Ang Panudlo Gikan sa Biblia Nagapabakod sang Pagtuo

“BILIDHON gid nga pribilehiyo nga ihinguyang ang nagligad nga lima ka bulan sa pagtalupangod sa mga panghunahuna sang aton Manunuga kag tun-an nga tamdon ang mga butang suno sa iya pagtamod!” siling sang isa ka tiglawas sang ika-122 nga klase sang Watchtower Bible School of Gilead sa adlaw sang gradwasyon. Indi gid malipatan sang 56 ka katapo sang klase ang Marso 10, 2007. Malapit na nila sugdan ang ila pag-alagad subong misyonero sa 26 ka pungsod nga padalhan sa ila.

Sa tapos gin-abiabi ni Theodore Jaracz, katapo sang Nagadumala nga Hubon, ang 6,205 nga nagtambong, nagsiling sia: “Nagasalig kami nga mapalig-on ang kaangtanan ninyo sa Dios kag mapabakod ang inyo pagtuo bangod sa pagtambong sa sini nga gradwasyon.” Ginpakilala niya ang apat ka humalambal nga magahatag sa mga estudyante sing sibu sa tion nga pagpalig-on kag laygay gikan sa Biblia agod mangin madinalag-on sila sa ila pagmisyonero.

Pagpalig-on sa mga Gradwado nga Pabakuron ang Pagtuo sang Iban

Si Leon Weaver, katapo sang Komite sang Sanga sa Estados Unidos, nagpamulongpulong sa tema nga “Padayon nga Himua ang Maayo.” Ginpahanumdom niya ang mga estudyante nga sa promedyo, ang tagsa sa ila nakahinguyang na sing 13 ka tuig sa bug-os tion nga pagpanudlo sang Biblia nga nagapabakod sang pagtuo. Sia nagsiling: “Maayo ini nga hilikuton kay nagaluwas ini sang kabuhi sang mga tawo, kag labi ka importante, maayo ini nga hilikuton kay ginapakadaku sini ang aton langitnon nga Amay, si Jehova.” Nian ginpalig-on ni Utod Weaver ang mga estudyante nga padayon nga ‘magsab-ug para sa espiritu’ kag indi ‘mangampo sa paghimo sing maayo.’—Galacia 6:8, 9.

Si David Splane, katapo sang Nagadumala nga Hubon, naghatag sing praktikal nga mga pahanumdom sa iya tema, “Pat-ura nga Mangin Maayo ang Inyo Una nga Tikang.” Ginpalig-on ni Utod Splane ang bag-o nga mga misyonero nga magsugod sing madinalag-on sa ila asaynment paagi sa paghimo sang mga masunod: “Maghupot sing positibo nga panimuot. Indi magpadasudaso sa pagdesisyon. Mangin mainabyanon. Indi mangin mamulayon. Mangin mapainubuson kag tahuron ang mga kauturan sa ila teritoryo.” Nian nagdugang sia: “Pagpanaug ninyo sa eroplano, himua nga mangin maayo ang inyo una nga tikang, kag kabay nga pakamaayuhon ni Jehova ang inyo matahom nga mga tiil samtang nagadala ini sa mga tawo sing ‘maayong balita tuhoy sa butang nga maayo pa.’”—Isaias 52:7.

Ang tema sang instruktor sang  Gilead nga si Lawrence Bowen amo ang “Isa ka Pat-od gid nga Palanublion.” Ginpahanumdom ni Utod Bowen ang mga estudyante nga sang ginsugdan ang eskwelahan sang Gilead sa tion sang Bug-os Kalibutan nga Inaway II, nagsalig ini sing bug-os sa katumanan sang mga tagna sa Pulong ni Jehova. (Hebreo 11:1; Bugna 17:8) Kutob sadto, naghatag ang Gilead sing kahigayunan sa mga estudyante nga pabakuron ang ila pagtuo. Ginapahulag sang mabakod nga pagtuo ang mga gradwado nga maglakat kag makugi nga ibantala ang kamatuoran.

Si Mark Noumair, isa pa ka instruktor sang Gilead, nagpamulongpulong tuhoy sa makawiwili nga tema nga “May Madumduman Ako nga Tawo Kaangay sa Inyo.” Ginpatalupangod  niya ang halimbawa ni manalagna Eliseo nga nagpakita sing pagtuo kag kaisog sa iya hilikuton. Pasad sa 1 Hari 19:21, si Utod Noumair nagsiling: “Si Eliseo handa sa paghimo sing mga pagbag-o sa iya kabuhi, wala niya gin-una ang iya kaugalingon, kag ginbantala niya ang katuyuan ni Jehova.” Gindayaw niya ang mga estudyante kay amo man ini ang ila panimuot kag ginpalig-on niya sila nga padayunon ini sa ila bag-o nga asaynment.

