May Yara Ka Bala Di-mamalatyon nga Kalag?

Kita bala unod kag dugo lamang? Ukon may yara pa bala iban nga butang nga nagahuman sa aton magluwas sini? Ang aton bala kabuhi temporaryo lamang? Ukon may yara bala di-kitaon nga bahin sa aton lawas nga padayon nga nagakabuhi pagkapatay naton?

WALAY sapayan nga ang mga relihion sa bug-os nga kalibutan may yara madamo kag makapagumon nga mga pagpati tuhoy sa pihak nga kinabuhi, ang kalabanan nagaugyon sa isa ka pagpati: May yara isa ka butang sa sulod sang tawo ang di-mamalatyon kag padayon nga nagakabuhi pagkapatay niya. Nagapati ang madamo nga ini nga “butang” amo ang kalag. Ano naman ang imo pagpati? Ano ang kalag? May yara bala di-mamalatyon nga kalag ang tawo? Importante gid nga mahibaluan naton ang kamatuoran tuhoy sa kon ano gid kita!

“Ang Tawo Nanginbuhi nga Kalag”

Ang “kalag” bala isa ka bahin sang tawo nga nagataliwan sa lawas kag padayon nga nagakabuhi pagkapatay niya? Suno sa Holman Illustrated Bible Dictionary, “sa masami ang kalag amo ang tawo mismo.” Halimbawa, ang Genesis 2:7 nagasiling: “Ang GINOONG DIOS naghimo sang tawo gikan sa yab-ok sang duta, kag naghuyop sa iya ilong sang ginhawa sang kabuhi, kag ang tawo nanginbuhi nga kalag.” Ang nahauna nga tawo, nga si Adan, isa ka kalag.

Ini nga paghangop ginasakdag sang iban pa nga mga kasulatan. Halimbawa, mabasa naton sa Biblia nga ang kalag nagahimo sing buluhaton. (Levitico 23:30, NW) Ginasiling man nga ang kalag ginagamuhan, ginasakitan, ginalagas, ginalisang, kag ginahadlukan. (Hukom 16:16; Job 19:2, Salmo 7:5; Juan 12:27; Binuhatan 2:43) Sa pagpatuhoy sa kalag subong isa ka tawo, ang Roma 13:1 nagasiling: “Ang tagsa ka tawo [“kalag,” NW] magpasakup sa pagbulut-an nga nagadumala.” Kag aton mabasa sa 1 Pedro 3:20: “Sa mga adlaw ni Noe, . . . pila lamang tawo, kon sayoron, walo [“walo ka kalag,” NW] ang naluwas sa tubig.” Wala gid ginapakita sini nga mga kasulatan nga ang kalag isa ka di-pisikal nga lawas ukon porma nga padayon nga nagakabuhi pagkapatay sang isa.

Ano naman ang masiling sa mga sapat kag mga tanom? Mga kalag bala sila? Binagbinaga kon  paano ginalaragway sang Biblia ang pagtuga sa mga sapat. “Magpadagaya ang mga tubig sing buhi nga mga tinuga [“buhi nga mga kalag,” NW],” sugo sang Dios. Pagkadason nga adlaw sang pagpanuga, ang Dios nagsiling: “Magpatubo ang duta sing buhi nga mga tinuga [“buhi nga mga kalag,” NW] sono sa ila mga sari: kahayupan kag nagasaug nga mga butang kag kasapatan sang duta sono sa ila mga sari.” (Genesis 1:20, 24) Gani, ang tanan nga buhi nga mga tinuga—tawo man ukon sapat—mga kalag. Ang mga tanom wala ginapatuhuyan sa Biblia subong mga kalag.

Ang tinaga nga “kalag” ginagamit sa isa pa ka kahulugan. Aton mabasa sa Job 33:22: “Ang iya kalag nagapalapit sa Boho, kag ang iya kabuhi sa mga manuglaglag.” Ang mga tinaga nga “kalag” kag “kabuhi” ginagamit diri sa magkapareho nga kahulugan, kag ginapasangkad sang tinaga nga “kalag” ang kahulugan sang tinaga nga “kabuhi.” Kon amo, ang “kalag” mapatuhoy man sa kabuhi nga ginaagom sang isa subong buhi nga kalag, ukon tawo. Gani, ang mga kaaway ni Moises nga nagtinguha sa pagpatay sa iya ginalaragway sa Kasulatan subong “ang tanan nga nagatinguha sang imo kabuhi [“kalag,” NW].” (Exodo 4:19) Kag bahin kay Jesucristo, ang Biblia nagasiling: “Ang Anak sang tawo wala magkari nga alagdon kondi . . . sa paghatag sang iya kabuhi [kalag] nga gawad sang madamu.”—Mateo 20:28.

