Makabatas Ka Bala Tubtob sa Adlaw ni Jehova?
Makabatas Ka Bala Tubtob sa Adlaw ni Jehova?
“Idugang sa inyo pagtuo . . . ang pagbatas.”—2 PEDRO 1:5, 6, NW.
1, 2. Ano ang pagbatas, kag ngaa kinahanglan nga magbatas ang mga Cristiano?
MALAPIT na gid ang adlaw ni Jehova. (Joel 1:15; Sofonias 1:14) Subong mga Cristiano nga determinado sa pagpabilin nga matutom sa Dios, ginakalangkagan naton ang tion nga mabindikar ang pagkasoberano ni Jehova. Samtang ginahulat naton ini, mahimo nga dumtan kita sang mga tawo, pakahuy-an, hingabuton, kag patyon bangod sang aton pagtuo. (Mateo 5:10-12; 10:22; Bugna 2:10) Sa sini nga kahimtangan, kinahanglan ang pagbatas—ang ikasarang nga antuson ang mga kabudlayan. Si apostol Pedro nagalaygay sa aton: “Idugang sa inyo pagtuo . . . ang pagbatas.” (2 Pedro 1:5, 6, NW) Kinahanglan nga magbatas kita, kay nagsiling si Jesus: “Ang nagapadayon [“nakabatas,” NW] tubtub sa katapusan maluwas.”—Mateo 24:13.
2 Mahimo man nga ang pagtilaw nga maabot sa aton amo ang balatian, pagkapatay sang aton hinigugma, kag iban pa nga mga problema. Malipay gid si Satanas kon bangod sini magluya ang aton pagtuo! (Lucas 22:31, 32) Apang, sa bulig ni Jehova, mabatas naton ang nanuhaytuhay nga mga pagtilaw. (1 Pedro 5:6-11) Binagbinaga ang pila ka eksperiensia nga nagapamatuod nga samtang ginahulat naton ang adlaw ni Jehova, mabatas naton ang aton mga problema nga wala nagaluya ang aton pagtuo.
Wala Sila Mapunggan sang Balatian
3, 4. Maghatag sing isa ka halimbawa agod ipakita nga makaalagad gihapon kita kay Jehova sing matutom walay sapayan sang balatian.
3 Wala nagahimo ang Dios sing milagro agod mabulong ang aton balatian, apang ginahatagan niya kita sing kusog agod mabatas naton ini. (Salmo 41:1-3) “Tubtob sa akon madumduman,” siling ni Sharon, “pirme lang wheelchair ang kaupod ko. May balatian na ako sang matawo ako, gani wala ko maagyan ang kalipay nga naagyan sang iban nga mga bata.” Nagsanag ang paglaum ni Sharon sang makilala niya si Jehova kag matun-an ang iya ginasaad nga himpit nga panglawas. Bisan pa nabudlayan sia maghambal kag maglakat, nalipay sia sa pagpakigbahin sa Cristiano nga ministeryo. Mga 15 ka tuig na ang nagligad, nagsiling sia: “Mahimo nga magagrabe pa ang akon balatian, apang ginapabaskog ako sang akon pagsalig kag kaangtanan sa Dios. Malipayon gid ako nga isa ako sa katawhan ni Jehova kag ginabuligan niya ako pirme!”
4 Ginlaygayan ni apostol Pablo ang mga Cristiano sa Tesalonica nga “palig-onon ang mga mahuyang sing tagipusoon.” (1 Tesalonica 5:14) Ang daku nga kapaslawan mahimo bangdan sang depresyon. Sang 1993, nagsulat si Sharon: “Bangod sa pamatyag ko daw wala gid ako sing hinimuan, tatlo ka tuig nga nahugakom ako sang grabe nga depresyon. . . . Ginlugpayan ako kag ginlaygayan sang mga gulang. . . . Paagi sa Ang Lalantawan, mahigugmaon nga ginpahangop sa akon ni Jehova kon ano ang grabe nga depresyon. Huo, nagaulikid gid sia sa iya katawhan kag nahangpan niya ang aton ginabatyag.” (1 Pedro 5:6, 7) Matutom gihapon nga nagaalagad si Sharon sa Dios samtang ginahulat niya ang daku nga adlaw ni Jehova.
5. Ano ang pamatuod nga makabatas ang mga Cristiano walay sapayan sang butang nga naeksperiensiahan nila nga nagatublag gihapon sa ila?
