig sa iya. Apang, bangod gintuga kita ni Jehova nga may kahilwayan sa pagbuot, indi sa tanan nga tion nagapasilabot sia sa aton mga ginahimo kag mga desisyon. Paano naton mailog si Jehova sa sini nga bahin?

Iluga ang Dios sa Pag-atipan sa Imo mga Anak

“Ang mga anak palanublion gikan kay Jehova.” Busa, dapat amligan kag atipanon sang mga ginikanan ang ila mga anak. (Salmo 127:3) Sa sini nga katuyuan, mahimo nga mangita ang mga ginikanan sing paagi agod magpautwas ang ila mga kabataan sang ila ginabatyag kag binagbinagon ini kon nagapakig-angot sa ila kabataan. Kon kontrolon sang mga ginikanan ang tanan nga hulag sang ila kabataan, nga wala ginabinagbinag ang ila luyag, daw subong sila sang isa ka manugbantay nga ginahigtan ang iya karnero agod makontrol ini. Indi ini paghimuon sang isa ka manugbantay sa iya panong kag indi man subong sini ang pagbantay ni Jehova sa aton.

 Si Mariko * nagbaton: “Halin sang gamay pa sila, pirme ko lang ginahambalan ang akon mga bata nga, ‘Himuon mo ini,’ kag ‘Indi paghimua ina.’ Abi ko obligasyon ko ini subong ginikanan. Wala ko gid ginahatagan sing komendasyon ang akon mga anak, kag wala kami nagahambalanay sing maayo.” Malawig makighambal ang anak nga babayi ni Mariko sa iya mga abyan sa telepono, apang indi sia makapakighambal sing madugay sa iya iloy. “Nian, narealisar ko kon ngaa subong sini,” padayon ni Mariko. “Kon nagapakighambal sa iya mga abyan, ang akon anak nagagamit sing mahinuklugon nga mga tinaga subong sang, ‘Huo, husto ina’ ukon ‘Amo man sina ang ginabatyag ko.’ Gin-ilog ko man ini agod mahibaluan ko kon ano ang ginabatyag sang akon anak, kag wala magdugay nag-ayo ang amon paghambalanay.” Ginapakita sini nga importante ang maayo nga komunikasyon, nga sa masami indi isa lang ang nagahambalanay, kundi duha gid sila ang nagahambalanay.

Dapat mahibaluan sang mga ginikanan kon ano ang ginabatyag sang ila mga anak, apang dapat man mahangpan sang mga anak kon ngaa isa ka proteksion ang pag-atipan sang ila mga ginikanan sa ila. Ginalaygayan sang Biblia ang mga kabataan nga tumanon ang ila mga ginikanan kag ginsambit sini ang rason: “Agod mangin maayo ka kag magkabuhi ka sing malawig sa duta.” (Efeso 6:1, 3) Ang mga kabataan nga kumbinsido gid nga mapuslanon ang pagpasakop sa mga ginikanan indi mabudlayan sa pagtuman.

Sa Pag-atipan sa Panong ni Jehova

Ang mahigugmaon nga kabalaka ni Jehova makita sa Cristianong kongregasyon. Subong Ulo sang kongregasyon, ginasugo ni Jesucristo ang mga gulang nga atipanon ang iya panong. (Juan 21:15-17) Ang Griegong tinaga para sa manugtatap naangot sa berbo nga nagakahulugan “bantayi sing maayo.” Ginapadaku kon paano gid ini dapat himuon, ginasilingan ni Pedro ang mga gulang: “Bantayi ninyo ang panong sang Dios nga yara sa inyo pag-atipan, indi nga napilitan, kundi sing kinabubut-on; indi tungod sa gugma sa di-bunayag nga pagganar, kundi sing malangkagon; indi subong nagapakaginuo sa mga palanublion gikan sa Dios, kundi mangin mga halimbawa sa panong.”—1 Pedro 5:2, 3.

Huo, ang hilikuton sang mga gulang kaangay sa iya sang mga manugbantay. Dapat atipanon sang mga gulang ang mga nagamasakit sa espirituwal kag buligan sila nga magpasibu agod sundon nila ang matarong nga mga talaksan. Salabton sang mga gulang ang pag-organisar sang mga hilikuton sa sulod sang kongregasyon, paghimo sing mga kahimusan para sa mga miting, kag paghupot sang kahim-ong sa kongregasyon.—1 Corinto 14:33.