Ang kahulugan nga ginahatag sang Biblia sa tinaga nga “kalag” maathag kag nagahisantuanay. Mapatuhoy ini sa tawo ukon sa sapat ukon sa kabuhi nga ginaagom sang isa ka tinuga subong buhi nga kalag. Subong sang makita naton, ini nga paghangop nagahisanto sa ginasiling sang Biblia nga nagakatabo sa kalag sa kamatayon.

“Ang Kalag nga Nagapakasala Mapatay”

Ang Biblia nagasiling: “Ang kalag nga nagapakasala mapatay.” (Ezequiel 18:4) Ang nalisang nga si manalagna Elias “nagpangabay . . . nga ang iya kalag mapatay na kuntani.” (1 Hari 19:4, NW) Subong man, ang Santiago 5:20 nagasiling: “Ang nagapaliso sing makasasala gikan sa pagtalang sang iya paggawi magaluwas sang iya kalag gikan sa kamatayon.” Huo, ang kalag nagakapatay kon ang tawo mapatay; indi ini di-mamalatyon. Sanglit ang tawo amo mismo ang kalag, kon magsiling kita nga ang isa napatay, ang buot silingon naton amo nga ang iya kalag napatay.

Apang paano naman naton hangpon ang mga teksto sa Biblia nga nagasiling tuhoy sa pagtaliwan kag pagbalik sang kalag? Tuhoy sa natabo kay Raquel sang nagpanganak sia sing isa ka anak nga lalaki, ang Biblia nagsiling: “Sang nagtaliwan ang iya kalag (kay napatay sia), ginhingalanan niya sia Ben-oni; apang ginhingalanan sia sang iya amay Benjamen.” (Genesis 35:18) Kag tuhoy sa pagkabanhaw  sang anak nga lalaki sang isa ka balo nga babayi, ang 1 Hari 17:22 nagsiling: “Ginpamatian sang GINOO ang tingug ni Elias [sa pangamuyo], kag ang kalag sang bata nag-uli sa iya, kag naumpawan sia.” Ginapakita bala sini nga mga teksto nga ang kalag isa ka di-kitaon kag daw landong nga butang nga nagataliwan ukon nagasulod sa lawas?

Ti, dumduma nga ang isa ka kahulugan sang tinaga nga “kalag” amo ang “kabuhi.” Gani, ang buot silingon sang ekspresyon nga ang kalag ni Raquel nagtaliwan amo nga napatay sia. Sa katunayan, ginbadbad sang iban nga Biblia ang dinalan nga “nagtaliwan ang iya kalag” subong “tagumatayon na sia” (Maayong Balita nga Biblia). Sing kaanggid, sa bahin sang anak nga lalaki sang balo nga babayi, nabuhi liwat ang bata.—1 Hari 17:23.

Kon Ano Gid ang Tawo

Maathag nga ginapakita sang Biblia kon ano gid ang tawo. Wala sia sing kalag; sia mismo amo ang kalag. Bangod sini, ang paglaum sa palaabuton sang mga tawo nga napatay amo ang pagkabanhaw. Ang Biblia nagasaad: “Dili kamo matingala sini; kay ang takna magaabut nga ang tanan nga yara sa mga lulubngan magapamati sang iya tingug kag magagowa, ang mga nakahimo sing maayo, sa pagkabanhaw nga sa kabuhi, kag ang mga nakahimo sing malaut, sa pagkabanhaw nga sa paghukom.” (Juan 5:28, 29) Ang matuod nga paglaum sang mga tawo nga napatay napasad gid sa sining masaligan nga saad tuhoy sa pagkabanhaw kag indi sa panudlo tuhoy sa pagkadimamalatyon sang kalag.

Daw ano gid ka importante nga matigayon naton ang sibu nga ihibalo sa kon ano ang pagkabanhaw kag sa kon ano ang kahulugan sini para sa katawhan! Importante man ang ihibalo tuhoy sa Dios kag kay Cristo, kay nagsiling si Jesus sa iya pangamuyo: “Ini amo ang kabuhi nga walay katapusan, nga pagkilalahon ka nila nga ikaw lamang ang matuud nga Dios, kag ang imo ginpadala nga si Jesu-Cristo.” (Juan 17:3) Ang mga Saksi ni Jehova sa inyo lugar malipay gid sa pagbulig sa imo sa pagtuon sa Biblia agod madugangan ang imo ihibalo tuhoy sa Dios, sa iya Anak, kag sa Iya mga saad. Pakig-anguti ang mga Saksi ukon sulati ang mga manugbalhag sini nga magasin.

[Mga piktyur sa pahina 4]

Sila tanan mga kalag

[Credit Line]

Goat: CNPC—Centro Nacional de Pesquisa de Caprinos (Sobral, CE, Brasil)