5 Tuhoy sa iban naman nga mga Cristiano, ang ila mga naeksperiensiahan sa kabuhi isa ka butang nga nagatublag gihapon sa ila. Nasaksihan ni Harley ang malapuyot nga inaway sa tion sang Bug-os Kalibutan nga Inaway II kag ginadaman gihapon sia bangod sini. Samtang nagakatulog, nagasinggit sia: “Bantay ka! Alisto ka!” Ginapalamalhas gid sia pagmata niya. Walay sapayan sini nga problema, padayon gihapon sia nga nagaalagad sa Dios, kag sang ulihi, amat-amat nga naglaka kag indi na tanto kagrabe ini nga mga pagdamgo.
6. Ano ang ginhimo sang isa ka Cristiano walay sapayan sang iya problema sa emosyon?
6 Ang isa ka Cristiano nga may problema sa emosyon nabudlayan gid sa pagpamalaybalay. Walay sapayan sini, padayon gihapon nga ginabantala niya ang Ginharian sang Dios, bangod narealisar niya nga nagakahulugan ini sing kabuhi para sa iya kag para sa mga tawo nga mamati sa iya. (1 Timoteo 4:16) Kon kaisa, daw indi niya mahimo bisan ang pagtum-ok lang sa doorbell, apang nagsiling sia: “Madugaydugay, makontrol ko na ang akon emosyon, kag nagapadayon ako sa masunod nga balay. Paagi sa padayon nga pagpakigbahin sa ministeryo, nakapabilin ako nga mabaskog sa espirituwal.” Indi mahapos para sa iya ang pagtambong sa mga miting, apang nakumbinsi ini nga utod nga lalaki nga mapuslanon gid ang pagpakig-upod sa Cristiano nga mga kauturan. Amo kon ngaa, nagapanikasog gid sia sa pagtambong.—Hebreo 10:24, 25.
7. Bisan pa nahadlok ang iban nga maghambal sa publiko ukon magtambong sa mga miting, paano sila nagabatas?
7 Ang iban nga mga Cristiano may phobia—sobra nga kahadlok sa pila ka kahimtangan ukon butang. Halimbawa, mahimo nga nahadlok sila maghambal sa publiko ukon bisan gani magtambong sa mga miting. Handurawa kon daw ano kabudlay para sa ila ang magkomento sa Cristiano nga mga miting ukon ang paghatag sing pamulongpulong sa Teokratikong Eskwelahan Para sa Ministeryo! Apang, nagabatas sila, kag ginaapresyar gid naton ang ila pagtambong kag pagpakigbahin.
8. Ano ang makabulig gid agod malandas ang problema sa emosyon?
8 Ang dugang nga pahuway kag tulog mahimo nga makabulig sa isa ka tawo agod mabatas ang iya problema sa emosyon. Maalamon man nga magpadoktor. Apang, ang pagsandig sa Dios paagi sa pangamuyo, makabulig gid. “Itungtung sa GINOO ang imo lulan, kag sia magaalay-ay sa imo,” siling sang Salmo 55:22. “Indi sia magtugut nga malingkang ang matarung.” Kon amo, “salig sa GINOO sa bug-os mo nga tagipusoon.”—Hulubaton 3:5, 6.
Pagbatas Kon Mamatyan Ka
9-11. (a) Ano ang makabulig sa aton nga mabatas ang kasubo kon mapatay ang isa ka hinigugma? (b) Paano ang halimbawa ni Ana makabulig sa aton nga mabatas ang kasubo kon mamatyan kita?
9 Ang pagkapatay sang isa ka katapo sang pamilya mahimo bangdan sang daku nga kasubo. Naghibi si Abraham sang mapatay ang iya hinigugma nga asawa nga si Sara. (Genesis 23:2) Bisan gani si Jesus nga isa ka himpit nga tawo “naghibi” sang mapatay ang iya abyan nga si Lazaro. (Juan 11:35) Gani, natural lamang nga masubuan ka kon mapatay ang isa nga ginahigugma mo. Apang, nakahibalo ang mga Cristiano nga may pagkabanhaw. (Binuhatan 24:15) Gani, wala sila ‘nagakasubu subong sang iban nga walay paglaum.’—1 Tesalonica 4:13.
10 Paano mo malandas ang kasubo kon mamatyan ka? Mahimo nga makabulig ang isa ka ilustrasyon. Masami nga kon magbakasyon gani ang aton abyan, agi lang ang aton pagpangasubo, bangod nagalaum kita nga makita naton sia liwat kon magbalik sia. Kon amo man sini ang hunahunaon naton tuhoy sa isa ka matutom nga Cristiano nga napatay, mahimo nga maghaganhagan ang aton kasubo bangod nahibaluan naton nga banhawon sia.—Manugwali 7:1.
