Mga Pamangkot Gikan sa mga Bumalasa

May tiil bala ang man-ug nga nakighambal kay Eva?

Subong sang narekord sa Genesis 3:14, naghambal si Jehova nga Dios sa man-ug nga naglimbong kay Eva sa hardin sang Eden. Ang Dios nagsiling: “Bangod ginhimo mo ini nga butang, pinakamalaut ka labi sa tanan nga mahagop nga kasapatan kag sa tanan nga ilahas nga kasapatan sang latagon. Magalakat ka nga nagasaug sa imo tiyan kag magakaon ka sing yab-ok sa tanan nga adlaw sang imo kabuhi.” Wala ginasambit sang Biblia kon bala may tiil anay ang sapat nga gingamit sa pagsulay kay Eva. Walay sapayan nga mahimo amo sini ang hunahunaon sang iban bangod sang ginasiling sa Genesis 3:14, indi kita makasiling nga may tiil anay ang man-ug antes ini ginpakamalaut. Ngaa?

Bangod ang ginpakamalaut gid ni Jehova amo si Satanas—ang di-makita nga espiritu nga naggamit sini nga sapat sa sayop nga paagi. Ginalaragway sang Biblia si Satanas subong ang “amay sang kabutigan” kag “ang orihinal nga man-ug.” Ining duha ka ekspresyon nagapatuhoy sa paggamit ni Satanas sing isa ka sapat, ang man-ug, subong iya manughambal agod hayluhon si Eva nga lapason ang sugo sang Dios.—Juan 8:44; Bugna 20:2.

Ang Dios ang nagtuga sa mga man-ug, kag mahimo nga nangalanan na ni Adan ang mga man-ug antes ini gingamit ni Satanas sa paglimbong kay Eva. Ining walay buot nga man-ug nga nakighambal kay Eva indi amo ang balasulon. Ang man-ug wala makahibalo nga ginamaniobra ini ni Satanas, kag wala ini sing hinalung-ong tuhoy sa paghukom sang Dios kay Eva kag kay Satanas.

Apang, ngaa naghambal ang Dios tuhoy sa manubo nga kahimtangan sang man-ug? Ang kinaugali sang man-ug nga nagasaug kag nagadiwaldiwal sang iya dila, nga daw nagadilap sing yab-ok, nagasimbulo gid sa ginpanubo nga kahimtangan ni Satanas. Mataas anay ang iya posisyon subong isa sa mga anghel sang Dios, apang gintagbong sia sa manubo nga kahimtangan nga ginatawag sa Biblia nga Tartaro.—2 Pedro 2:4.

Dugang pa, subong nga mahimo masamaran sang isa ka literal nga man-ug ang tikod sang isa ka tawo, ang gintagbong nga si Satanas ‘magadugmok sang tikod’ sang “binhi” sang Dios. (Genesis 3:15) Ang panguna nga bahin sini nga binhi amo si Jesucristo, nga nag-antos sing umalagi sa kamot sang mga tiglawas ni Satanas. Apang, dugmukon sa ulihi ni Cristo kag sang ginbanhaw nga hinaplas nga mga Cristiano nga kaupod niya ang ulo sang simbuliko nga man-ug. (Roma 16:20) Gani, ang pagpakamalaut sang Dios nagakaigo nga nagalaragway sa bug-os nga pagkalaglag sa ulihi sang di-makita nga “orihinal nga man-ug,” nga si Satanas nga Yawa.