Kahilwayan sa Paghambal Bangod sa Pagtuo

Samtang ginapabakod sang palaabuton nga mga misyonero ang ila pagtuo sa ila pag-eskwela, ginhinguyang nila ang mga talipuspusan sang semana agod ibantala ang maayong balita sa iban. Nagresulta ini sa maayo nga mga eksperiensia nga ginsaysay kag gin-akto sa bahin sang programa nga gindumalahan ni Wallace Liverance, isa pa ka instruktor sang Gilead. Ang tema sang iya bahin nga “Nagtuo Kami kag Gani Naghambal Kami,” nagpahanumdom sang mga pulong ni apostol Pablo sa 2 Corinto 4:13.

Pagkatapos sini, gin-interbyu ni Daniel Barnes kag Charles Woody, mga katapo sang pamilya Bethel, ang mga misyonero anay kag karon. Ginpadaku sini ang pag-atipan kag pagpakamaayo ni Jehova sa mga nagaalagad sa iya sing matutom. (Hulubaton 10:22; 1 Pedro 5:7) Ang isa ka misyonero nagkomento: “Naeksperiensiahan gid namon sang akon asawa ang pag-atipan ni Jehova paagi sa panudlo nga nabaton namon sa Gilead. Napabakod gid sini ang amon pagtuo. Importante ang pagtuo bangod ang tanan nga alagad ni Jehova, lakip ang mga misyonero, magaatubang sing mga pagtilaw, mga problema kag mga kabalaka.”

Padayon nga Ibantala ang Panudlo Gikan sa Biblia nga Nagapabakod sang Pagtuo

Sa paghingapos sang gradwasyon, nagakaigo gid ang pamulongpulong ni Samuel Herd, katapo sang Nagadumala nga Hubon, sa topiko nga “Padayon nga Pabakura ang Inyo mga Kauturan.” Ano ang katuyuan sang natun-an sang mga estudyante? “Katuyuan sini nga tudluan kamo kon paano gamiton ang inyo dila sa pagdayaw kay Jehova, sa pagtudlo sing kamatuoran sa iban sa inyo bag-o nga teritoryo, kag sa pagpabakod sing pagtuo sang inyo mga kauturan,” siling ni Utod Herd. Apang ginpahanumdom niya ang mga estudyante nga ang dila mahimo man gamiton sa indi makapalig-on nga paagi. (Hulubaton 18:21; Santiago 3:8-10) Ginpalig-on niya ang mga estudyante nga ilugon si Jesus sa paggamit sang ila dila. Isa ka bes, sa tapos mamati kay Jesus ang iya mga disipulo, sila nagsiling: “Wala bala nagdabdab ang aton tagipusuon . . . samtang ginatalastas niya sa aton sing bug-os ang Kasulatan?” (Lucas 24:32) Si Utod Herd nagsiling: “Kon makapalig-on ang inyo ginahambal, mapalig-on sini ang inyo mga kauturan sa inyo teritoryo.”

Pagkatapos sini, nabaton sang mga gradwado ang ila diploma. Dayon ginbasa ang isa ka sulat sang pagpasalamat gikan sa klase. Ini nagsiling: “Nabatyagan gid namon ang katungdanan nga gamiton ang amon natun-an agod tumanon sing matutom ang amon asaynment subong mga misyonero. Karon nga handa na kami sa pagkadto sa malayo nga mga bahin sang duta, nagapangamuyo kami nga ang amon panikasog magaresulta sa mabaskog nga singgit sang pagdayaw sa aton Daku nga Instruktor, si Jehova nga Dios.” Natandog gid ang tumalambong kag nagpinalakpak sila. Napabakod gid sang gradwasyon ang pagtuo sang tanan nga nagtambong.

[Blurb sa pahina 17]

“Kon makapalig-on ang inyo ginahambal, mapalig-on sini ang inyo mga kauturan sa inyo teritoryo”

[Kahon sa pahina 15]

ESTADISTIKA SANG KLASE

Kadamuon sang pungsod nga gintiglawas: 9

Kadamuon sang pungsod nga ginpadalhan: 26

Kadamuon sang estudyante: 56

Promedyo nga edad: 33.4

Promedyo nga tuig sa kamatuoran: 16.8

Promedyo nga tuig sa bug-os tion nga ministeryo: 13

[Piktyur sa pahina 16]

Ika-122 nga Naggradwar nga Klase Sang Watchtower Bible School of Gilead

Sa listahan sa ubos, ang mga raya nanumeruhan halin sa atubangan pa likod, kag ang mga ngalan nalista halin sa wala pa tuo sa tagsa ka raya.

(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.