11 Ang bug-os nga pagsalig sa “Dios sang tanan nga paglipay” magabulig sa aton agod mabatas ang kasubo nga ginabatyag naton bangod sa pagkapatay sang isa nga hinigugma. (2 Corinto 1:3, 4) Makabulig man kon binagbinagon naton ang ginhimo anay sang balo nga si Ana sang nahauna nga siglo. Nabalo sia pagligad lamang sang pito ka tuig nga pag-asawahay. Apang sa edad nga 84, nagahimo gihapon sia sing sagrado nga pag-alagad kay Jehova sa templo. (Lucas 2:36-38) Mahimo gid nga ang iya makugi nga pag-alagad sa Dios nakabulig sa iya nga mabatas ang iya kasubo. Ang regular nga pagpakigbahin sa Cristiano nga mga hilikuton, lakip ang pagbantala sing Ginharian sang Dios, makabulig sa aton nga mabatas ang kasubo kon mamatyan kita.
Pag-atubang sa Nanuhaytuhay nga mga Pagtilaw
12. Ano nga pagtilaw may kaangtanan sa pamilya ang ginabatas sang iban nga mga Cristiano?
12 Ang iban nga mga Cristiano nagabatas sing mga pagtilaw nga may kaangtanan sa ila pamilya. Halimbawa, masakit gid kon ang isa ka tiayon magluib! Bangod nasubuan kag indi mabaton ang natabo, mahimo nga indi makatulog kag maghilibion ang ginluiban nga tiayon. Mahimo nga mabudlay himuon bisan ang simple lamang nga hilikuton amo nga indi malikawan ang pagsala ukon mga aksidente. Mahimo nga ang inosente nga tiayon madulaan sing gana sa pagkaon, magniwang, kag mangin emosyonal. Mahimo mabudlayan sia sa pagpakigbahin sa Cristiano nga mga hilikuton. Kag mahimo nga maapektuhan man ang mga kabataan!
13, 14. (a) Paano ka napalig-on sang pangamuyo ni Solomon sang gin-inagurasyunan ang templo? (b) Ngaa dapat kita mangamuyo sa Dios para sa balaan nga espiritu?
13 Kon makaeksperiensia kita sing subong sini nga mga pagtilaw, ginahatag ni Jehova ang bulig nga ginakinahanglan naton. (Salmo 94:19) Ang pangamuyo ni Hari Solomon sang gin-inagurasyunan ang templo ni Jehova nagapakita nga ginapamatian sang Dios ang pangamuyo sang iya katawhan. Nangamuyo si Solomon sa Dios: “Bisan anong pangamuyo kag pag-ampo nga himoon sang bisan sin-ong tawo ukon sang imo bug-os nga katawohan nga Israel, nga ang tagsa ka tawo makahibalo sang kalalat-an sang iya kaugalingon nga tagiposoon kag magbayaw sang iya mga kamut nayon sining balay; niyan pamati ka sa langit nga imo puluy-an, kag patawara, kag himoa, kag ihatag sa tagsa ka tawo sono sa tanan niyang pagginawi, nga nakilala mo ang ila tagiposoon (kay ikaw, ikaw gid lamang, ang nakakilala sang mga tagiposoon sang tanan nga anak sang mga tawo); agud nga magkahadluk sila sa imo sa tanan nga adlaw nga nagakabuhi sila sa duta nga ginhatag mo sa amon mga ginikanan.”—1 Hari 8:38-40.
14 Makabulig gid kon padayon kita nga mangamuyo sa Dios para sa balaan nga espiritu. (Mateo 7:7-11) Ang bunga sang espiritu nagalakip sang mga kinaiya subong sang kalipay kag paghidait. (Galacia 5:22, 23) Nalipay gid kita kon ginasabat sang aton langitnon nga Amay ang aton mga pangamuyo—ang aton kasubo ginabuslan sang kalipay, kag ang aton kalisang ginabuslan sang kalinong!
15. Ano nga mga teksto ang makabulig sa pagpahaganhagan sang aton kabalaka?
15 Natural lamang nga makabatyag kita sing kabalaka kon may problema kita. Apang mahimo nga maghaganhagan ini nga kabalaka kon tandaan naton ang ginsiling ni Jesus: “Dili kamo maghimud-os nahanungud sang inyo kabuhi, kon ano ang inyo kaonon ukon ano ang inyo imnon, bisan pa nahanungud sang inyo lawas, kon ano ang inyo ipanaput. ... Apang pangitaa anay ninyo ang ginharian sang Dios kag ang iya pagkamatarung, kag tanan ini nga butang idugang sa inyo.” (Mateo 6:25, 33, 34) Ginalaygayan kita ni apostol Pedro nga ‘itugyan ang tanan naton nga paghimud-os sa Dios, kay sia nagakabalaka sa aton.’ (1 Pedro 5:6, 7) Agod malubad ang isa ka problema, nagakaigo lamang nga manikasog kita. Apang, kon nahimo na naton ang aton masarangan, indi ang pagkabalaka sa problema kundi ang pangamuyo ang makabulig sa aton. “Itugyan sa GINOO ang imo dalanon; salig man sa iya, kag himoon niya ini,” amba sang salmista.—Salmo 37:5.