Apang, ginapatalupangod sa aton sang ginsiling ni Pedro ang isa ka katalagman—nga basi ‘magpakaginuo’ ang mga gulang sa kongregasyon. Mahimo  ‘nagapakaginuo’ ang mga gulang kon nagahimo sila sing di-nagakaigo nga mga pagsulundan. Bangod sang ila daku gid nga handum nga tumanon ang ila obligasyon nga amligan ang panong, mahimo magsobra ang isa ka gulang. Sa isa ka kongregasyon sa Sidlangan, naghimo sing pagsulundan ang mga gulang kon paano magtamyawanay ang mga utod sa Kingdom Hall—subong abi kon sin-o dapat ang una nga magbugno—sa pagpati nga ang pagsunod sa sini nga mga pagsulundan makaamot sa paghidait sang kongregasyon. Walay duhaduha nga maayo ang ila motibo, apang ginailog bala sining mga gulang ang pag-atipan ni Jehova sa iya katawhan? Sing talalupangdon, ginapakita ni apostol Pablo kon ano ang iya ginahunahuna, sa pagsiling: “Indi nga mga agalon kami sang inyo pagtuo, kundi mga masigkamanugpangabudlay kami para sa inyo kalipay, kay nagatindog kamo bangod sa inyo pagtuo.” (2 Corinto 1:24) Si Jehova may pagsalig sa iya katawhan.

Magluwas nga wala sila nagahimo sing mga pagsulundan nga wala napasad sa Biblia, mapakita man sang mga gulang nga nagaulikid gid sila kon wala nila ginabuyagyag ang kompidensial nga mga impormasyon. Ginatandaan nila ang paandam sang Dios: “Indi pag-ibuyagyag ang likom sang iban.”—Hulubaton 25:9.

Ginpaanggid ni apostol Pablo ang kongregasyon sang hinaplas nga mga Cristiano sa tawhanon nga lawas: “Gintingob sang Dios ang lawas . . . agod nga walay pagbinahinbahin sa lawas, kundi ang mga bahin sini may yara kaanggid nga pag-ulikid sa isa kag isa.” (1 Corinto 12:12, 24-26) Ang Griegong ekspresyon nga “kaanggid nga pag-ulikid sa isa kag isa” literal nga nagakahulugan sing ‘pagkabalaka sa isa kag isa.’ Ang mga katapo sang Cristianong kongregasyon dapat may tudok gid nga interes sa isa kag isa.—Filipos 2:4.

Paano mapakita sang matuod nga mga Cristiano nga ‘nagakabalaka sila sa isa kag isa’? Mapakita nila ang ila kabalaka sa iban nga katapo sang kongregasyon paagi sa ila mga pangamuyo kag pagbulig sa mga nagakinahanglan. Nagabulig ini sa iban nga himuon man ang maayo. Binagbinaga si Tadataka. Sang ginbawtismuhan sia sa edad nga 17, sia lang ang nagaalagad kay Jehova sa iya pamilya. Sia nag-asoy: “May isa ka pamilya sa kongregasyon nga pirme nagaagda sa akon nga magkaon upod sa ila kag sa mga pagtinipon. Nagahapit ako sa ila kada aga antes ako magkadto sa eskwelahan agod binagbinagon ang teksto sa Biblia para sa sina nga adlaw. Ginbuligan nila ako nga malandas ang mga problema sa eskwelahan, kag ululupod namon ini nga ginapangamuyo. Natun-an ko ang espiritu sang paghatag gikan sa sini nga pamilya.” Ginaaplikar karon ni Tadataka ang iya natun-an paagi sa pag-alagad sa isa sang mga sanga talatapan sang mga Saksi ni Jehova.

Si apostol Pablo nagpaandam sa isa ka tugalbong kon tuhoy sa pagpakita sing interes sa iban. Ginsambit niya ang pila ka mga babayi nga nangin ‘mga kutsokutsera kag mga hilabtera sa mga hilikuton sang iban nga mga tawo, nga nagahambal sang mga butang nga indi nila dapat ihambal.’ (1 Timoteo 5:13) Bisan pa nagakaigo nga magpakita kita sing interes sa iban, dapat kita mag-andam nga indi kita mangin hilabtera sa ginahimo sang iban. Ang aton pagpakita sing interes sa iban indi nagakaigo kon ‘nagahambal kita sing mga butang nga indi dapat ihambal,’ subong sang mahukmanon nga mga tinaga.

Dapat naton tandaan nga mahimo indi pareho ang mga Cristiano sa ila personal nga ginahimo, kon ano ang ila luyag kaunon kag kon ano nga nagakaigo nga paglingawlingaw ang ila pilion. Ang kada isa hilway sa paghimo sang luyag niya kon ini nahisuno sa mga prinsipio sang Biblia. Ginlaygayan ni Pablo ang mga Cristiano sa Roma: “Indi na kita maghukom sa isa kag isa. . . . Tinguhaan naton nga himuon ang mga butang nga nagadala sang paghidait kag ang mga butang nga makapabakod sa isa kag isa.” (Roma 14:13, 19) Dapat naton ipakita ang aton sinsero nga kabalaka sa tagsatagsa sa kongregasyon indi paagi sa paghilabot sa ginahimo sang iban, kundi sa aton kahanda sa pagbulig. Kon ginaulikdan naton ang isa kag isa sa sini nga paagi, ang gugma kag paghiusa magalambo sa pamilya kag sa kongregasyon.

[Footnote]

[Piktyur sa pahina 19]

Kon hatagan mo sing komendasyon kag pakitaan sing kahanuklog ang imo kabataan, madula ang ila katahap kag magahambal sila sa imo