16, 17. (a) Ngaa indi mahimo nga madula sing bug-os ang aton kabalaka? (b) Ano ang matigayon naton kon iaplikar naton ang Filipos 4:6, 7?
16 Nagsulat si Pablo: “Dili kamo maghimud-os sa bisan ano, kondi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay. Kag ang paghidait sang Dios, nga nagalabaw sa tanan nga paghangup, magatipig sang inyo mga tagiposoon kag inyo mga painoino sa kay Cristo Jesus.” (Filipos 4:6, 7) Indi mahimo nga madula sing bug-os ang kabalaka sang mga kaliwat ni Adan bangod indi sila himpit. (Roma 5:12) Ang Hethanon nga mga asawa ni Esau ‘nanginkapaitan sa espiritu’ sang diosnon nga mga ginikanan ni Esau nga sanday Isaac kag Rebeka. (Genesis 26:34, 35) Mahimo gid nga nagkabalaka ang mga Cristiano nga sanday Timoteo kag Trofimo bangod sang ila balatian. (1 Timoteo 5:23; 2 Timoteo 4:20) Ginkabalak-an ni Pablo ang iya mga masigkatumuluo. (2 Corinto 11:28) Apang ang “nagapamati sang pangamuyo” mapalapitan pirme sang mga nagahigugma sa iya.—Salmo 65:2.
17 Samtang ginahulat naton ang adlaw ni Jehova, ginabuligan kita kag ginalugpayan sang “Dios sang paghidait.” (Filipos 4:9) Si Jehova “maloloy-on kag mainayohon,” “maayo kag handa sa pagpatawad,” kag “nagadumdum sia nga kita yab-ok.” (Exodo 34:6; Salmo 86:5; 103:13, 14) Gani, ‘ipakilala sa Dios ang aton mga pangabay,’ agod matigayon naton “ang paghidait sang Dios”—ang kalinong nga indi mapaathag sang tawo.
18. Subong sang nasambit sa Job 42:5, paano naton “makita” ang Dios?
18 Kon masabat ang aton mga pangamuyo, nahibaluan naton nga ang Dios kaupod naton. Sa tapos mabatas ni Job ang mga pagtilaw sa iya, nagsiling sia: “Sa hinuringhuring nakabati ako tuhoy sa imo [Jehova], apang karon makita ka sang akon mata.” (Job 42:5, NW) Paagi sa mata sang paghangop, pagtuo, kag pagpasalamat, sarang naton mabinagbinag ang mga pagpakig-angot sang Dios sa aton kag “makita” naton sia sa isa ka pinasahi nga paagi nga wala pa naton makita sang una. Ining suod nga pagkakilala naton sa Dios nagahatag sa aton sing kalinong sa tagipusuon kag hunahuna!
19. Ano ang mahanabo kon ‘itugyan naton ang tanan naton nga paghimud-os sa Dios’?
19 Kon ‘itugyan naton ang tanan naton nga paghimud-os sa Dios,’ mabatas naton ang mga pagtilaw kag makabatyag kita sing kalinong sa aton kaugalingon nga nagabantay sang aton tagipusuon kag ikasarang sa paghunahuna. Sa alibutod sang aton malaragwayon nga tagipusuon, indi kita mahangawa, indi kita mahadlok, kag indi kita magsalangisag. Indi maglibog ang aton ulo ukon indi kita magkabalaka, gani indi maggamo ang aton hunahuna.
20, 21. (a) Ang halimbawa ni Esteban nagahatag sing ano nga pamatuod tuhoy sa kalinong nga mabatyagan sang isa kon ginahingabot sia? (b) Maghatag sing isa ka halimbawa karon nga nagapakita sing kalmante nga panimuot kon ginatilawan ang patuo.
20 Ginpakita ni disipulo Esteban ang kalinong nga ginbatyag niya sang gintilawan sing mabaskog ang iya pagtuo. Antes sia maghatag sang iya hingapusan nga panaksi, nakita sang tanan sa Sanhedrin nga ang “iya nawung subong sang nawung sang manugtunda [“anghel,” NW].” (Binuhatan 6:15) May kalinong ang iya nawong kaangay sang isa ka anghel nga mensahero sang Dios. Sang ginbuyagyag ni Esteban ang sala nga nahimo nila sa pagpapatay kay Jesus, “naalipungut” ang mga hukom, “kag ginpabagrutan nila sia sang ila mga ngipon.” “Puno sang Espiritu Santo, [“balaan nga espiritu,” NW]” nagtangla si Esteban sa langit kag ‘nakita niya ang himaya sang Dios kag si Jesus nga nagatindog sa too sang Dios.’ Bangod napalig-on sini nga palanan-awon, nangin matutom si Esteban tubtob sa kamatayon. (Binuhatan 7:52-60) Bisan pa wala kita sing mga palanan-awon karon, mabatyagan gihapon naton ang kalinong halin sa Dios kon ginahingabot kita.
21 Binagbinaga ang ginsiling sang pila ka Cristiano nga ginpatay sang mga Nazi sa tion sang Bug-os Kalibutan nga Inaway II. Nagaasoy sang iya naeksperiensiahan sa hukmanan, ang isa nagsiling: “Ang sentensia nga kamatayon ginbasa na sa akon. Namati ako, kag pagkatapos ko mahambal ang mga pulong nga, ‘Magmatutom ka tubtob sa kamatayon,’ kag ang pila pa ka pulong sang aton Ginuo, nahibaluan ko nga natapos na ang tanan . . . Apang indi kamo magkabalaka. Kay indi gid ninyo mahanduraw ang kalinong nga akon ginabatyag karon!” Ang isa ka lamharon nga Cristiano nga pulugutan sing ulo nagsulat sa iya mga ginikanan: “Lampas na sa tungang-gab-i karon. Puede ko pa bag-uhon ang akon desisyon. Apang, mangin malipayon pa ayhan ako sa sini nga kalibutan kon ipanghiwala ko ang aton Ginuo? Sigurado nga indi gid! Apang, makasalig gid kamo karon nga biyaan ko ini nga kalibutan nga may kalipay kag kalinong.” Indi maduhaduhaan nga ginabuligan ni Jehova ang iya matutom nga mga alagad.
Makabatas Ka!
22, 23. Ano ang pat-od nga mabaton mo kon magbatas ka tubtob sa adlaw ni Jehova?
22 Mahimo nga indi matabo sa imo ang pila ka pagtilaw nga ginbinagbinag naton. Apang, husto ang mahinadlukon sa Dios nga si Job sang magsiling sia: “Ang tawo nga natawo sa babayi malip-ot sing mga adlaw, kag puno sang kagamo.” (Job 14:1) Ayhan isa ikaw ka ginikanan nga nagapanikasog gid nga tudluan ang imo mga anak sing mga prinsipio sang Biblia. Nagaatubang sila sing mga pagtilaw sa eskwelahan, apang malipayon ka gid kon manindugan sila sing malig-on para kay Jehova kag sa iya matarong nga mga prinsipio! Mahimo nga ginabudlayan ka man kag ginasulay sa inyo ulubrahan. Apang, ini kag ang iban pa nga mga kahimtangan sarang mabatas, kay ‘ang Ginoo, nagadala adlaw-adlaw sang aton lulan.’—Salmo 68:19.
23 Ayhan ginakabig mo ang imo kaugalingon subong isa ka ordinaryo lamang nga tawo, apang tandai nga indi gid pagkalipatan ni Jehova ang imo binuhatan kag ang gugma nga ginapakita mo para sa iya ngalan. (Hebreo 6:10) Paagi sa bulig niya, mabatas mo ang mga pagtilaw sa imo pagtuo. Gani, ilakip sa imo mga pangamuyo kag mga plano ang paghimo sa kabubut-on sang Dios. Nian, pat-od nga mabaton mo ang pagpakamaayo kag bulig ni Jehova kon magbatas ka tubtob sa adlaw ni Jehova.
Paano Mo Sabton?
• Ngaa kinahanglan magbatas ang mga Cristiano?
• Ano ang makabulig sa aton sa pagbatas kon may balatian kita kag kon mamatyan kita?
• Paano ang pangamuyo nagabulig sa aton sa pagbatas sa mga pagtilaw?
• Ngaa makabatas kita tubtob sa adlaw ni Jehova?
[Mga Pamangkot sa Pagtinuon]
[Piktyur sa pahina 29]
Ang pagsalig kay Jehova makabulig sa aton agod mabatas ang kasubo kon mamatyan kita
[Piktyur sa pahina 31]
Makabulig sa aton ang tinagipusuon nga pangamuyo agod mabatas ang mga pagtilaw sa pagtuo
